【開飯熱店入圍名單巡禮】深水埗平民美食天堂 新派傳統乜都有
2019-03-07

常問道人生有幾多個十年,OpenRice啱啱就有兩個。踏入開飯二十年,優秀開飯熱店2019以「歷久嚐新」做主題,擁抱經典、傳統老味道之餘,亦緊貼潮流,飽嚐新世代嘅美食。即刻睇下邊啲必試熱店入咗圍啦。
 


深水埗多平靚正餐廳是常識吧,除咗經典港式美食,近年仲多咗唔少食肆新力軍,由以茶為主嘅小清新Cafe、低調高質嘅正宗意大利餐廳、賣相搶鏡嘅日式海鮮丼專門店等等,無論貪新定喜舊,都總會搵到啱你口味嘅餐廳!


白色小屋嘆茶香料理 TEA HUB

白色店面令呢間餐廳喺深水埗呢個舊區突圍而出,高樓底加上簡約裝修頗有小清新感覺。餐廳叫TEA HUB大家應該都估到唔少食物都以茶入饌,好似佢哋嘅自選茶食套餐可以配茶漬飯或者茶湯麵。而最受歡迎嘅有佢哋嘅戚風蛋糕,富茶香之餘口感仲非常鬆軟。


圖:糖小妹


一丼三吃海鮮丼 宗像屋

由人稱「拉麵陳」嘅Meter Chan開設,貫徹門面低調而且貴精不貴多嘅風格,全店只賣一款海鮮丼,客人可以選擇嘅只有海鮮種類數目同分量,見到啲海鮮堆到好似山仔咁高的確係好吸引嘅。而且有特別嘅一丼三吃:先食海鮮丼、再用紫菜自己包手卷、最後做埋茶漬湯飯。


圖:haifoodarharry喜愛尋食


平食新鮮手製意粉 食意

新鮮手製意粉唔係高級意大利餐廳嘅專利,喺深水埗呢間小店同樣有!最多食家推介黑松露野菌忌廉汁手扭麵,新鮮手扭麵有咬口之餘,加上黑松露同野菌香味無得輸。定價貼地但無將貨就價,好似牛扒就用美國黑安格斯護心肉,肉味濃郁。
 


圖:Kikivicki


大大塊花膠車仔麵 任你點車仔麵

港式車仔麵同樣有新賣點,呢間就主打鮑汁炆花膠,大大塊又彈牙都係$12/塊!另外仲有手打墨魚餅、日式豬軟骨、糖心蛋、酸辣雞翼尖等特色餸,麵底又有韓國粉絲、番薯粉等,比一般車仔麵店有更多選擇。加上湯底無味精,多款食物堅持自家製作,咪成功突圍而出囉。


圖:sleepbeautyfollowmyfoodstep_


正宗台灣風味 程班長台灣美食

程班長嘅大名相信愛台灣菜嘅香港人未嚟過都聽過,程班長即係台灣店主兼大廚本人,必試招牌紅燒半筋半肉麵,湯底香濃,麵條有咬口。而且餐牌選擇超多,唔知仲以為去咗台灣夜市:麻油雞、擔仔麵、米血糕、蚵仔煎、蔥抓餅、黑糖芋圓,全部都係正宗台味。


圖:TFN_CheungJhcc09


不敗豬潤麵+西多 維記咖啡粉麵

講到深水埗嘅平民美食,呢度嘅豬潤麵絕對係代表之一。豬潤配老薑湯底非常暖胃,豬潤又熟得啱啱好,夠哂爽口。另一名物係咖央西多士,同一般茶記唔同,呢度嘅西多士係煎嘅,無咁油之餘蛋香味亦更突出,加埋椰子香十足嘅咖央醬,甜而不膩。


圖:foodiemoreflora_leon


深水埗十強名單仲包括主打足料大碗芋圓嘅康瑞甜品、裝修到食物都好有馬來西亞風味嘅蘇媽.蘇媽馬來西亞茶餐室、復古港式冰室良記餐廳(老鳳冰室)、同有米芝蓮推介嘅人龍店文記車仔麵。揀啱心水就記得用你手上嘅一票支持佢地啦!https://www.openrice.com/info/awards2019/index.html 




文: Cathy

關鍵字
開飯熱店大賞
入圍名單
深水埗
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【開飯熱店入圍名單巡禮】深水埗平民美食天堂 新派傳統乜都有
2019-03-07
2月份好評餐廳十強
2019-03-11
Chill嘆週末!黃宗澤蠔吧新推任食生蠔Brunch (有片)
2019-03-06
【開飯熱店入圍名單巡禮】港人最愛 人氣東南亞菜大激鬥
2019-02-21
【開飯熱店入圍名單巡禮】全城熱捧甜品店 疏乎厘班戟芋圓刨冰爭崩頭
2019-02-25