連組合Error肥仔都係佢哋粉絲嘅旺角人氣居酒屋，最近喺銅鑼灣開咗新分店呀！新店同樣以木系裝潢為主調，暗暗der燈光頗有氣氛，仲有個月球下嘅獅子山剪影佈景。食物方面，有多款當店限定嘅新菜式（係呀，旺角冇㗎），當中有兩款更以鹿兒島A4和牛製作！

 （左）吉列蘋果豚肉卷、（右） 吉列千層豚肉（三重芝士）

貪新同時都要念舊，鎮店招牌菜吉列豚肉當然有得食。之不過平時成日食三重芝士版，係就係又爆芝又拉絲好吸引，但就忽略咗另一個潛力股——吉列蘋果豚肉卷~ 一樣都係以日本栗飼豚腩肉製作，薄薄一層炸粉好香脆，豬肉嫩滑，夾住嘅蘋果用咗肉桂炒香，聞落好似蘋果批，食落多咗份香甜。

 申子和牛燒

而眾多款新菜式中，大大力推介申子和牛燒，一大片鹿兒島A4和牛上，放有日本雞蛋同北海道七星米，店員會即席喺客人面前以火槍燒製，再拌勻蛋黃，以和牛捲起沾滿蛋汁嘅飯就食得喇。視覺嗅覺味覺都各自得到滿足，即燒即食仍然帶有微暖，和牛軟滑入口溶化，散發出滿滿油脂香同蛋香。

 鹿兒島A4和牛茶漬飯

另一款和牛菜式係鹿兒島A4和牛茶漬飯，湯底用咗6隻無激素雞去煲14至18個鐘，所以出嚟無論係色澤定味道都好濃郁，仲好清甜𠻹。睇住以熱湯淋熟嘅和牛慢慢變色，半熟嘅狀態令佢口感更加軟滑。

 極上蟹膏蟹肉燉飯

蟹迷唔好錯過極上蟹膏蟹肉燉飯，打開蟹蓋就會見到松葉蟹膏蟹肉同蟹籽，絕無欺場。而飯粒亦帶有微微嘅淡橙色，原來係用龍蝦湯煲燉㗎，知佢咩料啦~ 精華盡吸，所以啖啖都係鮮甜嘅感覺。

 明太子天婦羅

餐廳亦特意獨家引入多間日本小型酒廠嘅清酒，有清甜嘅、有帶果香嘅、有微辛嘅……畀香港人可以試到更多別樹一格嘅手造清酒風味。有靚酒，當然都要有佐酒小食啦~ 同樣係新店限定嘅明太子天婦羅就襯到絕喇。真材實料，用足原條日本明太子去炸㗎，就咁食可能會覺得鹹香味略為濃咗少少，但食一啖再飲一啖酒就啱啱好，仲有少少微辛餘韻，或者呢啲就係wine pairing有趣嘅地方。

 日式製鮮鮑魚、日式特製鵝肝

日式製鮮鮑魚同日式特製鵝肝同樣充滿獨家嘅特色，兩款分別用上秘製醬汁醃漬、處理，前者鮮甜爽口，後者加多片自家製醃蘿蔔夾埋一齊食，軟滑得嚟多咗層爽脆感覺，仲有淡淡柚子微酸嘅清香中和膩感。

 其中兩款獨家代理清酒（即將供應）

申子居酒屋
地址：銅鑼灣渣甸街50號渣甸中心9樓

文：Kar
相、片：Wilfred Chui