烏冬控集合!嚴選4大高質烏冬店
2021-11-26

香港地唔少人都係烏冬控,好多人都鍾意佢粗身嘅麵質、獨特嘅口感同有一種淡淡嘅麵粉香~烏冬唔同嘅製法同配搭例如炒同配湯都可以有唔同味道,今次介紹四間香港嘅烏冬店畀大家,每間都令人有驚喜,烏冬愛好者一定要mark低逐間去呀。


高質自製烏冬店 鰹烏冬

烏冬控應該對呢間日式烏冬專門店唔陌生!餐廳喺觀塘起家,而家喺長沙灣同佐敦區都有開分店,店主十年間先後去過以烏冬聞名嘅日本香川縣四次拜師學藝,了解讚岐烏冬嘅歷史同正宗嘅製作方法。烏冬以日本小麥粉混合鹽水製成,麵質粗身彈牙,帶有麥香,如果想感受返麵條本身嘅香氣,建議大家食冷烏冬。而熱湯烏冬嘅湯底就以鰹魚乾同昆布等熬成,味道清得嚟都好夠味。配料方面就有關東煮蘿、味噌焗鯖魚、骨付雞、金菇牛肉卷同天婦羅,喺度食烏冬真係好似返咗鄉下咁~

圖: nocarbs_nolife


黑松露忌廉湯底 八沢

嚟得呢間日本菜,必試一定係招牌黑松露忌廉湯底海鮮烏冬。湯底有滿滿嘅黑松露,一啲都無手軟,配埋充滿奶香嘅忌廉湯真係好濃郁,出色位係雖然好濃厚,但又唔會太鹹同太膩,飲晒成碗湯都無問題,烏冬都滑溜彈牙又掛湯!唔想咁重口味嘅,廣島蠔肉碎烏冬同黑蒜灸燒極濃黑豚肉烏冬都值得一試,前者湯底充滿蠔嘅鮮味,每隻蠔都大大隻無腥味,食落感覺就輕盈啲;後者蒜味好香濃,黑豚肉脂肪同瘦肉比例啱啱好,入口有微微溶化嘅感覺。不過要提提大家,銅鑼灣分店最近轉咗賣泰國菜,想食烏冬要去筲箕灣、將軍澳同杏花村分店。

圖: ki918iameatproduct


全新fusion烏冬店 The Big Things Noodles

尖沙咀呢間全新嘅麵食專門店就主打亞洲風味日式麵食,以創新配搭融入傳統菜式,選擇唔係太多,但勝在款款都有特色~人氣北海道海膽稻庭烏冬,選用北海道海膽同忌廉製成海膽忌廉醬,啖啖都係濃郁海膽味,加埋黑白芝麻同大大粒新鮮三文魚籽口感更豐富~要再fusion啲嘅,可以試埋四川麻辣豆腐稻庭烏冬,放上粒粒脆豆腐,自家製麻辣醬汁同四川辣椒乾辣度十足,同烏冬又幾夾!

圖: lazybo.w


招牌石鍋烏冬 萬豚屋

呢間烏冬小店喺尖沙咀都有幾多年歷史,主打石鍋烏冬,呢排天氣開始轉涼,食完一碗熱辣辣嘅石鍋烏冬真係會暖晒!烏冬係手打烏冬,煙韌彈牙。湯底方面有五款,最推薦係香菌濃湯,菇味好突出之餘仲會加入一大羹黑松露,味道層次即刻提升咗~食得辣嘅朋友可以試埋香辣麵豉同香辣咖喱湯底~配料方面推介厚切豚肉同自家製吉列芝士豬扒,厚切豚肉肥瘦適中啖啖肉,後者外層香脆加上流心之選,邪惡都要食!

圖: Ericasy




文: Yanica

關鍵字
日本菜
烏冬
麵食
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2021生日優惠】持續更新! 12月壽星免費釣蝦 韓燒放題/浪漫西餐低至半價
2021-11-29
【隨時更新】零食速報 每周新款零食、酒品點評
2天前
【2021聖誕】即開生蠔任食!9 間聖誕自助餐精選
2021-11-29
烏冬控集合!嚴選4大高質烏冬店
2021-11-26
【2021聖誕】甜蜜蜜冬日!6大聖誕節下午茶精選
2021-11-22