【優秀開飯熱店大賞2021】13餐廳包攬兩獎 日韓東南亞菜篇
2021-05-27

年度盛事「OpenRice優秀開飯熱店大賞」今年以「日嚐作樂」為主題,希望大家從每日品嚐到嘅美食中創造樂趣,從探索餐廳中感受香港「味」力。日前已經宣佈賽果(按此即看賽果),名單上唔單止有唔少新面孔,更有13間餐廳一口氣奪得兩個獎項!今次同大家介紹香港人至愛嘅Comfort food日韓東南亞菜,就算仲未飛到住仍然可以靠舌尖感受當地風味。


燈籠滷味(最優秀灣仔/銅鑼灣開飯熱店)(最優秀開飯東南亞餐廳)

呢間人氣滷味老店被台灣媒體譽為「北市第一加熱滷味」,係唔少人遊台必食!而餐廳終於正式上年年頭登陸香港,係海外首間分店。滷汁用上台灣總店嘅祖傳滷湯,用桂皮、花椒及甘草等數十種材料製成,鮮味又帶些少回甘嘅味道。除咗有得好似車仔麵咁自由配搭配料外,仲有已設計好嘅套餐揀,如有齊最受歡迎嘅配料嘅師大人氣組合,啱晒忙碌嘅香港人。


Nuttea(最優秀東區開飯熱店)(最優秀小食店)

圖: bellofood

手調飲品畀人印象一向都唔太健康,但呢間同樣來自台灣、以堅果手調飲品而聞名嘅茶飲店就以健康為主題,以全素堅果乳取代牛奶沖調飲品,主打純植物性嘅堅果奶同堅果奶蓋。最人氣有伯爵朱古力堅果奶蓋茶及四季春堅果奶蓋,好飲又健康!


壽司郎(最優秀尖沙咀開飯熱店)(最優秀開飯日本餐廳)

來自日本嘅過江龍迴轉壽司店,只係來港短短年半已經準備開設第十間分店,證明人氣爆燈!供應近百款傳統壽司及創作壽司,價錢親民抵食,大部份十幾蚊至廿幾蚊就食到,就連入口即溶嘅大吞拿魚腩握壽司都只係$27,難怪成日都大排長龍。


哈豆(最優秀觀塘開飯熱店)(最優秀開飯東南亞餐廳)

由台灣人開設嘅台灣特色小店,由家傳滷肉飯、牛肉麵、餃子、鹹酥雞、各種乾拌麵及甜品都有,重點係款款都好有誠意。滷肉飯甜鹹得宜;豐盛台灣牛肉湯麵湯頭非常濃郁,牛𦟌炆得入味又夠腍;招牌芋泥奶凍吐司滿滿芋泥加上奶凍,口感好特別~


阿木台灣麵(最優秀旺角開飯熱店)(最優秀開飯東南亞餐廳)

餐廳由台灣人Polly主理,家族於台灣已經有60年開麵店嘅經驗。除咗供應麵類,仲有超過二三十款小食、滷味、台式飲品甜品。招牌紅燒牛肉牛筋麵,湯底用牛骨、牛肉、蔬菜及藥材煲足20小時,牛味濃郁。麵條用高根麵粉每日手工製作,彈牙爽口。家傳鹽酥肉都有故事,因為Polly唔食雞嘅關係,佢媽媽就特意為佢用豬肉造出呢款鹽酥肉,用松板豬肉製作,外皮酥脆,肉質軟腍。


牛大人台灣火鍋吃到飽(最優秀旺角開飯熱店)(最優秀開飯火鍋店)

火鍋控一定有聽過呢間火鍋店嘅名,因為佢曾經誇張到要每星期上網搶飛先食到!一間主打吃到飽嘅台式火鍋店,供應九款特色台灣湯底,紅燒牛骨鍋、秘方麻辣鍋等都好受歡迎。仲有多款台灣直送配料及台灣小食,特色瓜仔雞水餃、屏東水蓮菜、士林鹽酥雞、真醋小香腸及梅甘酥脆薯等,唔係度度都食到!


初見(最優秀荃灣/葵青開飯熱店)(最優秀開飯日本餐廳)

圖: hkmore_foodie

招牌香草吉列牛係每枱必叫,啱晒相機食先!牛肉脂肪分佈平均,表面上鋪滿香草,食落口感嫩滑,而且份量都幾多,又附埋小火爐畀客人自己控制生熟程度。另外日式火鍋如安格斯牛肉鍋及新鮮刺身。


OpenRice優秀開飯熱店大賞2021 (查看賽果按此)


關鍵字
優秀開飯熱店大賞
地區組別
菜式組別
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06