呢間餐廳本身已經喺中環同尖咀都有舖嘅，專食千層蛋糕嘅，喺美國開到過嚟香港嘅呢~ 估到未？
畀埋佢哋個朱古力千層蛋糕你哋睇嘞，呢款味嘅蛋糕新出㗎，仲要淨得銅鑼灣呢間先有得食咋。由面到底到返面，由內到外到返內都係朱古力，食落梗係有好香濃朱古力味啦，我數過，至少有成22層班戟夾住啲朱古力cream，感覺唔會太膩。
另外，呢間分店仲係第一間有埋主菜食嘅香港分店，首推紐約特色牛油果烘麵包。放底嘅麵包係烘過嘅bagel，上面首先有層cream cheese，然後就有好多好多牛油果肉舖滿晒成個面，再有一大球牛油果蛋白醬疊喺頂，望落去好green，每一啖都充滿住牛油果嘅香味，好滿足。
脆焗大蘑菇伴洋蔥汁係另一道值得推介嘅菜式，大大個蘑菇連埋香草同麵包糠焗香佢，個邊有些少脆，蘑菇味又好夠香，伴埋有真‧洋蔥嘅法蔥汁同牛油烘包一齊食，零舍開胃。
想飽肚啲嘅可以叫個飯，羊肚菌意大利飯伴溫泉蛋上到碟最興奮嗰下，就係一叉叉落隻溫泉蛋度，睇住啲蛋汁慢慢散開，滲入每一粒飯，有蛋香之餘仲有羊肝菌香，好惹味。 而清新啲嘅就有暖藜麥蔬菜沙律，強調係暖嘅，記得趁暖食。
噢，差啲唔記得講，新店有全日供應嘅「二人蛋糕套餐」，2個人，揀4件蛋糕，2杯嘢飲，再配多份雜錦鮮莓畀你，是咪好想即刻去瘋狂地食？
文：Kar
隨時接收最新資訊
讚好OpenRice專頁！