PangSuetYi's Profile

今日中午同朋友行過觀塘駱駝漆大廈，見到呢間Cafe新開張，餐廳環境幾闊落，啲咖啡味又幾香於是去試下～坐底睇menu原來呢間Cafe主打低碳&生酮飲食+手沖咖啡！我習慣Lunch食得light d ，所以我揀左個低碳慢煮雞胸牛油果黑醋沙律嚟試下，不過我見睇到隔離台嘅雞排脆肉瓜麵都好吸引，我就問侍應哥哥可唔可以轉雞排試下，佢地又好好人幫我轉喎💕上到台果然好吸引，雞排外脆內嫩，雞排應該係即叫即整，上台仲有熱氣出緊👍🏻 個黑醋汁應該經過調配，比起一般黑醋汁濃厚，多啲層次，唔係一般餐廳嘅黑醋另上👌🏻 呢個位有意外地加分～🥗🥗🥗另外～barista 哥哥係度沖緊手沖咖啡，唔怪之得咁香咖啡味‼️我就唔執輸叫左個Hand Drip-Nutty，Day One 嘅 Hand Drip 係用聞香杯上，最大程度比客人感受翻咖啡嘅香味，令我對杯咖啡充滿期待！雖然我第一次飲Hand Drip，但係Barista 哥哥會細心介紹咖啡豆嘅特色，飲落去嘅口感同香味，幫你揀最啱自己嘅咖啡，佢沖嘅咖啡嘅唔會太苦太濃、入口順滑，比到我好唔錯嘅體驗👍🏻👍🏻😉…Read More

其實上環中心係多寫字樓，中午選擇都係好多，但一入夜真係唔知食乜。機緣巧合之下同男朋友發現左間車仔麵舖，係新紀元廣場。 見到佢裝修幾得乾淨企理咁就試下啦。🤩我地叫左個千杯不醉雞翼，呢個醉雞翼係熱食黎，同一般凍食醉雞翼唔同，好入味，入口係好香嘅花雕酒味，推薦試下。👍🏻另外叫左個麻辣鴨血，唔算好多地方有鴨血食，好滑少少辣味，惹味得來都幾好送麵食。🤤🤤講翻主菜車仔麵先，我就叫左蘿蔔、豬軟骨同埋滷蛋，蘿蔔係好新鮮同清甜，入貨做得唔錯；豬軟骨唔會油，骨同肉比例啱啱好，同埋好入味，d肉煲到林曬，係意料之外嘅味道。👍🏻👍🏻🤗男朋友個碗有叫黑松露餃子，係黑松露超濃，我覺得幾特別所以推薦😁要提一提嘅係205辣醬，佢都幾辣，但成個麵因為個辣醬變到好香，可能係因為我鍾意食辣啦，我覺得揀佢做湯底無揀錯。👍🏻我地仲叫左個菜嘅，食得健康d呀嘛比大家睇下個點菜紙，價錢上都幾經濟，係上環價黎講dinner可以一戰。…Read More

經住大角咀朋友介紹去到呢間西餐廳，地點唔算方便，主要都似係做街坊生意同回頭客，搭港鐵就去到奧運站/旺角站行10-15分鐘。雖然地理位置唔算太方便，但我係絕對會翻撻嘅！！！🤤👏🏻呢間餐廳係有生蠔吧嘅，全部都係即叫即開，由於我同朋友都係生蠔迷，咁就一定要叫蠔啦。我地叫左美國太平洋生蠔。 呢款生蠔係大隻得黎爽口，而且海水味濃嘅，我個人就鐘意海水味濃dd嘅蠔，不過聽職員講佢地仲有賣美國白珍珠生蠔，相對淡口同厚肉，今次就無試到，下次試試先！💫💫另外我地叫左個寶雲酥羊🐏架，酥皮係羊架畫龍點精嘅地方，羊仔肉比較嫩，脆卜卜嘅酥皮包住，口感即刻多左層次，但坦白講，如果羊架肉汁唔夠酥皮就好易分開同埋成舊口感更乾，呢次舊羊架啱啱好甩骨，嫩口唔會軔，所以火喉控制好重要，呢間西餐廳我覺得火喉控制上係出色嘅，，一陣提及到嘅戰斧扒會更明顯。主角黎喇！ 個美國安格斯戰斧扒真係扒如其名，成個戰斧咁大舊，😱😱肉質鮮嫩唔在講，整體燒到大約6成半熟，肉汁完全被鎖住，職員有原件上左比我地“哇哇哇哇”完先送翻入廚房幫我地切件，佢話太大件喇怕我地手軟呀，真係超級貼心！ 然後個安格斯戰斧扒真係無令人失望，一咬牛嘅油脂同肉汁完全係完美balance ，好香牛味，為左呢個牛真係值回成餐飯嘅價錢，重點係戰斧扒嘅價錢真係相當親民，只係要800蚊左右，我地4個成人食係飽有餘。本身驚唔夠飽我地仲叫左個飯打底，我地叫左個波士頓龍蝦併蟹爪肉意大利飯，我個胃仲留戀緊個戰斧扒，繳左械🏳️🙌🏻，只係食左幾啖，望住朋友開心食🥺，個蟹爪肉risotto真係好有誠意，啖啖蟹肉係上面，一隻蟹都無幾多肉，唔知廚師拆左幾耐🦀🦀先有咁多肉呢？？ 真係食誠意都抵呀！好喇，到🧁甜品了！ 我個胃都休息完，我地叫左個榛子批配窩夫，榛子批面係舖滿碎果仁，餅底係瑪利餅，配榛子凍餅，唔會太甜又香榛子味，感覺幾新鮮，另外個窩夫係有鮮士多啤梨配，味道真係相當唔錯。總括黎講，我覺得餐廳設計叫Paris 18除左餐碟同佈置有巴黎鐵塔之外，係同法國餐無太大關係，不過都坐得舒服又乾淨，8位以下朋友傾下計都坐到，今次4個人就perfect，佢仲有2人套餐，好似都幾抵食，等我下次帶男朋友黎再食過！！😍😍…Read More

The Flying Elk 係喺蘭桂坊附近，地點唔難搵，今次同朋友去dinner，試過整體都滿意嘅！👍🏻因為有個朋友收工後趕黎，所以我地叫左少少前菜飲飲杯野先🍸🍸首先要讚嘅係佢嘅Drink menu選擇多真係可以媲美酒Bar，以下係我影嘅一小部份咁我試左佢一杯sweet wine，同埋叫左Truffle Popcorn 同 Deep Fried pig’s ears。Truffle popcorn 比較乾身香口，見到係用爆谷機新鮮整出黎，唔係包裝好嘅爆谷，佢配左黑松露碎喺面，香味同口感都唔錯！！ 但真係要襯熱食，新鮮個時係最好味！😋另外仲有個小食係deep fried pig’s ears，佢啱啱上菜個時我地仲以為係魷魚腳🦑 但食落先知係🐷耳，雖然係炸嘅，但油溫控制得好好，一炸好就上碟，唔會吸左好多油，比較清爽，配酒小菜黎講推薦！無幾耐朋友黎左，就上主菜啦！首先講下個Tar tar lamb in dill啦，羊仔肉入口即溶，唔會有腥味，上面配菜嘅酸蘿蔔絲酸酸甜甜好開胃！味道似德國常見嘅酸菜，好啦，佢好成功打開我地個胃🤤🤤🤤另外，我地叫左個Baby Chicken & L Obster “POT- AU- FEU”，waiter會先送上一個小小嘅茶杯，佢同我地解釋話係龍蝦湯，係baby chicken 🐔嘅汁黎，呢細細杯湯好重龍蝦味，食落就知佢係落足料熬出黎，雞嘅嫩滑同濃蝦好夾呀！仔細一望，原來佢個餐刀係用瑞典出品，由放龍蝦汁嘅茶杯仔到餐具都精心挑選，睇得出用心之處！ 我地問waiter有咩推薦菜，咁佢就同我地講試下呢個Roasted Scallop，係佢地嘅signature，佢個扇貝的確唔錯，好新鮮同彈牙，個特制醬汁令到個味道豐富好多，抵試嫁！！哈哈哈，終於到甜品喇！個人相當推薦佢個Creme Brulee，我係一個好鍾意食甜品，但又怕甜嘅怪人，佢唔算話好甜，加上D nuts好香口，完美作結我地個dinner gathering 😍😍😍…Read More

係元朗都幾多好野食嘅去左又新街 行到B仔附近佢店面細細唔係太起眼Order 左個set dinner +18蚊就有前菜同湯我叫左個黑毛豬扒配意粉味道相當唔錯🤤🤤Waitress 建議7成熟入口果然嫩滑扒仲好有肉汁仲有手掌咁大大塊要比一比正評👍🏿👍🏿係估佢唔到嘅之後佢加18蚊嘅前菜有ham同栗米湯我覺得栗米湯嘅蒜蓉包幾高質會再去！埋單都係100幾蚊🤤問左9月會出埋set lunch 我覺得要去再戰一下！…Read More

係上環PMQ附近靜中帶旺餐廳坐得舒服 Waiter 反應快 服務貼心 講到食物 前菜沙律🥗係main course size沙律菜新鮮 有黑醋麵包陪襯完完全全將我個胃打開！主菜叫左肉醬義大利麵🍝佢出色嘅地方係手打麵好有咬口軟硬適中 份量足夠 最估唔到甜品terisumi 居然仲大杯.......水杯咁 但好好味 咖啡味濃係完全可以挑戰專業餅房成餐係無加一感覺係物有所值係條樓梯上pmq少少辛苦啦但為搵好食 我覺得值呀！ 會再食…Read More

散水餅之選位於IFC city super 入面單件價錢中位數大約$50賣相就相當高質味道上 就揀左幾款講下最出名嘅抹茶餅 覺得無太大驚喜唔算好重抹茶味 但口感都幾滑同埋唔會好甜 雜莓撻係意外覺得好食嘅餅底夠脆士多啤梨好甜係高質嘅個白桃蛋糕我會讚白桃好清甜餅底不過不失 夠清爽藍莓個個就還好啦macarons 比較甜唔食嘅話芝士餅底都幾好似New York cheese cake 無太大驚喜 不過每種都唔差 各有千秋最出就賣相啦 影相都幾靚嘅…Read More

同一班同事去左食晏味道都唔錯.🤔不過青醬味唔出..份量黎講lunch 都ok相比起其他主菜嘅黎講都比較多 可能係因為意粉 比起個黑毛豬腩 佢比較抵食少少佢個出曬名嘅流心牛角包的確唔錯嘅好香小龍蝦味入口啱啱好 仲暖暖地 一句講曬就下午茶☕️食幾好 但中午就差dd 喇但服務就真係oo地咀個waitress 送個菜上黎 問佢係咩黎 佢話唔知😅😅 之後換碟又成日跌刀刀叉叉咁.... 嗯 可能仲未熟手啦 要加加油 有進步空間💪🏻…Read More