tallll's Profile

問吓大家：睇show之前最緊要做啲咩？.答案係醫飽個肚！你知啦，睇show又要fing 螢光棒，又要落力嗌，有時興奮起上嚟仲要跳埋一份，要好多energy㗎嘛🤪.話說前嗰排去紅館睇軒公演唱會，入場之前決定喺紅磡附近覓食！呢間拉麵店，我一直想試好耐，但因為佢真係超人氣，成日都排晒長龍，所以一直都冇機會食到。今次我專登早啲嚟，6點前就嚟到，排咗一陣終於有機會食到！（冇錯，係6點前都開始排緊隊🤪）.蒙麵係用車仔麵式嘅叫法，即係揀好麵底，然後每樣餸咁加上去！咁難得嚟到，當然希望試多啲嘢啦🎉我揀咗蒙麵麵底，升級咗番茄薯仔湯底，配料方面揀咗新鮮花甲、糖心鹵蛋、辣味魷魚，另外再加咗串招牌蜜汁叉燒！大滿足🥰🥰🥰.😋三餸麵麵底揀咗蒙麵，係呢間店舖獨有嘅！睇落有啲似幼身嘅烏冬，口感似薯粉，堅靭彈牙。番茄薯仔湯底係呢度嘅招牌之一，番茄味非常香濃，絕對唔係出面是但用茄汁開嗰種！薯仔唔會煲到溶晒，仲可以食到一粒粒嘅薯仔，口感💯💯💯👉🏻花甲份量十足，隻隻都大大隻、啖啖肉，完全冇沙！而且味道好鮮甜，推介👍🏻👍🏻👍🏻👉🏻辣味魷魚好惹味，香得嚟唔會太辣，食開BB辣嘅朋友都handle到！店員會將魷魚另外用碗分開上，令辣汁唔會沾到個湯底，好貼心！👉🏻糖心鹵水蛋好份味，熟嘅程度剛好，真心有糖心效果。.😋招牌蜜汁叉燒串即叫即燒，上碟係熱辣辣😍叉燒件件厚切、啖啖juicy，啱晒鍾意食肉嘅朋友！廚師會將叉燒燒到少少燶邊，但唔係燶到苦嗰種，少少燶邊更加可口惹味！蜜汁甜度剛好，唔會太甜太膩，食完想再encore!.整體嚟講，呢次體驗非常好，亦終於理解點解咁多人排隊！不過建議趕時間嘅話就唔好嗌叉燒喇，因為店主寫明「唔等得 唔好食」😂都好明嘅，慢工出細貨，同埋即叫即燒真係啖啖心機㗎！...題外話，回應吓最開頭：睇show之前最緊要做啲咩？除咗食飽個肚之外，當然係要買到飛啦🤪嚟緊就有MIRROR演唱會喇，各位鏡粉搶到飛未呢？預祝佢哋12個good show啦💪🏻💪🏻💪🏻…Read More

女仔雖然日日都話減肥，但喺甜品面前，真係抵唔住誘惑！仲要遇到呢間好味又抵食嘅雪糕店，真係諗唔到唔食嘅理由😂.油尖旺好多甜品舖，好多都好出色，不過價錢都唔平！前兩晚食完晚飯，想食個飯後甜品，但係又唔想洗百幾蚊食個雪糕，朋友突然靈機一觸，醒起銀城廣場地牢有一間良心雪糕店💛於是即刻過去試試佢！.雪糕店舖頭細細，但係有好多雪糕口味可以揀，而且好平好抵食：$10/2球，$15/3球，$20/4球！雖然佢某啲口味要加錢，但係加完都仲係好抵食，講真今時今日求其去便利店買支甜筒都要10幾蚊，你間小店嘅價錢算係好公道！.😋日式豆腐雪糕呢個係小店嘅低脂之選👍🏻食落係好香濃嘅豆腐味，質地比較輕身唔會太膩，而且唔會太甜，有驚喜！.😋Tiramisu雪糕雪糕球有粒粒嘅脆脆，好有口感！咖啡味香濃，相比豆腐味，呢杯奶味較重。雪糕質地香滑，非常對得住呢個價錢！.題外話，小店有部閃卡機，如果買夠$38可以抽一張卡，聞說裡面係一張指定口味嘅免費雪糕球卡🎉如果兩三個朋友一齊去，夾埋一齊俾錢，好易就有得抽卡😋又可以試多隻味🥰…Read More

可能好多人work from home 嘅關係，九展呢排午市都好靜，堂食人數寥寥可數。見到鳴日推出咗抗疫外賣救市，最平$49 有個飯，比起以往真係平咗好多！😋照燒雞扒飯配玉子份量十足，雞扒大大塊，照燒汁好好味！仲有半隻糖心蛋，配上炒雜菜，好唔錯！唯一係雞扒有陣微微嘅冷藏雪味未僻走晒，有改善空間～食晒成個飯好滿足好飽肚，建議細食嘅朋友可以叫少飯，避免浪費😀整體嚟講，$50有找有飯有肉有菜有紙包飲品，九展嚟講真係一個好選擇！…Read More

.喺佐敦渡船角一帶隱藏咗好多咖啡小店，Good Day Coffee 就係其中一間🥰 舖頭細細，但係裝修好別緻，俾人好chill 嘅感覺！.😋雞肉蛋沙律三文治三文治好厚好足料，蛋沙律係店主自己整，蛋同蛋黃醬比例唔錯，質感唔會水汪汪。除咗雞肉同蛋沙律之外，仲有大量蕃茄同生菜，感覺好清新好健康🍅.😋熱Latte奶啡冇得輸，奶香幼滑拉花靚！順帶一提，小店有得揀是日咖啡「Good Day Coffee」，不過咁啱嗰日係青瓜latte, 個人麻麻哋青瓜所以冇試到，不過咁樣嘅款式又幾特別！希望下次去試到其他創新嘅咖啡！.😋黑朱古力花生醬曲奇想講佢哋啲甜品真係好！吸！引！吸引到一嚟到我就食咗，唔記得影相🤣店主好貼心幫我焗返熱佢，暖暖嘅曲奇，中間花生醬有流心嘅效果！黑朱古力味好濃，同花生醬好夾，個曲奇真係無法抗拒！.呢度堂食座位唔多，期間見到有客人為咗食甜品專程過嚟幫襯，就算take away都唔介意！佢哋同店主有講有笑，相信係熟客嚟。好欣賞呢種人情味，真係小店獨有，唔係一般連鎖店可以媲美.呀～佢哋而家仲有得儲印花，買滿8杯咖啡就可以免費嘆第9杯！近佐敦嘅朋友可以留意返～.食完滿足嘅一餐，真係have a good day! 絕對會再幫襯🤤…Read More

收工路過Mikiki 順便買埋晚餐返屋企食見呢間餐廳新開，裝修好靚好日系，決定一試！買咗個咖喱可樂餅返屋企，可能外賣關係，返到屋企個飯糰有倒汗水，相信對味道唔多唔少有啲影響。 咖喱可樂餅味道甜甜哋，食嘅時候雖然凍咗，但唔影響外皮幾脆口。但飯糰夾住午餐肉+可樂餅+蛋+沙律醬呢個combination怪怪哋，味道唔係好夾，唔知其他款式會唔會好啲～ 值得一讚嘅係，用飯糰嚟做三文治呢個idea幾創新，方便咗啲依家冇得堂食又冇地方食飯嘅人，唔使喺街捧住個飯盒嚟食咁”呢hea”😅 …Read More

.平日下晝同朋友喺大角咀食嘢，嚟到呢間聞說係長期排長龍嘅台式小店。我哋大約一點鐘嚟到，喺門口等咗大概15分鐘入得，比想像中快。.介紹吓呢度嘅便當：每日餐廳都會有5種配菜，隨便當附上。當日就有炒野菜、香菌洋蔥粟米、炒粉絲、焦糖玉子、涼菜⋯⋯配菜都係以蔬菜小食為主，而且唔係每日都一式一樣，就算食多幾次都唔會咁快厭！.😋香酥脆雞便當歡變動可以揀三種口味：鹽酥/海苔/香辣，今次我哋揀咗海苔。雞扒即叫即炸，上碟時係熱辣辣🔥而且炸得好脆口，咬落肉質嫩滑，唔會炸到乾憎憎！.😋那個滷排骨便當餐牌上寫呢個係招牌菜，見到塊滷排骨（即係香港嘅豬扒）真係好震撼，目測大過我塊面！！！滷排骨好鬆軟好易咬，唔會食到痴牙。配個面頭嘅滷水汁，味道好夾👍🏻.😋蜂蜜麻糬白玉奶茶跟餐有幾款茶可以揀，不過今次我就加錢轉咗特飲。唔知係咪因為嗌咗少甜嘅關係，蜂蜜味唔算好突出，但我好鍾意成杯飲品好有𡁻口，麻糬同白玉都好chewy, 啱晒我口味！溫馨提示返，呢杯嘢都幾飽肚😂細食嘅朋友可以嗌返細杯嘅16oz.知道呢排飲食業市道好差，衷心希望呢間小店可以撐得住🥺有機會去開大角咀嘅朋友，不妨去食個飯支持吓佢哋💛…Read More

.呢間係座落喺一間酒店地面嘅coffee shop。今次揀咗嚟呢度嘆早餐，亦都特意試試佢好評如潮嘅Tiramisu🤤平日嘅早上，餐廳唔算多人，環境舒適寧靜，啱晒一個人放鬆吓，亦好適合三五知己傾偈聚舊.😋Espresso Mulled Wine第一次見有呢個combination! 覺得幾有創意🤩顧名思義，即係將espresso 同mulled wine 兩者crossover, 既有espresso 嘅醒腦提神，亦有mulled wine 令人暖意窩心嘅感覺🥰 雖然飲品味道略酸，但的確有點驚喜！留意返呢杯係期間限定嘅飲品，想試嘅朋友要把握機會趁早去喇.😋無花果帕爾馬芝士多士Parmesan cheese 嘅香濃，加上新鮮無花果嘅清香，兩者配搭恰到好處。無花果非常香甜，中和咗芝士嘅膩胃感，配上希臘乳酪同橙花味蜜糖一齊食，輕盈而清新！.😋Homemade Tiramisu雖然係食早餐，不過最期待嘅係呢樣甜品🤤網上好評如潮嘅Tiramisu 果然冇令人失望！Mascarpone cheese 口感綿香幼滑；手指餅係用自家espresso浸過，食落有濃郁嘅咖啡香，高質！…Read More

呢排work from home，太多日冇出街，早兩日頂唔順，決定落去行吓食個早餐。😋芝士洋蔥貝果屬於輕食之選，芝士洋蔥味好香，但食落唔算好濃味；餐廳會提供埋牛油同果jam，個人認為呢個bagel 配牛油夾啲！唔想早餐食得太飽嘅話，呢個bagel 就啱啱好😋Americano平時鍾意飲有奶咖啡，間唔中都想清淡少少。Americano好香，味道偏fruity簡簡單單一個早餐，為一個平日嘅早上打打氣，係一日嘅好開始🥰…Read More

喺度買咗個外賣返屋企做lunch, 份量多，雞扒好大塊，但味道好鹹。配菜（半隻滷蛋、炒粉絲）好食過主菜，$60幾包一杯熱茶，其他特飲全部都要加錢。本身但求食飽，冇乜期望，所以都冇特別失望…Read More

.中環雲咸街呢間餐廳以「正宗東歐菜」為賣點，主要係烏克蘭菜，老闆娘係烏克蘭人。之前《喱騷》阿澤有介紹過，曾經日日full booking！但多_謝正苦嘅政策，小店最近生意少咗好多，加上附近好多公司都有wfh 政策，依家連lunch hour都坐唔滿🥲.餐廳環境舒適，行浪漫情調路線，非常適合情侶拍拖、慶祝紀念日，亦都適合三五知己閒聊聚舊❣️.餐廳午市有提供lunch set, 包咗沙律、湯、主菜同飲品；湯可以揀傳統烏克蘭羅宋湯或南瓜忌廉湯。我哋今次嗌咗兩個set 再加一件甜品share，埋單每人$200有找。咁嘅價錢食到正宗烏克蘭菜，個人覺得好ok👌🏻.😋焗蘋果鴨胸鴨胸煮得啱啱好，唔會嚡熠熠。特別欣賞佢個醬汁，係香甜帶點微酸嘅蘋果味，好開胃！裡面有一件件切好嘅蘋果同薯仔，味道出奇地夾！有煮開嘢食嘅朋友都知道，用生果煮食，如果煮過龍會令生果好酸，但呢度完全冇呢個問題，好出色🤩.😋奶油燉雞柳Chicken Stroganoff 係一道經典俄羅斯菜，醬汁香濃但偏鹹，雞肉都好入味，配上粒粒蘑菇同薯蓉，薯蓉亦好香牛油味.😋烏克蘭風味蜂蜜蛋糕係東歐嘅經典甜品，用上蜂蜜同俄羅斯酸忌廉做成，一層一層咁鋪上，口感有少少似平時食嘅千層蛋糕，但佢面頭再淋上蜜糖同果仁，層次感更豐富.順帶一提，佢嘅湯品都好高質！南瓜忌廉湯一飲就知道唔係溝粉，係濃濃嘅南瓜香味，質地較濃稠，唔係水汪汪！.而羅宋湯係用咗傳統烏克蘭做法，同港式唔同：烏克蘭羅宋湯嘅鮮紅色，係用紅菜頭做成，配上紅蘿蔔、洋蔥、椰菜等蔬菜，再加上酸忌廉而成，絕對係誠意之作！.又再順帶一提，同老闆傾開計，佢話老闆娘依家仲好擔心俄羅斯會開戰😢希望老闆娘一家頂得住，好人一生平安💛…Read More

嚟到尖沙咀想食芋圓，坦白講本身係想食鮮芋仙😂但係實在太多人排隊，冇耐性嘅我定轉場，去咗後一條街嘅嚐仙。.舖頭細細，座位唔多，仲坐得好迫，都幾唔舒服。我哋坐近門口位，啲人出出入入仲成日唔小心撞到，呢個體驗認真麻麻.😋黃金地瓜泥豆花呢碗有地瓜泥、豆花、紅豆、珍珠、芋圓，好足料成碗滿晒！地瓜泥特別出色，真係好香番薯味，番薯係用咗黃色番薯，好香甜，唔錯！其他配料都冇乜特別，都係正常發揮。.留意返，地瓜泥只有凍食冇熱食，如果怕食凍嘢嘅女仔可能要揀返其他甜品～…Read More

之前父親節因為一個美麗嘅誤會，去到last minute 先發現原來冇人買蛋糕，臨急臨忙即刻係附近搵，睇吓買唔買到現成蛋糕。點知好好彩，喺尖沙咀呢間麵包舖，買到呢個開心果蛋糕，父親節限定版仲有架玩具車仔係蛋糕面頭做裝飾😂.想講個蛋糕真係好！出！色！！！睇落唔覺有啲咩特別，都係用海綿蛋糕同埋忌廉組成，上面有少少生果咁。但食落真係好驚喜！忌廉有好香濃嘅開心果味，中間仲會食到粒粒開心果碎，好高質！講真個蛋糕唔算好大（目測大約5”），但價錢係$300有找，連特別節日都係咁嘅價錢，性價比極高！之後都有再去幫襯佢買一件件嘅切餅，不過都係覺得開心果蛋糕最好食😋…Read More

下午茶時間，突然想食甜嘢，喺東薈城附近但搵咗間餐廳坐低食件cake.- New York cheesecake其實店舖都有幾多唔同嘅甜品選擇，不過千揀萬揀，最後都係揀咗好common嘅New York cheesecake😅 芝士餅密度好高，芝士味幾rich, 但餅底太厚，同埋唔夠鬆化，有啲失色。.Overall, 頂吓甜品癮就算啦，just don’t expect too much~…Read More

小店走簡約路線，用上純白嘅設計，加上綠色植物同音樂點綴，感覺好chill~ 如果唔係有人等位，真係可以喺度坐一個下晝😌.😋Avocado Smash牛油果醬多士，用料一啲都唔吝嗇，牛油果醬好足料，啖啖都食到濃濃嘅牛油果香！多士用咗酸種麵包，都幾厚切，烘得香脆。另外可以加錢配炒蛋/水煮蛋，怕唔夠飽嘅朋友可以試吓。.😋Beef Burger中間塊肉用咗紐西蘭草飼牛，配料有番茄、生菜、芥茉醬等等。我自己冇試食burger, 但見朋友第一啖咬落去，有啲肉汁流出嚟，相信都唔係乾憎憎嘅扒。但個人認為，成份burger 最搶眼都係佢上面拮住嗰條酸黃瓜😂.😋Apple Crumble Cheesecake平時食Apple Crumble 多數都係焗熱食，不過呢度係連埋cheesecake 凍食，又係另一種感覺！最欣賞個餅底，好香好鬆化，唔會太厚。.價錢方面其實都偏貴，但耐唔耐一次，山長水遠去到離島，對自己好啲都不為過～…Read More

有日去開悅來坊嗰頭，諗住順便食埋飯先返屋企，都係是但入咗一間餐廳，但求食個飯醫吓肚，冇抱住太多期望過嚟食。.😋芝士吉列豬扒定食定食本身有個飯、麵豉湯、有個前菜咁，正正常常。芝士吉列豬扒比我想像中大塊，豬扒面頭已經有唔少芝士碎，但原來中間都夾住流心芝士（雖然唔係好流）。豬扒幾脆口，不過炸粉太厚，有啲油膩；芝士量係多，不過芝士味唔夠濃，冇乜期望咁嚟食係ok嘅，但如果芝士迷一心諗住過嚟食芝士，我就覺得就可以慳返啲quota了…Read More