港島酒鬼新蒲點 西營盤酒吧餐廳全港首設Cocktail on tap(有片)
2018-08-30

On tap 嘅手工啤酒就飲得多,咁on tap嘅cocktail呢?由台灣開過嚟嘅掌門精釀啤酒,最近喺西營盤開多間分店,設咗36個tap頭,其中5個就係全港首次出現嘅cocktails on tap啦。呢間分店比尖沙咀嗰間,亦多咗好多嘢食,仲有唔少係以啤酒入饌添~ 以後港島嘅酒迷就多多個蒲點啦。

掌門常客對佢哋嘅得獎啤酒「Professor X」應該唔會陌生,酒體醇厚,麥芽、朱古力同咖啡味香,今次新餐廳就用咗呢隻酒嚟整burger同tiramisu喇。先講burger,肉扒醃製時加埋professor X 落去,令到塊扒喺無論顏色、肉汁定係味道上,都再多多層酒色酒香。建議叫多杯professor X,一啖burger一啖酒,香氣縈繞更耐。

至於tiramisu則係開飯仔最推介嘅甜品,用Professor X取代咖啡,但不減咖啡香之餘,仲突出到酒嘅醇香。

No.53 pizza係另一道用啤酒去整嘅嘢食。選用小麥啤去搓個pizza餅底,焗出嚟嘅口感更加香脆鬆化,面層舖上台灣小食如飛魚子腸、竹筍、甜辣醬等,香香辣辣咁好有台灣風味。

香煎啤酒帶子就用咗酸啤「酸酸」去醃製,烹煮嗰陣又再倒多次酒去提鮮,就好似平時落檸檬嘅作用一樣,而且仲多咗啲橘香,好清新。

好啦,講酒鬼最期待嘅酒啦。頭先講過,餐廳有36個tap頭,咁大部分當然係做返台灣直送嘅手工啤酒啦,平時你哋飲開嘅double IPA呀、前進都柏林呀嗰啲梗有啦,要特別介紹下嘅係一款叫「高街53」嘅新酒款,一聽個名就知係為今次新店而設㗎啦~ 係一款好清新好香嘅IPA嚟,柳橙同柑橘味突出,比一般IPA更易入口。

重點嚟啦,Cocktail on tap!歐美等國已經流行咗一段時間,而香港則係第一次出現。調酒師預先調好cocktail之後,就放入tap頭,用氮氣或者二氧化碳將酒從桶中推出嚟。暫時on tap嘅有5款,分別都用咗啲台灣常見飲料去調製。

例如「寶島翡翠」就係用班蘭葉、椰子汁,同埋台灣出產嘅高粱酒去調製,未飲已經聞到超強嘅米香味,飲落微甜。

藍色嗰杯同樣有用到高粱,另外仲有爆谷、藍橙糖漿同梳打水,調製出味道偏甜而酒味唔太重嘅「藍色天使」;紅色嗰杯「鐵娘子」就係gin酒加玫瑰、檸檬汁、青檸汁,仲有些少鹽。

掌門精釀啤酒
地址:西環西營盤高街53-65號地下富裕大廈地庫

文、相:Kar


關鍵字
西營盤
手工啤酒
cocktail
漢堡
台灣
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2021-05-03
【2021生日優惠】持續更新!5月食日本直送海鮮送西班牙紅/白酒
6天前
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15