wsyheidi's Profile

早已聽聞呢間餐廳係近期人氣王，睇foodie圖蚵仔魯肉飯粒粒飽滿，好似好吸引🤭，所以約埋兩個朋友平日夜晚去。等？無問題，預咗有排等，我地8點左右齊人，見到8點半截單，仲諗會唔會被截龍，有機會入唔到去🥺但佢又只係截咗我哋後面幾個人嘅龍，最後我哋8點20分有位！😍早已經喺等待時候揀好食乜，歡歡喜喜入到去，店員放低一張QR code叫我地落單，朋友立刻攞起手機。不過，就喺呢5分鐘入面，店員催咗我地落單催咗3次。😐（我哋：nani？！但會唔會太大壓力...）到上菜嘅時候，自然問問店員，可唔可以畀3隻碗仔我哋share食物？結果，店員攞咗兩個碗過來，然後話：「你呢度（指住碗魯肉飯）都有一隻碗，唔需要3隻碗啦～」😐之後，原本佢放低3對筷子，又突然攞走一對，話，你呢度（碗飯下面）都有一對呀。 😐（我哋：nani？！啲餐具有無必要計到咁盡？究竟有幾想洗少一隻碗？）嘢食好快上曬，我哋用咗3、4個字倒晒所有食物入口。去到8點50分左右，我哋都未食完，佢就想收晒我哋啲碗，要求我哋埋單，話9點要關門了。（我哋：nani？！你甜品都未上wor？😐如果你一開始知道你趕收工，serve唔切，點解唔直接截我龍？）好，講返食物：月見蚵仔魯肉飯：真係好食嘅，蚵仔粒粒飽滿，唔欺場，份量足。鹹酥雞魯肉飯：不過不失，食完好口渴。起司肉鬆蛋餅：幾好食，個醬汁酸酸甜甜，幾開胃。甜不辣：調味幾好，不過我比較喜歡再煙un啲嘅甜不辣～香腸：就係台式香腸，無乜comment。無冰芋泥鮮奶：好好飲，好多芋泥，好rich～芋圓糖不甩：芋圓幾好咬口。不過，都係無下次，我都係無呢個資格享用咁好食嘅食物㗎啦。如果都係要排隊，只能說大角咀都仲大把野揀，有更多食得更舒服嘅選擇：）…Read More

係一餐相隔幾個月都不時會回味嘅lunch～話說有日同同事喺銅鑼灣附近做嘢，突然斥起條筋，醒起之前睇過呢間佳牛美酒出lunch set，價錢都幾相宜。平時夜晚就應該唔捨得食佢，咁啱經過附近就決定上去會一會佢！叫呢道，本身只係諗住任何事物加黑松露都係無敵嘅搭配。不過放入口真係充滿驚喜。炙燒咗嘅A4和牛每一塊都係呈半生熟狀態，一咬落去首先係焦香嘅牛味，之後再咬就係軟嫩嘅半生熟口感，十分出色！呢個係和牛肉餅+太陽蛋嘅組合。唔知點解「肉餅」兩個字本身聽上去唔太fine dine嘅感覺，但我同同事都不約而同話對呢個有興趣！ 果然出到黎完全無令我地失望。和牛打成嘅肉餅的確牛味濃郁，而且肉汁滿滿。太陽蛋做到燶邊！100分！ 雖然唔係好驚天動地嘅烹調方法，但食落完全感受到廚師嘅用心～總括而言，呢個價錢食到呢個質素嘅食物+服務，完全收貨㗎啦！唔知佢依家仲有無做lunch set，如果有，十分推薦大家一試！…Read More

心情唔太好，想食一餐decent少少嘅晚飯安慰一下自己，同朋友選擇咗去開咗唔算太耐嘅bifteck，去之前覺得最吸引嘅係佢有雪室熟成和牛！喺香港實在好少見！餐包，有趣嘅係佢配搭埋天婦羅海苔同埋一pat好似poopoo嘅物體！（笑）其實佢係用面豉味牛油，食落個味道完全唔衝突，反而全個前菜好夾，十分神奇！（sorry相機食後，其實佢present得好靚嘅！）呢個係Fresh Oyster Three Ways，一個係青蘋果莎莎醬+柚子泡泡（雖然一督落去就無曬xd）配生蠔、一個係和牛他他+生蠔+魚子醬（切碎嘅）、一個係炸蠔。結論係好好食！🤣 我同朋友都覺得生蠔配他他嘅味道最豐富特別～上菜嘅waiter特登介紹，呢個risotto有別於一般用意大利米，反而係用薏米去烹調，配搭龍蝦醬汁同埋龍蝦肉，口感特別，而且食落口無食普通米咁膩口。上面配襯咗A4和牛Carpaccio，同樣十分驚喜和牛味道濃郁，口感軟嫩，係令人感到十分幸福嘅一道菜！去到扒房又點可以唔食牛呢？ 本身打算簡簡單單叫個Prime Hanger Steak。本身無特別留意menu，上菜時候waiter話呢道菜原來仲配咗Dry aged咗15日嘅牛舌。佢仲話牛舌用去dry aged，最後wastage會好多，只會剩低好中間嘅一段仲可以用來serve客，所以十分珍貴，叫我地仔細品嚐！果然！最後我地都俾呢個牛舌驚艷到！果種軟嫩同埋濃濃嘅牛味令我地內心小尖叫！當然個hanger steak都好食，佢配搭以牛舌烹調嘅醬汁，濃郁之餘但又唔會搶走主角嘅鮮味，十分出色。不過，講到全晚最令人難以忘懷嘅，一定係佢嘅甜品！（覺得佢地係被牛扒耽誤嘅甜品店LOL）一上枱就見到佢仲·冒·緊·煙！ 聞到微微嘅焦香味，頓時心諗好彩自己堅決留肚食甜品呀（因為見到佢地話每晚都有駐場甜品師，好似好勁咁lol）！個丸子食落口，就爆發中焦香，但唔係平時烤焦麵包之類嘅苦，而係香！本身好怕甜嘅嘢有太「創新」嘅鹹口味，覺得通常都會伏，但呢個雪糕完全顛覆我諗法。個雪糕其實就好似海鹽焦糖咁嘅味道，鹹甜唔會互相搶走，而且質地軟滑，係一個好高質嘅雪糕！因為上一個甜品太過太過令我地驚喜，呢個作為第二個上嘅甜品，難免會失色少少咁多🤏不過佢都係一個好好食嘅甜品！最上面嘅芒果雪糕feel到十分真材實料，中間白色嘅原來就係「Kasu」，問過waiter，原來就係成日喺SK II之類嘅護膚品聽到嘅「酒粕」。一食落去朋友就話「真係好sake」，酒味十分濃，好彩無醉xd。同朋友唔算十分十分餓，所以叫咗一個appetiser，兩個main同埋兩個甜品。結果兩個女仔食剛剛好！綜括而言，十分推薦大家慶祝紀念日、節日之類去！而且大推甜品！…Read More