楊明夥拍朋友開燉湯店 為都市人原盅燉無味精靚湯(有片)
2019-01-28

香港人不嬲都係「唔洗急最緊要快」,生活壓力大但又無時間花幾個鐘頭燉返碗靚湯滋補下,藝人楊明同樣都有咁嘅諗法,所以同朋友余先生一齊開設專賣中式燉湯嘅餐廳。餐廳三大堅持:唔加味精或雞粉、每天新鮮原盅燉製,同真材實料。難怪荔枝角總店開張一年唔到,就喺北角再開分店!
 

熱賣燉湯推介


藝人楊明同鍾意下廚嘅朋友余先生一拍即合,開設燉湯店為大家帶嚟滋補燉湯

總店位於荔枝角工業大廈地舖,係附近唔少上班一族嘅最愛餐廳之一。品牌主打滋補燉湯,原來因為老闆之一楊明諗到其實有唔少人鍾意飲湯,但礙於無時間,或者唔識自己煲,咁不如開一間燉湯店,幫都市人慳返啲時間同功夫,用相宜價錢就享受到一碗足料燉湯。開業後睇返街坊反應,令佢地更確認香港人喺長時間工作後,可以飲返碗燉湯滋潤下係一件好事。
 


花膠螺片燉雞($68)

品牌現時有12款常設燉湯,同一款期間限定燉湯,當中楊明自己最鍾意嘅係花膠螺片燉雞。因為藝人工作日夜顛倒,不時都要熬夜,飲返啖用花膠熬足四個鐘,充滿膠質嘅燉湯感覺都滋潤啲。而且雞湯味道亦比較容易入口。呢款亦係唔少女士嘅首選,除咗花膠養顏之外,其他湯料好似瑤柱、紅棗、瘦肉等都帶甜味,仲有潤肺補氣嘅功效。
 


泰國原個椰皇燉雞($58)

店家另一款人氣就係呢個原個泰國椰皇上枱嘅燉雞湯,根據老闆余先生所講,呢個泰國進口椰皇嘅椰皇水比較香甜,燉煮過後同雞湯味道最夾,加上用金華火腿帶起鮮味。湯頭清澈,有潤肺清熱之效,亦係楊明嘅冬天湯水推介。
 

時令燉湯介紹


天麻川芎白芷燉魚頭($68)

根據唔同季節,佢地亦會推出唔同時令湯水,好似之前夏天曾經推出冬瓜盅、杏汁燉豬肺等,最近冬天就有幫大家驅走風寒嘅天麻川芎白芷燉魚頭,有補腦活血、健腦散寒嘅功效,有頭痛困擾嘅朋友不妨一試。雖然打開燉盅聞落藥材味比較重,不過勝在毫無魚腥味,趁熱飲最暖身。
 

更多【明星訪問】:
1. 志雲開飯局 素食餐廳新出「鰻魚煲仔飯」
2. 新推限量海膽魯肉飯 傅珮嘉赴台學茶 加賣tea espresso
3. 黃長興開法日越Fusion菜餐廳 招牌香茅椰奶煮青口

 
足料炮製之選


澳洲野生黑邊鮑魚燉雞($78)

所有原盅燉湯用燉煮最少四個鐘,而且選料認真,好似呢盅特別選擇原隻澳洲野生黑邊鮑魚,係經過余先生反覆試驗,認為無論功效同鮮味都比鮮鮑魚或其他鮑魚為佳,配以藥材、瑤柱、杞子、桂圓等。因為所有店家所有出品都唔加味精同雞粉,可以自己加少少鹽帶起鮮甜味,有滋陰養肝之效。
 


原隻燜冬菇花膠(約8頭 特價$99)

而店家所有花膠都係選用非洲鱸魚花膠,貪其膠質重、夠厚身、口感滑,功效好啲,骨膠原含量亦比較多。呢碟用嘅原件花膠浸發同煮需時兩日,完全係心機菜。加上用金華火腿、乾瑤柱等熬汁再燜煮,醬汁香濃入味。


除咗燉湯,店家亦供應燉甜品、蒸飯、客飯、點心同涼茶。燉甜品廣受OL歡迎,而蒸飯更係冬天熱賣,編輯下晝三點到店採訪嘅時候已經售罄。證明無論係街坊定上班族都認同店家嘅養生慢活理念,以後想飲返盅滋補靚湯就多個選擇啦。
 








荔枝角總店:荔枝角長義街10號昌隆工業大廈地下3A2號舖
北角新店:北角英皇道177-191A號利都樓地下D號舖




文:Cathy
相、片:Tom Li

關鍵字
荔枝角
北角
燉湯
開飯星探
明星
楊明
花膠螺片燉雞
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
楊明夥拍朋友開燉湯店 為都市人原盅燉無味精靚湯(有片)
2019-01-28
銅鑼灣燒肉店2、3月限定 任食日本A4黑毛和牛及燒蠔
2019-02-04
1月份好評餐廳十強
7天前
20CM長MEGA版玉子燒!深水埗家庭式經營日式小食店
2019-01-23
快速慢食!Outback姊妹品牌登陸葵芳 和牛西冷、煙肉大爆炸芝牛肉漢堡
2019-02-01