日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18

呢間來自京都嘅過江龍吉列牛排店京都勝牛早喺2019年已經宣佈會登陸香港,等咗一年半,餐廳終於正式抵港,於銅鑼灣開設香港首間分店!京都勝牛2014 於日本關西京都發跡,喺日本超過50間分店,係日本市場佔有率第一嘅吉列牛排店,早前亦於韓國、台灣等地開設分店。招牌吉列牛排沿用「黃金六十秒」快炸秘方,牛排外層酥脆肉質依然鮮嫩!香港店聽日正式開業。


京都勝牛三味套餐($218 )

香港店所有吉列牛排,將沿用總店做法、牛種及部位,裹漿採用日本技術乾麵包糠、麵粉、雞蛋製作並按照指定黃金比例調配,牛扒以攝氏190 高溫炸至金黃酥脆,上枱時保持完美三分熟,食落酥脆輕盈,食多兩舊都唔會咁易膩。


招牌京都勝牛三味套餐啱晒牛魔王,包含炸翼板、菲力及薄片醬味牛,可以嚐盡三款唔同嘅牛排口感,亦會供應九款唔同調味及醬料畀大家配搭。推介翼板牛可配綠芥末;菲力可蘸咖哩醬食,而薄切牛肉同日式溫泉蛋食就最夾!而且怕有客人口味唔同,更特意另設燒爐畀大家自行燒至鍾意嘅熟成程度,好貼心~所有套餐均隨餐送上麥飯、椰菜沙律及味噌湯。


M9 和牛丼伴溫泉蛋($198)

注重健康嘅人士如果唔想食油炸品,可以試呢個M9 和牛丼伴溫泉蛋。選用 M9 澳洲牛肉,油花分佈均勻富嚼勁, 肉香濃厚,配埋流心蛋黃簡直一流~呢個餐每日限量供應,想食要早啲去呀。


東京風牛排鍋膳套餐($138)

鍾意鹹甜鹹甜嘅滋味,就一定唔可以錯過東京風牛排鍋膳套餐!坊間都係見到日式滑蛋豬扒多,配牛真係比較少見。餐廳更用上罕有嘅牛肩胛芯,每隻牛身上只有三至四公斤,油花均勻細緻,先將牛肩胛芯炸過再加上醬汁同煮,入口爽腍,配埋滑蛋汁及甜甜嘅洋蔥醬,送飯一流!


更多【新店直擊】:
1. 楚撚記新line!荃灣新開餃子店 必試黑松露什菌餃+香煎潮汕韭菜粿
2. Burger Joys副線!荃灣新開平民漢堡外賣店 $48安格斯手打牛肉漢堡
3. 感受韓國居酒屋氣氛!中環蘇豪新開韓式Sool-Jip 招牌拉絲甜辣燉排骨


霙花豬里脊豬排套餐($148)

唔食牛嘅朋友都有豬及各類海鮮選擇,霙花豬里脊豬排套餐可配上椪柑醋醬一齊食,酸酸地好解膩,而特製嘅芝麻豬扒醬一樣香濃惹味。


炸三文魚柳套餐($148)

炸三文魚柳呈粉橙色,熟成程度啱啱好,點自製他他醬及蘿蔔蓉食,清新不油膩。


麻糬雪糕糯米糍

食完炸物,當然要食返個甜品中和吓,呢個麻糬雪糕糯米糍係綠茶口味,麻糬外皮煙韌,綠茶雪糕香甜回甘。


京都勝牛

地址: 銅鑼灣謝斐道535號Tower 535地庫B01號舖





文: Yanica

相: Tom Li


關鍵字
銅鑼灣
過江龍
吉列牛排
日本菜
新店預告
走在最前線,為大家搜羅及報道有關即將開張的話題新餐廳資訊。
餐廳資料
本月熱門
【隨時更新】零食速報 每周新款零食、酒品點評
1天前
情人節愛意滿瀉 甜蜜蜜堂食/外賣下午茶推介
2021-02-01
日本吉列牛排店京都勝牛進駐銅鑼灣 黃金六十秒炸法 推介京都勝牛三味套餐
2021-02-18
楚撚記新line!荃灣新開餃子店 必試黑松露什菌餃+香煎潮汕韭菜粿
2021-02-10
1月份好評餐廳十強
2021-02-09