鐵板 Chicken Tikka
基本上用鐵板上菜嘅嘢食都好少好難食，所以味道的確算係ok，係成餐飯最好食嘅菜式。但個雞食落略嫌唔夠Juicy，調味又唔算惹味。行貨質素。
水魚之選嘅咖哩軟殻蟹
菜式連加一接近$200，但上菜只有兩隻軟殻蟹同唔算多嘅咖哩汁。平心而論，個咖哩汁有咖哩香氣，味道豐富同口感都濃稠，但份量太少。同埋軟殻蟹冇平時食開嗰種好多膏好有油香嘅感覺，所以即刻遜色咗好多。
海鮮炒飯(?
呢個係屋企人嗌，我都唔記得叫咩名。印象中唔使$100，足料都抵食。但味道普通，冇乜記憶點。
芝士印度烤餅
唔記得影相，但完全冇芝士味。烤餅亦偏乾，冇平時食開嗰種鬆軟口感。平時筆者可以一個人食兩大塊，嗰晚食半塊已經唔想再食了。
Mango Lassi
都係唔記得影相🥲口感偏稀，唔夠乳酪香氣。
總結：
價錢除咗某幾款菜式外，都算正常定價。但質素偏行貨，區內有更好嘅選擇。如非突然口痕非食印度菜不可，又懶唔想離開筲箕灣，唔建議食。
