新春去澳門燒炮仗, 結果變成賭場燒銀紙, 
化悲憤為食量, 食餐勁既, 雖然已訂位明天旅遊塔食自助午餐, 但一於少理, 因為肚餓, 食左先算.
新春期間真係人多,
晚上七點左右在門口等了十多分鐘才可入座, 入座前先結帳才進場, 進食時間沒有限制, 好過葡京酒店自助山要分時段入座.
第一次來, 環境感覺 OK 似高級食堂,
當然不能以星級酒店比較, 始終都係美食廣場嘛.
開位坐低後循例出去打個轉走個圈, 看看有乜野食, 款式好多, 不愧係拉斯維加斯式賭場.
自己主打食冷盤 :
生蠔, 長腳蟹, 翡翠螺, 青口, 凍蝦, 煙三文魚, 什錦薄切凍肉, 吞拿魚三文魚魚生等等等等, 有殺錯無放過, 熱盤真係無食過.
整體來講味道不錯, 合格有餘, 食物補充添加也算快, 侍應招呼換碟不算怠慢, 一舉手就有人來.
要彈既係 ......
1) 生蠔要排隊等待幾分鍾, 因為開蠔開唔切, 每次補充祇有十多隻,
三幾個人分零鐘就掃光, 直到九點幾仍見有補充.
2) 翡翠螺補充一兩次後直至離場也再沒有出現了, 莫非新春人多, 還是來貨數量太少
3) 全場祇有一台自助飲品機提供清水飲用, 反而橙汁及蘋果汁各有兩台飲品機分別在場內左右兩方, 飲清水要走來走去有點不便.
食飽後見有 Haagen-Dazs 雪糕, 重有2種味道, 整個鴛鴦雪糕球後就徹底了結呢一餐了.
Walk In 價每人 $288 + 10%, 但入境澳門時在碼頭出口處有賭場穿長靴靚女派發傳單, 傳單上有優惠打七折, 碌咭埋單每人才 $230.50-
講真, 此餐二百多元有香港三四百元的酒店自助餐質素個人認為算是有賺了, 好似食家 "思思糧" 話齋 : [以價錢來衡量的話, 某程度上都尚算抵食]
1
