之前介紹過韓國Instagram同Twitter大熱嘅Starbucks® Teavana™系列，估唔到轉個頭香港都有，今次終於唔洗葡萄泡菜國啦！9月14號開始發售嘅Starbucks® Teavana™，成個系列唔單止有超靚漸層呃Like一流嘅特濃咖啡鮮奶抹茶，仲有兩款以茶為主嘅特調同兩款蛋糕，就算唔為相機食先都想試！

Starbucks® Teavana™系列以唔同茶飲為主，希望可以重新演繹「茶」嘅意義。最吸睛嘅一定係有漸層嘅特濃咖啡鮮奶抹茶，優質抹茶粉同經典特濃咖啡完美結合，唔單止賣相一流，入口亦試到多重味覺層次享受，凍熱兩個版本都有。

有綠茶代表抹茶，另一方面亦有紅茶，紅西柚蜜糖紅茶就喺傳統紅茶當中加入紅西柚同蜂蜜，紅茶嘅韻味同西柚蜜糖嘅酸甜有致巧妙平衡，清新而不失紅茶嘅高雅感。另有凍嘅冰搖紅西柚蜜糖紅茶。

而冰搖石榴凝珠洛神花茶就用咗帶自然紅色嘅洛神花茶配搭石榴凝珠，凝珠咬開就係瞬間喺口腔爆發嘅石榴果汁，帶嚟味覺同口感嘅刺激。

最後兩款蛋糕分別係有層次豐富嘅抺茶朱古力蛋糕，同軟綿微甜嘅伯爵茶雪芳蛋。前者有抹茶慕斯、朱古力同抹茶蛋糕等七層味道口感，後者茶香濃郁甜而不膩，配多杯茶就係完美嘅Afternoon Tea Break啦。