今日已經係第二次返去買曲奇同芝士蛋糕😋😋 我平時好懶唔寫食評，不過見呢間 bakery 原來好新未有人食過食評，咁我又試吓做第一個啦☺️☺️ 上個月第一次食佢啲曲奇，係貪特意同我女話想試吓，咁又即管買包什錦手工曲奇試吓啦，點知返到屋企我哋兩母女開嚟試食就跟住停唔到口，一陣就食咗大半包😅😅 唔喝住都留唔啲俾爸爸同婆婆試😂 我鍾意佢哋啲曲奇唔太甜，好鬆化但又唔係好重牛油味，之前試過另外一啲好香牛油味但2-3塊就已經開始喉嚨痛😅😅呢間真係啱我口味，好多款揀但我又隻隻都好味。今日再經過天后，我女已經提我記住去買曲奇同芝士蛋糕，搞到宜家好似去親果頭都要去買手信咁😂😂 索性一不做二不休，順便買多幾包俾爸爸拎返公司開心 share😜😜希望佢啲同事都鍾意啦😙😙

知道間嘢都開左一陣，今日懶懶地決定買返屋企試下。我地 order 咗 Fish & Chips, Calamari & Chips, Onion Ring, Deep Fried Oreo。 點知個 Chips 一咬落去成口油，Fish 咬落去啲肉質好實，粉醬好厚，Onion Ring 完全食唔到洋蔥味，又係得粉醬味，Calamari 好硬。唔知係咪已經難食到無感覺，個 Oreo 係還可以放落口食嘅。總之真係好難食。可憐我個女之後半個鐘已經因為油得滯肚痾😓😓唉，呢間嘢真係要 black list 咯！

噚日同媽子兩母女拍拖，誤打誤撞去咗呢間越南菜館。我地叫咗以下幾樣嘢： 湄公沙律 素沙律，好香九層塔味，本身撈咗魚露，加係蝦片上一齊，感覺清新亦令人胃口大開 😜 蒸粉卷 媽媽至愛，粉皮蒸到半透明好滑！旁邊配上3片扎肉，口感同平時食開嘅好唔同，我同媽子搶住食第3片呢。另外亦有少量青瓜芽菜做伴菜，可以清新一下味雷。碟蒸粉卷俾坊間嘅普遍大碟，我地亦食到清哂底 😋😋 烤豬肉春卷撈檬 因為我貪心，想食烤豬肉又想食春卷，但兩個叫哂真係太多無可能食得哂。係唔知點取捨嘅時候，膽粗粗問下可唔可以雙拼，點知老闆又肯喎，真係好開心！個檬粉感覺同出邊嘅有啲唔同，比較濕潤，亦配上大量蔬菜墊底，只要落好少魚露撈埋食已經好夠，所以唔會好咸好酸，真係食到檬粉同菜本身個味。咁當然要講下啲餸啦！烤豬肉唔乾帶甜味，有啲似美珍香果啲五花腩肉乾咁，不過又無佢咁甜就係啦，咬到少少豬皮位好有咬口，好味！👍🏻👍🏻 最後係春卷喇，唔係炸到好噥好脆果啲，有咬到本身春卷皮嘅口感，唔咸但夠味，唔落魚露都好好食！好彩佢地俾我雙併等我可以食哂呢兩樣嘢，大滿足！ 其實我同媽子本身係好鐘意勁落魚露果種人，但今次都係第一次反傳統只係落少少魚露就夠，因為啲食物本身已經好出色。順帶一提個魚露，同出邊果啲好唔同，唔咸唔酸，真係只係俾你調味㗎咋！餐廳話佢地唔落味精，我信，因為成餐飯我地都唔囗渴唔駛飲水。 個靚姐好搞笑，講嘢同動作都好 cute，佢話佢叫 Barbie ，我覺得佢真係好可愛 😍😍 佢另外同我話原來佢地逢六日公眾假期有 lunch semi buffet, $88 有主菜，小食任食仲有嘢飲。貪心嘅我下次要帶埋老公去試埋其他小食先得😜😜 我本來好懶寫食評，不過呢次忍唔住想寫，見到其他食評話佢地啲嘢好似唔正宗，我本身唔係越南人又唔係越南大，所以唔知，但係我嘅總結就係試過之後啱我口味最重要！Barbie, 你放心， I'll be back !! 😎😎

尋晚成夜晚十點先同男友出街食飯，因工作辛苦想食餐好D，舒緩下心情，所以決定食西餐。又因為世界杯關係，都係食意大利菜比法國菜安全，甘意大利贏波起碼個廚師心情靚，煮D野食一定會比法國菜好。

甘時間上都唔早，所以方便D去左屋企附近既意大利小店試試。我同男友都好肚餓，就諗住叫個意粉同spear ribs 分住食。個sales manager 幫我落單果陣聽到我想叫ribs 之後，佢就停左一停，跟住就話如果我地真係想食ribs 既，就最好cancel 左個pasta，因為個portion 大到已經足夠我地兩個share 食。我心諗$129 既ribs 有無大得甘緊要呀？不過見佢好有誠意甘suggest，好喇，就聽佢話，最多唔夠食先再order 過。個manager 見我好似仲想試其他野，甘佢又suggest 最多叫個salad，佢幫我安排½ portion，我又諗甘誇？連salad 都淨係俾½ portion 我?

我男友開頭笑我，話我個樣呃人唔似甘大食！好喇，D 野食開始上抬，先黎杯白酒同Sangria，白酒OK，Sangria 好飲，個manager 話落少左D 酒，話驚太strong 我未必鍾意，叫我試下味先，唔夠佢幫我加番。個feel 好warm，因為佢有幫我諗過！D 香草麵包好香好脆，仲好新鮮添！Salad 都好好味，發覺佢個½ portion 都唔細，足夠我地兩個share。

登登登…登…主菜出場，我見到個ribs 果陣呆左，個area 有1 ½ - 2倍我塊面甘大，唔怪得佢話足夠我地兩個share 啦！當然個portion 大會俾人感覺抵食，但最緊要都係味道~~ 先聞一聞，好香，切開，好”諗”喎，第一啖，好juicy，yummy ~~ 第一時間就諗，唔駛再去Txxy Romxxs 喇，因為呢度好味得黎仲抵食夾大件！不過end up 我地都係食剩兩條ribs，因為我地食哂伴碟既greed salad 同薯角(都唔少架！)！Oh，我地中間再叫左杯house red，so far so good 啦！

仲有值得一讚係D service 真係好好，雖然鋪頭細細，但個manager 同D waiter 都好nice，restaurant 既格調都幾grand 既感覺，但佢地既service attitude 又令你feel comfortable 得黎又唔做hotel 甘局促。我知道我一定會再去，仲要介紹多D 朋友去添呀！

Order List:
White Wine x 1 glassHKD 49
Red Wine x 1 glass HKD 49
Sangriax 1 glass HKD 49
Saladx ½ portionHKD 40
Spare Ribs x 1HKD 129
Sub total:HKD 316
+ 10% chargeHKD 32
Total:HKD 348

上個禮拜既澳門之旅，其中一晚諗住過Taipa 既小飛象或者木偶食葡餐，既然黎到，點都要食返餐。上左的士之後，司機叔叔話果兩間D水準已經無咁好，就介紹左我地黎呢間海島船，經我經驗所得，的士司機通常都特別識食，好，信你一次，就試下呢間海島船~~
我地三人order左羊脾扒，咖哩蟹，大蝦，蒜蓉炒西蘭花... 羊脾扒稍為，味道OK，大蝦唔錯，大隻得黎幾爽口，菜就都係果D啦，咖哩蟹好味，味膿同埋個汁似葡汁多D，個waitress問我地要唔要蒜蓉飽，梗要啦，有咖哩汁嘛！點知個蒜蓉飽黎到果陣，好香喎，見到佢整得好好味咁，即刻食左一啖，熱辣辣好味呀，脆口同埋D蒜蓉香係由你個鼻經個口，再又食道落個胃，oh my god~~ 再試下個蒜蓉飽加咖哩汁，反而無咁好食，太咸！我地三個人食左兩個order足足十六件先覺得OK，最後梗係凈食蒜蓉飽唔落汁啦！你可以話妹仔大過主人婆，但真係好好味，其他主菜都OK，每人約$250唔算平又唔算好貴，都係果句，OK 咯！但個蒜蓉飽真係好驚喜~~

剛剛上個週末去左澳門過我同我男友既Birthday Trip。之前都聽朋友講金沙個Buffet 好抵食，今次一於去試下。禮拜五9:15pm 先到金沙，望望個牌，下？到11:00pm 咋，仲要滿坐！有D 失望，都知衰，無訂位嘛~~~ 跟住個waiter 見我地得兩個人，就照俾我地入去，原來唔係真既滿坐~~~
Anyways, 入到去，都未坐，第一時間同男友走去睇下有乜食啦！噢，個食物櫃好長喎，差D見唔到尾~~ 因肚餓關係，食野先喇，佢地有好多沙律選擇，有自己溝，亦有幫你溝埋味既，我就樣樣試D，唔敢食咁多，因為見到後面仲有好多野食。D 沙律好得，雖然間間食Buffet 都有沙律食，但金沙D 菜真係好新鮮，我試過唔落沙律醬食，都可以食到D 菜既甜味，我係香港D Buffet 就未試過喇！
沙律開完胃後，梗係食主菜啦！我男友唔俾我用大碟，只可用沙律碟，驚我唔覺意食太多喎，收到！既然得隻細碟，唯有每款要少少啦~~ 冷盤有刁草三文魚，好少既日式冷麵，日式漬菜，唔錯喎，好有水準，唔係D求其行貨。第二碟食左凍蝦同凍蟹，其實我平時係Buffet 唔會食呢D，通常唔掂，費事浪費Quota嘛，但見到佢地果D好似好靚咁，反正細碟，試下啦，天呀！我居然可以原全唔落source 同fresh lemon juice，但都勁甜勁彈牙，係真唔係呀？既刻想走去要多碟，但俾男友住，要我試埋其他野先，唉，好喇！
其他主菜，印度烤餅加咖哩source，唔錯，OK。有燒味，要左件細既燒鵝脾肉，OK喎，皮都仲少少脆，肉又唔肥，good，估唔到Buffet 食到呢D質數既燒味，仲有其他熱盤都唔錯，但太多，真係試唔哂咁多款，已經係要一件，再同男友share先算可以食多幾款~~
又到食凍野，壽司賣相幾得，但要食埋D飯咪又少D Quota？噢，佢有個魚生專櫃，Salmon, Tuna, 八爪魚同壽司蝦，個師博好細心咁每野既切三至四片我，等我可以同男友share，唔錯，都夠新鮮。
到甜品啦，款式都Ok 夠多，但同出邊D Dessert Buffet 差唔多啦，有朱古力噴泉，切定D 細件生果俾你自己整，我就鐘意個香蕉朱古力脆皮，好味！仲有個雪糕，都有四種口味俾你選擇架，但我食甜品果陣都10:45pm，無哂朱古力味，有D扁咀唔開心，咁我見到咁夜，無理由為我一個要人地拎盒新既出黎嘛，但唔知係咪個師博見我唔開心，跟住即刻拎盒新既朱古力雪糕出黎，仲見硬得滯，幫我"筆" 左兩球落雪糕杯度，我即時開心哂，D 有Strawberry 肉既雪糕都好好味架~~
嘻嘻，都仲未完架，食完甜品，諗諗下都係未夠候，又返轉頭走去拎左兩碟凍蟹，個師博可能見都就收工，同我講明佢地D野唔會留第日，跟住幫我揀哂D靚既蟹拑，仲同我我可以坐底食到11:15pm 都無問題，只不過係佢地收爐先，另外個waitress 就幫我拎定兩杯果汁俾我慢慢食~~~
講真，成個Buffet 過程都好正，D 野好食，服務態度好，仲要價錢平，我兩個人加完一都係$304，係香港呢個係一個人價錢，仲要無食得咁開心。我同我男友講，下次再去澳門一定要再食果度既Buffet，簡直係必到之地~~~