Tiffanyndia's Profile

大澳一直係小編心目中嘅香港離島No.1，由讀書到而家出嚟做嘢，每當想放鬆但又飛唔到嘅時候，都會諗起大澳。講到大澳名品，新鮮熱辣嘅沙翁絕對係頭三。小編當日去嘅時候，剛好碰上老闆娘新鮮炸起嘅沙翁。💛名品沙翁💛 HK$15 （外賣盒再加多HK$2 ）炸起嘅沙翁差唔多有一個拳頭咁大。金黃色嘅外皮口感好似新鮮炸起嘅油炸鬼，入面嘅內餡柔軟，但又比蛋糕多一分彈性。由於空氣感恰到好處，小編食完飯後再食一個沙翁，都唔會話太飽。沙翁雖然係油炸，但絕對唔油膩。餘溫未能將表面嘅砂糖融化，砂糖嘅顆粒感令到整體口感更加豐富。老闆娘亦有賣糯米糍，下次可以試吓。…Read More

在OpenRice平台上暫時未見到石門分店紀錄，所以先將食評寫在大埔分店名下。如有不妥，煩請告之，會將食評刪除，謝謝。好喇可以入正題喇，小編路過石門見到京瑞廣場二期（下稱「京二」）好似葵廣咁有好多小食店，所以就去探索一下喇。咁其實京二都有唔少賣雞蛋仔嘅舖頭，亦都差唔多每一間都有芝士豬柳蛋口味。但man姐呢款係叫做豬柳蛋芝士三文治，個做法會有啲唔同。首先倒入蛋漿，以豬柳同蛋做餡，再加入胡椒調味。等雞蛋仔成型後，加上大量芝士喺面，將雞蛋仔捲起夾住，用機器嘅熱力將芝士熔化，達到拉絲效果。最後嘅成品的確就會好似商品名一樣，變成一個雞蛋仔型嘅豬柳蛋芝士三文治。正如圖片所示，成個雞蛋仔層次都好分明。芝士都唔係超市嗰啲片裝芝士，食得出芝士味，拉起絲嚟亦都好過癮。但小編個人覺得胡椒味偏重咗少少，咁呢個係個人口味問題。蛋漿有蛋香味，同埋雞蛋仔每一格嘅內部都填到滿滿，好似蛋糕咁有彈性，唔會好乾得個殻咁。整體小編都覺得幾高分。分店仲有餐肉芝士、蛋撻同麻糬等口味。值得再嚟試一試。…Read More

茉酸奶由大陸過江開到香港已經有一段時間，但因為價錢進取，所以小編一直都未有嘗試。今次藉住路過太古嘅機會就試吓啦。今次小編試嘅產品係牛油果乳酪奶昔(HK$46)。單睇產品名，就知道可以分為三個元素去評價。1. 牛油果飲物上鋪咗小半個牛油果，都算係足料。飲落有明顯嘅牛油果味，但未講得上算好濃郁。有少少行貨。2. 乳酪乳酪味係非常非常之淡，所以都令人幾失望。由其是品牌名強調「酸奶」二字，但產品連點題都做不到，實在有點諷刺。小編本身係抱住飲物會好似印度lassi一樣有乳酪嘅厚度同味道，但飲落係基乎冇乳酪味。市面上乳酪飲品好多，無論係現製定工廠流水線生產，呢一杯係我飲過之中最淡乳酪味。3. 奶昔奶昔嘅滑同基本厚度係做到嘅。但呢方面算係產品嘅基礎，所以冇加太多分。產品味道一般，未有拍照，賣相同其他人影嘅相差唔多。整體而言，如果你當佢係一杯水果奶昔，佢係合格嘅；但如果以酸奶做招徠，就略嫌貨不對辦。價錢喺太古城中心而言，未算去到最進取，同一杯咖啡差唔多錢。但如果我係喺嗰邊返開工，我會寧願拎啲錢去買杯咖啡提神。…Read More

最近社交平台上都多咗人討論醬油蟹放題，價位由300起跳到500不等，規則五花八門。所以小編喺試醬油蟹放題之前，決定先試一試餐廳嘅水準。💛醬油蟹兩隻+紫菜包飯💛餐廳嘅醬油蟹有單隻/兩隻嘅形式咁賣，但一次過買兩隻會平啲。試食當日得小編一個到場，所以決定請店員幫忙將另一隻當外賣處理。店員都好好人幫忙，同埋會將外賣嗰隻先放入雪櫃保存。醬油蟹新鮮多膏，蟹肉鮮甜，口感QQ。醬油嘅味道都討好，但小編覺得係偏水果甜味重啲，麻油味重少少，唔算喺係小編嘅好感帶內。呢次其實係小編第二次食醬油蟹。上次喺濟州食嘅時候，的確令我好驚艷。醬油恰到好處咁帶出蟹嘅鮮甜味，唔會死鹹或者死甜。今次雖然未去到驚艷嘅程度，但如果未有時間去到韓國，用嚟止下癮，都係相當滿足嘅。紫菜飯溫度暖暖，紫菜用料足，都不錯。另外一點想讚下餐廳，食蟹嘅時候，有主動提供手套同埋裝殼嘅骨桶，非常體貼，令到今次嘅用餐體驗都非常良好。雖然有YouTuber講過呢間餐廳嘅醬油蟹放題質素麻麻，但根據小編今次單點嘅用餐體驗，小編覺得可以俾次機會試下嘅。…Read More

有關注開香港必食米線舖嘅朋友，一定會知道荃灣嗰間老闆娘雲南米線，係幾多人排同埋幾難等位。為咗食名物炸雞球同埋蝦膠豆卜，閑閑地都要等返個幾兩個鐘。小編今日喺尖沙咀搵到一間喺炸物方面，都可以叫做止下癮嘅餐廳代替下。💛蝦膠豆卜💛首先，佢個蝦膠豆卜的確好出色。上枱嘅時候熱辣辣，脆卜卜。咬開都見到原隻蝦喺入面，的確係真材實料。同埋蝦膠嘅比例，都食得出用料一啲都唔吝嗇，唔會溝得太多粉，保持返蝦膠應有嘅彈性。💛炸豬扒💛食得出都係新鮮炸出嚟，同埋會分開上，唔會比米線嘅湯底整濕。所以由頭食到尾塊豬扒都係脆嘅。同埋店主好細心咁將塊豬扒切咗件先上，啱晒懶人唔使自己用刀切喇。💛酸辣湯米線💛米線，老實講就普普通通。但應有嘅酸同辣味都喺度，同埋熱度同口感都ok，咁都算合格㗎啦。唔算特別驚艷。整體係可以一食。如果真係好掛住荃灣老闆娘嘅蝦膠豆卜，又唔想特登過去排隊，呢間餐廳係絕對值得一試嘅。…Read More

喺香港生活咗咁耐，第一次聽有一種菜式叫乾蒸菜。價錢唔貴，所以決定點都要試吓。舖頭嘅招牌菜有乾蒸排骨同乾蒸白鱔。💛乾蒸排骨💛本身小編平時係唔食排骨嘅，因為覺得好油。但因為佢係唔落一滴水就乾蒸嘅緣故，啲油份喺煮嘅時候已經迫晒出嚟，入口就多咗份焦香感而冇乜油膩感。張相望落好似有啲燶，但食落唔會有嗰種燒燶咗嘅味道，只係有香口嘅感覺。食落去覺得有少少似日式燒肉嗰種烹調手法，但感覺就冇咁熱氣。同埋雖然佢係乾蒸，但食落去唔會嚡口，肉汁依然好豐富。💛乾蒸白鱔💛舖頭用嘅鱔好新鮮，食落去完全冇腥味。個蒜蓉汁較得好好，非常惹味。同埋乾蒸嘅手法將魚油迫晒出嚟，個油脂香都非常好送飯。乾蒸雞乾蒸雞個蔥油調得好好。但始終雞嘅油分有限，所以乾蒸起上嚟會比排骨同白鱔遜色。但佢用蒸嘅手法，已經做到好似雞煲咁惹味，已經好好。呢度加$5，就可以白飯任裝。而且所有餸都好好送飯，價錢又唔貴。好推薦發育期嘅學生黨嚟食。同埋以平民飯堂嚟講，環境算乾淨同坐得舒服。…Read More

恆河咖哩屋都算係喺港島幾出名嘅印度餐廳，但筆者喺港島住咗咁耐都係第一次食。可能因為期望愈大，失望愈大。鐵板 Chicken Tikka 基本上用鐵板上菜嘅嘢食都好少好難食，所以味道的確算係ok，係成餐飯最好食嘅菜式。但個雞食落略嫌唔夠Juicy，調味又唔算惹味。行貨質素。水魚之選嘅咖哩軟殻蟹菜式連加一接近$200，但上菜只有兩隻軟殻蟹同唔算多嘅咖哩汁。平心而論，個咖哩汁有咖哩香氣，味道豐富同口感都濃稠，但份量太少。同埋軟殻蟹冇平時食開嗰種好多膏好有油香嘅感覺，所以即刻遜色咗好多。海鮮炒飯(?呢個係屋企人嗌，我都唔記得叫咩名。印象中唔使$100，足料都抵食。但味道普通，冇乜記憶點。芝士印度烤餅唔記得影相，但完全冇芝士味。烤餅亦偏乾，冇平時食開嗰種鬆軟口感。平時筆者可以一個人食兩大塊，嗰晚食半塊已經唔想再食了。Mango Lassi都係唔記得影相🥲口感偏稀，唔夠乳酪香氣。總結：價錢除咗某幾款菜式外，都算正常定價。但質素偏行貨，區內有更好嘅選擇。如非突然口痕非食印度菜不可，又懶唔想離開筲箕灣，唔建議食。…Read More

好耐冇食過，水準依然保持到。香蔥魚蛋麵 $40 加紫菜 $5王林記嘅魚蛋一向都好出名。喺一間有啲名氣乾乾淨淨嘅餐廳食碗麵，以而家嘅香港嚟講，價錢絕對ok。魚蛋唔算大粒，但贏在質素好。入口彈牙，咬一啖有好香嘅魚味同埋潮式魚蛋特色嘅胡椒香氣。令人意外嘅係佢嘅香蔥唔係gimmick嘢，食落的確係有香蔥味，係食台式蔥油餅嗰種香蔥味。 湯底唔錯，食完唔會口渴。幼麵都彈牙恰到好處。 嫌就咁食麵太寡，加啲紫菜，就完美還原到潮式粉麵嘅鹹鮮。同埋聽講紫菜好有營養，可以多食😆。占醬厚多 $20凍檸茶 跟餐加$15占醬多係呢餐嘅最大驚喜🤩🤩首先，好難得咁夜都仲有得食。落單嗰陣，侍應會問你要厚多定薄多。喺香港呢個成日俾人話要改善服務質素嘅社會，算係好難得！上餐嘅時候，賣相完全令我驚艷。果占同花生醬都好大方，搽到滿哂咁俾你。咬落去烘得脆口，又因為厚多嘅關係，麵包有足夠嘅厚度，喺烘完之後保持鬆軟。可以話係完美嘅飯後甜品💛凍檸茶就同茶餐廳一樣。其實新鮮檸檬沖，基本都會清新好飲。純粹係有少少貴。其實呢啲街坊小店就好少有人寫，除非好劣。所以一般都係會喺OpenRice見到質素麻麻/唔好嘅評價。但筆者希望to be fair，對努力經營嘅街坊餐廳俾返應有嘅credit，同時都避免普通食餐飯都會中伏嘅機會。使應使嘅錢，去提高自己嘅quality of life。笑死，吹得太大🤣🤣總結一下，味道質素環境都唔錯，的確可以入日常飯堂嘅list。但要留意一點，餐廳只收cash同八達通。…Read More

[筆者寫開潮文, 簡而精嘅食評請滑到最底]作為一間以貓🐱為賣點的cafe, Urban Cafe就好比一個偶像派演員,明明可以靠樣搵食, 但偏偏要走實力派路線,以食品質素喺呢個餐飲業站一席位。喺旺角約朋友食飯, 老實講醉翁之意不在酒, 啲野好唔好食往往都係最後先考慮嘅因素。但一諗起俾百幾二百蚊食啲垃圾, 咁不如去M記食個24蚊餐好過啦(當然而家M記都係blacklist左喇) 所以喺幾年前, 我就變左投入旺角特色cafe嘅懷抱, 亦喺無意中發掘到Urban Cafe。以貓Cafe而言, Urban Cafe食物嘅定價係偏實惠, 基本上就等同你食個豐富少少嘅譚仔,再加$20就有貓陪你玩咁。如果閒日下午茶時段黎, 兩個人坐兩個鐘埋單都係$100有找🤑對比一般貓Cafe "按時收費, 野食另計"嘅收費模式, Urban Cafe都算係初入門貓奴嘅最佳選擇。用餐時間有兩小時(如果冇新客入黎都可以繼續坐), 會有充分嘅時間同朋友傾計玩貓, 唔會好似一般旺角餐廳一晚要翻幾次枱咁趕你走嘅。所以平時約frd gathering, 如果佢地唔怕毛孩, 我都會推薦Urban Cafe❤️至於食評開首提及, 猶如打手般吹奏嘅食品質素呢, 個人覺得係中上水平嘅。就算唔計可以同貓玩呢個咁加分嘅元素, 大約$90-$100食到一個新鮮整起, 忌廉味濃而不膩嘅意大利飯/意粉, 性價比其實已經係極高。因為呢幾年黎Cafe都有轉下餐牌同菜式啲名 (簡單啲講即係我唔記得啲野食名)刪線, 所以我就分幾大類去品評下啲野食。意粉🍝: 喺意粉質感上冇乜驚喜, 都係一般連鎖西餐廳(e.g. 意X屋)嘅質感。個人覺得比起正宗西餐黎講係偏淋。但個意粉汁係食得出真係用白汁開, 算係有誠意之作。個人推薦👄: 溫泉蛋卡邦尼意粉意大利飯🍚:個人覺得係可以值4粒⭐, 事關市面上並非間間西餐廳都識整Risotto。Cafe嘅Risotto喺質感上完美滿足到al dente的口感, 軟硬適中。用以燴飯嘅汁亦恰到好處, creamy但不膩。配搭得極好。個人推薦👄: 黑松露野菌忌廉意大利飯肉食類🍖:有牛豬雞唔同嘅選擇, 適合不同紅肉白肉嘅愛好者。基本上肉香同肉質嘅水平都在線, 如果喜歡食肉汁豐富啲嘅, 個人會推薦慢煮雞胸。不得不提嘅係佢嘅薯角, 新鮮炸起, 外脆內軟, 其微微嘅辛辣味, 真係忍唔住再嗌多個餐淨係食薯角😋個人推薦👄: 咩都好 最緊要配薯角漢堡包🍔:漢堡包餡由最基本嘅牛肉到軟殼蟹都有, 逼死有選擇困難症嘅你:0)))))入面嘅餡都多料, 就算大食如我,一個包配薯角😍都夠飽。同埋個包都有少少脆面, 個樣同啲漢堡專賣店(not M記,ok😑?)嘅廣告都有8,9成似。個人推薦👄: 咩都好 最緊要係薯角Pizza🍕:呢一part算係比較遜色嘅一環, 因為批底過厚, 同啲pizza連鎖店(e.g. Pizza Hxx, 脆X雞)差唔多, 或者再厚啲啲🤢所以就算佢個批上面啲料好足, 芝士好香都救唔返呢個敗筆。唯一可處嘅可能係好飽肚lol 個人推薦👄: 食其他啦ching總結之言, 野食唔錯, 貓貓可愛, 座位略嫌空間感不足, 但尚算合理。如果係啲咩X假期介紹, 應該會係性價比之選‼️至於咩甜品啊飲品啊, 等我下次再去食tea嘅時候先再一一點評, 事關我已經打左千三字, 好L攰💤 Bye Bye👋…Read More