拉麵店轉型開居酒屋 抵食北海道家庭鄉土料理
2018-06-19

呢間日本拉麵店喺香港已有一段時間,今次開居酒屋新line,主打一系列北海道家庭及鄉土料理,最新分店位於九龍灣淘大商場,定位親民,大部份菜式都係幾十蚊,好適合住喺附近嘅街坊!


居酒屋餐牌以送酒小吃、家庭料理為主,刺身類就較少,不過都有唔少海鮮菜式,當中必吃係天然火山石清酒煮花蛤($68),選用北海道產名酒國士無雙製作,而且即席喺你面前煮,將清酒倒入石鍋中,煮三分鐘就食得!



花蛤係本地新鮮貨,雖然較細隻但都幾鮮甜,而且酒味好濃郁吓。火山石喺度,保持熱騰騰溫度,當然要趁熱食先至最好食啦。



另一款時令推介係原隻燒北寄貝($48),同樣係用上國士無雙煮製,原隻連殼北寄貝有清酒及牛油吊味,味道爽甜,貝肉亦厚身爽口。


另外仲有一系列送酒小食,好似大廚自創海老芝士脆脆($48),餃子皮製成三角型,包住蝦膠同芝士炸香,加埋酸甜醬汁好醒胃。



仲有好香口嘅醬油川海老($35),河蝦炸到脆卜卜,帶微甜醬油味,送酒一流,唔覺唔覺就會掃晒成碟。


送酒當然唔少得串燒,紫皮甜薯食得多,呢度有更香甜嘅栗子薯,同樣好易食唔停口。自製雞肉捧亦都好香口,如果更加焦香就好喇。

燒栗子薯、秋葵 $28,燒免治雞捧串 $42


唔夠飽?食啲飯啦!平時日本人節慶先食嘅惠方卷,呢度一年四季都有供應,餡料有吉列蝦、蟹椰、青瓜、甜蛋等,口感好豐富。又或者試試十勝好出名嘅醬燒豚丼,用日本黑毛豬製作,豬肉唔鞋口而且醬汁好香甜。

海老惠方卷 $68

醬燒豚丼 $68


酒類可以青梅醋清酒,酒味好輕,飲落有清新梅香,一大壺都係$38,好抵飲!不過想酒精度更濃就要點其他清酒或者燒酒喇。



Domon居酒屋









關鍵字
日本菜
居酒屋
九龍灣
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
1天前
【隨時更新】零食速報 每周新款零食、酒品點評
2天前
甜蜜蜜暑假 7月下午茶推介
2020-07-03
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22
【7月生日優惠】免費食酒店晚餐.免費粥底火鍋
2020-07-02