食盡地球's Profile

今日係荃灣收工，不過因為太夜唔想買菜，所以決定同屋企人出去食，行行下見到辛安東元祖奶奶雞唔使排隊，咁就一於食呢間啦！平日7點到，入去都仲有好多位，但8點打後就多人。上次飲完清酒溝汽水就愛上，今次再點，甜甜地都易清新。辛安東元祖奶奶雞是招牌菜式，今次點半隻雞及小辣，入口其實都幾辣下，不過食食下又OKAY。重點係雞肉非常滑溜，而且入味，自己屋企好難有咁多時間燉煮到相同效果。仲有，配菜都非常惹味，吸收全部醬汁精華，好味！我最喜歡烤鰻魚，完全不會有泥味，肉質結實彈牙，食落啖啖肉。真露煮蜆，一般般，無咩味道。用柚子蜜煮雞翼，無諗過甜甜地的醬汁包住巨型雞翼會咁好味。老公最喜歡的牛助骨鍋，煮得非常入味，但絕對不會太鹹，嫩口的牛肉配上清新蔬菜，好味！…Read More

今日一家三口外出用餐，專程來到上環食韓國料理，聽講這間119 PLUS是在港島區的第一間分店，試完好食，下次可以到總店朝聖。燒鯖魚，沒想過魚味如此濃郁，最正是魚油慢慢在口腔散發，不得了！近期好多年輕人都飲的韓國酒溝汽水，淡淡的酒味又混和甜甜的汽水，感覺幾特別‧呢個是全晚最好味的菜式，海鮮飯用料豐富，最抵讚是醬汁濃而不膩，而且非常香滑，老公大讚！，牛肋骨，個人喜歡牛肉味濃，所以都好適合自己口味，不過肉質有少少硬，可以改善。份量極大的芝士排骨，幾乎佔據1/2張枱。排骨入味又鬆軟，加上黏稠的芝士捲住食，明知食完又會肥幾磅都係忍不到！非常清新的ORANGE CLUB，水果顏色斑斕，見到都覺得開心，入口清甜，做飯後甜品非常好。…Read More

本來想同朋友搵黑夜壽司，點知行黎行去都見唔到，最後見到新星11點都仲未關門，所以臨時改去打邊爐。選擇唔算多，都係平價食材，不過價錢咁平都好正常。完全無味的竹蔗水，好似飲緊甜甜地的普通水咁。醉雞湯底唔錯，聞落非常香，雞件都幾滑。牛肉粒夠香濃，牛肉片嫩滑，象拔蚌彈牙，魷魚新鮮，蘿蔔唔夠清甜。點左長腳蟹柳，點知原來係長腳.蟹柳，而唔係長腳蟹.柳。魚唔夠滑，骨都幾多。漏單問題嚴重，廚房阿姐亂咁執，有畫個d就送唔齊，無畫個d就是但搭多幾條落碟，牛柏葉落單4次都無黎過，激死！…Read More

今晚屋企又做「無飯家庭」，返到去已經8點幾，所以決定落樓下酒樓點兩個小菜，又有得涼下冷氣。中式牛柳唔錯，個汁無之前咁鹹，而且牛肉趁熱食都幾易咬，凍左就差少少。用白茄子整魚香茄子煲，唔會太過油膩，最正係鹹香味濃，用黎送飯一流。八珍豆腐煲都係濃味，用料豐富，加入唔少蔬菜及海鮮：蝦、魚。仲有碟西蘭花魷魚，全碟淡到似無落過鹽，要靠沾魚香茄子汁先入到口，魷魚更加無新鮮可言，最後每一咬左一啖就放棄。…Read More

之前同朋友講起麥當勞Create Your Taste，原來有得用生菜代替麵包，所以一直都想去試下，今日終於有時間經過銅鑼灣又就到午餐時間。生菜fresh得黎好爽口，而且都幾大塊，配料揀左多汁的烤菠蘿、濃味的蘑菇、仲有新鮮大片蕃茄，成個食完都唔會覺得好heavy，估唔到麥當勞清新之選都做得好好！…Read More

係觀塘做完野，心思思想去飲啖茶，不過大熱天時唔想周圍行，見到呢間就行入去食啦。瑤柱蛋白炒飯唔錯，香口之餘又唔會油膩，白飯粒粒分明、飽滿，最緊要係鹹淡適中。不過份量太多，明明已經叫左少飯，但一個人都係食唔完，好似做左大嘥鬼，唯有打包返去做晚餐啦。…Read More

呢兩日返返下工，老細都揀啱中午時候黎探班，成班工友就起哄叫老細請食飯。師奶仔食咩都無所謂，但工友就一定要大碟夾抵食，所以10幾個人就浩浩蕩蕩去食酒樓，一圍枱剛剛好。雜菜燴伊麵，味道清清地，有西蘭花、小棠菜、白菜仔，不過菜就好似唔太夠，反而麵就食極都仲係咁大碟，最後仲可以分一半俾其他人。…Read More

鳳梨甜酸肉-以原隻菠蘿咁上，見到個陣都幾驚喜，影相出黎又好睇。排骨唔會太厚粉漿，食落外皮剛剛好沾上酸酸甜甜的汁，非常開胃，不過份量就好似太少。芒果香草蜜糖磚塊-次次食茶木都會點一份，今次試芒果口味，估唔到芒果肉都幾清甜，而且賣相非常少女，顏色甜美，撈下撈下一齊食，又一卡路里爆升但忍唔住口的美食。綠茶紅豆蛋糕-綠茶味都幾濃，但又唔會苦澀，口感軟綿幼滑，如果紅豆味再重少少就好。…Read More

hit到飛起的BAKE日日都排長龍，次次行過唔係賣哂，就係見到一大班人圍住，所以今次終於的起心肝，決定一大朝早去等！呢間鋪頭源於北海道札幌市一間洋菓子老店KINOTOYA，係日本已經大受歡迎，再經杜小姐介紹一番，識食的香港人又點錯過！軟心芝士餡料由三種芝士配搭而成，當中包括北海道函館產輕味芝士、別海產濃味芝士及法國產鹽味忌廉芝士，一出爐香到隔幾條街都聞到。撻皮方面就牛油曲奇餅底。每人最多買6件。都好，唔怕自己失控食多左，話哂一件卡路里都幾驚人架嘛。芝士內餡既軟綿又濃郁，似慕絲又似泡沫，半流心狀態無得輸。餅底鬆脆香口，牛油味都幾濃，正！…Read More

中午和朋友食涼瓜牛肉飯，12點去到都要排隊，多數係附近的地盤或清潔工人，不過10分鐘入到去坐低，之後都好快上飯。牛肉唔會太韌，都算幾多片，不過個汁就好重口味，涼瓜索哂個汁，鹹左少少，而且薄切少件，唔知係咪呢排涼瓜太貴？成碟飯份量好多(已經少飯咗)，女人仔食唔哂，不過見D地盤工友又食得哂，有D仲要添飯(免費架！)…Read More

朝早的中環特別多人，雖然已經差唔多10點先到大家樂食早餐，但係都見長長人龍，好彩收銀姐姐手腳快，三兩下手勢就落完一張單，排隊俾錢都算係好快。之後等拎早餐人龍就郁得慢少少，但係都係5-10分鐘內拎到餐，以後呢D時間黎食都應該無問題。今日食柴魚花生粥配炒米粉，估唔到個粥非常足料，柴魚大大件，花生大大粒，而且粥底都好綿。炒米粉完全唔會油膩，又唔會痴埋一舊，好過之前係其他分店食。唯獨杯奶唔夠香滑，少少扣分，不過單講食物都係好味。…Read More

住係西灣河差唔多20年，睇住太安樓由街坊宵夜變成全民宵夜，之前都係得西灣河人識去食，依家一到夜晚就有好多人係其他區專程過黎食，我諗都係網上力量帶動，對食店黎講就賺多d，對食客黎講就係要排隊等食。以前都幾鍾意的蛋記，不過自從阿so介紹完後就開始唔同左，愈整愈無以前個種足料感覺，食落粒粒幾乎空心，但係好在蛋味都仲算香濃，而且烤得幾脆，間中食下都okay。…Read More

前兩日行過旺角，見到豪大大門口又係排長龍，心諗真係咁好味？台灣正版食過，香港其他分店都食過兩次，就係無食過旺角呢間，所以行多兩圈等無咁多人先返黎排隊。其實炸的時間唔算耐，落單後幾分鐘就有得拎，係排隊個下要等。雞排比之前食過的兩間分店好，真係新鮮熱辣送到手，炸粉唔厚之餘仲肉質嫩滑，一路食一路有汁流出黎，雖然寫食評先見到呢間負評比較多，但個人黎講都算滿意。…Read More