珍煮丹銅鑼灣開業了 又一台灣人氣黑糖珍珠茶飲過江龍 (有片)
2018-08-03

又又又一間台灣開過嚟嘅黑糖珍珠奶茶飲店啦,又係開喺銅鑼灣喎,睇嚟呢區將會出現多條人龍喇。

今次嘅過江龍係主打黑糖類嘅珍煮丹。珍煮丹大約2010年已經喺台灣開始創立,算係比較早期嘅一批珍珠茶飲店,喺當地有超過25間分店,而香港就係佢哋第一間嘅海外分店。對比同類嘅黑糖珍珠茶飲,喺呢個打卡年代,佢哋喺造型方面明顯輸蝕,冇靚靚裝飾,亦冇掛杯效果,不過負責人就充滿信心咁話佢哋著重研製珍珠同黑糖,希望能以味道取勝。而且佢哋有得選擇飲品嘅甜度同冰量,自由度相對較大。

黑糖珍珠鮮奶係佢哋嘅經典招牌飲品,珍珠係用自家煮嘅,就連黑糖都係!黑糖係由佢哋台灣自家工廠生產,味道自行調校,係幾香嘅,但同時都幾~甜下。建議大家如果唔係甜魔,揀嘅時候可以揀半糖或者微糖。至於珍珠,軟身得嚟又幾有咬口,黑糖味突出。選用明治牛奶,但感覺冇台灣嗰邊嘅奶味咁濃,不過整體感覺都唔錯,飲之前記得要搖勻喎。

另一杯都好受歡迎嘅飲品係泰泰珍珠鮮拿鐵,即係泰式奶茶加黑糖珍珠啦,同樣都係建議揀半糖或者微糖,色水係幾靚,但茶味可以再濃啲。

宇治抹茶紅豆就係大家心目中嘅perfect match啦,煮過嘅紅豆甜度適中,幾綿密,應該係抹茶控嘅指定選擇。

如果想要清新少少嘅,可以考慮蜂蜜檸檬菊花茶同不知春茶。前者甜中帶酸,惜菊花味唔夠突出;而後者係台灣嘅青茶嚟,味道幾清香,茶味重,至於有幾澀,就要睇你揀嘅甜度而定喇,無糖或微糖就相對澀啲咯。

香港menu比台灣嘅少咗啲啲選擇,但依然有黑糖奶香類、純茶類、新茶道類、濃純拿鐵類、手作果茶類、台式古早類同愛戀檸檬類揀,奶蓋類就遲下都會有得飲。

負責人表示,Menu、配方、製作過程、份量都同台灣一樣,除咗牛奶之外,其餘全部材料都係由台灣直接送運過嚟,希望可以將店家傳統研發嘅味道帶到過嚟香港。開店初期,仲會有幾名台灣店員助陣。



珍煮丹
地址:銅鑼灣利園山道15號地舖


文、相:Kar


關鍵字
銅鑼灣
過江龍
台灣
茶飲
黑糖珍珠
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
幸福Pancake登陸銅鑼灣!鬆軟原味、開幕限定抹茶味(有片)
2018-09-24
地獄廚神Gordon Ramsay 尖咀再開分店 無敵海景伴威靈頓牛扒
5天前
9月份好評餐廳十強
2018-10-08
濃而不膩!太子芝士麵專門店 必試芝士撈+咖哩撈+叻沙(有片)
2018-10-05
張敬軒餐廳新推皇后下午茶 紅絲絨盒珍珠鍊造型激真
5天前