喜茶來了!沙田店平安夜開業 香港menu率先試 (有片)
2018-12-21

喺深圳爆紅,閒閒地等杯茶都要排成個鐘嘅喜茶,早前宣佈會嚟香港開分店,頭四間分別開喺沙田、銅鑼灣同尖沙咀。而沙田店將會率先喺12月24號平安夜嗰日開喇!即刻同各位心急子睇定香港menu有咩飲啦,有香港限定嘢呀~

喺深圳爆紅嘅芝士茶原創者喜茶終於都嚟香港開店喇,望一望menu,兩地茶飲類別差唔多,都係有莓莓芒芒、滿杯水果、芝士茗茶、當季限定同波波家族等。至於原材料同茶底配方,負責人表示基本上亦係一樣,而且員工仲要先喺國內接受過培訓至得,所以品質同平時上去飲開嘅分別唔大喎。

 芝芝莓莓($47)

 芝芝芒芒( $45)

最受歡迎嘅莓莓芒芒家族,有芝芝莓莓($47)同芝芝芒芒( $45)做代表,兩者都係配以清幽嘅綠妍茶底,奶蓋亦做得相當順滑,芝士鹹香味適中,記得開細窿飲咗幾啖純奶蓋先呀。之後大啖大啖飲仲飲到好多果肉添。前者用嘅士多啤梨,會因為唔同地方唔同季節嘅當造時間而有所唔同,而家呢期就係嚟自美國嘅,果肉酸酸甜甜,好清爽;後者嘅芒果係菲律賓呂宋芒,好香甜,芒味甚濃。

滿杯紅柚($38)

滿杯水果家族系列嘅滿杯紅柚($38),大大片薄片紅柚掛喺杯邊,打卡一流。茶底帶有茉莉花香,本身已經有種清新嘅感覺,仲要加埋甘澀多汁嘅紅柚果肉,真心fresh。不過又唔使怕佢會好澀喎,因為中間有層沙冰,減低澀度之餘亦更能帶出茶香,平衡度不錯。

多肉葡萄($45)

當季限定係一眾忠粉最期待嘅茶飲,呢季做緊多肉葡萄($45)呀,掛住芝芝桃桃嘅朋友要等下年夏天喇。呢杯多肉葡萄望落去雖然較深色,但有漸層效果呢~ 最底層嘅係粒粒手剝新鮮葡萄果肉,數上去有葡萄果汁、葡萄沙冰,頂層就係芝士奶蓋,官配係茶味相對清淡嘅雲峰茶底(亦可轉配綠妍或烏龍茶),整體感覺清甜,好有層次。

 金鳳茶王($32)

至於芝士茗茶系列嘅金鳳茶王($32),係獨家定制嘅極品烏龍,採用特殊燻烤工藝製作,碳焙嘅香氣留守時間幾長,茶香 過後有回甘,面層嘅奶蓋就唔使多講啦,一貫嘅鹹香醇厚,好夾。

開飯仔間唔時都會上去深圳飲,講真,今日試完香港店嘅茶,味道分別唔大,係保持到質素嘅,不過價錢就畀深圳店略嫌貴咗少少喇,例如芝芝莓莓喺深圳賣30蚊人仔,嚟到就變咗47蚊港紙。

而除咗平時飲開嘅果茶同奶蓋之外,舖頭仲特別推出咗香港限定版:冰火雞蛋仔($32)!即係雞蛋仔加雪糕呀,好地道,雪糕係港式奶茶口味。

BTW,眾所周知,喜茶每間舖嘅裝修都係打卡重點,好似深圳有黑金店、pink pink店咁,而香港呢間就係以白、灰色為主調,最標準格局嗰隻。舖頭係一個長方形嘅空間嚟,以「遊廊」為設計概念主題,風格簡約。

沙田店係全港第一間開嘅喜茶,仲要揀正聖誕嚟開,到時會有應節嘅聖誕杯套、熱飲杯同貼紙,兼且喺開業頭3日,所有飲品仲會買一送一添呀!不過肯定大排長龍啦,嗚呀!


喜茶
地址:沙田沙田正街18號新城市廣場1期4樓408號舖
開業日期及時間:12月24日,早上10點


文:Kar
相、片:Tom Li


關鍵字
沙田
喜茶
茶飲
芝士
奶蓋
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
1天前
給自己一個休息時間 10-11月下午茶推介
2019-10-25
高CP值放題推介
2019-11-07
鼎王來了!味道服務媲美台灣 必食麻辣鴨血鍋及員工教路秘製鼎王飯(有片)
2019-11-01
糧尾打氣!5間灣仔平價飯堂推介
2019-10-24