香港嘅Cafe越開越多唔同種類，西營盤呢間新店就可以話係療癒風：簡約溫馨嘅木系裝修，可以放鬆嘅榻榻米坐位，家庭式食堂Feel嘅定食，手工製作嘅甜點等等。
日常位於西營盤第二街，由兩母女主理，希望喺而家氣氛低沉嘅社會當中，提醒大家日常其實可以回歸簡單，因此選擇喺西營盤呢個有人情味嘅舊區開店。Lunch Time主打日式定食，另有多款甜點同飲品選擇，店主都透露希望之後可以推出素食Menu！
免治雞肉軟骨串配茶漬飯定食（$138）
試業期間約兩三個禮拜就會轉一次定食款式，當中以呢個茶漬飯定食較受歡迎，有沙律、免治雞肉軟骨串、日本鯖魚、茶漬飯。沙律簡單以胡麻醬提味，清爽醒胃。免治雞肉軟骨串調味得宜，雞肉混入一粒粒軟骨增加咬口。
茶漬飯嘅湯係店主用玄米茶加自家高湯調配而成，入口以鰹魚乾嘅鮮味為主，後韻係茶嘅清香。飽滿彈牙嘅珍珠米飯上面加咗明太子醬，微微辛辣可以帶起湯底香味。煎日本鯖魚肉質嫩滑，食落魚油香味突出，完全唔腥，食到一半可以按喜好點蛋黃醬或者加檸檬汁換個口味。提提大家鯖魚比較多骨，不過都係大嘅斜骨，小心挑走就無問題啦。
柚子芝士卷蛋（$50）
自家烘焙嘅卷蛋每日會有兩至三款口味選擇，採訪當日就有焙茶卷蛋（$48）同柚子芝士卷蛋。柚子芝士口味用咗Cream Cheese混合柚子果醬製作酸酸甜甜嘅忌廉內餡，外層嘅蛋糕亦有加入柚子皮提升香氣，最後加上忌廉、橙乾同柚子皮裝飾。忌廉嘅柚子味最明顯，蛋糕香味較淡但勝在口感濕潤鬆軟，整體味道清新、甜而不膩。
牛角窩夫配抹茶麻糬及豆腐雪糕（$52）
近年大熱嘅牛角窩夫通常都係配雜莓或者雲呢拿雪糕，呢度嘅店主想配合返Cafe嘅日系風格，就選擇搭自家製抹茶麻糬。牛角窩夫口感酥脆唔過硬，配煙韌嘅麻糬估唔到又幾夾，麻糬仲灑上日本抹茶粉，同有黃豆香嘅豆腐雪糕加埋一齊的確幾有日式風格。
更多【新店直擊】： |
柚子氣泡咖啡（$48）
特飲亦有水準，咖啡選用偏堅果風味嘅意大利豆，味道香醇唔太酸。呢份柚子氣泡咖啡以柚子醬配Tonic Water，再畀客人倒入濃縮咖啡，可以自己控制濃度。咖啡烘焙香氣濃郁，加上柚子同Tonic Water嘅天然甜味同氣泡感，清爽消暑。
手作巧克力（$48）
朱古力亦落足心思，店主用70%朱古力粉先煮成醬，相比起直接沖泡，朱古力醬唔單止更濃郁同帶出可可香，口感亦會更厚滑！飲落果然有香濃朱古力味，加上牛奶嘅甜味平衡啱啱好，厚身得嚟又順喉。
日常
地址：西環西營盤第二街128號海昇大廈第二座地下H號舖
文、相：Cathy.H