buttercup's Profile

戴頭盔先，我唔知正宗係點，但係買過袋裝螺螄粉煮，試過即食杯裝，又試過其他區嘅螺螄絲，都係覺得呢間最好味麻辣君話未食過，於是同佢嚟新鋪，佢入到鋪頭都話氣味好重😂，坐左陣臭覺適應左啦好在佢都ok螺螄粉，我今次都係中辣，但係辣味好似唔夠之前食咁勁，仲點左鴨腳同豆筍，鴨腳好夠淋，豆筍原來係豆筋，我地仲以為係筍🤭，甜甜地帶辣味，都幾好味由落單到傳菜，老闆都好殷勤，我見有幾位外賣員嚟攞單，老闆對佢地好客氣，因為好多時我見其他食肆都會對外賣員呼喝食食下，有幾位小學生入嚟，其實大廳都有枱夠佢地坐，但係佢地衝左入偏廳，然後老闆好好，並無叫返佢地坐大廳，佢地坐低之後，老闆就默默地去拎搖控開冷氣註：我估嗰位男士係老闆卦…Read More

一坐低無耐，老闆就問準備好未，好在前一晚就背定餐牌，爽快就點左炸燒賣，牛腩煎米粉，蔥花蛋治，冰啡樂，然後老闆就問要唔要魔鬼奶油多，其實呢個都係wish item，不過驚點太多食唔晒，諗住下次再嚟嘅，老闆係我猶豫個陣就話：寫個薄嘅比你試吓啦，好食架，寫左啦咁就老屈左……不過屈我啦屈我啦，我無問題架蔥花蛋治個烘底真係不得了，係真脆，唔係烘到乾然後𠝹損口嗰種，滿滿蔥香，我地覺得咸左少少魔鬼薄多士，本身係無牛油，牛油要加$6，我覺得牛油係must，如果唔加，件多士只有甜味，呢個薄多士神奇嘅地方，除左面頭有華田粉，係薄薄嘅多士仲可以切薄加入餡料，不得了炸燒賣又係驚喜，外脆內軟，個皮係脆嘅！唔係炸到乾嗰種，配埋不多不少嘅麻辣油，正牛腩煎米粉，梗係要欣賞嗰對蝦條眉同笑容汁，牛腩係分開上，原來係會加一pat蒜蓉，即刻搵周一腹𢳂走佢，唔好污染我啲牛腩，裡面有啲牛筋，全部都好淋好入味，煎米粉好香口，就只係蝦條炸得比較乾冰啡樂相比就較普通，本身係2/3杯凍啡+罐可樂，即係飲到咁上下就加返啲可樂，飲到後尾就係得可樂味啦最後想講，姐姐係超級好態度，幫我地收走餐碟時，都會問：食完未呀，食完幫你地收左先；見我地枱面無野食，又會問，仲有無野食未嚟呀，呢度啲野全部都好好食呀…Read More

疫情期間甚至回復大致正常，我地都好少外出食野，周一腹見到有推廣優惠，$150有85折就話要去食簡單講下蜜汁豬 - 味道似bbq嗰隻廉價蜜糖味肉燥麵 - 普通青瓜 - 大碟又大舊，唔入味雞翼 - 我無食，唔評論魚柳 - 炸漿皮白雪雪，魚肉無味豆腐 - 周一腹問我會唔會係廚房唔記得落鹽酥粉蠔餅 - 本身個味道都唔知點形容，仲有芫荽定芹菜嘅野，完全唔係我口味蛤蜊湯 - 普通脆芋圓 - 黑糖好少又好似有啲稀，但係芋圓炸左幾好食最好味係杯檸檬薏米特飲…Read More

見大家都話傳統，之前報導又話店主好有心，路過外賣左三款湯水1/芝麻糊，芝麻味唔夠濃，仲食到差少少就炒過火嘅味道，杰左啲2/芋茸蓮子西米露，食到幾粒淋過毛巾嘅蓮子，芋頭味淡淡的，西米幾乎溶晒3/花生糯米麥米粥，只能講，好糊我希望只係因為路途太遠影響左，下次有機會再堂食…Read More

無諗過食物質素係咁樣，所以無影相點左三樣野豚肉生薑燒定食，肉份量都算多，但係每塊有一半係脂肪咖哩吉列豬扒飯，豬扒有三塊，但係每塊應該係6cm x 6cm, 敲落去‘kong kong’聲，我仲以為點左瓷磚芝士蕃茄雞扒烏冬，雞扒size正常同埋都滑，但係就無醃過，雪味滿滿，烏冬淋過毛巾，即食烏冬質素應該比佢好…Read More

我同周一腹叫左兩個炸雞餐，我食忌廉芝士雞飯，佢食咖哩黑豚肉飯，仲加左芝士春卷。先食個飯，忌廉芝士汁比較稀，但係幾香，食唔到芝士味；周一腹話咖哩黑豚中規中矩，係平時食到嘅咖哩，我覺得醬汁同飯嘅比例剛好。芝士春卷同餐牌上一樣咁幼，我鍾意佢地相片夠誠實😂，可能就係幼，食完都唔覺膩。炸雞新鮮出場，炸雞比我想像大件，皮脆肉嫩多汁，調味唔會太濃，講真，如果同隔離老伯雞比較，鳥元贏七條街啦（話九條街就誇左少少）。…Read More

聽聞紅豆奶茶係呢間店嘅原創，名物仲有周一腹最鐘意嘅豬扒同沙嗲牛肉，決定黎一試。都唔知有幾耐無去過熟食中心，環境同衛生比預期好，嗰度有好幾間食肆，不過營業緊嘅就只有呢間，其他店鋪好似做午市同晚市。經過精密嘅計算，梗係叫沙嗲牛肉西多士同豬扒麵再加杯紅豆奶茶。奶茶好快就送上，我覺得紅豆同奶茶比例同甜度剛剛好，好融合，唔會互搶味道，不過周一腹就覺得好普通；然後到豬扒麵，豬扒好香蔥油，好淋，不過就薄左少少咁啦；我最期待嘅西多士到啦（我真係期待西多士咋，牛肉唔係我目標），切好西多士，四隻角梗係歸我，因為沾到牛肉最少，切個陣唔好諗住係流心，會有一埋沙嗲汁湧出黎，只係微量醬汁剛好掛係牛肉度，周一腹話我計算失誤，因為咁樣試唔到沙嗲味，而且佢覺得出面甜入面咸，好奇怪。…Read More

對某部份人黎講，車仔麵係回憶，高峰時間有長長嘅人龍，企係一格格載滿唔同餸料嘅車仔前面，可以排隊個陣先決定麵同餸（要食菜就要點麵個陣講埋，店員煮麵就順便淥埋菜），又可以等店員煮好煮好碗麵先決定醬汁，你由頭到尾睇住自己碗麵‘誕生’，而係點菜過程當中，你係會同幫你煮麵嘅人有交流，我諗食物唔係一個回憶重點，過程先係令人懷念，依家有好多車仔麵店，但係大家只可以對住冷冰冰柯打紙落單。因為啞x有團購，之前又睇過雜誌報導店主嘅訪問，所以大手買入左現金券（可以食三次），打算試晒所有‘名菜’。我叫左廣島蠔椰汁泡飯，椰汁湯好香，無添加味精，怎至連蠔都無添加，我覺得似係就咁將蠔放入水淥熟，總之味道好raw，就知道係廣島蠔；周一腹當然抗拒唔到咖哩誘惑，叫左廣島蠔咖哩飯，佢嘅炸蠔同我嘅湯蠔同出一徹，應該無添加就上炸漿，咖哩味道超淡，質地好奇怪，只可以叫咖哩色玻璃芡；周一腹話南乳雞翼嘅味唔夠出，我就話剛剛好，因為我怕南乳味太出就變左好咸；炸豬手，無論賣相同口感都食唔出係炸，其實我都唔肯定炸豬手應該係爽口定軟身，呢個我放棄評論；一君炸蛋係鵪𪂹蛋，表面上左啲調味粉先炸，有啲味咁囉；我地叫左杯椰汁冰，我覺得比起某間專賣椰汁飲品店好飲，仲有，我地食一啖湯飯再飲一啖椰汁冰，發現只係熱同凍嘅分別…Read More

我唔係宗教原因唔食牛肉，只係我唔鐘意嗰種質地同味道，但係我會食牛丸同牛肚，有人話牛丸係最無牛味，咁就解釋到點解我會食牛丸。唉，又咳唔食得麻辣，唯有食清淡粉麵。餐牌同我係openrice見有啲唔同，無左咖哩，多左車仔麵選擇，周一腹知道無咖哩當然有啲失望，不過見到車仔麵就加晒分，因爲佢可以點N款餸。我都選擇車仔麵啦，可以只選牛丸同牛肚，但係車仔麵最少點三款，我點左紫菜，周一腹知道我一定會分享啲餸畀佢，佢好克制只係點墨丸牛筋雞翼。牛丸唔似平時食嘅咁實，鬆軟帶啲牛味（我接受到啦）；牛肚夠淋唔痴牙又入味；紫菜無沙，$5份正常份量；我點粗麵，唔知煮麵係咪用鹽水煮，麵好咸，不過只係咸，食完無口渴。食左周一腹一粒墨丸，雖然唔算爽口但係幾好味，唔係出面嘅粉團墨丸，無好重嘅調味，我好怕啲墨丸有蒜仲要味精；周一腹話牛筋好淋（但係投訴好細舊），仲話雞翼好香脆，應該係生炸；佢話佢啲米線好咸，不過我試過，無我啲粗麵咁咸。如果下次我唔想食辣個陣，我都可能會再黎食多次。…Read More

今日第一餐叫豐富啲，細滲，咖央多士，蝦麵，喇沙，愛他愛她，美祿恐龍同馬來拉茶。先黎兩杯飲品，美祿恐龍嘅美祿粉無新加坡飲到嘅咁誇張，人地啲美祿粉成座山咁高；拉茶茶味淡，無練奶嘅香甜，都係茶記嘅港式奶茶好飲啲。咖央多士好脆，只食到甜味，無椰味同班蘭味；蝦麵同喇沙望落有啲似，不過兩個湯底係唔同嘅，喇沙正路，蝦麵個湯真係蝦味重啲，有蝦甜味，魚蛋唔腥唔彈，啲腩肉好乾好鞋，蝦係正正常常，唔好期望爽口彈牙，不過驚喜在於跟麵一齊上嘅辣醬，係蕃茄辣醬，好香濃蕃茄味，呢個一讚。細滲黎到，果然係combo，入面有金菇豆卜雞腳豬手豬肚豬腸，當中最好食係雞腳，唔係煮到爛溶溶，個湯有藥材味，不過好似聞唔到當歸香味，味道都可以；愛他愛她(睇餐牌係寫魚肉混有香料嘅魚條)，味道似泰式魚餅，但係肉質超淋，似粉團，呢個唔啱我口味。…Read More

我除左係麻辣控，同時都係芋頭控，閒時會去街市買半邊芋頭蒸黎就咁食😋，幾個月前上網搵到呢間鋪，今日有機會路過啦！中午12點半入到去，店主問有無預訂，我以為要白行啦，好在4件原味同芋泥蛋卷有現貨，店主仲推介蛋黃味芋頭酥，既然黎到，都買左兩件蛋黃味，6件芋頭酥店主幫我裝入盒，拎上手仲暖暖嘅，新鮮出爐喎！返到公司仲暖嘅，急不及待食左一個原味，酥皮唔油膩，淡淡嘅芋頭香，比台灣出名嘅兩家芋頭酥店還好食（分別係老豆同個仔開嘅），台灣嘅我只食到奶味同甜味，芋味欠奉，其中一間我仲專程去買😒，另一間係桃園機場咁啱見到，香港呢間，比台灣價錢貴少少，份量又細少少，不過呢啲唔係問題，最重要好食得多，分享左一件畀同事，佢都認同（我都有分享台灣買嘅芋頭酥畀佢）。夜晚食完飯，就即刻開埋個蛋卷，拆開包裝紙已經聞到蛋香味，蛋糕好好味，包住厚厚嘅芋泥，仲咬到芋頭粒，可能因爲凍食，芋香味無咁出，不過真係純芋泥，唔會有好假嘅香味，死甜或者奶味，$70一條蛋卷仔好似有啲貴，不過真係真材實料，好好味。…Read More

周一腹愛咖哩，我愛烏冬，順理成章黎一試。嗰日放假專登早啲黎食lunch, 個胃都未瞓醒，所以點左咖哩忌廉雞同牛烏冬各一，費事眼寬肚窄浪費食物。食物黎到最期待就係夾起烏冬，穿越咖哩汁同忌廉嗰下，咖哩好香，沾上左忌廉就中和左咖哩嗰種辛味，烏冬唔知係咪用咖哩汁煮熟，麵身吸收左滿滿嘅咖哩味，但係我覺得烏冬偏淋，我鐘意彈牙烏冬，周一腹就話好好味，總之係咖哩就係好味。肉嘅份量好少，雞肉好似有四、五小粒，周一腹就無留意自己碗牛有幾多份量，不過我諗唔多，因為賣點不在肉，總括都係好味。…Read More

跨年咳仲未好唯有避辣，見到依家野無辣又多小食，咁啱仲可以買折扣劵所以同麻辣君黎試。又黎叫到成枱野，黃金雞翼，黃金魷魚圈，咖哩豬皮蘿蔔，白烚菜心，鴨血魚腐新竹米粉，花膠北菇蝦籽粗麵。酸辣怕撩咳，只可以點清湯，黎到我好沮喪話啲湯清到呢（其實我唔係投訴，係呻無得食辣），點知侍應姨姨以為我嫌啲湯寡，友善地指住枱面有三樽調味醬可以加，餐牌寫清湯無味精，我信，因為唔止顏色清連味道都清，鴨血一啲味無，唔爽唔淋唔硬唔韌咁囉；魚腐有啲實，有啲味嘅；米粉我覺得軟硬剛好；麻辣君點花膠，價錢黎講份量叫多，我地唔知嗰啲係咩花膠，有兩大一細，佢分享左細花膠畀我，可能細舊，都軟身容易咀嚼，另外兩舊我見麻辣君𡁻左好耐，最終有半舊放棄左。黃金雞翼我覺得咸蛋黃爭左少少唔夠厚，食唔到咸蛋黃香，雞翼調味都清清地；黃金魷魚圈咸蛋黃多啲，一上枱就聞到咸香味，趁熱食好，因為凍左少少就食到魷魚圈有鹼水味；唔食得麻辣只好叫我咖哩豬皮蘿蔔止下癮先，感覺咖哩無麻辣咁強烈，心理好過啲，咖哩味好淡，豬皮好硬，蘿蔔唔入味。枱面仲有三樽辣醬，有一樽好神秘得個骷髏骨頭公仔，我唔食得辣只好叫麻辣君試，佢試完之後只係講左句‘幾辣’就完左。總計$175不過係openrice買左兩張優惠券，實付$147最值得一提係，侍應姨姨好客氣好有禮貌同細心。…Read More

今日放假專登搵麻辣君食晏晝，因為咳唔可以食辣，上次同朋友黎食晚飯見到午餐餐牌有beyond burger，所以黎試，點知職員話依家無啦，好失望，既然坐低左唔通走咩（雖然真係好想，我都係為左呢個菜而黎）。我地點左南瓜意大利飯，大啡菇漢堡。意大利飯煮得好乾身，每粒飯都有汁包住，頗重奶味，應該係用忌廉煮嘅關係，食到有陣甜味，唔知係黎自南瓜定係忌廉；麻辣君點大啡菇個陣，有啲驚啡菇會出水整淋個包，不過我覺得如果啡菇會出水的話，廚師應該要換啦，漢堡黎到無咩驚喜，好平凡嘅素漢堡包。餐牌寫咖啡奶茶可選杏仁奶，點知職員又話依家無供應，餐廳應該要更新個餐牌又或者畫走佢嘛，叫咩無咩令我覺得今日個午餐有啲失望。…Read More

上次黎嘅時候係年三十，大排長長長長長龍，所以放棄左，今日周一腹媽媽話想去工展，於是再黎挑戰，時間尚早所以未見人龍，前一晚係openrice 個餐牌見到期間限定係柚子蜜豬扒，或者商戶未更新openrice, 黎到見到嘅限定係蔥油豬扒，any肥，一場黎到期間限定係咩都會點架啦，仲點左豬軟骨同話梅花雕豬手。三碗飯都差不多時候黎到，豬軟骨同豬手都係暖，只有豬扒係熱嘅。蔥油豬扒無論蔥油定豬扒都係滿滿嘅，可惜蔥油唔算香，不過豬扒真係一讚，厚肉但係軟熟而且脆漿薄好香脆；豬軟骨唔會煮得太爛，仲食到軟骨嘅口感，我食到有啲豬腥味，不過醬汁帶甜好好送飯；豬手夠淋唔肥膩，豬手味道淡，周一腹媽媽話個汁好甜（因為啲汁淋左落啲飯度），攪到啲飯甜晒，食多兩啖飯就覺得好膩。因為我咳所以攪到周一腹無得點佢最愛嘅咖哩，唯有好番搵機會再黎試…Read More