日本神級燒肉店中環開業 午市食A5和牛五大部位
2018-06-02

日式燒肉迷一定要識來自東京嘅焼肉ジャンボ(Yakiniku Jumbo),開業三十年,現時有兩間直營店。長年高居日本食評網三甲位置,引入全國不同產地和牛之稀有部位,加上自家創製的醃肉醬汁,被譽為東京燒肉店的始祖。首間海外店選址香港,而且忠於原著,牛肉、醬汁以及烤爐都同日本一樣!



位於中環萬宜大廈,有別於一般燒肉店,樓底高格局開揚。烤爐抽風好,唔怕食到一身燒肉味!



開業初期,日本社長兼總廚南原範充亦駐場監督,確保質素。香港店亦由日本廚師主理,亦曾到總店受訓。



所有牛肉都係冰鮮而非雪藏貨,由總廚親自於日本搜購再每周運抵香港,而且全部手切。唔一般燒肉店只取某一個縣牛肉,但Yakiniku Jumbo每一個部位都會揀全國最靚產地出品,更會不時轉換,可能來自鹿兒島、櫪木縣等不定。除咗側橫腹肌(skirt)及牛舌來自澳洲,其他全為日本和牛。


另一靈魂係醃肉醬汁,日本多間著名燒肉店都係由Yakiniku Jumbo供應!醬汁由日本運來,於上枱前輕輕醃製數分鐘就得,帶少許果香及微酸,可以中和和牛油膩感,又唔會喧賓奪主。


晚市有套餐及散叫,有十幾款稀有部位可選,而且更有特別命名。如Zabuton位肩位、Mizuji就係前腿腹肉、Ichibo則係盤骨附近臀肉,非常刁鑽,油花、肉味亦各有特色,燒烤時間要因應部位調節,侍應會教你大約燒幾多秒就ok。



採訪當日和牛來自櫪木縣,每個部位滿佈均勻油花,入口油香重亦富牛肉甜味。個人比較鍾意平衡Misuji,食時可以再點少少酸汁或特製醬油,帶出層次。

(左)Kalbi肋肉、(右)Uchimomo大腿內側



招牌作不得不提野原燒,切得極薄西冷位,由專人代燒,每邊略燒十秒左右,油花多到火光熊熊,生熟度剛好,肉質柔軟又肥美甘香,再配上九州生雞蛋黃同吃,似食緊壽喜燒。


推介食午餐,價錢比晚市更抵,$498已經可食到五款招牌部位一共7塊,而$598更包埋野原燒。另亦有熟食、吉列牛等十幾款選擇,最平九州產雞肉烏冬套餐由$150起。



Yakiniku Jumbo

地址:中環德輔道中60-68號萬宜大廈3樓302號舖


文、相、片:Perrins

關鍵字
燒肉
日式燒肉
燒烤
和牛
東京
Jumbo
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
全港首間牛角Buffet旺角登場 全日任燒任食和牛(有片)
2018-05-28
台灣排隊三個鐘!虎紋黑糖波霸鮮奶抵港(有片)
2018-05-30
5月份好評餐廳十強
2018-06-08
多倫多知名越式Pho店 銅鑼灣插旗
2018-05-29
日本神級燒肉店中環開業 午市食A5和牛五大部位
2018-06-02