Peko928's Profile

呢間又係 book mark 咗好耐，今日終於有機會一試。首先一定要介紹呢個兩餸爆膽丼，想食要預訂，碗仔細細，但海膽勁多又鮮味，撈埋隻日本雞蛋（朋友唔食所以另上），真係欲罷不能。唯一可惜係冇咗三文魚籽，唔知係咪缺貨？不過齋食海膽都好滿足😋。跟住就係幾款燒物，包括特級牛脷芯，豬頸肉伴柚子汁，鹽燒心燒雞翼同燒冬菇，樣樣都高質，牛脷芯同豬頸肉夠 juicy，雞翼燒得夠香口，冬菇就正常發揮，燒完唔會太乾，好食。再之後係幾款小食甜品，包括燒芝士年糕餅，燒菠蘿同燒芝麻湯圓。芝士年糕餅芝士味勁濃郁，絕對有驚喜；燒菠蘿係呢度嘅名物，又甜又 juicy；芝麻湯圓都幾有趣，外形勁似燒墨魚丸😹，味道都唔錯，如果可以整到佢流心就更加好（我認我好貪心😎）。朋友唔飲酒，所以我叫咗杯 mocktail，呢杯 Baby Bellini 有桃片，橙汁，檸檬汁同薑啤，對於我嚟講實在太甜，下次可能叫梳打類較好。最後必須一提，呢度嘅服務認真好，打電話同佢哋溝通過兩次，兩次都非常有禮，值得一讚👍。…Read More

西貢做完嘢，熱辣辣，想搵間坐得舒服嘅食嘢，於是就嚟咗呢度。雖然主打印尼食物，但係餐廳嘅裝潢同格局更似一間 cafe，窗明几潔，令人感覺舒服。原本想試牛骨湯飯同牛丸，但係可能嚟得晏咗，兩樣都售罄🥺，於是就揀咗個印尼雞湯飯。我承認揀呢個係畀塊印尼蝦片吸引咗😂，所以食物上枱時，第一時間就將佢幹掉，蝦片脆卜卜，好正。試一啖湯，湯底偏淡口，不過椰奶，香葉同香茅味好重，加埋青檸汁，係我鍾意嘅味道，撈飯食一流。除咗雞肉外，湯入面仲有雞蛋，豆卜，芽菜等，材料算豐富，食哂成碗白飯同餸，非常飽。嚟多杯椰奶咖啡，底層 cold brew 咖啡偏濃，配合上層厚厚嘅椰奶，剛剛好，唔苦，亦唔太甜，係椰汁味同咖啡味 balance 得唔錯嘅一杯飲品。…Read More

好耐冇入嚟元朗，一場嚟到，當然要搵間小店幫襯下。呢間都幾隱蔽，舖仔細細，環境一般，但價錢就好實惠。叫咗個魚生飯定食，包沙律，前菜，茶碗蒸同麵豉湯，晚市 $102 免加一。沙律係粟米粒配蟹柳，粟米粒唔係好甜，所以如果沙律醬多返少少就更好；前菜係中華沙律，正常味道；麵豉湯入面嘅海帶同豆腐粒都幾多，算有誠意；茶碗蒸雖然份量唔多，但蛋夠滑，入面仲有細細粒蝦肉同帶子，好食。主角魚生飯好大碗，魚生片有三文魚，劍魚腩，帶子，北寄貝同甜蝦，劍魚腩同三文魚都係厚切，夠肥美，超正；甜蝦都夠新鮮，連蝦頭嘅膏都甜；至於帶子同北寄貝就比較薄切，唔太夠喉😂。飯底好明顯食得出係好飽滿嘅日本米，我嘅至愛。…Read More

呢間係朗豪坊頂樓 Texas Burger 嘅分支，雖然主打 burger，但今次由於有朋友叫咗牛扒，咁我哋於是就叫 pasta 同 risotto 啦。先嚟個餐湯，係忌廉波椒湯，原先店員介紹嘅時候都擔心椒味太濃頂唔順，不過飲落又幾好飲喎，好 creamy，完全飲唔出椒味。餐飽細細粒，少少香草味，唔錯。主菜方面，最有印象係慢煮紅酒燉牛面肉菠菜意大利飯，除咗 risotto 軟硬度啱我口味外，醬汁味道亦夠濃，好啱重口味嘅我，面頭啲菇菇更烤得好脆好好食。朋友最鍾意 8 安士紐西蘭草飼肉眼牛扒配烤蔬菜焗薯角，我都覺得唔錯，百零蚊大大塊牛扒，性價比算高。由於叫咗七成熟，講真就唔會好 juicy，不過都算嫰滑有牛味，就係略嫌上面嘅蒜片多咗啲啲，食嘅時候要撥開，否則會影響牛味。side dish 都好食，唯獨法邊豆好生，食咗半條就放棄。煙三文蘆筍青醬意大利麵就同想像中有啲落差，因為平時食開嘅青醬 pasta，會比較多青醬同橄欖油，但呢個就非常 creamy，似忌廉汁多啲，青醬味好弱，雖然有啲失望，但其實味道都算唔錯。下次嚟，一定要試埋佢哋嘅 burger。…Read More

話說今年行維園年宵見到廟街玉子燒有擺檔，本來想幫襯，但睇見條隊咁鬼長就嚇怕。上星期咁啱經過廟街，於是就過嚟食玉子燒。本來想叫個原味，哥哥話明太子或者蟹膏味多人揀，我怕明太子太鹹，於是就叫咗個蟹醬流心芝士玉子燒。原來呢度係有堂食，就係放張細細嘅 bar 櫈喺路邊當枱，一路食，隔離小販大叔就一路準備開檔，真係別有一番風味😆。講返件玉子燒，原來都唔細，亦頗厚身，塞滿咗成個透明膠盒。面頭除咗郁郁木魚絲之外，仲有沙律醬，賣相唔錯。咬一啖，即刻 feel 到入面熱辣辣嘅拉絲芝士同埋鮮甜嘅蟹膏，兩者出奇地夾，食食下仲發現原來中間隱藏咗一條蟹柳。餡料就好豐富喇，至於玉子本身亦燒得剛好，唔會太老，夠嫰滑，甜度也適中，總括嚟講，係我鍾意嘅味道🫶。…Read More

一行入來泰巷已經好鍾意，成間店都顯示同社區有緊密連繫，牆上面畫有社區地圖，每張枱旁邊都放咗唔同單位製作嘅社區印刷品，食客睇嚟亦以熟客居多，一路食一路同店員閒話家常，成個 vibe 超正💜。叫咗個來泰巷咖哩雞麵，咖哩汁杰身椰汁味濃唔太辣，係我鍾意嘅味道。碗麵雖然只有一隻雞髀，但 size 都唔細，仲啖啖肉，好食。跟餐仲有碗蘿蔔湯，正常味道，清清哋，正好中和濃烈嘅咖哩味。我最鍾意試奇怪嘢，於是叫多杯粉紅飲品😆。店員話入面係梳打，蛇皮果，奶同糖水，佢見我話唔鍾意太甜，就落少咗糖水。杯嘢勁粉紅，本來有啲可怕，但飲落又ok喎，唔識形容個味道，不過我諗唔落奶可能更清新更好。店員哥哥話呢個配方係泰國人教，如果我下次再叫可以試下走奶喎😆。…Read More

一年兩次嚟葵涌做嘢，最開心嘅，就係可以幫襯呢邊嘅小店。今次就試下上海菜。叫咗個上海排骨菜飯連凍豆漿，50蚊，真心抵食。除咗價錢平，另一個優勝處就係份量多，個菜飯勁大碗，好飽肚。味道方面，凍豆漿同炸排骨正常水準，個菜飯呢......就極有進步空間，菜非常少，飯亦偏乾，感覺似煲熟啲飯就咁將啲菜粒撈落去咁，所以啲飯係冇乜菜味。希望店家會改善啦。…Read More

老實講，近年呢，經濟不景，如果時間許可，好多時都會下午茶當晚餐，因為真係實惠好多。今次五點幾喺葵涌做完嘢，就趕及六點前嚟呢度食個豐富嘅下午茶啦。叫咗個咖哩牛腩飯，雖然係下午茶，份量一啲都冇少到，抵讚。牛腩有筋有腩，炆得入味，薯仔都夠腍。咖哩汁偏辣偏鹹，雖然唔係我最鍾意嘅濃椰汁味道，但都算惹味，餸飯一流。另外，最值得一讚嘅係餐廳嘅環境，非常乾淨企理，完全唔似一般茶記，反而更似間 cafe，坐得好舒服。…Read More

呢間真係久仰大名啦。一場嚟到，當然要試佢個名物韭菜餅啦，但係望一望 menu，見到居然有芫茜餅😯，諗住即刻轉軚，可惜最後兩粒畀前面位姨姨買咗🥺，於是疊埋心水，繼續食韭菜餅。由於即叫即煎，所以都等咗差唔多十分鐘。拎上手，熱辣辣，勁大粒，好飽滿。等咗一陣，冇咁熱喇，就咬一啖，發現皮好薄，煎得香脆之餘又唔太油膩。餡料方面更值得一讚，韭菜勁多，入面仲夾雜咗啲豬肉，兩者嘅味道調得非常好，惹味之餘又唔太鹹，認真好食。講真，廿蚊三粒，絕對性價比高。…Read More

話說灣仔和記餐廳結業前一直未去過，其實係我嘅一大遺憾。前排知道有間姊妹店喺西灣河，已經第一時間走過去幫襯。今次嚟到灣仔做嘢，當然把握機會，嚟佢新開嘅 cafe 食個 lunch 啦。一入門口，已經被呢度嘅裝修吸引：水泥風牆身同木系枱椅，全部都係我最鍾意嘅。揀咗個面向街嘅位坐低，都未落單，就畀隔離枱嘅食客吸引咗目光，原來係一班音樂人飯聚緊，果然係間同音樂有緊密聯繫嘅 cafe。叫咗我嘅至愛卡邦尼意粉，無論味道同口感都係我鍾意嘅口味，份量仲比一般 cafe 多，要讚👍。唯一可改善嘅係賣相，例如擺盤可整齊啲，面頭隻蛋煎靚少少，咁就 perfect 喇。杯 Flat White 呢就無可挑剔喇，我成日覺得奶啡一定要配 nutty 嘅豆，所以呢杯絕對啱我口味，加埋個靚靚拉花，勁滿足🥰。…Read More

紅煮意歷史都算悠久，以前成日去電影中心睇戲都會經過，但係就一直都未有機會幫襯。今次又嚟呢度睇戲，就順理成章上嚟食個午餐。十二點幾嚟到，要等位，而家香港呢個經濟狀況，算少見，證明呢度都真係幾多客。等咗一陣，終於有位，一坐低，就畀入面嘅氛圍吸引住：電視不斷播哥哥嘅 MV，勁正，我仲發現原來呢度星期六晚有 live music😯，好正喎！呢度除咗有恆常嘅餐牌，仲有個每星期轉款嘅午餐 menu，我叫咗香煎美國豬仔扒配炭燒章魚餅意粉，醬汁係意大利蕃茄汁。先嚟餐湯同餐包，餐湯幾 creamy，仲食到粟米粒同蘑菇粒，唔錯。主菜嘅豬仔扒幾 juicy 嫩滑，章魚餅口感偏腍，雖然同個意粉唔係好 match，但係都幾好食，伴碟嘅蕃茄同沙律菜都夠 fresh，整體不俗。飲品我揀咗自家製樽仔鴛鴦，雖然係原味，但係對於我嚟講都係偏甜，不過茶啡比例幾好，所以都算好飲。…Read More

做嘢經過光輝圍，突然好肚餓，於是就幫襯咗 We Time Cafe，呢間係 cafe 裝修同食物，但價錢偏向茶餐廳水位，幾抵食，難怪要排長龍。叫咗個三重芝士鮮茄吉列豬扒焗珍珠飯，由於即叫即焗，所以都等咗一段時間，上枱時超熱辣辣。叫得做三重芝士，果然幾重手，𢳂一羹，勁拉絲，我最鍾意😋。芝士同茄汁味道都夠濃，送飯一流，至於吉列豬扒就正常水準，唔算好 juicy，但亦都唔會嚡到擦紙膠咁。包餐湯包茶，六十蚊，抵食啦。…Read More

由細到大都好鍾意食糯米，無論係糯米包，糯米卷抑或糯米飯，有得叫我都一定會叫。以前食糯米飯會去坑口村，不過真係好耐冇去喇。早排喺灣仔做嘢，當然第一時間去強記試下佢哋嘅名物糯米飯。我不嬲都唔食潤腸，不過今次就叫咗米芝蓮推介嘅鴛鴦腸雜錦臘味糯米飯。呢度我必須要講，以前唔鍾意食潤腸，只係因為食咗啲唔靚嘅潤腸，今次呢條就非常好食，油脂充足，唔會乾爭爭好粉咁，勁正。相比之下，臘腸就正常水準。至於糯米飯，同之前食開嘅唔係好同，可能因為唔係生炒嘅關係，冇咁惹味，不過真係好耐冇食過糯米飯喇，所以一樣咁滿足😋。…Read More

嗰日去到石門，本來一心諗住幫襯豆腐巴克，點知敵唔過心魔，食咗樓下間餃子店。嗰間餃子店餃子大大隻，勁飽。食完，都係心思思上返去豆腐巴克食甜品😸。我叫咗個黑糖豆腐花，雖然我覺得豆腐花配傳統嘅黃糖係最好食嘅，不過估唔到呢碗都非常唔錯，豆腐夠滑夠豆味，配黑糖雖然真係甜咗少少，但係由於我好鍾意黑糖嘅味道，所以我覺得好食。下次再嚟，一定要試埋其他嘢。…Read More

甜品嚟講，我幾鍾意食豆腐花。今次嚟到甜姨姨，由於得一支公，唔敢挑戰食名物刨冰，於是就叫咗芒果豆腐花。首先要讚係呂宋芒份量幾多，差唔多鋪滿大半碗豆腐花，芒果味鮮甜，再加埋芒果汁，好食。下面嘅豆腐花就正常水準。另外要讚嘅係呢度環境幾寬敞，座位唔算好逼，食得舒服。…Read More