【2023生日優惠】持續更新!3月壽星燒海鮮放題半價/甜品畫圖免費
2023-03-09

大家生日前後會有唔少飯局,同朋友仔大吃大喝,享用唔同菜餚慶祝,但記得用埋生日優惠呀!開飯仔搜羅全港嘅生日優惠,今次整合咗2月生日優惠,部分優惠重橫跨幾個月份,甚至可以重複使用㗎。


上村牧場 薩摩⿊⽑和牛燒肉餐85折    
生日優惠日期:2023年3⽉20⽇⾄5⽉31⽇

嚟緊有和牛控生日嘅話,不妨試下呢間日本人氣過江龍燒肉店~品牌主打日本自家牧場飼養嘅高質薩摩⿊⽑和牛,供應牛五花、里肌肉等部位。餐廳即將推出限時生日優惠,凡當⽉壽星喺網上訂座時,列明用「生日85折優惠」,並訂座3位以上,薩摩⽜饗宴套餐可享85折!



鳥森 壽星訂座全單9折+300ml清酒買一送一 
生日優惠日期:2023年3⽉1⽇⾄3⽉31⽇

如果想試特色串燒,銅鑼灣呢間鳥燒主題店,主打一系列以惠比壽雞隻製作嘅串燒,另外部分內臟款式則來自本地新鮮雞。廚師發板包、單點選擇供應提燈、雞冠、日本產雞心元等款式。部分食材更先經過自家熟成再烤製。今個月壽星經OpenRice網上訂座,即享全單9折、300ml清酒買一送一,以及免切餅費。

圖:ClareyleeXbabychanx


Pillowtalk Restaurant & Bar 免費畫服務 
生日優惠日期:2023年3月1日起,直至餐廳另行通知,欲了解詳情可聯絡餐廳。

生日想有儀式感,可以喺甜品著手。屯門呢間西餐廳,只要訂座時通知會慶祝生日,當日點嘅甜品會免費提供畫碟服務,重會盡力滿足你嘅圖案要求,好似美國隊長、粉紅兔兔、安妮亞等都畫過,吸引唔少人嚟慶祝生日。而且一系列菜式價格相宜又足料,如避風塘軟殼蟹意粉、頂級安格斯肉眼扒都值得一試。

圖:餐廳(FB)


蝦蝦燒 壽星半價 
生日優惠日期:2023年3月1日起星期一至四(公眾假期及其前夕除外),直至餐廳另行通知,欲了解詳情可聯絡餐廳。

有得食又有得玩!蝦蝦燒嘅室內BBQ場,可以涼住冷氣嘆海鮮放題,每檯旁邊都設有蝦缸,畀大家自助捉活蝦;另外自助食品區則供應蜆、鮑魚、肉串、雪糕、汽水等。而家每4位同行,1位當月壽星即享半價,而且免切餅費、開瓶費,可以自備生日蛋糕等盡情慶祝!壽星入座時需出示附圖片身分證明文件作確認,生日優惠唔可以同其他優惠一齊使用。

圖:timetoeatgoodwest


城景國際酒店 - City Café 城景閣 食自助餐送生日蛋糕 
生日優惠日期:2023年3月1日至2023年3月31日

City Café嘅「龍蝦美饌‧海鮮自助晚餐包括一系列海鮮料理,如橋底炒金蒜龍蝦鉗、龍蝦刁草三文魚水晶卷、梳乎厘焗釀蟹蓋等;重有空運生蠔、雪花蟹腳、麵包蟹等冷盤;另外每位客人可免費獲贈「法式野菌焗釀龍蝦米多」一客。而「環球美饌自助午餐」則有Carving Station如即切燒美國牛肉眼、多款熱葷、精緻甜品等美食。而家經官方網頁訂座午市/晚市自助餐,可獲贈免費生日蛋糕半磅。

圖:餐廳官網、Pochurychan


城景國際酒店 - 樂雅軒  食中菜送賀壽蟠桃 
生日優惠日期:2023年3月1日至2023年3月31日

樂雅軒係法國藍帶美食協會之公司會員之一,加上中式裝潢簡約清雅,啱晒同鍾意食中菜嘅壽星食生日飯。餐廳以創新意念重新呈現傳統粵菜、老火燉湯等菜式;午市則有多款點心,如鵪鶉蛋燒賣、蜆芥炸鯪魚球、黑毛豬叉燒包等。而家嚟嘆散點菜式嘅話,生日客人以及同行賓客均可獲贈賀壽蟠桃一客,記得需要提早2日訂座並講會用呢個優惠呀。

圖:餐廳官網、Uncle Cheong


Dough Bros Pizza & Doughnuts 免費薄餅
生日優惠日期:2023年1月31日起,直至餐廳另行通知,欲了解詳情可聯絡餐廳。

Dough Bros主打doughnut同pizza一直受大家歡迎,皆因前者不時推出創意口味;後者嘅手工酸種薄餅則用歐洲麵粉製作,口感煙韌,有肉類同素食款式照顧唔同食客需要。而家喺官網免費登記為會員,更可以享有免費生日薄餅(口味請向店員查詢)。

圖:餐廳(官網、FB)


百樂酒店Park café 免費自助午餐/下午茶/晚餐 
生日優惠日期:2023年1月5日至2023年5月2日

尖沙咀百樂酒店Park café嘅「品櫻‧花見」下午茶自助餐、「韓味日嚐」自助午餐、「拾味南歐」 海鮮自助晚餐,以及都有生日優惠!午餐供應雜錦天婦羅、蜂蜜芝士炸雞、韓式辣醬芝麻炸雞、清酒忌廉煮藍青口、蒲燒鳗魚蟹籽炒飯、壽喜燒、沖繩海鹽布朗尼等;下午茶可品嚐櫻花煙肉洋蔥焗青口、櫻花酸奶芝士蛋糕、櫻花蝦海鮮炒麵、櫻花焦糖燉蛋等鹹甜點;晚餐則有燕窩芒果奇異果龍蝦杯、燕窩鮑魚龍蝦粥、花膠姬松茸蟲草花燉雞湯、蟹腳海鮮拼盤、燕窩桃膠燉蛋白、瑞士MÖVENPICK雪糕等款式,以及無限供應果汁、啤酒。而每4位惠顧,1位當月壽星可以免費享用一次,同行朋友則有85折優惠。

圖:餐廳(FB)

圖:餐廳(FB)


8度餐廳Café 8 Degrees 自助晚餐半價+送餐酒/免費生日蛋糕+送餐酒  
生日優惠日期:2023年2月1日至2023年5月31日

8度海逸酒店嘅自助餐一向性價比高,而「尋味海鮮之旅自助晚餐」自助晚餐有多款海鮮料理,包括每日2款空運到港嘅法國、美國或愛爾蘭即開生蠔、鱈場蟹腳、青檸青酒浸大蜆、醬燒鮑魚、花膠螺頭燉雞湯、燒肉眼扒、意式香草烤春雞伴黑松露汁等前菜同主食,甜品則有招牌芒果拿破崙、綠茶朱古力心太軟、Häagen-Dazs/Mövenpick雪糕等。而家當月生日嘅朋友預訂4位或以上自助晚餐,壽星可享半價優惠配免費紅/白餐酒1支,或免費生日蛋糕1磅配紅/白餐酒1支


半島酒店大堂茶座 1位免費、送生日蛋糕1個 

生日優惠日期:2022年12月30日起至2023年3月31日(不適用於1月1日,1月21日至25日,2月14日,詳情請向餐廳查詢)

半島酒店嘅「快樂生辰獎賞」性價比高,有齊前菜、主菜同甜品。而家每位壽星喺生日當日惠顧大堂茶座晚餐,2人同行即可獲贈生日蛋糕1個;而4位或以上,則1位免費再送贈生日蛋糕1個。留意返要72小時前訂座;如需取消訂座,則提前最少24小時通知。

圖:餐廳官網


La Famille 免費嘆戚風小蛋糕
生日優惠日期:2023年1月30日至2023年2月1日(已完結)

La Famille嘅戚風蛋糕唔太甜,口感鬆軟,一直受甜品控歡迎,佢哋每個月重會挑選一日壽星送蛋糕俾佢哋,而今個月嘅幸運兒係2月9日生日嘅你~只要喺1月30日中午12時至2月1日中午12時期間,按以下登記步驟,就會免費換取戚風小蛋糕一件,活動採取先到先得形式,而成功登記嘅壽星會收到電郵通知。

登記步驟:
1. Follow其的Instagram(@lafamillecake)及like Facebook(@lafamillechiffoncake)。
2. 進入網站(按此)填寫並提交個人資料。
3. 成功登記後,你將於48小時內收到成功登記電郵通知,如成功得獎,得獎者將收到獲獎電子換領信,喺揀選咗嘅日期(2月6日至2月9日)去門市兌換蛋糕。
4. 得獎者憑換領信上嘅QR Code於所選擇嘅日期,親臨La Famille分店,並向店員出示有效的身份證明文件核對姓名、出生日期即可換領獎品。
5. 參加者必須年滿11歲、持有香港身份證、並為當月嘅生日之星,而每位參加者只可登記一次。

圖:餐廳Facebook



關鍵字
生日優惠
優惠
Birthday
壽星
生日飯局
好友生日飯局的環境、食物質素、驚喜等因素都很重要,開飯仔集合各類最適合慶生的餐廳,方便飯局搞手。
餐廳資料
更多
收起
本月熱門
【2023生日優惠】持續更新!3月壽星燒海鮮放題半價/甜品畫圖免費
2023-03-09
【2023新店精選】持續更新!3月嘆過江龍特色龍蝦、摩登菲律賓菜
5天前
【隨時更新】最後倒數!2023即將結業人氣/老字號餐廳
6天前
【隨時更新】零食速報 每周新款零食、酒品點評
6天前
3月份自助餐推介 和牛自助餐、全新榴槤甜品主題
2023-03-06