最新台灣過江龍超吸引 海量芋圓珍珠奶茶
2018-07-04

雖然近期已經有好多間台灣茶飲店過嚟香港開店,但係當你見到呢間嘅招牌飲品啲珍珠同芋圓多到咁嘅時候,咪又係會繼續尖叫同排隊~

話說呢間茶飲店喺台灣有兩間分店,香港係第一間海外分店。同台灣本店一樣,都係有純茶、口感、果茶、奶茶、latte同鮮奶等類別嘅選擇,另外仲多咗「芝士奶蓋」揀添呀,台灣冇㗎!不過講到最最最吸引,點都一定係要介紹咗招牌Q罩杯先。

Q罩杯同鮮奶同伯爵茶做底,杯入面有海量嘅珍珠同芋圓,根據開飯仔目測,睇住店員一匙一匙咁嗶落去,一啲都唔孤寒,珍珠、芋圓應該大約有成三分一杯咁多呀,所以吸極都有!珍珠口感煙韌,芋圓亦有咬口,留心食仲真係食到芋頭味同蕃薯味添,心心眼。不過留意返,真實飲用版啲珍珠芋圓會喺底㗎(但可以放心啲珍珠同芋圓份量一樣都係咁多),如果想要好似呢杯咁嘅樣用嚟打個靚卡,要落單前同店員講定啊。

呢杯黑布蕾奶茶都值得留意下,喺開業初期暫定每日限量大約15杯咋!黑布蕾即係黑芝麻布甸,每日新鮮製作嘅。一啜就啜到佢上嚟,滑得嚟仲真係有粒粒芝麻嘅口感,味道香濃。

得香港店先有嘅芝士奶蓋系列,茶底所有嘅茶葉都係嚟自台灣,好似皇家奶蓋紅茶咁,就係用皇家伯爵茶做底,茶香較重而不澀,奶蓋泡沫層綿密,淡淡芝士鹹香飄出。

雖然台灣都有拿鐵系列,但宇治抹茶拿鐵就得香港先有。珍珠芋圓黑布蕾全部都有得加,加錢就有。不過抹茶當然就係加配返老拍檔紅豆最夾啦~

 黑糖奶霸


恰迷紅茶
地址:荔枝角長沙灣道883號億利工業中心地下1D號舖
開業日期:7月6日

文、相:Kar

關鍵字
荔枝角
芋圓
珍珠
台式茶飲
珍珠奶茶
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06