女士概念餐廳屯門新店 嘆自主三層架+Nissei軟雪糕(有片)
2018-07-11

呢間以Girl Boss概念為主嘅Fusion餐廳最近去到屯門開分店,保留粉紅色主題裝修,繼續供應可以自己任意配搭嘅三層架Set,而且仲新增咗唔少用Superfood入饌嘅美食,仲有一系列外賣創意飲品同日本Nissei軟雪糕,畀各位Girl Boss更多選擇!
 

新出美食+消暑推介


脆炸虎蝦.炸魷魚圈.紫薯片($78)

Girlboss by Master Kama屯門店新加咗唔少選擇,包括呢個最啱開心Sharing嘅炸物拼盤,虎蝦同魷魚圈都相當香口彈牙,點辣他他醬更惹味。而紫薯片更加係新鮮人手切片,加埋蕃茄莎莎一齊食味道清新。
 


煎蛋芝士牛肉漢堡窩夫($98)

將麵包換成比利時直送嘅列日窩夫,窩夫微甜紮實,配埋誘人嘅半熟煎蛋同Juicy牛肉漢堡扒,口感同味道都同一般漢堡唔同。配埋雙色薯條,相當滿足。
 


Superwoman(堂食$58)(外賣$38)

夏日炎炎,食飯當然唔少得一杯冰涼特飲!顏色非常Sharp嘅Superwoman其實係用火龍果打成,甜味自然唔過膩,加埋星球蒟蒻,影相呃到Like兼幫大家消暑呀。
 


Queen Cheese Milktea(外賣$38)(堂食$48)

餐廳除咗堂食之外,其實亦有外賣閣方便大家買杯特飲邊行邊飲。呢杯芝士奶茶嘅奶蓋有相當香嘅牛奶味,再加白朱古力Topping增添甜香。芝士嘅少少鹹香同奶茶亦相當夾,加埋口感滑溜嘅自家製布甸,最啱鍾意幼滑口感嘅女士們。
 


Softy-Moment Ice-cream(扭紋$33)(日本傳統糖果+$5)

新登場嘅仲有呢款日本Nissei雪糕!每日都會有日本原味牛乳同限定口味,前者選用8.0牛奶,後者有巨峰提子、蜜瓜等唔同口味輪流推出。開飯仔今次試嘅係牛奶同朱古力扭紋,好似食緊香濃版嘅朱古力牛奶雪糕咁!而雪糕可以再加Topping,包括日本空運到港嘅傳統糖果、迷你麻糬、熊仔軟糖等等,色彩繽紛。
 

 
人氣三層架介紹


Bossy Royal Set($368/2人份)^

餐廳招牌之一,強調畀各位女士自己任意配搭嘅套餐當然有得留低啦,可以選擇2款沙律/餐湯,2款半份嘅前菜,一款主菜再加2款半份嘅漢堡/薄餅/意粉/意大利飯。加上用三層架奉上,最啱同好朋友一齊分享!
 


烤南瓜松子仁雞絲沙律(單點$43)

餐廳唔單止幫大家相機食先,仲照顧埋大家健康,好似烤南瓜松子仁雞絲沙律嘅主角就係Superfood南瓜,高纖維同低熱量得嚟又有多種維他命,烤過之後更顯香甜。配埋香脆嘅松子同雞絲非常易入口。
 


三文魚柚子檸檬玻璃杯沙律(單點$43)

各位Girl Boss一齊動手!用玻璃樽一層層裝住所有材料,賣相吸引。食之前要扭實個蓋先將食材同醬汁搖勻,再倒落碟方便食用。嫩滑嘅三文魚加上微酸嘅柚子,相當開胃。而且三文魚含豐富蛋白質同Omega 3,食多啲都唔怕啦。
 


芝士蟹肉釀蟹蓋(單點$88/個,套餐+$20)

老實講,就咁睇單價真係貴咗少少,但推介嗌Set嘅各位女士加點,因為蟹蓋食起嚟真係滿嘴一絲絲嘅鮮甜蟹肉,夠足料,加埋芝士味道香濃而唔膩。
 


Shake Shake單骨雞翼(單點$68)

Shake Shake薯條大家可能都食唔少,Shake Shake雞翼又試過未?單骨唔單止方便食,仲可以均勻沾上Shake Shake粉。而日本空運到港嘅Shake Shake粉有成10種口味任揀,包括章魚燒、BBQ味、芝士波味、梅子味等等,好有新鮮感。
 


低溫慢煮法國黃油春雞.肉桂燉蘋果.奶油薯仔片.迷迭香燒汁(單點半隻$118,全隻$208)

用法國黃油春雞以低溫方法慢煮,再加埋香氣十足嘅迷迭香燒汁相當吸引。肉桂燉蘋果同樣富肉桂香味,奶油薯仔片就口感軟綿,係值得留肚食嘅配菜。
 


炸軟殼蟹冬蔭功意大利粉(單點$128)

香脆嘅炸軟殼蟹固然好味,但開飯仔就覺得亮點在於個冬陰功汁!香辣惹味,而且啖啖都食到香茅等香料味道,夏天食特別醒胃。
 


鱈場蟹肉香草芝士焗蟹子意大利飯(單點$168,套餐加$30)

鍾意食蟹朋友必點!因為餐廳堅持用隻新鮮鱈場蟹即場拆肉,加埋鹹香芝士,係令人忍唔住一啖接一啖咁食嘅邪惡之選。上面仲有蟹子增加口感,略嫌意大利飯軟咗少少,米芯再硬啲會更討好。
 


Teddy Bear(堂食$58)(外賣$38)






Girlboss by Master Kama
屯門屯隆街3號屯門市廣場一期3樓3223-3225號舖
^Bossy Royal Set星期六、日及公眾假期18:00後不設供應




文、相、片:Cathy

關鍵字
屯門
Girlboss
三層架
窩夫漢堡
Nissei雪糕
玻璃杯沙律
Shake Shake雞翼
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
2020-09-18
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
油麻地新開小木屋Cafe 嘆西日Fusion龍蝦湯烏冬配咖啡
2020-09-08