茶飲熱潮繼續！今次介紹嘅係嚟自京都嘅新品牌，首店居然唔係開喺日本而係銅鑼灣？睇睇Menu，以抹茶同坊間較為少見嘅焙茶同玄米茶為主，亮點在於店員會即席以茶筅刷茶，保留更多茶香之餘口感仲更厚滑。仲有布丁、蕨餅等甜品，名副其實Tea Time最啱！
 

本茶由一位京都茶農開設，有見香港有唔少台灣茶飲店，而日本大眾又未必完全接受新式抹茶飲品，所以決定喺銅鑼灣開第一間店，先畀香港人、特別係新一代近距離接觸同體驗抹茶咁話！
 

人手沖製茶飲

飲品當中三款Latte同一款薄茶（Usucha）會由店員即席人手沖製！各位抹茶控或者都見過用茶筅擦抹茶，擦焙茶就真係比較少見喇。焙茶即係經過烘焙嘅綠茶，選用品牌自家出產嘅焙茶葉先切碎再磨粉，點單後再加水同用茶筅擦茶，最後將焙茶倒喺冰同牛奶上面，形成吸引嘅漸層。
 

鮮奶焙茶（$33）

雖然係凍飲，但拎上手已經聞到茶香，飲落綠茶幽香同獨特嘅烘焙香平衡有致，餘韻悠長。口感亦比坊間飲到嘅更厚，咁係因為即席用茶筅擦茶可以將更多空氣打入茶湯當中，而且令茶粉完全溶化。
 

鮮奶玄米茶（$33）

玄米茶同樣選用自家出品，特別將抹茶同炒製過嘅玄米磨成粉，令玄米香味更突出！飲落的確先品嘗到玄米香味，抹茶嘅淡淡回甘再慢慢滲出。而鮮奶係用包括日本明治等品牌嘅牛奶再以秘方調配，保證唔落糖精調味。
 

抹茶沙冰（$38）

抹茶飲品最多款式，採用丸久小山園、福寿園同伊藤久右衛門呢三間日本老店嘅宇治抹茶粉。睇呢杯抹茶沙冰顏色都幾翠綠，飲落略嫌牛奶香味比較重，如果係重度抹茶控可能就會有啲失望啦，勝在甜度適中。
 

 
茶香和風甜品

焙茶布丁（$22）

焙茶控唔單止可以飲焙茶，仲可以食焙茶呀。首推呢杯焙茶布丁，同焙茶飲品一樣選用自家出品茶粉，食落茶香同烘焙香更為濃郁！甜味平衡，喉韵足而長。唯一扣分嘅係口感唔係好夠滑同彈。
 

三色蕨餅（$50/盒）

再貪心啲嘅話可以試呢盒三色蕨餅，分別有宇治抹茶、焙茶同玄米茶三款口味。蕨餅本身已經加咗黑糖，淡淡甜味帶出茶甘。三款當中以焙茶茶香較突出，玄米茶同抹茶就相對清淡。無甜不歡嘅甜魔們可以配抹茶或者焙茶口味嘅蜜糖，開飯仔就揀咗抹茶蜜糖，味道香甜帶回甘。
 

本茶宇治丸子（$32/盒）

整體而言都係焙茶口味比較濃郁同突出，如果你係焙茶控嘅話就啱哂喇。而抹茶控都不妨試下玄米茶飲品，多咗一重米香又保留抹茶清幽味道。除咗銅鑼灣首店，品牌嚟緊計劃喺旺角同將軍澳開設分店，有興趣嘅話記得密切留意！
 

本茶
銅鑼灣軒尼詩道555號崇光百貨B2樓B14號舖

文、相、片：Cathy