【食得健康兼關懷社會】愛心社企餐廳齊來少鹽少糖
2021-01-22

香港社企餐廳一直致力履行社會責任,為弱勢社羣創造就業和培訓機會以及保護環境。雖然每間社企餐廳都有自己嘅願景,但都秉持希望社會變得越嚟越好嘅信念,就好似「全城減鹽減糖」活動嘅目標一樣,希望香港人可以食得越嚟越健康,有壯健嘅體魄一齊去為社會努力。

今次搵嚟三間參與少鹽少糖食店計劃嘅愛心社企餐廳,他們為顧客提供少鹽少糖嘅選擇或者菜式,希望大家了解到用啱材料同煮法,減鹽減糖會更好食、好健康。大家可以去呢幾間社企餐廳試下佢地特別設計嘅少鹽少糖菜式,為社會出一分力嘅同時,亦可以享受健康美食。


如庫豐生有機食堂

如庫豐生有機食堂主打素食菜式,餐廳理念係希望能提供優質真正嘅食物,如最基本嘅油、鹽、糖,分別使用山茶花油、海鹽或岩鹽及有機冰糖及庶糖。負責人茹素二十多年,佢食素除咗係為自己亦係為社會,能清理身體內嘅小宇宙達至身心靈平衡健康之餘,亦能夠保護大自然環境。而且相信只要食材優質,食物就唔需要加太多鹽和糖調味。除咗調味料外,餐廳選用公平貿易嘅白米以支持農民,蔬菜亦用返自己有機農場種嘅菜,土地得到保育。

 


素艇仔粥 

坊間嘅艇仔粥多數用魷魚及豬皮等増加口感,而餐廳就用海茸取代魷魚,不但骨膠原豐富,而且口感脆夾煙韌;而海茸口感與豬皮相似,再加入腐皮、麵筋及有機薑,食落口感同味道都與真艇仔粥無異,調味方面只係加少量油、鹽、糖及即磨柬埔寨胡椒粉就夠晒美味。


糖醋黑白木耳

糖醋黑白木耳營養價值高,主要希望食客感受返食材原味。先將黑白木耳白灼後過冷河,加入少量油、鹽、糖以及根據個人口味選擇少許優質白米醋或浙醋調味即可。 


粟米牛油果壽司

素壽司平時都較少見,粟米選用有機粟米,新鮮香甜。而牛油果亦係近年好受歡迎嘅健康食物,最特別係加入自家製沙律醬,用橄欖油、有機豆漿、醋及少量糖製成,不含蛋、奶,全素食者都食得。而且比起普通沙律醬食落無咁膩、無咁甜外,食材本身嘅鮮甜都足夠令人增加食慾。


U Deli賞味軒 (HKU)

U Deli賞味軒係東華三院社會企業iBakery旗下嘅餐廳,主要提供價廉物美嘅大學餐飲服務,亦在校園間實踐社會共融理念。負責人希望培訓不同能力人士發揮到自己嘅才能,無需局限重覆性嘅工種,因為每個人都有自己擅長嘅部份。餐廳除咗培訓員工能夠在共融嘅環境中就業,獲取工作帶來嘅尊嚴及滿足感外,亦讓學生在投身社會前體驗和接納與不同能力嘅人共融共事。

 


白汁雞皇飯 

白汁雞皇飯食材包括雞球、三色椒及鮮冬菇,坊間食開嘅白汁通常會加好多糖,而呢度就先炒香洋蔥,再落少許花奶做成醬汁,因為花奶及洋蔥本身帶有甜味,只要加少量鹽調味便已經相當美味。          


葡汁燴牛肉烏冬

呢味葡汁燴牛肉烏冬嘅醬汁係自家調製,無放糖,而且餐廳在烹調此菜式時比平時減少咗2/3嘅鹽。食材包括洋蔥、甘筍、鮮冬菇、少量黄薑粉及奶,主要都係利用甘荀及洋蔥増加本身鮮甜味。餐廳特意分開烏冬及醬汁,除了可減少吸收鹽和糖外,烏冬亦唔會變得過於軟腍。


洋蔥黑椒雞扒薯菜

先將洋蔥及原粒黑椒爆香,釋出洋蔥本身的甜味,就唔使落額外嘅糖。食材有洋蔥絲、青紅椒及雞扒,比以往落少1/3嘅鹽。


U Deli賞味軒 (EdUHK)

U Deli於香港大學內係一間外賣店,而於香港教育大學內就設有堂食,環境廣闊,而且設有戶外位置,一邊望住山景一邊用餐實在令人心曠神怡。

 


栗米肉粒飯

栗米肉粒飯食材主要包括栗米蓉、栗米粒及豬肉粒,減少使用鹽糖,取而代之嘅係增加粟米粒份量,由粟米粒帶出食材本身嘅 甜味。     


自家制香草醬意大利麵 伴 焗蘑菇、雜菌及露筍

坊間意大利粉嘅醬汁通常都較重調味,餐廳嘅自家製香草醬加入紫蘇葉、番茜葉及松子仁等香料製成,本身香料味都好足,所以就唔使加咁多額外嘅鹽和糖等調味料。配埋三種蔬菜蘑菇、雜菌及露筍食就更健康。      


吞拿魚忌廉汁蘑菇意大利麵

平時忌廉汁都係用鮮忌廉加鹽及糖製成,而家就減少鹽糖份量,加入磨菇製成,所以食落蘑菇味特別香濃,同意大利麵好夾!


* 資料由客戶提供 


關鍵字
少鹽少糖
社會企業
健康
客戶專訊
本月熱門
【2021生日優惠】持續更新!8月壽星免費嘆麻辣串串鍋
3天前
【隨時更新】零食速報 每周新款零食、酒品點評
6天前
【恭喜張家朗、何詩蓓】多間餐廳立即推出限時優惠一覽
2021-07-28
投奔盛夏 7-8月份下午茶推介
2021-07-08
6月份好評餐廳十強
2021-07-06