or#Tm66307793's Profile

今日去咗文華度食過下午茶，本來想去cake shop，但一早已經滿咗，所以唯有去隔離，反正都可以食多幾樣野。食嘢嘅種類非常多，中餐，西餐，東南亞，種類可以包羅萬有。今日我哋食印度咖喱，意大利粉，海南雞，同埋沙律。就係因為侍應特別推介海南雞，我哋先至會叫，點知最失望就係海南雞，肉質非常粗糙，真係超級普通，但係都要收成三百幾蚊，我唔介意俾貴啲食好嘢，不過呢個海南雞就認真唔好ok。印度咖喱同埋沙律就真係值得一讚，雖然都要俾差唔多二百幾蚊食個沙律，但係呢個沙律我就覺得好值得叫蘋果琴譜嘅配搭，非常清新，再加埋新鮮嘅沙律菜，藍莓，用料新鮮配搭，味道亦都掌握到非常好。印度咖喱就真係唔錯，唔止有米飯，再加埋薄餅，味道亦都非常出色好有印度嘅風味🙏🏻…Read More

中環街市開左咁耐都無認真行過，今日終於有時間放鬆吓去行吓，睇吓入面環境和食店，先發現有精品咖啡店，Chart Coffee 仲係由得獎虹吸咖啡師主理，咁啱睇到做緊期間限定，愚人節特別飲品，但係詳細個名我真係唔鬼記得。即係覺得好特別有冰粒嘅咖啡，加埋橙嘅香味同埋梳打水，口琴我啲乜嘢我就冇仔細去研究，喺咁熱嘅天氣可以飲到呢杯果汁加咖啡香氣口感嘅飲品，連我唔係咁好咖啡嘅人都覺得好正，趁佢而家仲有得飲嘅時候大家不妨去試吓😊😊😊唯一美中不足嘅時候就係覺得價錢有啲貴…Read More

冇諗過呢間居酒屋冇咁難訂，門口外型十足京都小店，不過幾分鐘時間，推門入去時，已發覺場內坐滿人。前菜薯仔雞蛋沙律非常特別，比我想像中好味，外型都非常前衛，好似隻刺蝟咁，薯片脆卜卜加埋軟綿綿嘅雞蛋沙律，非常之夾，口感正。呢一度前菜都好想食多碟，不過之後有好多嘢食，所以都冇咁做。是夜最鍾意嘅菜式絕對係全隻三黃雞西班牙燴飯。師傅表示，這道菜融合左南洋海南雞飯和西班牙傳統海鮮飯的特色。雞胸入口卻意外嫩滑鮮美，有海南雞的風味。至於香烤雞腿也皮薄脆、肉多汁。雞鮮之外，仲食到甘香的高湯精華，更完全滲透到每粒日本越光米當中，加上特製山椒薑蓉，味道豐富更高層次，所以燴飯全部清空。…Read More

英國大廚Simon Rogan嘅第一首家海外餐廳，崇尚自然有機，不單裝潢綠意盎然，更提倡產地直送概念，大量選用新界農場的有機食材。就係沖住呢個點所以就去試。食材嘅運用的確非常驚喜，好多意想不到嘅食材融入煮食當中。譬如一啲好本地食材好似萵筍，又或者特別嘅蔬菜會融入甜品。麵包布丁亦都非常不錯，包體係牛角包有好多層，索咗經過發酵嘅樺木液配上松露香，食落好似芝士吐司，簡單中帶點不平凡，咁多樣當中我最愛係佢。絕對係英國菜本地化，非常有特色嘅餐廳！…Read More

本身就係冇肉不歡，所以見到就新開了一間主打煙燻慢煮及燒烤的 Smokehouse Bar & Grill，加埋打正美國德州旗號，就肯定黎一次大魚大肉。打頭炮係最勁嘅肉類盛宴，今次嚟食就係為咗試吓佢哋嘅肉類品質，成個拼盤真係夠晒多，有煙燻牛胸肉、墨西哥辣椒芝士腸、圖林根腸、烤豬肋骨、手撕豬肉、檸檬椰菜沙律、燒粟米及自家製醬汁，再蘸上自家製的醬汁一齊吃，絕對惹味十足。其實我哋兩個人食都已經食到好鬼飽，不過老公想試其他嘢，所以我哋都有薯條同埋青口，不過老實講海鮮真係爭啲，唔該大家嚟食都係叫返肉食比較穩陣啲👍🏻…Read More

因為帶住BB，最理想就係行商場，尤其係海港城，帶住BB真係冇得頂，樣樣都齊全。就係行BB嘢個陣見到有間新開嘅韓國燒烤，決定一家三口一齊去，即日就喺OpenRice訂位，仲有個專屬套餐，仲可以額外用埋海港城coupon，所以真係好鬼抵食。套餐真係好豐富，除咗有醬油鮑魚帶子，仲有非常之多韓國特色泡菜，最好仲可以有得無限添加，呢樣真係啱晒我哋最鍾意食韓國前菜嘅人。燒烤更加唔使講，肉類非常新鮮，而且仲有侍應親自幫我地燒，食物同服務真係唔話得！最感動嘅位就係員工非常親切，因為同行有個BB，冇諗過侍應姐姐仲攞埋私伙玩具俾小朋友玩，知道BB心急等燒烤食，仲切咗啲水果片俾我BB，呢啲暖心嘅行為，真係唔係間間餐廳嘅員工都有，完全感動咗我同我老公。下次有機會我一定唔會再帶埋BB同老公一齊去食！…Read More

今日黎開旺角，就去朗豪坊行街，因為老公想食西餐，所以就直接上了頂樓試吓呢間既有自助餐，又有主菜嘅西餐。朗豪坊頂樓都有好多餐廳選擇，但係呢間呢就比較光猛啲。半自助餐，其實選擇都比想像中多，沙律；凍海鮮同埋貝殼類；幾款火腿，熱湯，飲品，麵包，甜品，種類都可以話相當豐富，尤其係甜品同埋沙律，每様至少都有五款選擇，其實都可以話唔欺場㗎啦。當然海鮮就真係爭啲，選擇少同埋新鮮度都係差少少，不過其他都不過不失，以價錢嚟講都算係交足功課。主菜其實都值得一讚，我就點咗牛柳拼大蝦，老公就揀咗燒春雞，賣相都唔錯，味道亦都OK，以價錢嚟講，我覺得性價比極高😊…Read More

今日行街，行開海港城，發現進住咗好多新嘅餐廳，八一漁八係其中一間，取替左之前唐人館嘅位置。本身就一個勁鍾意食海產嘅人，冇諗過商場竟然有主打海鮮嘅中餐廳，所以就好想去試吓究竟呢間嘢掂唔掂。出乎意料之外，商場入邊嘅中餐廳竟然可以食到咁高質素嘅海鮮，因為中菜嘅海鮮最緊要第一個字就係新鮮，最難忘係個白胡椒蟹，選用頂級馬來西亞砂朥越胡椒粒，香氣醇和，經自行炒香、磨粉後，加入蟹隻燜焗，蟹鮮、胡椒香氣係嘴裡徘徊，絕對可以講得上係唇齒留香。仲有就係個甜品，食咗咁多到海鮮，加埋各種嘅肉類，最後嘅甜品係用咗椰青雪糕布甸，具體個甜品名真係唔記得，不過整體口感真係好Refreshing，令到成個咁我都非常清新，亦都解除咗好多油膩感，真係值得讚！…Read More

紅磡呢一間陳茶館都已經食咗幾次，價錢抵食，芋圓真係做得好食，種類都算多，如果唔係因為怕肥都真係會想日日食，因為我真係會芋圓迷芋圓好食就唔使講，不過熱食就認真麻麻。因為屋企老人家要食熱嘢，所以上次排咗僱員就順便嗌咗個熱嘅糖水，薑味的而且確好濃，不過唔夠甜，同埋同凍食嘅芋圓相差甚遠，所以都建議大家食飯凍嘅👍🏻…Read More

知道喺金鐘太古廣場新開左呢間粵菜，咁啱又近公司附近，所以決定同班朋友來試試。地點的而且確非常方便，喺太古廣場中庭一望就見到，餐廳裝修都好特別，就好似世外桃源咁先要經過一個細細的門口入去，之後就像飛船嘅內籠，牆壁掛滿中式風味的擺設，有種非常夢幻的感覺。地方同埋座位都好闊落坐得好舒服，都適合一家大細，又或者同朋友去食。因為大家都唔想煩食啲乜嘢，所以直接就叫咗個六人套餐，套餐嘢食，真係好豐富。開胃小食，三小品當中包括有子薑皮蛋、乾蔥牛柳粒及麻辣手撕雞。如果食得辣嘅朋友，我就非常推介麻辣手撕雞，夠辣同埋非常惹味！鮮蟹肉粉絲煲，亦都係驚喜之作，炒得乾爽不油膩的粉絲口感煙韌而且充滿鑊氣，索盡了蟹肉鮮甜的味道。因為嗰晚我哋都有幾個男同事，所以都特登叫咗隻芝麻糖脆皮雞，賣相好有舊式嘅風味，直程係將成隻雞擺設到好似鳳凰咁，芝麻糖脆皮咬下完全就好似薯片咁脆口，非常推介👍🏻…Read More

平日下午茶時段，冇諗過食UCC都要排隊，不過因為太耐冇食，加上入邊真係坐得舒服，所以就等咗一陣。嘢食都唔錯，意粉沙律麵包都幾好睇，意粉比想像中彈牙，煮得啱啱好，海鮮沙律都幾新鮮，仲會配麵包，窩夫真係整得唔錯，即叫即整，所以整體質素認真唔錯。尤其是如果你係帶住小朋友嘅父母，呢間餐廳都算係小朋友Friendly嘅餐廳，BB凳就唔使講，最重要係餐廳有兒童餐，同埋好多食物小朋友都係可以食到嘅。座位夠晒寬敞，我哋連埋BB加埋BB車都夠位，非常適合有小朋友嘅父母帶埋小朋友一齊去食😊…Read More

生日慶祝，老公訂了請新開張的赤之匠同我慶祝生日。舖頭裝修好新淨，室內設計也很有格調，，而且私隱度好高，客人可以喺私密嘅房間裏面享用鐵板燒確實係喺香港好少見。食物方面，質素都係非常之高。鐵板燒澳洲活黑邊鮑魚體型夠大兼口感彈牙，品嚐起來有無窮的滿足感！本身澳洲出產的鮑魚已經份外鮮甜，再加埋鹽、黑椒、同埋秘製醬汁作鐵板燒的黑邊鮑，更加提升海水鮮味，同時令彈牙肉質增添一份柔軟口感，將海中極品的味道口感淋漓盡致地發揮！飛驒和牛三文治我都覺得非常之正，選用帶牛奶香甜的麵包，用上富肉味的和牛西冷，最重要係麵包兩面分別抹上帶籽的芥末醬及自製番茄洋葱醬，一口咬下有和牛柔軟與脂香肉味，兩款醬汁的微酸也能解膩兼提升肉味。今次嘅生日飯老公真係抵讚安排得非常之好，好開心！…Read More

即日book 即日有位，真係非常幸運，臨時打去問，竟然有位攝到入去，連個接電話姐姐都話我好彩🎉。店舖地方唔大，這次安排我哋坐吧枱，每台客人都有一位師傅席前烹調壽喜燒，介紹每一道菜嘅食材和產地，可以近距離觀賞大廚為我們烹飪料理嘅過程，舒服悠閒地等吃。mori 主打關西壽喜燒，以燒的方式烹調，即加糖同埋少量壽喜燒醬汁令和牛有焦糖化的效果。所以對於鍾意食牛嘅朋友尤其是我呢一種牛魔王，都真心覺得食物品質同埋服務都好唔錯。其實價錢嚟講，我覺得都算合理，同埋飯都係無限添加，不過真係唔好貪心，因為食得太多後邊真係食唔到，因為食得太多後面都會覺得好油膩。…Read More

公和出品的豆腐花味道真係一流，食過好多老字號，但唯獨公和嘅豆腐花真係好好味，好滑，豆味重。美中不足就係大碗豆腐花用膠碗，如果用瓷碗就真係perfect。（細碗豆腐花都仲係用緊瓷碗👍🏻）除咗豆腐花，今次我哋仲食埋釀豆腐，豆腐卜，魚腐，味道都唔錯，你可以自由配搭，又或者叫三寶都得！比起以前，公和而家真係完全係新形象，唔只門面，食物已經唔再限制於豆腐類，仲多咗好多選擇，如果想食地道風味，真係可以一試👍🏻…Read More

呢間餐廳真係可以話的相係完全極度難book。其實我已經book咗大半年都book唔到，皇天不負有心人，終於俾我book到間房試到呢間餐廳係咪即係傳說之中咁神。地方比我想像之中細，出邊極少枱，然後就三間大房。我哋嗰日就係book咗間房，而book間房嘅好處就係可以識到一啲特別小小嘅菜式，就係佢嘅煲仔飯。食物質素可以講話真係好好，頭盤四道菜以「象拔蚌配雲南皺皮椒及海茸」我認為係最出色，象拔蚌新鮮有咬口，以皺皮椒真係起咗個畫龍點睛嘅作用，令到成個象拔蚌非常惹味! 其他三條都唔錯，不過就係預期之中嘅好味。永食材都非常之新鮮，當中煲仔飯的而且確非常驚喜，「永煲仔飯」用上自製白臘肉赤米蝦乾煲仔飯，白臘肉入口即溶，煮得啱啱好嘅米粒配上蝦乾，成個煲仔飯好好食。最後就係甜品，我冇諗過甜品。都可以咁好食，水果就唔使多講，當然就係新鮮就最好食，但係真係冇諗過個冬甩可以好食到咁，外皮椒脆，內裏的流心蓮蓉，簡直正到暈，如果有得外賣，我一定買十個八個返屋企食🥰🥰🥰雖然呢一餐價錢很貴，好多人嘅評論都比較參差，但我個人覺得食材同埋味道真係都可以值得再次幫襯。至少佢比嘅菜式都係貨真價實。…Read More