【特約分享】機場禁區新食力 LINE FRIENDS粉絲必訪主題餐廳
2019-04-18

大部分香港人都有個副業,就係……旅遊家!每年都總係要去返幾個旅行。去旅行食好西當然是常識,但上機前餵飽個肚更加係常識。機場禁區內有個24小時都有嘢食嘅美食廣場,兼且最近仲啱啱做咗翻新,有幾間全新食肆進駐,中港台等東南亞菜式通通都有得食,仲有中場客運廊嘅BITE&BITE with LINE FRIENDS,食完就登機,時間好就好多!

可愛LINE FRIENDS主題     BITE&BITE with LINE FRIENDS

香港LINE FRIENDS嘅fans,如果去開旅行,就要趁呢個機會拜訪一下佢哋嘅主題餐廳啦。乘搭無人列車去到201-230嘅登機閘口嗰邊,就可以零距離咁捕獲BROWN同SALLY佢哋喇!

餐廳由門口到用餐位置,都有好多隻唔同嘅角色造型公仔,隻隻都真心cute,有啲仲坐喺張櫈度陪你一齊食飯添~ 門口就係全球首個手持漢堡嘅MEGA BROWN!粉絲們記得要預留多少少時間,逐隻打卡啊。

Menu就以漢堡、小食為主,好似烤豬肉漢堡、香脆雞扒漢堡、炸雞翼、薯條咁,每款漢堡都用上獨特嘅韓式秘製醬汁,有辣有唔辣,全部都惹味開胃。如果你咩都想食啲嘅,唔使左揀右揀啦,叫個LINE FRIENDS 拼盤就啱晒~花生醬花生焦糖雪糕係香港限定款式,好有香港味道。至於飲品,荔枝熱情果特飲、山竹特飲都唔錯啊,清甜,仲有啲啫喱可以咬下咬下咁。但講到最cute嘅嘢食,就一定係BROWN同CONY造型嘅熱香餅啦,cute到真係要問:怎麼可以吃兔兔?!

BITE&BITE with LINE FRIENDS
地址:赤鱲角暢達路1號香港國際機場機場客運大樓 (禁區) 中場客運廊7樓7MC200及7MC214號舖

傳統泰國美食  滿泰

呢間泰國餐廳,直接由泰國進口香草同香料,連大廚亦係泰國師傅嚟,要食到傳統泰國美食當然不是夢。

海南雞飯當然係招牌主打之一,但食得多都總會想轉下口味。不妨試下芭堤雅燒雞飯,所選用嘅雞種較海南雞飯嘅更有雞味,加上師傅以秘製調味同配料醃製全雞,再用正宗泰式燒法,即場香烤,雞肉自然更入味,而且做到皮脆肉嫩。

泰國嘢點少得冬蔭功?冬蔭功蝦球金邊粉係其中一道較受歡迎嘅菜式,冬蔭功湯用上十幾種香料同海鮮等材料熬製八個鐘,味道酸辣鮮甜,同時又有青檸同薄荷葉而滲出嘅清新。金邉粉口感軟滑,兼且索盡湯底精華。而如果上機前唔想食太飽嘅話,可以就咁叫碗冬蔭功湯飲下呀,材料豐富,蝦肉鮮爽。

滿泰
地址:赤鱲角暢達路1號香港國際機場機場客運大樓 (禁區)7樓7E180號舖
電話:37980051

地道香港味   正斗粥麵專家

通常去旅行前後,總係會想食返啲地道嘅香港味,提供粥品麵食嘅正斗就啱晒喇,品牌仲曾經榮獲香港旅發局「美食之最大賞」同米芝蓮推介。

鮮蝦雲吞麵係餐廳嘅招牌菜,做法正宗且講究,係沿用傳統嘅廣州西關做法,竹昇麵一定用全蛋做,雲吞嘅蝦肉同豬肉係七三比例,仲要係正宗嘅散尾雲吞嚟。湯底以豬骨湯、蝦殻、大地魚等熬製,再加入蝦籽,湯清味濃,雲吞皮薄餡靚。

清清地想食碗粥嘅,生腸及第粥係個唔錯嘅選擇。粥底用咗幾種米混合,加埋腐竹去煲,再以廣東生滾粥嘅方式加入材料去煮,新鮮滾熱辣,新鮮嘅黃沙豬膶同生腸入口爽嫩。而干炒牛河亦唔普通,背後花咗唔少心機,河粉係由人手逐條撕開,務求令到每條河粉都可以均勻咁入味、上色,炒完出嚟感覺油分亦較平時嘅少,牛肉亦係用新鮮牛肉㗎,好有誠意。

正斗粥麵專家
地址:赤鱲角香港國際機場一號客運大樓7樓離港層東大堂7E182號舖(禁區)
電話:22610101

新加坡米芝蓮   莆田

呢間新加坡米芝蓮一星餐廳喺香港有唔少分店,而家就連機場都有啦。雖然餐廳起源新加坡,但食嘅其實係中國福建菜。

黃花魚燘飯,並唔係一般嘅普通燘飯,細心咀嚼會食得出粒粒飯香中滲有魚香,原來係因為大廚先炒香咗生米同黃花魚後,再用魚骨慢熬而成嘅湯汁嚟到去燘飯,所以啲飯先咁鮮香啊。

如果要數最受歡迎嘅菜式,就非莆田滷麵莫屬喇,呢碗滷麵嘅湯頭用咗成十二種原材料去製作,包括咗有新鮮豬棒骨、雞肉、干貝、蜆、蝦、蝦米等熬成八個鐘嘅濃白滷汁,相當有鮮味,麵條較為粗身,索湯一流,所以一啖食落去,就有股濃郁嘅鮮味喺口中爆發。另外,機場限定嘅葡田煎包嘅餡料豐富,洋蔥、肉絲等等都有,仲好juicy添。

莆田
地址:赤鱲角香港國際機場一號客運大樓離港層東大堂7樓7E181號舖


 廿四小時開放的美食廣場


特約分享:香港機場管理局

關鍵字
機場
美食廣場
客戶專訊
餐廳資料
更多
收起
本月熱門
【隨時更新】零食速報 每周新款零食、酒品點評
3天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
6天前
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
3天前