聖誕就嚟到，又係一年一度約親朋好友開心食大餐嘅時候啦～好多酒店同餐廳都推出咗唔同主題嘅聖誕Buffet，今年為大家精選幾間最有節日氣氛嘅自助餐，一齊喺燈飾下嘆住美食迎接2025聖誕！
節日奢華海鮮自助晚餐 The Lounge 
想搵個靚景地方同屋企人朋友過節？呢間自助餐有開揚景觀，成個用餐體驗都即刻升級。自助餐內容相當豐富，冰鎮海鮮如龍蝦、鮮蝦、蟹腳樣樣齊，仲有刺身、壽司、手卷等冷盤選擇。熱食就有香煎和牛扒、鐵板鮑魚、大蝦、羊架、火雞等，款式多到唔知由邊度食起。除夕夜仲會有更奢華嘅料理，加上海景真係好有氣氛呀。
平安夜及聖誕日：成人每位港幣1,538元、小童每位港幣1,028元
除夕：成人每位港幣2,288元起(每兩位成人可獲贈香檳一瓶)、小童每位港幣1,488元
節日自助晚餐 咖啡廳 
海鮮控留意！呢個自助餐最大亮點一定係可持續發展波士頓龍蝦兩食，可以食到即烚同香燒兩種龍蝦煮法，再加埋皇帝蟹腳、凍蝦、翡翠螺等冰鎮海鮮，鮮味滿滿。熱盤亦都相當應節，有燒火雞、威靈頓牛柳、炆鴨掌花膠、和牛卷等等。甜品區仲有樹頭蛋糕、焦糖燉蛋同千層酥，超有節日feel又啱打卡，適合約埋朋友、家人過一個甜甜嘅聖誕夜～
平安夜、聖誕日及除夕：成人每位港幣998元、小童每位港幣498元
聖誕市集主題自助餐 普慶餐廳
將成個自助餐打造成聖誕市集咁，行入去就好有節日氣氛，超有gimmick！一入座每位客人會先收到一份限定嘅味噌燒龍蝦尾做開場，之後就可以周圍行美食檔，邊食邊玩～最吸引係佢哋嘅甜品檔位，有打卡一流嘅立體聖誕蛋糕、巨型樹幹蛋糕、泡芙塔、蘋果肉桂麵包布丁等等輪流登場。最特別係日本大熱嘅「拉麵雪糕」，紫薯蓉做成拉麵造型，賣相可愛又好味，為盛宴畫上超甜美句號。飲品方面有熱朱古力、香料熱紅酒任飲，加少少錢就可以升級任飲氣酒、紅白酒、米酒同燒酒，成件事更歡樂～
平安夜及聖誕日：
第一輪 下午5時30分至晚上8時｜成人每位港幣1,028元、長者每位港幣848元、小童每位港幣618元
第二輪 下午8時45分至晚上11時｜成人每位港幣978元、長者每位港幣788元、小童每位港幣578元
除夕：
成人每位港幣948元、長者每位港幣778元、小童每位港幣708元
節慶及元旦自助晚餐 Café 103
呢間一向係靚景自助餐嘅熱門之選，位於103樓，坐上去俯瞰成個維港，真係超浪漫～自助區選擇算係相當全面，海鮮有生蠔、刺身、凍蟹、生蝦等經典必備，熱葷亦涵蓋唔同國家嘅菜式，由燒味到漢堡都搵到，啱晒一班人嚟開心分享。另外，甜品迷一定會瘋狂!! 節日甜品依然又靚又精緻，節日造型蛋糕、朱古力放滿成個枱，影相打卡同食都一樣開心。最加分嘅係，意大利氣酒、指定白酒同紅酒全部任飲，邊食邊Cheers，聖誕聚會氣氛即刻拉滿！
平安夜及聖誕日：
第一輪 下午6時至晚上8時｜成人每位港幣1,738元、小童每位港幣798元
第二輪 下午8時30分至晚上10時30分｜成人每位港幣1,688元、小童每位港幣798元
除夕：
第一輪 下午6時30分至晚上9時｜成人每位港幣2,088元、小童每位港幣898元
第二輪 下午10時至翌日凌晨00時30分｜成人每位港幣2,288元、小童每位港幣798元
節日家庭自助餐 cafe TOO
呢間自助餐就最啱一家大細同大班人聚餐。主打溫馨家庭氛圍，餐枱上係一系列節日必食嘅經典菜，包括酥脆火雞威靈頓、法式煎牛排配鵝肝及黑松露、蜜汁烤火腿、火雞大餐，仲有黑松露芝士餛飩等暖心嘅菜式。甜品方面就更加澎湃，成枱聖誕造型蛋糕同小點心，睇到已經好開心。場內仲有遊戲區、手工藝坊及趣味美食角嘅「奇趣角」，小朋友可以自己放電，氣氛輕鬆又歡樂，好啱節日家庭聚會。
平安夜及聖誕日：成人每位港幣1,388元、小童每位港幣928元
文：Yanica
編：Kate
