小公主step芬妮的個人專頁

焚妮王后今次踏足呢間越南菜, 之前一路想試但聽聞好難等位, 今日早左少少出宮, 順利入座唔駛等！本后對鹹蛋黃永遠抗拒唔到, 一眼就決定要呢個鹹蛋黃醬燒雞蛋包飯, 另外可以用優惠價叫飲品小食, 二話不說叫埋個蜜糖雞肝多士加青檸梳打, 一於食盡佢！飯到, 第一眼大叫: 鹹蛋黃呢？友人話我知佢係鹹蛋黃醬, 於是本后馬上試一口… 好味！雞肉唔鞋, 帶少少甜味同淡淡鹹蛋黃味, 每淡飯加埋少少滑蛋, 再配上花生醬菜絲沙律, 攪到本后食晒碟飯~ 青檸梳打加左大量檸檬葉, 絕對無慳住慳住!!! 友人叫左個牛油雞翼, 本后分到一隻, 炸得乾脆, 鎖得住啲肉汁, 輕鬆幹掉一隻. 食完主食就到小食, 本后超愛肝醬, 上枱時眼前一亮… 會唔會太多肝醬呀！絶對無因為用優惠價而將價就貨！同友人一人一半, 一放入口本后又叫到隔離枱都望一眼, 實在太好食, 淡淡的蜜糖甜味加上濃濃雞肝味, 真係食多塊都得！價錢唔算好平, 中環區算中價, 不過食物質素太好, 本后下次要試埋個牛河！…查看更多

本后成為中環儷人幾個月, 係時候為中環餐廳評下分！係IG見到呢間新餐廳, 睇官方照片好似不錯, 約埋個中環飯腳試試佢~ 位於投注站樓上, 餐廳入面有多部電視播住球賽, 應該都幾方便大家隨時落注. 本后唔識賭波賭馬, 專注番食物上面！Lunch set前菜可以揀湯或沙律, 正常水準, 不過不失. 主菜我哋都揀左豬扒, 本后的芝士豬扒只有好少芝士係面, 豬扒炸得有點過頭, 有點乾… 飯腳的豬扒蛋包飯, 本后試了一口, 茄汁味唔夠, 又係不過不失. Lunch Set包左飲品或甜品, 本后係衝住個吉士布甸而來的, 賣相不錯, 質地夠滑, 焦糖亦夠多, 為呢餐飯加番少少分！…查看更多

正所謂一不離二, 本后又去左high tea啦~今次過海去左尖沙咀, 朋友想食個好味啲嘅scone, 咁大家就諗住豪一豪食好啲啲又坐得舒服啲… 天氣有點熱, 我哋坐左係室內, 坐低望下個menu先知轉左係梅姐主題, 由於本后係九月尾用餐, 所以個日係第一日推出, 正常十月先開始, 當然是期間限定, 有食真係要睇實個日子！由於又係留肚唔食lunch, 兩位女子即時變得大食, 一黎就決定要追加兩個scone, 咁大家就可以食晒兩隻味道｡ 跟scone有clotted cream之外, 仲有無花果醬同士多啤梨醬, 朋友欣賞無花果醬, 但本后就略嫌偏甜, 都係幼滑嘅clotted cream啱我多啲｡ Scone帶少許濕潤, 唔太乾, 細細個食兩個絕對唔係問題｡主角出場, 好多梅艷芳字眼, 個烈焰紅唇十分吸睛｡ 一輪打卡之後, 由鹹點開始｡ 侍應建議先由鵝肝puff開始, 因為加咗爆炸糖, 放得耐驚冇咗個效果｡ 但其實本后即刻放入口都感受唔到爆炸糖嘅威力, 不過鵝肝嘅味道都好出, 加上靚靚食用花, 絕對冇失色！龍蝦春卷同Quiche屬於正常貨色, 反而黑色的松露雞蛋三文治卷有驚喜, 黑松露味好出, 同Creamy嘅雞蛋好夾, 勁想食多件！甜點方面, 先切左個火焰雪山開心share, 入面係白酒啫喱, 一切個下有酒香, 襯埋啲紅莓一齊食好好味, 可惜就係放耐左一陣個雪山開始溶化, 可能食完個鵝肝第二樣就要食佢啦！其他甜點唔算特別貨色, 最有趣係個Milk tea macaroon, 食之前要將啲奶茶唧入去, 可惜奶茶味唔夠出, 反而下面塊dark chocolate中和番個甜味｡食完行埋隔離嘅梅艷芳展覽, 好完滿!!! …查看更多

最近好多朋友移居海外, 本后的中學好友亦離別在即, 決定臨別前食個下午茶好好傾下計。吸收左上次經驗, 本后今次揀餐廳真係唔敢輕舉妄動, 結果喺眾多港島區餐廳裏面我哋揀左ZENG。當日本后早左少少到, 一坐低見到個環境同無敵大海景已經心感滿意, 當日天氣很好所以有啲曬, 幸好室內唔算太熱, 感覺幾舒服！由於當日係平日, 原來得兩個set可以揀, 一個係串燒set, 另一個係甜品set但可以加錢叫輕食, 我哋兩個又係lunch都無食, 所以決定叫甜品set再加沙律和牛角包, 飽肚一點。先來Mentaiko Blue Crab Green Salad, 很清新, 唔會因為價錢而少左蟹肉, 味道很不錯！再來Salmon & Avocado Croissant, 呢個配搭一定唔會出事, 個牛角包都幾鬆軟, 合格！到主角甜點出場, 繼續沒有那些打咭用高架, 但碟子明顯有design, 加上食用花裝飾, 絶對適合相機食先。我哋分別叫咗3個和4個items, 所以大家可以試晒7款甜點。~ Cinnamon roll 唔係美式好甜好多糖霜個隻, 少少甜淡淡地滲出肉桂味, 如果嚐甜者未必係佢杯茶｡~ Pancake 中規中矩, 如果可以俾多啲蜜糖味道會無咁寡｡~ Ice-cream 係柚子口味, 清新好味！~ Chocolate Layer Cake 沒有很多層, 但朱古力味很濃, 帶點苦, 係大人嘅味道｡~ Creme Brûlée Cake 有驚喜, 軟軟的蛋糕質感帶著濃濃的Creme Brûlée味道, 本后好滿意。~ Scone 唔會太乾, 果醬同牛油均中規中矩, 好快清左成個。~ Panna Cotta 唔知係咪我哋掛住講嘢, 放耐左令到個味有少少奇怪, 最後成為唯一無食晒嘅甜品。環境靚食物質素高, 仲要價錢平, 本后十分滿意, 誠意推介俾其他朋友仔~~!!! …查看更多

話說本后好少食下午茶, 更加未試過個啲打咭high tea, 今次兩位美麗人妻相約high tea, 一心諗住唔食午餐留肚好好享受, 點知失望而回。High tea會用當造生果為主題, 本后品嘗的係日本白桃, 與人妻抱住極大期望, 諗住可以食個痛快！由於本后遲咗少少到, 完全睇唔到個餐牌, 所有食物唔知係乜就放落口｡ 本后一坐低就一次過放低幾碟食物….. 唔…… 平時我見到人哋個啲high tea好靚𠺝, 點解我哋呢幾碟好似食自助餐攞晒啲嘢返黎happy share咁嘅？好啦, 本后無食lunch好肚餓, 賣相唔好但好味都可以填補下不足！先食鹹點 (如果有食物名稱都係之後查番出嚟, 食個下唔知㗎！), 個迷你漢堡還可以, 有少少肉汁唔太乾, 味道不錯｡ 吞拿魚三文治就大家都識整… 火腿配白桃, 係全餐最大舊嘅桃, 配上勁薄Parma ham, 本后覺得唔夾嘅, 可能個桃唔夠甜, 成件事俾個Parma ham搶晒, 好錯！那一串原來係鮮蠔大阪燒, 本后食嘅時候完全感受唔到有蠔嘅存在｡ 最後嘅鵝肝醬配白桃果醬, 入口時嘅白桃味很奇怪, 幸好鵝肝醬有番少少aftertaste, 未去到要俾負評｡去到甜點部分, 全部失望！蛋糕質素普通, 只有死甜沒有桃香… 奶凍全是奶味, 和上面的白桃醬完全唔夾…. 香茅啫喱配白桃蜜餞算是不錯, 但希望餐廳可以俾番隻小匙羹我進食呢杯小啫喱, 你俾隻食飯匙羹我其實真係差啲放唔到入隻啫喱杯！好啦, 到本后最愛嘅鬆餅｡ 一字記之曰: 乾！成個餅一啲都唔濕潤, 乾到粉碎, 牛油同果醬未見特別出色, 本后食左半個停手｡話晒都係本后少有嘅high tea, 呢個質素真係太失望…… 好啦我唯有努力啲再揾其他好味餐廳啦~~…查看更多

銅鑼灣真係變得好快, 原來湊湊進駐左希慎, 經友人介紹, 兩個女子決定放工後食餐好, 齊齊打邊爐。本后第一次幫襯, 員工會跟大家説國語令本后有一刻置身台灣嘅感覺！由於進場已經八時多, 幸運地唔使等位順利入座｡餐牌製成一本雜誌一樣, 湯底選擇多, 真係眼花撩亂。由於本后最近公務繁忙, 唔想諗太多, 一於揀個二人餐加少少嘢, 馬上落單！揀好食物, 朋友誠意推介茶飲, 本后對珍奶有一份情意結, 明知會飽肚都忍唔住叫左一杯大紅袍珍珠奶茶。凍飲份量十足, 超大杯！呢度同台灣手搖店一樣, 可以自己調整甜度同冰量, 本后揀左半糖少冰, 味道剛剛好！(雖然最後都因為太飽而飲唔晒….)調好醬料就可以等食, 今次嘅湯底係紅顏花膠雞鍋+胡椒豬肚雞鍋, 湯底一到先自隊兩碗, 好足料, 花膠雞飲到少少濃郁骨膠原, 胡椒豬肚就比較清, 兩款湯底淥出嚟嘅餸都有唔同嘅味道, 本后就偏愛胡椒豬肚, 清清地可以食多兩塊肉~套餐以外叫多左個小食黃金條酥同時蔬湊湊, 黃金條酥略嫌唔夠鬆脆, 失色咗少少｡ 下次都係試吓荔枝蝦球~~ 套餐有好多嘢食, 由於朋友唔食牛, 所以每人處理自己碟豬同碟牛, 本后碟牛係美國特選級牛小排, 眼見散叫都要二百幾蚊, 身為牛魔王嘅我不負眾望, 成碟清晒！朋友個碟伊比亞黑豬肉都好好味, 本后都忍唔住食咗兩塊｡ 海鮮方面由於無晒基圍蝦, 得返鮑魚可以揀, 鮑魚細細隻但尚算新鮮｡ 其他丸類油條蔬菜就不過不失啦~ 因為真係飽到食唔晒！雖然飽到撐住個肚, 但一定要食佢嗰個梅子茶凍, 梅子酸酸的加上濃郁嘅茶味啫喱, 真係幾飽都可以食多杯！大滿足！…查看更多

想念日本系列 🇯🇵星期五晚, 全香港人都去晒食燒肉, 好難揾位, 但友人又好想食肉, 千辛萬苦揾到金金, 盡管8:30pm先有位都要去豪食一番！一入座先被$168熊本A5和牛的宣傳牌所吸引, 要知道本后無牛不歡, 仲要價錢咁平, 真係明明四個人有一半唔食牛都要點一塊試試佢。之後仲點左一大堆肉類, 前菜, 連烏冬同湯都唔放過, 前後叫左三round, 要知道而家餐廳10:00pm閂門, 但燒烤嘅時間唔到我哋控制, 本后差啲想開埋隔離個爐加速烹調時間！不過食力強勁嘅本后同友人, 真係用咗一個鐘KO所有食物, 真係要比掌聲自己！所有肉類都讚不絕口, 鍾意佢哋味道唔單一。身為牛魔王嘅本后, 對於A5和牛同埋厚切牛舌都 十分滿意, A5和牛有油香, 牛舌燒耐左都仲好淋, 好有係仙台食嘅感覺。另外壺漬牛肋骨肉, 自己先成條肉放落碗醬汁再放入爐燒, 一放上爐就見到刀工, 師傅將條牛切到成條頸鏈一樣, 燒好有點像牛肉乾嘅味道, 好食！雞肉配上岩鹽青檸, 好食到朋友想再叫多份。最後食埋烏冬飲埋個湯, 大滿足地離開！唯一不足係點餐較慢, 可能本后心急驚食唔切, 所以好想快啲落到單爭取時間食多啲！下次都係早啲上去希望可以食多幾碟啦~…查看更多

本后深居銅鑼灣, 竟然首次踏足Tower 535嘅三樓, 反省真係要多啲出巡。今次幫襯呢間日系cafe, 木框加梳化嘅裝潢感覺舒服。Menu選擇唔算多, 主打Sando同少量意粉小食, 可能因為以輕食為主, 食客九成係女士, 食量大啲嘅男士可能要叫多份先夠飽~ 今次本后叫左set lunch嘅Beef Sando, 成個set仲有前菜同甜品, 飲品可以正價減$8, 不過本后熱底要飲凍嘢, 又要加番$5, 未食嘢先計數 😆。先黎飲品打頭陣, 本后同街坊叫左Hojicha Latte, 第一口飲落好強綠茶感, Hojicha味道比較淡, 無心理準備會俾個份草青味嚇親！前菜兩款我哋叫左各一開心share, 雞翼無乜特別, 味道不過不失, 反而炸青瓜有驚喜, 看似熱氣但食落都好清新, 食到幾飽都容易清碟。輪到主菜Sando, 牛魔王嘅本后當然唔會放過Beef Sando, 街坊朋友就選擇左雞肉Sando。牛肉係一粒粒牛肉粒, 加上烘過嘅麵包, 炸洋蔥同醬汁, 味道意外的好, 朋友亦好滿足她的雞肉Sando, 難怪每枱都見到佢嘅踪影！最後甜品係Brownie, 唔知係咪侍應唔記得左上枱, 雪糕有點融掉~ Brownie質感煙韌, 加埋雪糕幾好食。看似輕食但其實最後食晒成個餐都捧住個肚走！整體味道不錯, 加上環境舒服, 幾啱自己一個人靜靜地食個飯。唯一不足係侍應比較新手, 希望下次有進步！💪🏻…查看更多

本后今日微服出巡, 跟王太后同皇親國戚飲完茶後, 私約閨密勇闖大角咀來一個咖啡時間。試業中的一浪, 純白嘅裝修好文青, 跟印象中的大角咀感覺好唔同。呢幾日熱到本后無乜胃口, 加上食完午飯不久, 今次主打冰涼飲品！飲品主打咖啡為主, 亦有數款Soda飲品, 本后唔算太好咖啡, 但就俾個橙啡呢個名吸引左, 一於試試佢！橙啡一到, 橙汁同咖啡兩層顏色好吸睛。先試一口面層的咖啡, 好fruity, 帶點酸, 本后心諗混合橙汁會否酸到爆炸？點知溝埋一齊之後竟然中和左個酸度, 淡淡的咖啡帶著橙汁的香味, 對於本后十分對胃 閨密一早飲梗Dirty, 決定叫件蛋糕開心share! 蛋糕出自日光手筆, 濃濃的朱古力味但唔太甜, 暖暖的蛋糕伴著雪糕同吃, 好幸福 傾住計眨吓眼KO晒所有嘢, 決定叫第二round飲品。閨蜜決定品嚐Long Black, 本后就要試吓那杯名字可愛的姜啜濤！其實飲品係Mojito + Ginger Ale, 入口有青檸的酸味, 餘韻帶點淡淡的姜味, 好清新！飲住第二杯一路聞住窩夫嘅香味, 可惜個胃唔爭氣, 太飽試唔到, 下次本后要再試下食物嘅真章！…查看更多

想念日本系列 🇯🇵本小姐食牛無數, 但唯一係炸牛排就連係日本食都覺得唔好味.... 難得同街坊食飯, 就試試呢間來自日本嘅京都勝牛！今次試翼板牛, 配上蘿蔔蓉減輕油膩感, 第一口就咁食, 三成熟嘅牛排, 肉味無被炸漿嘅味道覆蓋, 之後再試其他醬料和山椒鹽, 成功引出肉味！食到一半, 可以要個爐將牛排煎熟一點, 令油香和肉味更濃~ 食埋生菜絲(可添加)和醃菜, 飲埋麵豉湯, 大滿足！呢間暫時係我食過最好食嘅牛カツ, 會再繼續幫襯！…查看更多

本后又出巡銅鑼灣, 呢餐飯局擺明要傾到天荒地老, 見Cosmos有獨立房間, 又可以睇Netflix, 最緊要係唔限時, 即刻book房！本身係Red Mr., 疫情下唔可以唱K, 本后欣賞佢將K房變成小包箱, 真係講嘢大聲啲都唔驚嘈到人！一入房望下menu, 全日Happy Hour買一送一！我哋唔飲酒, 叫左杯Popping Candy. 本身好重菠蘿味, 有趣嘅係加左爆炸糖, 驚唔夠可以加埋附送個一包, 飲入口冇爆炸嘅感覺, 但就不停聽到啪啪聲, 好攪笑！晚餐我哋叫set dinner, 包前餐湯菜主菜甜品, 前菜揀左蕃茄水牛芝士沙律, 以為係一片片咁上, 原來加埋火箭菜成兜上. 水牛芝士細細粒, 愛好芝士嘅我就有點唔夠喉, 不過加埋沙律醋都好味嘅. 主菜係澳洲厚切肉眼扒, 個扒煎得唔錯, 做到medium效果, 亦唔太乾仲有少少肉汁. 甜品可以加錢轉蛋糕, 我哋已經食得太飽就要跟餐嘅奶凍, 本身奶凍嘅味道好淡, 但topping嘅紅豆就好甜, 加埋一齊係做唔到混和嘅效果, 可能落番個少甜嘅cream會仲襯啲. 整體上好滿意, 三個女人坐足四個鐘, 由於傾到雞啄唔斷, 基本上冇睇過部電視, 下次再深究下有冇點歌function！…查看更多

終於食到籽樂！身為港島區嘅朋友, 過海食飯總會揾一堆餐廳俾朋友揀, 唔知點解籽樂係我個wish list上面永遠不被揀中~ 今次四條女尖沙咀睇早場, 終於有人陪我食到啦！鹹蛋黃Pizza係目標菜式, 之後叫埋德國豬手, 黑松露野菌忌廉汁意粉同比目魚扒 (因為有朋友唔食牛, 本后唯有下次先食), 四個lunch set happy share! 跟餐嘅蕃茄湯飲得出用新鮮蕃茄打出嚟, 加埋蒜蓉包勁好食~ 萬千期待嘅鹹蛋黃Pizza, 由於加咗肉鬆, 味道有點兒太搶, 鹹蛋黃嘅味道變得唔突出, 好彩個餅底都好脆, 當佢係肉鬆Pizza就會覺得好好食. 德國豬手中規中矩, 鍾意佢唔太鹹, 肉質唔硬. 本后反而鍾意個意粉同比目魚扒, 意粉個黑松露幾突出, 就算凍咗都好好味！比目魚扒係我鍾意有魚味嘅肉質, 加埋薯仔配菜, 好滿足！埋單每人唔使$200, 好抵食~ 大家幫襯嘅時候, 記得要俾啲時間侍應們, 嘗試吓放慢自己講嘢嘅速度, 大家要互相包容唷！…查看更多

唔好睇佢店舖細細, 食物水準十分之高！第二次幫襯, 繼續保持水準~今日打爆限聚額四人出動, 一人一碗拉麵之外仲可以叫多幾款小食, 海膽薯蓉球襯熱將海膽同入面嘅忌廉溶入在一起, 超好味！小食拼盤有沙律有炸物, 一次過滿足三個願望~重點拉麵, 湯底是重點！第一件事要先飲啖湯, 今次四個人有三款拉麵, 每款湯底會根據主食而配合不同味道, 看得出廚師的用心. 上次幫襯食左蟹拉麵, 今次食角切日本宮崎牛拉麵, 牛味超濃, 加上豚骨湯底, 成碗食晒好滿足~~ …查看更多

七週年紀念最後一擊...... 藝術甜品!!!之前一天才預約, 幸好還可以得到夜少少的booking. 我和男友早了半小時到達, 也很快可以安排到坐位~先來一支welcome drink, 試管果汁得意又好味. 再order甜品後的飲品, 我們點了Cafe Latte & Chocolate 70%, 兩款都需要補少許差額的.首先選擇枱墊顏色, 我們決定了黑色作背景, 另外還有白色和灰色可供選擇. 藝術家 (我給他們的稱呼)會先詢問有沒有食物敏感, 然後開始繪圖, 其間會不斷介紹食物名稱和種類, 還主動幫忙拍照, 過程很開心. 完成作品後一輪拍照時間, 跟著便啟動匙羹! 所有食物都很美味, 而且份量頗大, 晚飯吃不飽反而被這甜點填滿了胃~~ 餐後的Chocolate 70%很濃郁, 真的甜上心頭!!! 坐位不多, 幸好大家幹掉眼前美食也會主動到旁邊沙發位置休息, 令大家不用等太久便可欣賞這甜品藝術. 這是一次很特別的飲食經驗, 如有特別日子, 真的要來試一次!!!…查看更多

某日小公主的同學興高采烈地叫食火鍋,可能天氣突然轉涼,所以大家都顯得異常積極.大伙兒到達火鍋城,大大塊牌寫住任食,價錢不貴,9:30p.m.後六十多元, 11:00p.m.後更只要五十多元.食物選擇多,有大大隻生"ho",幾新鮮,仲有壽司任食,十一時後有十五元一碟生蝦,比晚市平很多.我們一行十二人,叫了差不多8round,叫埋飲品,每人都係$107,仲有甜品送,食到個個捧住個肚走.招待亦很周到,我想這會變成小公主的火鍋勝地.…查看更多