Nice Yakiniku & Fine Wine

係一餐相隔幾個月都不時會回味嘅lunch～

話說有日同同事喺銅鑼灣附近做嘢，突然斥起條筋，醒起之前睇過呢間佳牛美酒出lunch set，價錢都幾相宜。
平時夜晚就應該唔捨得食佢，咁啱經過附近就決定上去會一會佢！

火炙A4和牛丼飯配黑松露汁

$298

叫呢道，本身只係諗住任何事物加黑松露都係無敵嘅搭配。不過放入口真係充滿驚喜。
炙燒咗嘅A4和牛每一塊都係呈半生熟狀態，一咬落去首先係焦香嘅牛味，之後再咬就係軟嫩嘅半生熟口感，十分出色！

煎和牛肉餅、太陽蛋配日本米飯

$238

呢個係和牛肉餅+太陽蛋嘅組合。唔知點解「肉餅」兩個字本身聽上去唔太fine dine嘅感覺，但我同同事都不約而同話對呢個有興趣！
 果然出到黎完全無令我地失望。和牛打成嘅肉餅的確牛味濃郁，而且肉汁滿滿。太陽蛋做到燶邊！100分！ 
雖然唔係好驚天動地嘅烹調方法，但食落完全感受到廚師嘅用心～

總括而言，呢個價錢食到呢個質素嘅食物+服務，完全收貨㗎啦！
唔知佢依家仲有無做lunch set，如果有，十分推薦大家一試！