Duely's Profile

第一次嚟依間小舖食，點咗兩款burger分別為1. 經典芝士漢堡(classic beef)以及2. 鏡(Mirror)。比較鍾意佢D漢堡比較多蔬菜，唔會太多醬，雖然塊牛唔太厚。除咗有薯條，仲可以揀炸蓮藕片或者番薯條。揀咗latte做飲品，不過可惜就只有奶味。考慮埋個價錢，覺得個品質都算OK嘅。間舖頭標榜佢哋嘅蔬菜同麵包係每日朝早送來，而Angus patty就係用冷凍澳洲牛肉夾頭、牛胸肉同和牛脂肪製成。…Read More

突然好想食熱辣辣嘅湯面，就揀咗位處灣仔嘅露面手工拌麵料理。鎮店蟹黃拌麵蟹黃同麵分開上，雖然望落去似係偏稀，不過飲落都有蟹嘅鮮甜味道，麵條亦有足夠嘅韌性。嫩雞白布湯闊麵就咁睇似係平平無奇，但一試個湯底覺得幾creamy，雞肉亦夠嫩滑，闊麵食落去嘅感覺有啲似餃子皮咁。巴蜀口水雞個口水雞夠哂惹味，如果份量再大啲就好啦。鎮店蟹皇雲吞之前試過巴蜀粒粒大雲吞，今次就試吓蟹黃雲吞。蟹黃味道都幾突出，如果雲吞皮再薄啲就perfect啦。蜂蜜百香果茶鍾意百香果嘅味道，杯茶飲落唔會太甜，合乎我口味。…Read More

收工後約咗同伴食飯，要喺中環搵間快靚正之選，個人覺得餃掂會入三甲。龍鳳松茸雙煎餃(8隻) $98龍鳳松茸雙煎餃係我經常點嘅餃子，黑松露聞落好香，而且味道幾濃郁，而白松露嘅味道就比較似蘑菇。依種煎餃喺其他餃子舖都不太常見。芫茜豬肉湯餃 (跟狀元九鼎湯) (10隻) $61芫茜豬肉餃就係我同伴嘅最愛，餃子內裏嘅芫茜非常足料，我諗芫茜愛好者食完應該會幾滿足。狀元九鼎湯嘅材料有粉葛、鯪魚、紅蘿蔔、扁豆、蜜棗等，飲落幾有鮮味，而且夠哂潤喉。蜜餞雞翼 (3隻) $24蜜餞雞翼甜度剛好，最怕有啲餐館整得太甜，食緊嗰時就喺到諗，早知叫5隻啦。自家制山楂雪梨水 $20山楂雪梨水都幾滋潤，山楂配上雪梨，有清腸排毒、降脂減肥、生津解渴等功效。上湯松茸時蔬 $32為咗確保自己每餐都有充足嘅纖維，我吔就order咗碟時蔬嚟share。…Read More

同伴係餃掂嘅常客，今晚我哋都約咗喺依度食飯。龍鳳松茸雙煎餃(12隻)自家制山楂雪梨水龍鳳松茸即係黑白松露嘅意思，黑松露聞落幾香，香甜濃郁，而白松露嘅味道就比較接近蘑菇。價錢雖然比其他餃子較貴，但都係值得嘅。山楂雪梨水飲落口感覺滋潤，味道亦唔會太甜。餃子麵 - 芫茜豬肉餃(6隻)同伴係芫茜愛好者，非常欣賞依度嘅芫茜豬肉餃。即使我對芫茜冇特別喜好，亦都覺得唔錯，配上麵線，份量都唔細。上湯松茸時蔬一餐飯又點可以冇蔬菜呢？飲食要有足夠嘅纖維先至夠健康。中環威靈頓街上有三間餃子舖，不過我最鍾意嘅，始終都係餃掂。…Read More

之前有去過Coffeelin喺西營盤高街嘅舖頭，試過panini同咖啡，感覺都唔錯。今晚嚟到佢哋喺跑馬地嘅舖頭，本身都有少少期待。Boulevardier (rye whiskey, sweet vermouth and Campari)原來佢哋除咗有咖啡之外，亦有Bartender駐場。叫左杯Boulevardier，佢就好似係Negroni嘅表親，只係由gin轉成whiskey。Parmesan Truffle Fries (truffle aioli, parmigiano reggiano)薯條份量都幾足，配上Parmesan芝士絲，再點埋truffle醬，唔錯。Duck Ragu (pacherri pasta, confit duck, red wine sauce)一上擡已經聞到好香嘅鴨肉味，長通粉咬落夠哂彈牙，配上紅酒醬汁同蕃茄都幾醒胃。HV Meatballs (pork and beef, tomato sugo)肉丸由豬肉同牛肉混合而成，咬落都幾鬆軟，內裏亦有肉汁。Basque Burnt Cheesecake巴斯克焦香芝士蛋糕味道濃郁，如果可以再燒焦啲就perfect啦。HV Tiramisu (blueberry compote)個tiramisu都幾濕潤，配上甜甜酸酸嘅藍莓醬，我都幾鍾意依個配搭。整體嚟講，依度嘅食物都令我幾滿意，環境亦幾有情調，值得再次幫襯。…Read More

記得一年前嚟過依度食，當時係買外賣因為唔俾堂食，今日終於有機會坐低喺度食啦。鎮店蟹皇拌麵 $98睇住橙黃色嘅蟹皇，簡直係食指大動。將成碗蟹皇倒落去啲麵到再拌勻，食落去就感受到蟹皇嘅鮮甜，值得推介。老壇酸菜湯小雲吞10粒 $42湯底有濃濃嘅酸菜味，小雲吞剛好一口一啖，唔錯。秘製香糟醉雞 $58雞皮唔算太厚，食落有淡淡嘅酒香，係唔錯嘅小食。滑溜溜香芋鮮奶 $28杯飲品飲落去奶味較重，不過都有淡淡的香芋味。見到佢哋出咗一人拌麵套餐，等我下次一個人嚟嘅時候試吓先。…Read More

依度嘅裝修樸實無華，嘢食方面，共有三種湯底可以揀，分別係辣味蝦湯底、咖喱喇沙湯底同埋豬骨雞湯底，另外亦都可以揀福建滷麵。蝦肉墨魚丸麵 - 辣味蝦湯底 (另加豆腐卜)湯底其實唔算非常辣，試咗一啖，濃濃嘅蝦味已經散發出嚟，蝦肉爽口彈牙，都幾有鮮味，索哂湯底嘅豆腐卜亦都非常惹味。墨魚丸魚片麵 - 咖喱喇沙湯底 (另加腐角)帶有微微咖喱味嘅喇沙湯底，令到我嘅口腔充滿椰奶同香料嘅味道，墨魚丸亦都幾好味。脆香魚皮香脆可口，而且份量都幾大，夾埋湯麵一齊食真係一流。腐乳通菜食飯點可以冇菜呢？碟菜嘅份量都唔細。熱檸檬薏米水及凍美祿檸檬薏米水可以揀多薏米，酸酸地咁，夠晒開胃。依度平時晏晝唔少人排隊，夜晚終於可以休閒咁嘆碗靚麵。…Read More

朋友介紹咗依間位處長沙灣嘅餐廳，我哋夜晚8點鐘嚟到，餐廳坐滿一半，但坐低冇耐就已經接近滿座。愛爾蘭N2生蠔及法國選生蠔宜家做緊限定優惠買五送一，大隻啲嘅係愛爾蘭N2生蠔，No.2嘅重量大概係86克至110克，我哋嗌咗嘅依款食落有After Taste，即係鮮甜嘅味道會齒頰留香，有回甘嘅甜味。日式黑豚肉漢堡黑豚肉夠晒大塊，亦都有肉汁，薯條炸得夠香脆，個包亦都夠鬆軟，唔會太乾身。香草忌廉龍脷焗長通粉個長通粉焗得幾香，龍脷柳唔會太過薄身，而且夠多忌廉汁，滿足哂我想食焗嘢嘅慾望。整體來講，餐廳嘅食物質素唔錯，下次經過長沙灣我會再幫襯。…Read More

今次係第二次去Ninetys，上次去灣仔店就食佢哋最出名嘅菜式，今次嚟到Soho店就想試吓其他菜式。Chips with Crab Dip $98(Potato Fries, with Crab Dip (Blue Crab Meat, Crab Fat, Greek Yogurt))薯條炸得香囗，crab dip係用花蟹蟹肉同Greek yogurt整嘅，蟹味夠晒濃郁，依個配搭對我嚟講幾新鮮，值得推薦。Pulled Pork on English Muffin $98(Pulled Pork Braised with Cinnamon and Chilli on Toasted English Muffin)依度菜式對我嚟講稍為辣咗少少，不過都幾惹味。手撕豬肉配上熱辣辣嘅English muffin，整體效果唔錯。Sweet Potato Cake with Chicken Thighs $158(Purple Sweet Potato, Grilled Sous Vide Chicken Thigh, Eggs, Sesame, Spring Onion)紫薯煎餅唔會太甜，真空低溫烹調嘅雞腿肉質嫰滑，而成個主菜嘅擺碟陪襯亦做得幾靚。It’s Easy Easy $88(Moscatel, Lime, Milk, Oolong Tea)係上圖右手邊嗰杯，麝香葡萄酒加上烏龍茶嘅配搭都幾好，值得一試。Ginger Touch $78(Somerton Chardonnay, Ginger Juice, Apricot Hojicha Tea)係上圖左手邊橙色嗰杯，杯入面黑色嗰粒其實係茶葉嚟嘅，不過杯cocktail 薑味比較明顯，都幾好飲嘅。今次試咗Ninetys佢哋signature dish以外嘅選擇，水準都唔錯，下次lunch hour再嚟過先。…Read More

作為一個鍾意食煎餃嘅人，餃掂嘅分店越開越多，對我嚟講絕對係一件好事。琴晚我6pm已經嚟到，舖頭尚算唔係好多人。龍鳳松茸雙煎餃四件白松露餃子，四件黑松露餃子，合共八件。兩隻口味都唔錯，黑松露嘅味道會較強，但未至於蓋過豬肉餡嘅味道。蜜餞雞翼熱騰騰嘅雞翼味道唔錯，蜜餞甜度亦都適中，值得一試。壽喜燒牛肉煎餃依度嘅煎餃唔會煎得好油膩，而且內裏夠哂肉汁，餡料除咗有牛肉，仲有爽口嘅馬蹄。上湯松茸時蔬成餐飯加埋碟蔬菜就更加好啦。舖頭環境乾淨衛生，食物質素亦都幾好，值得再次幫襯。…Read More

今晚嚟咗一間幾有特色嘅餐廳。聽服務員講，依度嘅嘢食加咗大概10至20mg嘅CBD，CBD係一種取自大麻嘅物質，有令人輕微放鬆嘅效果，但唔會令人上癮。日式芥末忌廉香煎廣島蠔闊條麵Wasabi Hiroshima Oyster Fettuccine廣島蠔味道夠濃郁，幾鍾意芥末味寬條麵，但唔會有攻鼻嘅感覺，只可惜份量細咗少少。青咖喱安吉拉雞卷Green Curry Chicken Enchiladas上菜嗰陣已經夠哂熱辣辣，青咖喱夠哂辣，有喺泰式餐廳食嘅水準。雖然熱量應該都幾高，不過係值得食嘅。班尼迪蛋銀鱈魚配白酒芥末汁伴香蔥薯泥Pan Seared Black Cod with Egg Benedict我不嬲都幾鍾意食Egg Benedict，配搭銀鱈魚又真係未試過。銀鱈魚煎得幾好，薯泥有淡淡嘅芥末味，整體效果唔錯。開心果青檸鮮奶油芒果千層酥Mille Feuillet依份千層酥絕對有驚喜，個酥夠晒脆，芒果香甜，配埋開心果，令我幾滿意。餐廳啱啱營業有八折。Med Chef有gimmick之餘，最緊要係味道唔錯。…Read More

又係時間要諗吓今晚外賣買乜嘢啦。你妳主打手作芋泥，夜晚未夠七點已經有唔少人嚟幫襯買外賣。入面嘅裝修都唔差，可惜今晚無緣喺呢度食。肉鬆芋泥吐司塊toast夠脆身，肉鬆香口，估唔到同微甜嘅芋泥都幾夾，同埋塊toast用紙包住，食嗰陣夠晒方便。台式滷水雞扒滷肉飯滷水雞扒夠哂入味，滷肉飯唔會太過鹹同肥膩，配埋半隻溏心蛋，成個便當唔錯。香芋蝦餅蝦餅夠香口，帶有淡淡嘅香芋味，咁樣嘅蝦餅幾特別。古早味炸雞卷雞卷嘅皮炸得夠香脆，雞肉亦唔會太乾身，啱晒我依啲鍾意食香口野嘅人。已經好耐冇去過台灣lu，耐唔耐可以食返啲好食嘅台灣菜已經幾滿足。…Read More

近排天氣有啲凍，食韓國嘢暖暖身就最啱啦。醬炒牛肉石鍋芝士拌飯襯拌飯仲係熱辣辣嗰陣，就將甜辣醬加入石鍋入面。拌飯多肉少菜，夠晒健康，而且仲有少少飯焦添。牛排骨湯依個湯嘅牛味非常濃郁，餐廳標榜佢哋嘅韓式住家熱湯係零味精同零防腐劑嘅，相信餐廳用咗唔少時間去熬製依個牛排骨湯。鬆軟嘅牛肉伴着粉絲食非常好味，加埋蕎麥麵食就係另一番風味。韓式煎餃子 (5隻)依路嘅餃子款式非常多，有蒸嘅亦有煎嘅可以選擇。餃子皮煎得夠香脆，餡料亦唔錯，係一個我幾鍾意嘅小食。餐廳嘅裝修走少女風格，食物質素不俗，值得再嚟過。…Read More

今晚喺灣仔呢頭，就揀咗依間拌麵店試吓。皮蛋豆腐豆腐夠晒嫩滑，加埋皮蛋同蔥花，都幾開胃下。鎮店蟹黃拌麵嗌外賣麵同蟹黃湯會分開，最好都係趁熱食。將成碗蟹黃湯淋喺麵條上，先飲一啖，鮮味幾突出，麵條亦比較有彈性，正合我心意。芥香麻醬雞絲粉皮雖然係小食，不過都幾大份下，粉皮夠咬口，配埋濃濃嘅麻醬同雞絲一齊食，正！巴蜀粒粒大雲吞五粒雲吞夠晒足料，食完都幾飽肚下，而且夠晒香辣，非常惹味！整體嚟講，食物質素唔錯，會再返嚟食過。…Read More

依幾日好凍，最想食啲嘢可以暖暖身，就揀咗喺尖沙咀食韓國嘢。Oppa店舖唔大，牆上嘅電視都播着K pop MV，氣氛唔錯。秘製章魚蛋漿熔岩炒飯由店員親自倒上蛋漿同芝士，再係咁用火槍噴呀噴，直至啲芝士完全溶哂，再將炒飯同芝士攪拌，跟住就食得啦！炒飯芝士味十足，亦有啲泡菜嘅微辣，天氣凍真係要趁熱食，美中不足係啲章魚比較細粒咗d。蜜糖牛油炸雞嚟到韓國餐廳有炸雞當然要嗌啦。依度嘅炸雞下面仲有薯條，正！蜜糖牛油味夠晒濃，炸雞脆卜卜，滿足哂我想食炸雞嘅慾望。韓式蒸餃子最初以為淨係五隻搞好少，點知依五隻餃份量十足，肉同菜比例啱啱好，點埋醬汁更加滋味。近來冇得去旅行，係依度食到韓國嘢非常滿足，整體嚟講，食物水準唔錯，值得再嚟。…Read More