為友食大's Profile

呢排番工太攰 放假決定對自己好啲 見到隻牛頭着哂燈咁架勢 決定試一試佢鋪頭入面有好多牛牛裝飾 仲有呢塊牛牛解剖圖 一對menu就知食緊邊個位 長知識呀嗌野食全自助 俾錢 拎部bib bib機 之後返去拎嘢食 食完記得放番餐盤上收餐盤車望一望張menu 有六款牛揀(肉眼、牛柳、牛板腱、西冷、後腰三角肉同日本和牛肉眼/西冷)全部用gram計 食幾多嗌幾多 唔會嘥醬料方面有三款: 蔥油、洋蔥油同蒜油仲可以加$28跟set 任選三款 自由配搭話明係對自己好啲 梗係食Premium啦我嗌咗300g後腰三角肉配蔥油($172) 而朋友就嗌左300g西冷配蒜油跟set($189) share食set揀咗白飯、麵豉湯同可樂出counter嗌 即叫即磅 師傅手起刀落 冇花冇假然後我問咗個好白痴既問題 就係問有冇得揀幾成熟店員話係鐵板上 清一色做medium rare嗰下知自己柒咗 明明人哋舖頭名都寫明係medium rare steak 岩盤牛扒 幾成熟由自己話事Bib bib bib拎餐嚕首先係朋友既西冷配蒜油朋友話西冷牛味唔算重 食落啖啖肉 連根 食既時候最好食咗厚肉嗰邊先 因為塊石好快凍配既蒜油出色 香得黎唔搶味佢另外仲有跟柚子燒汁 濃味既 唔好點太多 柚子感覺清新之後就係我既後腰三角肉配蔥油真心欣賞後腰三角肉 牛味好重 瘦得來唔會乾唔會鞋 反而仲好多汁 鍾意牛味重既朋友一定會好鍾意配既蔥油 基本上係淨蔥 冇油既但呢個組合 好好 可以好純粹咁欣賞塊肉 加咗少少枱上面既岩鹽 完美提鮮 唔需要太多醬料 已經好完美 推介!…Read More

前排朋友話請食飯 話不如去試下永年 我問食咩架 佢話係食車仔麵 心諗咁客氣呀 之後我食咗暫時人生食過最貴嘅車仔麵永年開係新城市廣場入面地下嗰層 對住一排落地玻璃 相當開陽 近户外啲 心情都好啲兩點幾呢個鐘數都幾多人架 等緊位嗰陣睇下個餐牌啦 嗯 有啲料到..個價錢門口有counter俾人外賣港式麵包同奶茶 見到有個姐姐特登黎買幾枝樽裝奶茶 好似好正咁 等我陣間又試下先坐低睇下餐牌 scan QR code嗌嘢食 我嗌咗永年大碗麵($88) 入面有豬腸、魚蛋、蘿蔔、豬紅、豬皮、雞翼、雞翼尖、魷魚、紅腸同時菜 跟油麵底、清湯同永年特飲 - 樽仔奶茶($9)而朋友就嗌咗女神麵($88) 入面有鮑汁炆花膠、豬手、枝竹球、冬菇、紫菜、蘿蔔同時菜 跟米粉、清湯同凍飲 - 枝裝可樂($4) 朋友話係咪凍飲都加$4唔係唔飲枝裝可樂下嘛 你又啱喎枝奶茶幾好飲 飲落似茶走 但佢係完全冇煉奶架 真係茶餐廳奶茶 落糖同淡奶 係枝多奶好滑嘅奶茶我碗麵呢 份量都唔細架 一黎到啲餸多到見唔到個麵底呀 豬腸仲肥嘟嘟 所有餸都極之入味 好明顯每樣都醃得好足 如果你係重口味/突然好想食好濃味嘅人呢 呢碗麵一定好啱你 睇下個清湯完全唔清就知佢醃得幾足啦 可惜我係個唔重口味嘅人 食到覺得個腎有啲痛(講笑) 朋友個女神麵就啱我啲喇女神麵出場喇 係高級版車仔麵 可能佢冇乜滷水野 唔會話好咸 恰到好處呀佢啲花膠都唔野少 份量多 食落少膠偏爽 食極都仲有 好似好底咁 科科豬手都有兩舊 一大一細 炆到好淋入哂味 夾得大力啲即刻甩骨呀 個枝竹球都幾cute 咬開見到一層層 有枝竹香 跟埋啲湯食 唔錯唯一差咁啲既係 佢嗰舊係鮮菇 唔係冬菇 係炆冬菇就真係屈機喇…Read More

今日黎開長沙灣 決定搵間黃店好好食一餐 搵到既係呢間堅持每日新鮮自家製烏冬嘅烏冬店 - 鰹烏冬 即刻去試一試先去到都唔算多人 排緊隊嘅時侯店員俾咗餐牌同點餐紙我哋睇定有咩想食 都未揀好就已經有位喇餐牌主要分三部分 冷烏冬、熱烏冬同小食 自由配搭自己想食嘅組合 每個野食都有簡而精嘅介紹 方便大家落決定好傷心嘅係所有特別味嘅烏冬都畫咗 冇得揀 好想試大麥/海苔竹簾烏冬呀野飲方面有水同玄米茶 自助形式咁放係鋪頭最入面 拎野飲嘅同時可以順便係隔離拎埋餐具我今次嗌咗原味竹簾烏冬(冷)($46) 同味增焗鯖魚($36)我揀烏冬嘅時候堅持一定要揀過過冷河嘅烏冬 誓要食到非常煙韌嘅烏冬!! 果然鰹烏冬冇令我失望 真心出去唔會買到呢種質地嘅烏冬 唔係誇張 加埋佢個醬 仲有啲芝麻香 食落好清新 抵佢多人食嘅而小食方面呢 個鯖魚就係平時食到嘅日式鯖魚 好食嘅 但唔係道食都得 早知試骨付雞啦朋友嗌咗鰹魚清湯烏冬(熱)($46) 同天婦羅雞件 (4件)($42)鰹魚湯都係鋪頭嘅一大招牌 朋友話比起冷烏冬 熱烏冬都算煙韌但偏硬 湯底重鰹魚味但唔會好咸 除咗塊鳴門卷淋啤啤唔好食之外 成個麵都一流呀大大力推介天婦羅系列嘅小食 今次嗌嘅雞件好出色 雞肉嫩滑大大件 粉薄皮脆 下次黎要試埋其他炸物…Read More

見佢呢排新開決定去試一試 本身冇諗住寫所以冇乜點影到相 但一見到佢真身 阿姐決定要寫一寫喇廿一堂有收銀都有完善既自助服務 可以自助點餐、自助取餐、自助回收 總之就好自助啦 當自己屋企得架喇 講笑 我食完太錯愕既關係 竟然唔記得咗自助回收 冇領取到您的環保獎賞 真失策我嗌咗有Number 1人氣既 1. 廿一燒豚丼($52) 飲熱玄米茶 而朋友就嗌咗 3. 廿一炭燒鳥丼($54) 飲百事可樂開心試新野 餐廳環境乾淨光猛 搵個位坐定定等Number拎野食望落個餐賣相好唔錯 好多塊豚肉 肥瘦各半 食落香口 唔太膩 有紅色醃蘿蔔同芝麻 好夾 當好開心要大啖大啖食之際 咦 筷子一野篤到底既 掀開 真係吓出聲 啲飯咁少既 乸埋都唔夠放係每舊肉下面當壽司喎 就係咁旋風式吸入成個飯 我個午餐食完好似冇食過咁 小女好無奈 真係太細份 完全唔夠喉 唯有飲埋杯熱玄米茶增添果腹感朋友既鳥丼 都係話好味 但好細份 偏貴呀…Read More

唔係第一次食四季良晨 每次食完都成日心郁郁想再黎食 午餐下午茶晚餐都食過 依然好滿意入到去坐低會有去咗樓上Cafe既feel 播住輕快又熟悉既台灣/廣東歌 感覺輕鬆 嗌野食就要記住枱號去門口收銀落單 嗌好野食番埋位 坐低等食就得架喇而家下午茶時段(1400-1700) 有啲餓 決定食休閑下午茶套餐同朋友都嗌咗T23 清燉酥炸排骨米線 ($39) 兩個都嗌同一個餐就知佢個酥炸排骨有啲料到啦 外脆內軟 薄薄既脆皮咬落啖啖肉 唔會好乾 加上佢個蜜糖芥茉醬 好清新呀!!鐘意濃味啲可以轉紅燒牛肉湯底 而我就鐘意藥膳少少既養生清燉牛肉湯底喇強烈推介大家轉麵底做台灣麵 事關佢麵身粗啲又有咬口 加埋佢個湯底 好味呀跟餐送指定野飲 凍飲加$3 如果想轉其他茶研社飲品就計正價減$5 加配料(好似: 紅豆、椰果、珍珠、咖啡水晶、蘆薈、曲奇碎)就加$4我哋分別嗌咗熱香濃奶茶加珍珠($4)同凍蜂蜜綠茶少甜少冰($3) 珍珠係普通珍珠冇用黑糖煮過 不過勝在夠煙韌 始終放係熱飲 浸得耐都會淋 凍飲就冇呢個煩惱喇 而蜂蜜綠茶就正正常常仲有其他餐牌俾大家參考下…Read More

傷心酸辣粉之冇波打兼二人限聚令 太傷心既關係決定要食餐好既調劑一下 黎到有好大隻連豬同Pepe既串Grill 120分鐘任飲任食和你燒要留意下鋪頭既營業時間 平日同星期日開1700到凌晨0200 而星期六開最長係1300到0200 今次決定要食平日HAPPY HOUR時段 (1930前離坐) 早係啱啱開鋪就即刻去食喇 入面冇飯粉麵、小食等熟食 係真全串燒黎架另外值得留意嘅係鋪頭唔大 加上二人限聚令 闊落既四至六人枱都只可以坐兩個人 所以想食又唔想等既話就記得book位喇坐位闊落 乾淨企理 啲野摸落冇油淋淋 加分隔咗塊珍珠板 變相仲多咗分私隱度 食落更放心 加分醬料多元化 白色無label嗰枝似日式蜜糖燒汁 係燒到咁上下既時候揸上串燒道既 其餘仲有四款粉:孜然粉、海鹽、味椒鹽、串Grill辣粉 同埋兩款醬: 泰式魚露、韓式梨汁燒烤醬本人覺得燒既時候落粉比起揸蜜糖燒汁更好食 大家不妨試下睇下邊一款啱大家口味坐低待應細心介紹用餐方法同須知 串燒款式多 仲有燒烤時間建議就唔怕燒唔熟啦野飲任飲 都有啤酒嗌 不過就要另外加$$嗌喇未落單之前 待應會先上一份頭盤 而每次落單唔可以多過60串 因為個架會放唔哂 無問題呀燒到興起又食唔切住 可以放係爐上面既架 一黎可以keep住佢熱 二黎唔會燒燶 放上去同朋友share一流睇下個爐燒到我串棉花糖幾靚仔放串燒纖既筒 好滿呀食完送甜品Haagen-Dazs雪糕一杯 為我呢餐串Grill畫上完美既句號呀野食新鮮 服務又好 完全可以encore 下次再黎食過!!…Read More

今日黎到深水埗行逛決定去試下白布烏冬 見前排好多地方都有推介佢 一於去試下等咗陣位 好快就入得去 門口見到鋪頭淨係收Cash 大家要留意喇鋪頭闊落 日式簡潔裝修 乾淨企理 坐低放好袋係櫈下面既籃仔 待應就俾咗我哋一人一杯熱茶 相當貼心摸住熱茶底研究下嗌啲咩好 餐牌有四頁 中日雙語 都係食白布烏冬 有熱/凍沾麵版 或者湯麵版同朋友各自嗌咗唔同既野 我嗌咗有星星推介既溫系雞肉入沾白布烏冬($86) 朋友嗌咗雞肉入熱湯白布烏冬($86)我個沾麵版熱白布烏冬黎到 賣相相當吸引 黎食之前有睇過食評話沾麵底太甜 白布烏冬成塊布咁好難夾 食落會失儀態 所以食之前都好有心理準備食落個沾麵底係真係偏甜既 但可以接受 話哂配大塊白布烏冬本身冇味 所以拉番個平衡 沾麵底似甜豉油湯 加大蔥、雞肉、蕃茄同茄子(茄子好好味) 食完味道都好滿意 除咗沾麵底比我想像中稀之外經過論盡咁食呢幾塊白布烏冬之後 發現將佢放入沾麵底之後用匙羹幫手將佢接2下 似春卷形咁係最易食 仲可以烏冬同沾麵底一齊食添 Perfect呀小嚐咗朋友既熱湯湯底 同樣係配雞肉 食落朋友既甜豉油湯多咗一份雞肉既香味 比較濃郁整體上都好好味同好新奇 係個特別既體驗 但佢都真係係同區黎講算好貴 所以新屎坑試完表示食一次就夠了…Read More

平日放飯時間係銅鑼灣 間間都好多人 想食快野又唔想外賣 黎到人頭湧湧既龍城冰室 排咗陣隊都算快就入到去基本上冰室座無虛席 入面節奏好快 無論侍應、收銀同食客都以極高速完成手頭上既事/暴風吸入食物 可能係午飯時段 搞到望多陣餐牌都有啲壓力呀餐牌都幾多款揀架 有是日午餐同主menu 拿拿林落完單之後侍應就開始派下午茶餐牌 原來我哋遲多幾分鐘就可以叫下午茶喇 實在係失策失策呀我哋嗌咗份有廚師推介既王牌鐵板套餐 - 板燒和風嫩牛柳配照燒汁($90) 套餐 跟飯 飲凍檸茶(+$3) 走甜少冰 又到咗寫食評先發現佢冇送到餐湯(喊) 另外加配咗份大牛油豬仔包(+$8) 同單點咗碟蒜蓉拍薑炒芥蘭($46) 總共$147呢道既鐵板餐都幾貴下架 要$90起 即刻試一試佢值唔值 牛量充足 冇呃你嫩牛柳係真係幾嫩下 完全唔會鞋身或者韌 煮到啱啱好 厚身啲既位仲特別好食添 熱辣辣既牛柳配埋個照燒汁 既有芝麻粒既香又有豉油既甜 加埋落舊牛柳道 真係幾唔錯 一口接一口呀呢個大牛油豬仔包(套餐+$8) 係我好後悔嗌咗既野 事關佢真係好大(食完都飽飽地) 但我睇錯以為係奶油豬仔包 當我發現佢上面冇奶既時候真係大失所望 如果佢有奶就好喇 一定會有好多人想加配架!!最後係呢碟蒜蓉拍薑炒芥蘭 味道一流兼有鑊氣 爽脆冇起渣 花就多咗啲 我知好多人都會食埋啲花 但我堅信老人家話食得花多會耳鳴 所以我食淨一個小森林 總括而言佢都係好食架…Read More

轉角見到呢間Nuttea 同一街都係既coffee shop/ bubble tea shop唔同 決定入去試一試呢間街角小店 店面細細 但裝修別緻又開陽 可以話五臟俱全有個小board介紹Nuttea創辦人 原來係前足球員退役後既打本小店 睇準大家對堅果既喜愛 推出一系列堅果飲品 有奶蓋茶、奶、奶茶、咖啡 另外仲有水果茶同冷萃茗茶佢既奶大有來頭 係由五種堅果整成既奶 當中有杏仁、合桃、夏威夷果仁、榛果、腰果 堅果奶俾素食者一個選擇 都俾大眾對素食有多一種認識 原來堅果奶都可以同奶好似又好飲 做到’沒有牛奶沒有奶精的堅果奶’比起好多手搖飲品黎得健康一入店 旁邊就有介紹每日限售100杯既得獎飲品 - 伯爵朱古力堅果奶蓋茶 好吸引 但今日想飲啲清新啲既野 所以最後揀咗 四季春堅果奶蓋茶($34)微甜少冰 同滿杯奇異果($35) 無糖少冰本身對奶蓋要求好高 飲過好多坊間失敗既奶蓋茶 令我對奶蓋茶成日有種患得患失既感覺 有啲擔心呢杯奶蓋茶都會唔得 唔信邪 決定都係要嗌奶蓋!!首先有gimmick小鏟子 俾你鏟起啲奶蓋試下 再45度角大啖飲 感受下奶蓋同茶底既結合鏟起篤堅果奶蓋放入口 即刻會心微笑 媽呀 係好味既奶蓋呀 佢好creamy 好smooth 有陣榛子醬既味 好似繽紛樂變咗奶蓋咁 入面啲nuts細細粒 有啲咬口 好特別好好味飲一啖連堅果奶蓋既四季春 濃厚既奶蓋俾清新既四季春中和 有一種甜甜又清新既感覺 唔會太濃太甜 啱啱好 重點係通常都會飲完個奶蓋仲有大把茶 今次竟然可以飲完個茶都仲有奶蓋淨 太神奇喇 會唔會蝕錢架咁做生意(喊 - 感動既眼淚)另外嗌咗好少地方有得飲既奇異果茶 - 滿杯奇異果 因為無糖既關係 杯野飲好天然 堅有奇異果肉加綠茶底 清新得黎好健康 應該嗌微甜 少少甜既點綴一定令杯茶更出色最後想話佢哋飲筒係環保既飲筒 加分…Read More

超級肚餓黎川味美食實唔會令你失望呀 有各款小食、湯麵、撈麵 麵款有紅薯粉、手功拉麵、米線、河粉 湯底更加有走辣、小辣、中辣、大辣、麻辣 餸大部分都係加$6/$7 既親民份量又大 真係邊道搵 係想食米線既另一個好選擇我食既係酸辣炸醬米線($28) 走辣 內置大麵底!! 跟榨菜、芽菜、酸菜、蔥花、芫荽 細食既朋友記得要嗌少麵另加豬頸肉($7)、生菜($6)、紫菜($6)大食既我都表示要食淨少少麵呀 可想言之有幾大碗啦本身個麵餐已經有酸辣炸醬 炸醬都有一個餸既份量架 肉香跟埋榨菜酸菜好夠味 口感都好好 加埋啲餸 實在太豐富喇另附同行朋友既撈米線版同湯手工麵版俾大家參考…Read More

今日有時間可以食到個早餐 冇乜諗法 見到香港餐室有早餐就入咗去餐牌都係預計會有既早餐元素 嗌咗自選百搭粉面早餐($33) 如果包可以揀香脆奶油豬仔飽唔係迷你菠蘿包就好喇 事關本人真係好鐘意奶油豬黎到個菠蘿包都唔迷你架 但就唔多夠熱 一放落口打咗個突呀 除咗個包底有俾隻煎蛋座熱咗少少之外 成個包都凍既 食完仲有啲乾添 我指我個喉嚨其他餸都好食 有流心蛋黃既煎蛋 微微煎過既煙肉 通粉份量適中 仲有2條菜添 係同預期差唔多既港式早餐 西冷牛扒幫你砌埋放埋係通粉上面 刀都唔洗用呀…Read More

Yo 又係介紹高質黃店既好時候2200先last order係波友/夜食飯既首選呀!!食咗好多次 家下有得練番波 又再番黎幫襯佢好多好多滋味選擇 但我都係叫番我既最愛廚師推介 11. 滋補花雕醉雞泡飯 ($55) 趕得切係last order前落單 1800後野飲加$8 平時飲凍利賓立(同普通凍飲一樣$$) 今日飲凍檸茶花雕醉雞非常入味 例牌size 有少量椰菜/菜芯伴碟 泡飯係淡淡嘅藥膳湯 有明目杞子 同大碗飯 打完波好肚餓既情況下 呢個飯量先夠架嘛 細細兜邊夠阿姐食食到老闆都記得我哋 仲送咗碗蘿蔔過我哋食添 心心眼老闆 …Read More

壽司郎應該冇人唔識喇 分店都開咗好多間 今次黎到樂富壽司郎試試佢門市Walk-in 吧枱卡位都無所謂 等咗50分鐘就有得食喇 留意喇如果號碼叫過咗30分鐘就冇得食架喇等到有迴轉位 迴轉位相當闊落 每兩個位都有板隔開 有私隱之餘又唔怕對面岸口沫橫飛 侍應主動介紹坐位點餐架部 另附膠袋俾你放口罩壽司方面性價比相當高 可以稱得上價廉物美 4個價錢$12/$17/$22/$27 嘆各款壽司 海鮮新鮮 手握飯量都好足 但呢道係冇淨刺身或手捲嗌架炸物方面嗌咗和風鹽味炸雞翼($27) 2隻1開2既雞翼 都幾好食 夠脆又夠Juicy 係少咗啲甜品我好鐘意係巴斯克烤芝士蛋糕($27) 有cream係面 一齊食相當夾 芝士既香加上忌廉甜甜既配搭 一口接一口 停唔到呀 話咁快就清哂食完覆一覆單就可以咁制埋單 侍應會黎覆核碟既數量 之後只要拎住坐位張卡就可以去收銀處埋單 全程非常方便 電子化 食完仲有印花卡可以儲印花添…Read More

韓閣將軍澳開分店 逢星期一至五1430-1800下午茶 唔加一 仲有為隆重開幕而有既優惠多羅羅 幫襯時留意下餐牌 睇下啲優惠啱唔啱你喇地方闊落 侍應好好禮貌 坐低冇耐就上咗前菜 係醃蘿蔔同螺肉落單嗌咗 T01 炸雞特餐($102) 入面有炸雞半隻 醬汁方面有三種 揀咗甜酸味、蟹肉田園沙律拼香草薯條 跟2杯野飲L01 牛肉石鍋飯($48) 跟前菜一款及甜品、熱飲或例湯首先上場既主食係牛肉石鍋飯 侍應細心地俾咗兩份碗筷我哋 知我哋share食石鍋飯份量好好 餸夠多 拌完飯之後啖啖都有餸食到 唔會有齋飯冇餸既情況出現 牛唔老 石鍋夠熱 辣到有少飯焦又唔會燶 加埋韓式辣醬 好味見我哋食得七七八八就上炸雞特餐 炸雞皮脆但肉乾 冇juicy 脾位較好 甜酸醬汁幾好味 薯條份量幾大食完寫食評先發現 佢冇俾到T01入面既蟹肉田園沙律同L01既甜品我 Sad…Read More

雞蛋仔本身就係出名既香港特色美食 而媽咪雞蛋仔連續四年獲選米芝蓮2016-2019既香港街頭小食推介 就知佢有幾猛料啦款色越出越多 真係花多眼亂 每款都好想食相比起傳統炭燒雞蛋仔 佢係少咗一份風味 但係佢一樣做到香脆既外殻 同有住半滿既熱辣辣餡料既美味水準 雞香加上唔同配搭既食料 拿捏當中既平衡 帶出另一份美味係咁多款式入面我都係鐘情芝士雞蛋仔($35) 佢做到足餡而不膩 既有蛋香又有芝士既咸香 就算自己一個食哂都唔會有濟既感覺 兩者好平衡 為我同朋友既聚餐畫上完美既句號呀…Read More