那些年,我們一起吃的晚餐's Profile

下午茶48蚊零鑊氣乾炒牛河又未至於難食既，肚餓到爆都會食埋去。不過反正都翻炒，就炒多兩野啦，而家熱d又唔熱d咁。同埋落成堆芽菜，下次落少d啦，畀餐牌隻手指公icon厄左。食件三文治會開心d😂環境幾好坐既。杯野都好飲既。…Read More

見新開，食飯多個選擇，本來雙贏。點知遇著個黑面侍應，都幾無癮。坐底都9:30am ,入到去吉位大把，侍安排我坐單人卡位。點知一坐底就覺得凍，原來頭頂有幾把風扇。天氣岩岩轉涼，冷氣加風扇真係頂唔住，見窗邊有位就調過去。侍應呀姐就好話我調位。同佢解釋凍，問佢風扇可唔可以唔熄，又扮聽唔到。然後”那翻揸沙”話多人要搭枱，我應佢好呀，多人未搭。再問拎杯水想話好忙，叫我自己斟，望天花又唔見自助水吧字眼。有客入真係想叫佢搭我枱，人地見半間吉位，睬你都膠，真係小家到死。其實都過左繁忙時間，洗唔洗咁執著砌磚式安排座位？我食完十分鐘都閃人啦，唔洗做咩！？講番個早餐，其實麻麻地。隻蛋又唔係即煎，食落凍既。除左牛肉奄得入味，其他野賣相，味道一般以下。間野留番比隔離酒店，貪方便食個飯既客吧。…Read More

公司響附近，一星期都食一兩次。成日黎食因為幾好坐，早餐又唔係貴。今次食沙嗲牛麵，煎蛋。打依篇野主要係想讚揚個廚好識煎蛋，每次都煎都無話穿蛋黃，狀態好既話蛋白仲會有脆邊而蛋黃仲係生。講翻沙嗲牛，牛肉份量多。但沙嗲偏咸，撈完湯都係咸，如果加微辣會惹味d。多士即烘有heart.可能成日食，如果煎雙蛋可以配 腸蛋/腿蛋/餐蛋 就無咁悶。整體黎講33蚊真扺食！日昇中心，熟食市場條街d早餐都挨住40，希望依間唔好咁快加價。…Read More

被歸類為頹飯既粟米肉粒飯一直係我至愛。雖然間間茶餐廳都有，但好食既真係小之有小。可能市場定位係頹飯，令到餐廳有錯覺，覺得客人叫左預左伏，由頹飯變左cap水魚飯。所以近依十年都無特登點，差不多價錢，50幾蚊個寧願有塊扒食咬下或者炒粉麵，蝕極都有野落肚。因為伏既粟米肉粒飯，就算好肚餓，食兩啖都唔會想食—肉粒鞋，切得一舊大一舊細、汁似水、預著飯底乾身真係gg.但依間煮得好有heart. 肉粒鬆軟，有d餐廳真係肉片當肉粒，比人感覺係食淨肉撈埋當係。個汁就較中式，我覺得可以調濃d. 我較喜歡忌簾，但依個都唔差。可能廚師本身都鍾意食，所以下午茶有依個飯點。有用心煮既粟米肉粒飯買少見少，依間大家可以放心一試。…Read More

見間野主打三文治咁，招牌哂咁，未試下囉。40幾蚊食份咁既野，真係哂錢哂心機。拿！有圖有真相，d蛋老到準備投胎，牛肉食兩三啖又有硬野(吐番出黎廢事影)，細份唔緊要，但又唔係特別好食，咁你就打多隻蛋做大份d啦。招牌意思係未伏咁解😂蛋牛治加杯野飲，就你門口都有間檔仔都係收廿蚊鬆d。40幾蚊依份野真係唔抵食。或者我唔識嗌野食。其實你間野係未主力蛋包飯？我見隔離位個蛋包飯都好靚仔，望落你都識煮蛋，但點解蛋牛治d蛋老成咁。🤔…Read More

買少見少舊式茶餐廳。假天花，拱門，地磚，木卡位，木枱加玻璃，水吧位燈片，過去傳宣既海報，入到去好似時光倒流。午餐45左右街坊價，但我都叫左個繪汁吉豬飯加杯凍奶茶。繪汁係以前周街都食到既果道，濃濃地，甜得黎有些少茄汁味。點解我話以前容易食到？因為隨著領展趕盡殺絕，又或者餐廳無人接手，依類茶餐廳愈來愈少。而家多數響獨立大廈地鋪先會有機會遇到。不得不讚佢個吉豬，炸得岩岩好，咬落鬆化，58蚊，岀面都食唔到。一味賣弄厚切果d餐廳無用架，寧願你炸得好比多件人地啦，果d餐廳永遠令你失望。…Read More

經朋友介紹之後，響大埔成日食，但最近搬鋪無咁就腳(哭)今次咁岩觀塘約左朋友，夜晚9點工廠區應該易有位，所以行去駁下。唔去尢至可，去到包場，我都唔好意思堂食阻人收工，所以唯有快！每次都係叫個丼加個赤海蝦。今次用埋d優惠券。間野真係佛心，每50比用一張，今次用左4張。原本多飯都叫佢變翻正常份量。反而上次大埔唔知點解唔比用，仲以為比壘廢紙我😂😂壽司飯每次食都微甜微暖超好味，觀塘同大埔味道一樣，希望之後都keep住。唔知係未就收工，食物都大大份，特別係個丼飯三文魚，5件都比到d刺身級數，反觀大埔每次三文魚都瘦得可憐🥹下次一定會再黎，亦都會早d😂😂…Read More

上OpenRice尋覓北角食店。見係茶餐廳仲要咁好評價，行到門口有條固定隊，一睇就知伏極有限！一坐底望下隔離左右都係叫豬排早餐，我都跟嗌番個。咁難得黎北角，所以叫左個全日早餐，順便試埋個沙嗲牛。沙嗲牛通，牛肉食落沙嗲有微辣，可惜牛肉唔夠熱而且湯太多。如果少湯，沙嗲牛熱d應該好好食。再黎主角豬排，大大塊，不過唔夠淋，味道都唔差。最欣賞間餐廳無用茄汁豆當一個配菜，仲有塊薯餅。咖啡甜甜地有d澳門咖啡感覺。下次會再黎試午餐/晚餐。最後想講，好討厭而家d茶餐廳記早餐，丹麥多士當首選，食多士反而落單要講明、茄汁豆當一個配菜。香腸火腿蛋食得你幾多錢？麵包茶牛油都懶？香港茶餐廳早餐普通配菜都已經無左煙肉，再咁度縮，早餐會無哂吸引力。…Read More

當年附近反工，睇住佢開，雖然價錢比出面街貴，但環境ok,又幾好坐同幾好食都周不時幫襯。特別佢個早餐，應該全港得佢咁做，菠蘿油/鮑魚絲通粉/火腿奄列，放假都試過特登去食。N年後，我做左個錯誤決定，就係帶朋友去食lunch . 坐低過廚房無廚師得番碟頭飯。ok,照落單，飯又一舊舊，汁又麻麻，然後扒一塊，成碟野又唔係特別熱…總之後悔。直到今日，食埋曾經迷戀過既早餐，徹底失望。入到間鋪大把位，但淨係開一邊，聲稱另一邊要做清潔，再問多句又話一陣好多人…大姐，朝早1030咋…實情呀姐侍應唔想行多步，weekend想坐下卡位chill 個早餐都唔得。落單又遇著另一個態度差既侍應……終於到左主角早餐上台，兜粉加左肉丁都可以無黎味道，d肉丁又難食，菠蘿油走哂樣，以前叮完都脹卜卜，牛油亦無咁快溶哂，而家見丁都無希望。最後附上收碗碟餐車，離遠見到都唔開胃。工廠區似終都係工廠區，幾靚裝修都無用，可惜！…Read More

深水埗長沙灣果兩間都有食開，最近發現觀塘老母都有，點都要捧下場。前後叫過六，七次外賣。D野食係好食既，但每次都等勁耐。所以之後都醒水兩點半就打電話落order.但今次電話落都等成差不多半個鐘。等左五個字左右問下收銀有無漏單，又要受佢氣😞 到d餐岀黎，一個侍應抽成四大袋。我都係叫一個外賣姐，就要陪埋其他大單一齊等。其實兩點半之後都無爆場，如果見煮好就拎岀黎啦。今次食下午茶牛柳粒飯，有炒底，牛柳都好多，非常抵食。Ps 我有試過兩半前落單，但部機落唔到tea …Read More

今次早餐食 招牌豬排米 奶油多 雙蛋 凍奶茶。見響元朗開，特登去幫襯。有個習慣唔知叫咩既時候，就會點”招牌”菜。招牌菜都難食真係唔想有下次…然而今次點左個 招牌豬排 。又鞋又乾，咬落又無肉汁。早餐入面又要比較貴。咀嚼多兩啖直頭想吐出黎…元朗有個特色，就係唔知點解好多餐廳料理豬排都有一手。就算唔岩口味，但塊豬排至少係軟淋，食得落口。今次第二次食，兩次件多士都唔係即烘，如果唔係即烘既，就唔好收人1蚊，淨係做方包算啦，又唔係做到踢哂腳。凍左既多士真係扣分。…Read More

本身鍾意食叉燒，見佢名叫叉燒大王入去試下。其實都心裏有數，通常依d名收得你50蚊一個叉飯，叫做保證唔會全部都係又鞋又乾既叉燒。碟飯上台，正常size既叉燒7舊，食落都淋既，但唔係全淋。份量多d會覺得型d。叫得大王就比d霸氣啦😂比起有燒味部既茶餐廳無咩特別之處。叫做試過囉，適逢好想食叉燒寧願斬50蚊幫呀媽加餸😂又或者撞岩你果區有d質素保證既燒味，食果d好過。另外凍奶茶無咩茶味。食個lunch50蚊可能你覺得我多要求🤣🤣。但我真係食過好多50蚊高質叉飯，可能佢唔叫大王我都未必打依篇野😂其實打依篇主要原因係飯食飯碟。我叫叉飯，但碟邊有d黃色油，又有d大大滴水珠。感覺好似人地食完碟雞飯，求其過一過水抹一野再裝個叉飯。🙂🙃…Read More

第二次幫襯，其實都係想坐好d同飲杯啡。叫左個焗豬扒飯同凍啡。凍啡岩我口味，甜咖啡。不如所料，焗飯真係好難食，唔怪得餐牌咁多9唔搭8選擇，有拉麵，豬油撈飯都有（笑）講番個焗飯，除左包裝似，味道完全唔係果回事。唔熱已經係死罪，仲叫自己做焗之專門店尤如用大頭砸自己對腳。個炒底毫無靈魂，咁當然都好過無炒既......芝士又拉唔到絲。其實熱到辣手對焗飯黎講真係好重要。做焗飯醬汁要落好多，凍既汁真係食唔落口，哂quotas.豬排份量多既，但質素尤如香港政府，正正經經用一塊靚豬排好過啦。其實佢可以碟頭飯咁上菜算，何必洗多隻碟？…Read More

第三次黎食，之前都打左篇關於佢既焗飯好廢。今次食都係想飲佢杯咖啡，同埋卡位幾好坐。但為免中第三次伏，所以叫左個日式咖哩吉列豬排飯。估唔到個飯仲熱過前兩次焗飯，真係比佢吹脹。日式咖哩味道一般，唔夠甜，但唔難入口。但我無撈均哂d飯。個飯唔係珍珠米，無期待無失望既。但稍微有點硬。吉列豬排上台時個面仲炸炸聲。面果層炸漿好味。但都係果句，用塊靚小小既豬排啦。經過今次，更加肯定唔好叫焗飯。下次都會為左杯凍咖啡再黎既。…Read More

由愛群食到變愛心。順天得果幾間餐廳，以前唔係食天皇就係食愛群，依間都食左十幾年。茄汁味道咁多年都無變。豬排都係咁上下，不過不失。平時會叫羅宋湯,因為好濃味好好飲。都係街坊生意，佢地又唔介意街坊叫學生餐。有時有d細路玩完，會入去斟水飲😂😂最近好小幫襯，入去見到員工無再著果件好classic既工作恤有種失落感。同埋一入門口個鐘都無左好耐，但總會下意式望一望。屋邨茶餐廳價錢覺得有點貴，不過明既，要交租比領展，條邨又得一間中學，又係老人邨，有人接手仲有得食仲想點？之後有機會仲會幫襯。❤️…Read More