而家做餐廳的確幾難，炮製嘅食物除咗要滿足客人嘅味覺，仲要講求視覺效果！位於將軍澳嘅呢間日菜餐廳最近玩新意，每個月會安排一日舉行藍鰭吞拿魚放題，由餐廳嘅日籍師傅即場切開重約75公斤嘅藍鰭吞拿魚，非常澎湃，速睇有乜好食先！
先介紹番呢個任食藍鰭吞拿魚有咩食，一個價錢包枝豆、豆腐野菜沙律、10款刺身壽司、金菇炒牛肉、田園炒野菜、炸物、鍋物以及甜品雪糕。
主角當然係即切即食嘅吞拿魚刺身啦！呢條可持續發展嘅藍鰭吞拿魚來自日本鹿兒島，重約75公斤，非常有「分量」。解魚表演一開始，不只餐廳客人舉機影相、睇片，連經過見到嘅途人都停晒喺度觀賞。
吞拿魚最常食到嘅部位有赤身、大拖羅及中拖羅，香港人就最鍾意（右）大拖羅，油脂感甚香，入口即融，開飯仔亦非常喜愛；日本人就偏愛赤身，雖然無咁有油香，但口感較輕盈，又同樣嚐到入口即融嘅感覺。
大廚會用匙羹將靠近魚骨嘅吞拿魚肉刮出，然後剁成吞拿魚蓉，加少許蔥花，就做成吞拿魚蓉壽司。
美人鍋入面有一隻雞腿肉，再加冬菇、豆腐、娃娃菜等配料，豐富而不太油膩。
炸物有蝦、冬菇等雜錦天婦羅，以及經鐵板煎香嘅鐵板豆腐，外面帶點香脆，豆腐依然嫩滑。
除咗拖羅之外，仲有腦天、臉頰肉、下巴等分量極少嘅吞拿魚部位，不過就要額外加錢先食到，價錢為$280/兩片。
鮪魚盛宴
價錢：$428/位
供應時間：每月一次，視乎漁量而定，須留意漁釧Facebook專頁的更新。
漁釧
地址：將軍澳唐德街9號將軍澳中心地下G89號舖
文：Joy