死飛女's Profile

晚市套餐$8x-9x，叫咗豚肉一口照燒雞丼、餃子同加$5要咗熱牛乳抹茶。坐低冇耐，隻腳好痕，原來枱底有嘢咬😖好彩有其他枱可以調。上咗杯牛乳抹茶先，味道清淡如師姑尿，都幾難飲吓…. 早知飲杯熱茶好過。個丼飯賣相唔錯，豚肉、雞肉都算好食，但係啲飯就有啲慘不忍睹，又濕又淋，完全冇飯味，我食剩一半🙈成個餐唯一可取嘅係餃子。甜品係泡芺，唔想食，冇試。$93，食完身理同心理都仍然好空虛，完全係欲求不滿，唔會有下次！…Read More

之前行過見咁多人買，今日星期五下晝4點幾，喺公司用COMEBUY TEA QR Code落單，撳咗「取單提醒」，諗住等通知先去攞！等咗20分鐘見冇聲冇氣，就行過去追下，去到原來一早整好咗，熱飲都已經攤到變咗常溫🙈，我問店員「取單提醒」係經電郵定SMS，因為我兩樣都冇收過。店員回覆我，佢哋只會喺order ready嘅時候嗌號碼，佢哋唔會入機話整好邊張單。即係話我有我「取單提醒」喺公司坐住等，佢有佢現場嗌號碼攤凍啲嘢飲。真係好勵害嘅落單、取單系統！最後，我當然覺得佢啲茶唔好飲（啲芋丸仲發晒脹、一pat pat），所以要出個食評提醒吓大家！…Read More

離開咗深水埗一段時間，再次食佢嘅豬膶麵真係震撼到我。冇諗過會變得咁難食，豬膶又老又柴，食落冇味，湯亦冇晒啲豬膶泡泡。唯一可取，係夠熱！為咗減低我因為食咗劣食而引發嘅憤怒，我加左件加央多，希望可以平衡味蕾，好彩冇浪費呢$16，佢療癒咗我，冇即場反枱。隔離枱有對銀髮族夫婦，嗌咗豬膶麵同牛肉麵，佢哋都話豬膶好老、咬唔到。伯伯想叫店家換，但婆婆制止佢，話食唔到就由佢，最多以後唔幫襯。冷靜落嚟，回想剛才嗰碗豬膶麵其實並唔係咁難食，只係佢唔再係維記豬膶麵嘅味道，佢只係一碗將貨就價，用唔新鮮豬膶做嘅麵，我剛才嘅憤怒只係恨鐵不成鋼，只要放下對維記豬膶麵嘅感情，就唔會影響到我情緒。香港飲食業萬歲！…Read More

端午節假期同阿媽撐枱腳，諗住行下街、食下飯。因為阿媽準備新屋入伙，所以有啲家品、小電器要買，咁就去MegaBox，佢話想食牛扒，見 Ruby Tuesday 口碑麻麻，咁就揀Salted Pig啦！叫咗豬肋骨、肉眼、帶子意大利飯，賣相唔錯、份量亦足，可惜味道只係正正常常，冇乜值得推介！Salted Pig平時即使係週末，主餐牌都會有折，但因為係端午節假期，所以冇折正價埋單會覺得好唔抵。…Read More

平日自助午餐，優惠價$428（已包加一）食物選擇多，刺身品質不俗，片皮鴨、燉湯十分岀色。凍海鮮有蟹腳、龍蝦鉗、大蝦、小龍蝦、大蜆，正正常常，冇驚喜但亦唔會失望。Cold cut、芝士都有唔少選擇，不過芝士已經切好，賣相就略為遜色。必食嘅係Godiva 朱古力軟雪糕同各式杯裝Häagen-Dazs！甜品係榴連主題，有自家製榴連雪糕、貓山皇軟雪糕、榴連奶凍，絕對可以滿足榴連控！不過如果唔嗜榴連，又唔鍾意食雪糕，咁甜品嘅選擇就會少咗啲。…Read More

行大運執到死雞，book到星期日brunch時間，佢有一個獨立brunch menu，基本上佢signature 嘅嘢都可以喺呢brunch menu試到，不過如果想食三黃雞就要夜晚先有。點解咁難book位？因為真係好好食 ，而且性價比超高！建議食brunch嘅，一定要加$138飲埋個海鮮湯，包你唔會失望！…Read More

食過兩間銅鑼灣The L Place嘅餐廳，兩次經驗都好好。即使餐廳細細，食物有質素之餘，服務亦好周到。今次試Mano亦都冇令我失望，6點坐低我哋喺第一枱客，即使menu選擇唔多，但每樣都頗吸引。二人套餐好抵食$888，但因為想食墨汁意大利飯，所以冇嗌套餐。整體食物質素都係有水準，不過如果正價嘅話就有啲貴，而我今次係經網上平台 book，所以有折覺得幾抵食！個人覺得佢個荔枝香茅特飲同墨汁意大利飯係必點。下次會再嚟試二人套餐！…Read More

四個人或以上經OpenRice book枱有至尊拼盤送。整體食物質素唔錯，份量合理。不過同其他香港餐廳一樣，完全冇服務可言。我哋一行五人，安排坐六人卡位，枱面完全唔夠位放食物，要我哋自己食快啲同不停幫啲餸換位，大家先可以夾到唔同嘅餸🙈同行朋友喺尖沙咀店食過松子魚，話好值得食。不過灣仔店嘅松子魚就完全唔掂，不但未能掌握油炸火候，本身食材都好有問題，條魚又腥又有泥味。我去洗手間嘅時候，有兩個食客話啲嘢食唔掂，一定唔會再嚟。公道啲講，只有松子魚係地獄級別，其實河蝦、片皮鴨係好食嘅，拼盤、小籠包、四季豆、小排骨係正常合格嘅，不過酸辣湯就唔建議嗌喇！…Read More

食咗招牌威士忌BBQ豬扒飯豬扒鬆軟厚切、BBQ醬惹味、飯軟硬適中Combo嘅小食可選肉丸、薯條、湯如果可以轉沙律或者芝士焗西蘭花之類就更加好下次應該只會外賣單點一嚟小食唔多啱食，二嚟Combo只免費跟罐裝汽水或水，轉伯爵奶茶係要加$18🙈…Read More

自助午餐性價比極高，而且Waitress耐心有禮！有沙律、小食、即做nann bread、六款咖喱、印度飯及甜品、西瓜。羊咖喱同butter chicken由其出色，其他素食咖喱亦同樣做法正宗、美味。免費飲品已經包一杯汔水、茶、啡或mango lassi。平日lunch只有六成滿，有唔少外國人會一個人嚟食。真心覺得好食、抵食，希望多啲人支持佢係！…Read More

餐廳裝修之後，有朋友食完晚飯後讚不絕口。所以特登約埋一齊試吓佢午市嘅點心！由於太多嘢想試，最後決定叫行政午餐($398/位)。熱情嘅staff，推介我哋食貴妃雞，所以就另外加咗半隻貴妃雞($350)。餐廳設有大小不同嘅VIP房，而大廳就有5、6 張中枱。我哋平日去，即使枱都坐滿晒，但因為食客係2、3人一枱，所以都唔會覺得嘈。點心係逐位上，而且樣樣都好高質、好好食，淨係食蝦餃、燒賣、蝦角、擔擔麵同黑糖豆腐花新地，都已經值回票價！而雪山焗水牛奶包，就同我期望有啲落差，我以為個餡會係類似燉奶嘅口感，但佢係似煉奶多啲嘅😅。今餐最難忘嘅係嗰半隻貴妃雞，我從來唔食雞皮，但今次都忍唔住食晒佢啲皮😂。隻雞唔止滑，而且係好香、好油潤，即使我哋食唔切攤凍左，佢都一啲都唔膩！總括嚟講，我同朋友都好滿意呢個點心omakase 嘅體驗！…Read More

晚飯5個女仔去，叫咗個四人餐$1138。套餐跟半隻片皮鴨，怕唔夠食所以片皮鴨加$288要夠一隻，另外加咗四喜烤麩$78同京燒排骨$118。整體食物質素未如理想，當一般街坊酒樓都係師傅喺你面前片鴨，但呢度係片好晒先上枱。全隻片皮鴨份量亦頗少，味道達街坊洒家水準，值得一讚嘅係包鴨塊皮，唔係行貨嘢，厚薄軟硬適中。即使受疫情影響只有幾枱客，服務仍未見殷勤，想點菜、加茶、換碟都要等一段時間先有樓面過嚟，明顯係生手，而最奇怪嘅係樓面會同時兼任清潔，隨時會戴上手套然後抹枱。睇裝修同環境，你會睇得出投資者肯定揼咗唔少錢去搞呢檔嘢，但咁嘅食物質素同服務真係好趕客。…Read More

因為工務要到氹仔簽約，一切順利下午兩點已經攪掂晒兼食埋lunch。坐車去咗Galaxy諗住飲杯咖啡、食件cake，點知周圍都得tea buffet或high tea set... 已經食飽飯，冇理由又百幾二百蚊食甜品。行咗一個圈，決定喺果汁王買杯嘢飲坐下算（因買咗四點半船飛）。門面頗光鮮清潔，生果望落都新鮮，所以放膽試！我叫咗Blueberry Caca ($48)，主要有藍莓、香蕉、椰子、椰汁。點餐快，但出餐慢... 我等咗超過10分鐘，我睇住佢地執材料+水+糖水，放攪拌機再倒入杯，但個攪拌機重倒剩差不多1.5杯... 睇到呢度就知瀨咗嘢！攞上手杯嘢係室溫、唔凍嘅！一飲入口... 淡而無味兼水汪汪，一啲都唔似用香蕉打嘅。結論係，所有主打做大陸人生意嘅舖頭都千其唔好幫襯！佢地只想hit and run，賺你一次錢就夠，因為佢地有11億人，每人比佢呃一次佢就fat-fat了～…Read More

我畢業到而家，十幾年嚟都一直喺中上環返工，平日午餐多數係沙律、三文治。見到對上一個食評吹噓呢間嘅沙律有幾掂，攪到我都忍唔住特登嚟買。我都係試Cobb Salad，可能因為差唔多兩點先去，青瓜冇晒所以轉咗蘑菇比我。攞上手已經覺得份量十足，不過話晒都收你HK$88，冇可能輕飄飄嘅。我對呢個沙律十二分滿意，雖然係貴，但每一種材料都好好食，唔會撈埋晒得一種味。每食一啖，你都會食得出唔同材料嘅原或鮮味。明顯係好細心咁去準備、選購每一種材料，水準絕對媲美高級餐廳、酒店嘅級數。雖然係貴，但我都一定會再幫襯，因為實在太好食！…Read More

本身食量不大，所以約朋友吃飯通常不會選擇自助餐。但無奈母親大人最愛吃自助餐，所以只好久不久跟她去不同酒店試試各種自助午餐。今次選了The Place，主要是懶得過海、在OpenRice的評分不錯，再加上有Discount優惠。食物選擇很多，海鮮冷盤有生蠔、青口、蝦同螺。可能開蠔的手法有問題，6隻中有4隻有蠔殼碎，其他海鮮則淡而無味。刺生有4款，只試了吞拿魚、甜蝦，味道一吃就知道是平價貨。熱盤亦多選擇，但食物質素平平，是優質美心快餐的水準。雪糕是Movenpick的，有6種口味。其餘的甜品就不提也吧！…Read More