【2022生日優惠】持續更新!1月壽星自助晚餐半價 嘆免費蛋糕/清酒
7天前

生日想食得盡興,或者試唔同嘅特色餐廳,記得留意開飯仔每個月搜羅全港嘅生日優惠。今次整合咗1月生日優惠,部分優惠重橫跨幾個月份,甚至可以重複使用㗎。


百樂酒店Park café 免費自助餐  
生日優惠日期:即日起至2022年5月4日 (「櫻」粉蜜「蘋」下午茶自助餐1月15日至16日不設優惠)

尖沙咀百樂酒店Park café新出嘅「韓」氣逼人自助午餐,以及「櫻」粉蜜「蘋」下午茶自助餐都有生日優惠!前者供應炸雞、鐵板燒、石鍋拌飯、人參雞湯等多款韓國料理,後者就以蘋果同車厘子製作特色鹹甜點。而每4位惠顧,1位當月壽星可以免費享用一次,同行朋友則有85折優惠。




City Café 城景閣 首輪自助午餐享低至65折+送生日蛋糕 
生日優惠日期:即日起至2022年1月31日

City Café嘅環球美饌自助午餐供應數十款各國美食,有時令海鮮、壽司刺身、多款熱葷同Movenpick雪糕等,其中Carving Station嘅肉類重日日唔同款𠻹,分分鐘食到即切燒美國牛肉眼;加埋無限添飲嘅果汁同茶啡,大人小朋友都啱食,留意指定時段有低至65折優惠㗎。今個月嘅壽星喺生日正日及前後3日嚟嘅話,可獲贈生日蛋糕半磅,記得提早喺入座前2日預訂並講會用呢個優惠,入座時再出示身份證明文件核實。




Tiffany Blue Box Cafe 送Blue Box Cake+Tiffany & Co. 旗艦店導賞
生日優惠日期:2022年1月起,直至餐廳另行通知,欲了解詳情可聯絡餐廳。(不適用於元旦、情人節、母親節、平安夜、聖誕節、聖誕節翌日及除夕)

生日打卡好基本,咁喺玻璃屋設計嘅Tiffany Blue Box Cafe食生日飯,一定滿足到呢個要求。呢度全日供應菜單上嘅套餐,豐儉由人,又可以自選菜式配搭。例如三道菜套餐就有前菜、湯品同主菜,前菜有龍蝦沙律、北海道帶子薄片刺身等款式;主菜則有煙三文魚班尼迪配魚子醬、香烤西班牙豬扒或龍蝦扁意粉等選擇。而家只要訂座兩位以上、每位客人各點一份全日供應嘅套餐,壽星即享一份迷你Blue Box Cake,並免費參加由專人帶領、喺全港最大Tiffany & Co. 旗艦店嘅導覽體驗,欣賞各式藝術品同高級珠寶。

圖:TaurusVicyuehw_fish


8度餐廳Café 8 Degrees 自助晚餐半價  
生日優惠日期:2022年1月3日至2022年3月31日

8度海逸酒店嘅自助餐一向性價比高,而環球聚會自助晚餐有過百款菜式,每日有2款空運到港嘅法國、美國或愛爾蘭即開生蠔、鱈場蟹腳、迷你麻辣牛肉鍋、煎鵝肝伴黑松露汁、滋補蟲草花燉老雞湯、上湯粉絲浸大蜆等中西合璧嘅菜式。而家當月生日嘅朋友預訂4位或以上自助晚餐,壽星可享半價優惠,或免費生日蛋糕1磅,或送紅/白餐酒1瓶。



燒肉臻 送300ml清酒一瓶 
生日優惠日期:2022年1月1日至2022年1月31日

主打日式燒肉嘅燒肉臻,有專人幫你燒製唔同肉類,等你品嚐熟度啱啱好嘅質感,其中餐廳自家製嘅低溫熟成牛肉特別濃味。而場內雖然有自助清酒售賣機,但今個月生日嘅朋友晚市時段嚟慶祝生日,會獲贈300ml清酒一瓶,咁飲免費酒點都開心啲嘅。

圖:emmiLoveFoodBaby


漁獲浜燒 送壽司蛋糕 
生日優惠日期:2022年1月1日至2022年1月31日

燒海鮮除咗係BBQ,日式浜燒都一樣別具風味。漁獲浜燒由日本直運多款新鮮海產到港,長腳蟹、甲羅燒等鮮味食材都畀你有返家鄉嘅感覺。今個月生日嘅朋友,嚟食滿$2,000更即享免費壽司蛋糕1個。

圖:餐廳Facebook


鳥居居酒屋 送清酒1瓶 
生日優惠日期:2022年1月1日至2022年1月31日

近年鳥燒店愈來愈受歡迎,鳥居居酒屋就選用日本鹿兒島赤雞製作串燒,肉質嫩滑鮮味。而家當月生日嘅朋友預訂4位或以上晚市時段,並出示身分證確認本月生日及消費$2,000,就送你300ml清酒1瓶。

圖:XbabychanxVirgo.W


寬巷子 打邊爐送粉盒花園
生日優惠日期:2022年1月起,直至餐廳另行通知,欲了解詳情可聯絡餐廳。

寬巷子嘅藝術手工火鍋擺盤精美,生日打卡就啱晒喇。用麻辣鴛鴦火鍋煮招牌玫瑰松板豬、冬甩子、枝仔冰等火鍋配料,即刻提升惹味指數。而當月生日嘅朋友提前至少兩日預訂4位或以上晚市時段,並喺訂位時講返係慶祝生日,就會送上原價$328嘅粉盒花園畀壽星,等佢返屋企繼續回味餐廳招牌蔬菜花藝拼盤,以及麻辣湯底醬料。


八歌仙 壽星半價嘆和牛燒肉 
生日優惠日期:2022年1月起,直至餐廳另行通知,欲了解詳情可聯絡餐廳。

呢間日本鐵板燒店主打鐵板燒放題,有Blackmore M9+澳洲和牛、A5熊本和王和牛等高質肉類。而家凡3人同行,當月生日嘅朋友即享半價優惠,入座時記得向職員出示身份證明文件證明。留意返每枱只限一位使用呢個優惠,亦唔可以同其他優惠同時使用;而星期五、六及公眾假期不設此優惠,所有加一服務費會以原價計算。

圖:餐廳Facebook


Fun Fun 串串鍋 麻辣串串鍋4人同行壽星免費 
生日優惠日期:2022年1月起,直至餐廳另行通知,欲了解詳情可聯絡餐廳。

呢度任飲任食嘅麻辣串串鍋由四川師傅主理,招牌重慶麻辣湯鍋充滿當地風味,加錢則可以轉鴛鴦湯底。串串款式有15款,啱想過下口癮嘅麻辣控。壽星喺生日前後7日嚟享用晚市時段,只要4人同行就1人免費。

圖:food6850Tears_Tearswujoegame


半島酒店大堂茶座 送生日蛋糕1個 
生日優惠日期:2022年1月起,直至餐廳另行通知,欲了解詳情可聯絡餐廳。

半島酒店嘅「快樂生辰獎賞」性價比高,有齊前菜、主菜同甜品外,每位壽星喺生日當日惠顧大堂茶座晚市套餐2位或以上,可免費享用迷你生日蛋糕1個;而4位或以上即可享1位免費同獲贈生日蛋糕1個,留意返要72小時前訂座呀。



京都勝牛 壽星免費自選甜品 (銅鑼灣設有網上訂座)
生日優惠日期:2022年1月起,直至餐廳另行通知,欲了解詳情可聯絡餐廳。

鍾意食吉列牛扒嘅朋友,呢間京都過江龍就啱晒你喇。香港店沿用總店「黃金60秒」嘅製作方法,以攝氏190高溫將炸牛排至三分熟,炮製出外層酥脆,內裡鮮嫩嘅口感。而家當月生日嘅朋友,提前2日預訂任何分店4位或以上,喺落單時出示身份證明文件作實及享用正價套餐,壽星即可免費獲贈自選甜品1客。

圖:餐廳Facebook


平昌 壽星75折+免切餅費 
生日優惠日期:2022年1月起,直至餐廳另行通知,欲了解詳情可聯絡餐廳。

平昌嘅韓燒放題有多款肉類、海鮮同韓國小食,點多幾款鍾意嘅款式都唔傷荷包。而like平昌Facebook專頁或follow Instagram後,於生日當天或前後3日嘅15:00後惠顧,埋單時出示身份證,壽星即享75折優惠同免收切餅費,呢個優惠更可重複使用。

圖:alice118loveonew4ever


泰.夯蝦 「正宗曼谷流水蝦」4人同行壽星半價 
生日優惠日期:2022年1月起,直至餐廳另行通知,欲了解詳情可聯絡餐廳。

泰.夯蝦嘅正宗泰國流水蝦放題,啱晒掛住泰國嘅朋友!店內設有特長蝦缸,令你好似去咗當地咁即夾即燒,另外重有多款海鮮選擇。而每4位成人其中1位係當月生日,壽星就有半價優惠,注意不可與小童優惠共用。

圖:ki918


蝦立方休閒娛樂釣蝦場 壽星免費釣蝦+送生日蛋糕
生日優惠日期:2022年1月起,直至餐廳另行通知,欲了解詳情可聯絡餐廳。

台式風格嘅蝦立方休閒娛樂釣蝦場,提供多款口味活蝦料理,包括奶油、檸檬、胡椒等口味,而即釣嘅蝦揀鹽燒或清蒸都會免加工費。喺生日前後3天惠顧時出示有效出生證明,壽星即享免費3小時釣蝦,如4人同行可獲贈精美蛋糕一個,有得玩又有得食!留意返優惠需提前3日預約。

圖:Kola_1panwong



關鍵字
生日優惠
優惠
Birthday
生日飯局
好友生日飯局的環境、食物質素、驚喜等因素都很重要,開飯仔集合各類最適合慶生的餐廳,方便飯局搞手。
餐廳資料
更多
收起
本月熱門
【隨時更新】零食速報 每周新款零食、酒品點評
2021-12-22
【2022生日優惠】持續更新!1月壽星自助晚餐半價 嘆免費蛋糕/清酒
7天前
食完暖笠笠!冬天必食八大羊腩煲
2021-12-24
香脆鬆軟!精選香港6大牛角包
2022-01-06
【2021回顧】咖啡地圖!新開Cafe一覽 精品咖啡/朝啡晚酒/打卡店
2021-12-30