今時今日買月餅，除咗揀口味外，包裝都一樣咁重要，送禮夠晒得體嘛！今年唔少餐廳同網店都推出包裝超有特色嘅主題月餅，例如有畀大家懷緬過去嘅舊香港主題、充滿本土氣息嘅電影主題、大人小朋友都鍾意嘅卡通、夠晒浪漫嘅星夜等，一齊睇下有邊款啱心水~
望月 熊本熊流心奶黃月餅
呢間店每年推出嘅月餅都好有gimmick，今年就得到熊本熊官方授權推出中秋禮盒，於店舖最受歡迎嘅奶皇月餅上印上熊本熊嘅身影，真係超可愛！月餅內餡以泰國椰汁混入奶黃同鹹蛋黃，細膩嘅奶黃結合香濃嘅鹹蛋黃，唔會太甜膩。另外仲會出埋限量版拼圖，熊本熊fans不可錯過。
訂購方法：(按此)
四喜麵包 電影主題月餅
中秋節一大班人圍埋食月餅最緊要有話題，呢間一向主打風趣幽默兼走懷舊風嘅餅店就啱晒！今年特別搵嚟風格同樣懷舊、作風抵死嘅無紙用工作室合作，創作一系列懷舊電影海報作為月餅盒包裝，以大家都有共鳴嘅戲名同插畫為主題，七款月餅包括朱魚璋博士（五仁雙黃月餅）、月之呼吸（雙黃白蓮蓉月餅）、嫦娥愛你（雙黃紅豆沙月餅）、伯爵茶溫泉（迷你伯爵茶味奶黃月餅）、壞過花生（迷你花生醬奶黃月餅）、Be Ninja（迷你奶黃月餅四個裝）同奶黃馬戲團（迷你奶黃月餅八個裝），好盞鬼！btw，你哋認唔認得返係邊幾齣電影啊？
訂購方法： (按此)
K11期間限定店:
即日起至8月26日（只供預購月餅券，不設取貨或現場購買）
8月27日至9月21日（提供月餅換領及現場購買）
SENSES Amuseum 星夜珍藏版奶黃月餅禮盒
主打藝術商品嘅店舖，今年將梵高經典名畫結合香港著名景色，推出珍藏版奶黃月餅禮盒 – 星夜，仲附埋別注版梵高卡牌同3D眼鏡，送禮最啱！設計取材自梵高名畫《星夜》，畫作上方係藍色夜空配上月亮同星星，結合香港尖沙咀海旁景色，好浪漫，如果收到呢個禮盒真係會心心眼！
訂購方法：(按此)
當文歷餅店 乘月到紐約月餅禮盒
來自美國紐約嘅餅店，除咗舊年大受食客歡迎嘅手工伯爵茶奶黃月餅，今年更首次推出經典奶黃月餅。禮盒設計別出心裁，見到都忍唔住要「嘩」一聲。以紐約市嘅夜空為主題，疫情下大家去唔到旅行，仍然可感受外國氣息。水晶球入面全部都係紐約名勝剪影，包括自由女神像、布魯克林大橋、古根漢博物館、紐約獨有嘅黃色的士等。撳下個燈掣更可照亮紐約市夜空，帶大家過一個不一樣嘅中秋。
訂購方法：(按此) 及門市發售
BK Bakery 阿塗主題月餅
圖：主打手工法式蛋糕嘅餅店，今次同本地漫畫家阿塗合作推出月餅禮盒。禮盒呈粉紅色，外型就咁睇幾似一個紙袋，封面印上勉勵香港人嘅字句，好有共鳴！口味方面一共有六款，包括鹹香重奶流心奶黃、香濃日本若竹抹茶流心奶黃、日本直送高知縣柚子奶黃、台灣凍頂烏龍茶奶黃、幽香伯爵茶流心奶黃同經典酸甜台灣鳳梨，小朋友才做選擇，買「我全部都要！」套裝就可以一次過試晒喇～
訂購方法：(按此)
港爐‧萬事屋 紅香爐港迷你月餅
圖：呢間本土文青手作店今年都加入月餅戰場，推出紅香爐港迷你月餅，分別有松露奶皇、鳳梨奶皇、紫薯海鹽蛋皇同伯爵紅茶。月餅禮盒呈金色，好有高級感，而且每個月餅盒都有一句充滿本土特色嘅廣東話字句同舊時香港圖片，勾起唔少人嘅回憶，饒有心思。
訂購方法：(按此)
Ralph’s Coffee BEAR-ista 奶黃流心月餅
為慶祝今年中秋節同埋Polo Bear誕生30週年，呢間咖啡店推出香港獨家發售嘅Ralph’s Coffee BEAR-ista經典奶黃流心同咖啡流心月餅。月餅禮盒設計好精緻，造型仿傚經典Ralph’s Coffee BEAR-ista，著上條紋恤衫、針織領帶、Ralph’s Coffee經典綠帽，配襯經典牛仔褲及徽標圍裙，超吸睛！咖啡口味以優質有機咖啡豆為原材料，咖啡味幾香濃啊~
訂購方法：(按此)
A-1 Bakery BT21 夜月。營火會奶黃月餅禮盒
今個中秋有宇宙明星BT21陪大家！呢間連鎖麵包店同LINE FRIENDS合作推出BT21夜月。 營火會奶黃月餅禮盒上印有可愛嘅BT21圖案，設計充滿創意，當拉開月餅內盒，面層嘅立體BT21圖案就會彈起，fans一定要買嚟收藏。食完月餅仲可以當收納盒自用，實用又環保！
訂購方法：(按此)
文: Yanica
編：Kar