暑假一定要去海洋公園玩! 玩咗成日，就緊係要食野充飢！海洋公園全新泰式餐廳「Ginger Grill  爐炭燒」，主打泰式地道菜式、明火炭燒及多款以薑入饌嘅料理，酸酸辣辣嘅味道，即使夏天無胃口，都立即令你味蕾大開！

而家就一齊睇下海洋公園嘅獨特泰式消暑良方，讓味覺暢遊泰國！

「Ginger Grill  爐炭燒」坐立於海洋公園夢幻水都，設計以大自然園林為主題，以大地色為色彩基調，牆上清雅嘅薑花為人手繪製，更設有一幅別緻嘅綠色植物主題牆壁，大型玻璃窗戶讓自然陽光照射到餐廳内，令客人猶如置身園林美景之中。

餐廳更設有酒吧枱，同三五知己一齊飲酒談心最適合！

「泰」滋味     極致嘅味覺享受

呢度嘅泰式料理係以泰北農間村落及傳統文化為創作概念，廚師推介包括「泰式燒葵花雞」、「爐炭燒大蝦酸辣湯」及「泰式船麵」。 

相機食先？呢道原隻「泰式燒葵花雞」一定係你嘅不二之選！大廚先將雞用各種香料醃足全日，以清湯浸泡後，再風乾一日，最後烤焗至皮脆肉嫩，單食呢個雞嘅功夫，已值回票價！上枱時，店員會燃點雞身內嘅香茅枝、斑蘭葉及青胡椒，令香料氣味一次盡情散發！

泰式燒葵花雞

「爐炭燒大頭蝦酸辣湯」視覺效果非常吸引，一隻大頭蝦就咁「趴」係碗上，非常浮誇！酸辣湯用上多種香料煮成，以備長炭烤去香茅、檸檬葉嘅過多水份後，加入湯中，令香料味道更濃。最後加入大頭蝦一齊煮，令蝦身盡吸湯嘅精華鮮味，放入嘴中湯頭會瞬間爆發！

爐炭燒大蝦酸辣湯

每日限售150碗嘅地道「泰式船麵」，湯底以豬骨熬製兩日而成，加入豬腩肉、豬肉丸等多種豬類食材配料以及脆卜卜嘅炸豬皮，香口惹味。

泰式船麵

明火炭燒     視覺、嗅覺與味覺多種感官刺激

「Ginger Grill  爐炭燒」另一主打食物就係炭燒美食。為咗俾客人一個集視覺、嗅覺與味覺嘅獨特體驗，餐廳係中央放置明火炭燒爐，客人可圍坐係爐邊，觀賞廚師以精湛嘅手藝即席烤製各類海鮮及肉食。

明火炭燒爐

餐廳更特別選用「備長炭」燒烤食材，令食物外脆內軟，仲能夠快速有效地鎖住肉汁，逼出油脂，比一般炭燒出嚟嘅食物更香口滋味。為咗進一步提升食物嘅味道，大廚以自製香茅枝代替一般燒烤用嘅油掃，將香料掃上各式燒物，將香茅及香料等味道同時帶入食物中。  

明火炭燒推介料理包括「美國有骨牛肉眼扒」，牛肉眼扒肉質鮮嫩，油脂經炭火一烤，油香四溢又能鎖緊肉汁，肉質更添嚼勁，滋味無窮。

美國有骨牛肉眼扒

至「薑」風味     融入醬料、飲品與甜品中

餐廳個名已經話你知食物係有薑嘅元素。呢度嘅泰式醬汁係鮮磨研製，當中嘅「特色薑味醬」同「薑黃薄荷沙律醬」更係以薑嘅香味及其他香料相互融合，配搭唔同嘅食物，引發出唔同嘅味道。

多種自家鮮磨研製泰式醬汁

大廚創意無限，以薑嘅元素注入甜品及飲品中，將「薑」玩至極致！薑味特飲「暖戀夕陽」係用咗豐富營養素嘅薑、西柚及甘筍等新鮮食材調製而成，係配搭炭燒辛辣美食嘅健康之選！夏日炎炎想飲返杯酒可以點杯「薑聚時刻」，佢係由波本威士忌、生薑、薑黃、梳打及糖漿混合而成，杯邊以砂糖點綴，辣中帶甜。

 左：暖戀夕陽　右：薑聚時刻

薑味甜品方面有以香滑燉蛋、黃薑及蜜糖作調味主角嘅「蜜糖薑汁燉蛋」，甜辣兩味交錯，層次豐富曼妙，用佢做一餐嘅總結最適合不過！

蜜糖薑汁燉蛋

「Ginger Grill  爐炭燒」

地點：海洋公園夢幻水都

查詢電話：3923 2323

*餐廳客人如享用晚餐，晚上6時30分後可免費入場，更可獲得4小時免費泊車優惠。有關條款詳情，請參閱：https://bit.ly/2PJ3R3X

特約分享：海洋公園