國內人氣太二酸菜魚 美國店班底銅鑼灣開店
2018-09-09

深圳名店除咗喜茶、探魚之外,太二酸菜魚都好出名。未食過?最近店舖美國分店班底,於銅鑼灣開設第一間分店,香港都有得食喇!香港店老闆於美國有三間分店,成都亦有一間分店,但因為店名已被註冊,所以唯有改名廚十三老壇酸菜魚


舖頭風格同餐牌同太二大同小異,都有招牌黑白畫,餐牌同菜名亦同本店一樣咁難估,好似正經的雞被撕、刀拍前男友、致青春等。只有十多道菜,主打酸菜魚可揀小、大及土豪份量,亦可以揀三個配菜,但就冇得揀辣度。

老壇酸菜魚 $468


開業初期有成都師傅親自監督,選用一斤半以上新鮮鱸魚,即日劏及起骨,絕對唔留過夜。酸菜則同本店一樣來自成都,要發酵365日先用得,師傅先炒香酸菜,再加入豬骨及雞熬成嘅湯,再煮配料。魚肉就要分開煮,之後爆香辣椒、蒜頭及香料,灒上滾油同菊花瓣就食得!


大份量約供3人食用,碗成個面盤咁大!師傅教先飲啖湯,湯底比國內店少辣,相信一般都handle到,而且微酸開胃唔太油,但就略嫌唔夠香。魚肉片得薄身,白滑鮮嫩亦有魚味,而且啖啖肉完全無骨最啱懶人。



本店標榜「酸菜比魚好吃」,酸菜冇想像中咁酸,有莖亦有葉,質感爽脆,而且可以解膩,一啖魚肉一啖酸菜都幾開胃,菊花瓣除咗賣相好睇,亦有下火功效。配料有9款可以揀,好似午餐肉、寬粉、腐竹、蓮藕等,寬粉質感煙韌Q彈。



想食辣啲,鉢鉢雞腳帶麻辣,沾上紅油好惹味。酥炸無臉男即係酥肉,炸得香口乾身。小吃就有兩露均沾(紅糖糍粑)同埋解辣必備嘅情誼綿綿,即係冰粉。

鉢鉢雞腳 $88、酥炸無臉男 $88

兩露均沾 $48、情誼綿綿 $28


太二喺大陸只接受電子錢包,又冇得訂位只可以排隊,而且四位以上唔招呼!香港店就冇咁多規矩,不過價錢當然就冇得比。如果唔想上深圳,喺香港想食就當然呢度方便啲啦。



廚十三老壇酸菜魚

地址:銅鑼灣渣甸街66號亨環4樓



文、相、片:Perrins

關鍵字
深圳
酸菜魚
太二
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
4天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11