父親節就嚟到喇！各位孝順仔女又係時候計劃下父親節大餐食咩好～今期開飯仔搜羅咗4間餐廳畀大家，分別係日式早午餐、扒房三道菜午市套餐、限定下午茶同招牌斧頭扒晚宴，無論咩時間慶祝都冇問題，一日食幾餐都仲得～

目錄

早午餐：日式美食之旅 Zuma

揀食日本菜就係最安全嘅選擇～呢間餐廳喺6月17日和18日特別推出父親節週末早午餐，包括辣豆腐配牛油果沙律、蝦及蔬菜天婦羅、海鹽雞翼、豬肉餃子配辣和風汁及廚師精選壽司刺身拼盤。最焦點當然係主菜炭燒A5級日本和牛肉眼扒，搭配新鮮山葵、脆蒜片同特製醬汁，牛味香濃油脂又豐富。其他主菜仲有蒜香牛油烤龍蝦、炭烤西班牙黑毛豬肋眼伴柚子松露汁等，一樣咁出色，最後以甜點拼盤作結先完美，讓父親一早就有個Good morning！

供應時間：2023年６月17日及18日上午11時開始

午餐：18安士頂級燒牛肉 Morton's of Chicago 

如果爸爸鍾意鋸扒嘅就啱晒啦，lunchtime就帶佢去鋸！呢間酒店內嘅西餐廳，推出父親節限定午市套餐，主打優質18安士頂級燒牛肉，仲可以邊食邊睇維港美景，爸爸又點會唔開心呢～三道菜午市套餐以頭盤凱撒沙律、Morton’s 精選沙律、焗洋蔥湯或龍蝦湯掀開序幕。主菜包括重點推介嘅18安士頂級燒牛肉，香氣撲鼻肉味突出；焗亞歷山大珍寶蝦都鮮味滿滿，配菜可選芝士松露炸薯條、薯蓉、香炒原粒蘑菇或忌廉菠菜。甜品都好多選擇包括藍莓紐約芝士餅、法式焦糖布甸及香濃朱古力慕絲，爸爸一定滿意。

供應時間：6月17日及18日

下午茶：父親節限定「初夏茶語下午茶」   樂聚廊 

食靚靚下午茶唔一定係女人嘅專利㗎，一於襯父親節帶爸爸去體驗下！呢個下午茶專為各位爸爸而設，糅合綠茶、泡菜、韓國牛肉、柚子等韓食元素製作，例如有綠茶雞蛋軟包三文治、韓式牛肉卷、泡菜芝士飯餅，直情令爸爸一秒變oppa。甜品亦係特別為各位父親大人度身訂造呢，推介威士忌朱古力杏仁脆餅同咖啡閃電泡芙。

供應時間: 6月18日 (星期日) ，下午3時至6時

晚餐：招牌斧頭扒晚宴 Flint  

如果爸爸鍾意食肉嘅可以帶佢去呢間餐廳試埋斧頭扒四道菜晚餐，有得自選頭盤同湯品，再嚟就係份量十足嘅澳洲Stockyard安格斯斧頭扒，烤得恰到好處，切開係鮮嫩嘅粉紅色，好多汁而且肉味濃郁。另有美國USDA內布拉斯加州肉眼扒、香烤羊架配椰菜卷及香烤西班牙黑毛豬配南瓜粉團等選擇，總有一款啱心水！

供應時間：2023年6月17日至18日，晚上6時至10時．須於3天前預訂

文: Yanica