荳子 (大埔超級城)

營業中

休息中

為食豬呢日去大埔玩，去到呢間cafe食個brunch。呢日係周末，過咗正常午餐時間都仲要排隊。deluxe full English all day breakfast: 呢個all day breakfast一上枱，餓咗一陣嘅為食豬對眼就發晒光。包括咗好多種類嘅嘢，啱晒貪心嘅為食豬。其中炒菇嘅份量唔少，加咗少少香草炒，菇味好濃郁。黑松露炒蛋雖然炒得唔算滑，但有香濃松露味搭夠。為食豬最欣賞係兩個好似窩夫，又似蛋糕嘅糕點。切開入面唔會乾爭爭，帶少少濕潤，比較似軟熟版嘅窩夫，帶啲蛋香味。就咁食其實已經好好味，加埋附上嘅cream，就變成一道甜品，好滿足。千島醬蟹棒蟹籽帆立貝薄餅: 本來為食豬都擔心係咪超薄批，好彩最後都係厚批。可以見到用料都唔少，每一塊都有一粒帆立貝，仲有蟹棒同唔少蟹籽，芝士都唔少嘅。 為食豬覺得批底做得唔錯，個底焗得脆卜卜，中間都仲保持鬆軟。呢兩款食品都跟一杯餐飲，為食豬就揀咗咖啡同檸檬蜂蜜，兩杯都不過不失。見隔離枱嘅甜品好吸引，下次可以試埋。