joeylove's Profile

冬天咁凍真係好鐘意打邊爐，一來可以慢慢滾慢慢食，又可以坐耐少少傾計。放夜又幾個人，一於冬至前聚聚食餐好!今次揀左呢間麻神麻辣火鍋，台灣開到黎香港，應該唔錯吧?抱住期望黎食~~~入到店，咁夜估唔到都幾多人，一坐低就話原來9:30後25%off，估唔到竟然有折?!無諗咁多，一睇餐牌，多野揀到呢.....選擇困難症啊真係!款式好多，仲有套餐揀，最後我地當然係揀左唔少樣野.....麻辣特選老饕鍋 $128呢個第一次食，入面有牛肚、牛根咁，即係台灣牛雜，麻辣味濃，超入味，鐘意食辣呢個超正!美國牛頸脊  $248份量都幾多，肉質嫩，脂肪分佈平均，入口超濃郁牛味，連埋湯底一齊入口超惹味~西班牙黑毛豬梅花 $198肉味濃，口感較結實，但不會韌口，但又不覺油膩，口感超好!另外，仲叫左丸子拼盤、蓮藕片、冰菜、鮮淮山、鵝腸等.....丸子拼盤我都推介，入面有梅菜豬肉丸、墨魚丸、鯪魚丸及蝦丸，彈牙爽口，好好味!食材新鮮，而且好多種類可以揀，呢餐真係又抵食又好飽!!!…Read More

喺得尖沙咀區返工，呢區有咩好野新野食又點會唔知！之前同秘書小姐黎過呢度食lunch覺得唔錯，環境闊落景觀開揚，食物又有質素，所以今日放工就約左個舊同學黎試下晚餐~睇睇menu，有兩個餐都做緊推廣discount，咁我地就揀左個經濟少少$338嘅，望落都相當豐富，雀仔胃嘅女仔肯定食唔晒~今日個餐湯係洋蔥湯，閒落好香，飲落濃郁但又唔係鹹，洋蔥好滑口~跟住就係卡邦尼意粉，份量唔會太over，因為陣間仲會有main course嘛~個Carbonara入口夠creamy，味道好出唔會淡而無味，食完會好想再食~Main course我就揀左烤澳洲肉眼扒，我呢啲牛魔王梗係無牛不歡，要滿足我亦唔係咁易，因為成個尖咀好多地方嘅牛扒我都食過！呢度塊ribeye steak好夠厚身，入口juicy，有咬口，剛剛好唔會韌，烤到外脆內嫩，肉味濃，個人認為五成熟最正~同學仔揀左個烤美國雞胸伴巴馬火腿，佢話keep fit唔可以好似我呢啲瘦底人咁食得咁heavy喎，不過都忍唔住大家交換左少少黎食~呀！估唔到個雞胸又相當唔錯喎，一聽到雞胸我已經怕怕，實好鞋口，但原來食落又幾鬆化，配埋個汁同parmaham一齊食味道勁有層次，原來健康之選都可以好滋味~最後歎埋件軟滑香濃嘅芝士蛋糕，呢餐真係好享受~…Read More

年年生日男朋友都會畀surprise我，今年都唔例外，帶咗我嚟呢間日式食府歎Omakase~ 由師傅發辦就最好，乜都唔洗諗，乖乖地坐喺度就會食到最時令嘅日本靚海鮮，呢個安排真係太好，食每道菜都係一個驚喜~以下呢幾樣就令我印象最深刻：→千葉縣‧地金目鯛配黃金三文魚子地金目鯛係千葉縣嘅野生海鮮名物，魚肉特別粉嫩，油脂雪白同分佈均勻。師傅將佢厚切，可以食得出果種滑口同肉質結實嘅口感，味道係魚味濃厚兼帶鮮甜，真係新鮮到好似啱啱上水咁~配埋通透金黃嘅三文魚子，有提鮮作用。→愛媛縣真鯛‧配鯛魚白子真鯛係日本人慶祝節日先會食嘅高級鯛魚，有“魚類之王”美譽，愛媛縣就盛產呢款魚，一年四季都食得到果份美味魚鮮同肉質細嫩~至於鯛魚白子就入口即化，鮮香味好吸引， 透明而且油潤豐腴嘅魚肉真係無得輸。→北海道鳥貝鳥貝個外型好得意，因為形狀似雀仔個頭而得名~佢嘅肉質好厚而細嫩，味道鮮美甘甜，口感爽脆非常獨特，第一次食對佢印象難忘~→深海池魚配烏魚子深海池魚比一般池魚更肥美、更爽滑、更鮮甜，厚切刺身完全可以食到果份清、甜、爽~烏魚子味道好特別，口感柔軟油潤，鹹得恰到好處，食完仲好有餘韻，令人回味無窮。→靜岡縣駿河灣活赤座海老呢款海老其實係日本龍蝦仔，同平時食啲海老好唔同，肉質勁爽勁彈牙，味道勁鮮同甘甜，簡單點醬油同芥末已經好正~ 呢餐結論係3個字：好~幸~福~…Read More

好開心搵到個又係好為食又係好鐘意試新野既另一半，食野就成為左我地拍拖既指定活動，通常一個月四個周末，知慳識儉既我地有三個禮拜都係食平野，淨返個星期就可以揀啲豪少少既野食，今個星期輪到食好野，great！！！呢度環境幾優雅、舒服，侍應感覺親切。食物方面，第一樣係南瓜湯，又香又濃好creamy，入面仲有蟹肉好驚喜，點埋長餅乾一齊食好夾。Main course方面柯打左美國優質肉眼同五花腩，前者D坑紋好靚，令人食指大動，好香口、肉質鮮嫰，後者雖然份量少少，但就有令人一試難忘既魅力，五花腩咁中式既食材，原來用西式整法又可以present得咁elegant，真係好大驚喜。最後黎個甜品拼盤兩口子孖住食甜入心，細細件一次過可以試到好多款，擺上網放閃好多朋友都問邊度有得食。…Read More

每次公司附近有新餐廳開，同事LUNCH群組就會瘋狂討論，近期討論得最熱烈既就係呢間西班牙餐廳：ROJO，話D出品幾有水準，同埋環境唔差幾有格調。所以今日我就拉左三位同事過嚟捧下場，雖然位置唔喺大街，但午餐時候一樣出現人龍，待應哥哥話下次嚟之前可以先訂位。4個人一人叫左一款set lunch，每個set lunch都有配埋餐湯、麵包同餐飲，個雜菜湯都幾足料，唔會好似茶餐廳果啲稀到好似水咁，濃味得黎又唔會去到太咸既程度，配埋塊香脆蒜蓉包，yummy^.^成個人即時開晒胃，好期待主菜上檯。我叫左個香蒜欖油辣椒意大利粉（$78），簡簡單單用橄欖油、辣椒加香蒜片嚟煮意粉，既有辣勁，又有蒜香，橄欖油味道亦突出，整體味道層次好豐富好突出，而意粉既軟硬程度適中、幾有咬口，份量亦唔少，鍾意食辣既朋友一定like爆呢個意粉，當然包括我啦，哈哈……！！！…Read More

小女子一向都係韓國男團既忠粉，最近飯上既就係Bigbang既師弟Winner同iKON，佢地都係經過好多輪淘汰戰先有機會出道，不過外界成日將佢地兩隊做比較，記得Winner成員講過：Winner係"水冷面"，iKON就係"拌冷面"，前者感性，後者刺激，係完全唔同既！計我話，why not both？？？今日黎到呢間韓國餐廳，我就揀左"Winner"，哈哈……天氣熱嘛，最啱梗係食水冷面啦，好鍾意佢既面條超Q彈爽口，浸住面條既冷湯汁好pure，飲落非常清淡，加上有清清甜甜既梨片、醃白蘿蔔、青瓜同蛋，最特別既口感係黎自個湯汁，入面有冰碎，所以夠晒凍！成碗面解膩又飽肚，唔錯，食完個人都醒一醒！…Read More

呢排女同事之間既熱門話題，竟然係水晶男孩！佢地係一隊16年前解散左既大熱韓國男團，最近係《無限復活》入面重組，令到大家都睇到勁感動，仲為佢地即將會重新出道感到好欣慰。傾傾下我地又韓癮起，又係時候食返餐韓國菜調劑下心情先。炸雞已經夠邪惡，呢度仲要用鐵板上變成芝士酸辣味炸雞，真係邪惡度爆燈！大大件雞件炸到勁香勁脆，然後熱辣辣咁放係半融芝士上面，撈埋d粒粒粟米入去，一手拉起件雞，拉到好多芝士絲同沾滿好多粟米，不得了！睇黎減肥計劃又要暫且擱置。之後呢個星星飯盒，因為覺得個賣相好得意而叫，最啱影相呃like。呢樣係好傳統既韓國食物，只要將煎香左既韓式午餐肉同腸仔，加入埋菠菜同芽菜等配料，然後收返個蓋係咁搖、係咁搖，咁就食得，簡單滋味。而呢個韓式粉絲雞煲帶甜既味道層次豐富，汁醬好多，浸滿左d雞，加上用薯粉製成既韓國粉絲吸盡湯汁精華，煙韌彈牙，仲有大量薯仔同蘿蔔都豐富左口感。下次唔知我地又會搵個咩理由再食韓菜呢，期待~~…Read More

雖然成日聽人講早餐係一日裡面最重要既，不過工作忙又收得夜既香港人，反而通常最重視晚餐，今次就第一次黎呢度食dinner，睇睇menu主菜7揀1，揀左香煎龍脷柳配牛油檸檬汁($138)，餐飲就加$25轉洛神花茶，包埋餐湯、沙律同甜品。洛神花茶帶酸好開胃，女仔特別啱飲因為養顏又消脂，等之後大啖大啖食唔怕肥，最LIKE係有個火爐仔長期烘住保溫，一壺約可沖到約4杯。主菜黎喇！香煎龍脷柳配牛油檸檬汁，個汁酸味中帶少少fresh，魚肉食起黎幾新鮮、幾肥美，啖啖肉好嫩滑。…Read More

老豆生日，聽朋友介紹黎食放題，話咩都有得食個下正。我同阿哥都想食魚生，老人家又唔想食生野～第一次聽放題日，韓，生，熟咩野都有，仲要有火鍋LOL 出發前阿哥同老豆講，魚生唔食你就dum佢地落火鍋lo，熟哂，哈哈哈哈～賣個關子，到底有無食熟魚生?超Happy囉！真係$139位任食所有野！！！！！我地張張紙都有叫，哈哈除左韓國野～well~ 邊個話女仔一定鍾意韓國野架~老豆最愛ge Spicy Soup 火鍋～傻的嗎，其實我好怕食spicy -.- 張相影到咁曚就知我有幾怕啦～哈。不過阿哥同老豆話食得好爽，因為好足料，D蝦好爽同好大隻～無份食的我，唔知點介紹,哈～重點重點！！！！我全晚最期待就係哂呢度！D魚生好新鮮，豉油都無落就食左幾塊先～另一樣最愛ge係甜蝦，平時去元氣只係敢食甜蝦壽司，哈，因為有點小貴。。呢度就發啦～有咁多食咁多～！蟹棒好濃蟹ge鮮味，平時食開蟹柳。。今晚食個D完全係人間極品*3* 阿哥話我食得好野少wo, d反應好誇=.= 係又點，最後我食左3 round刺身！大大力推薦～其實仲食左好多熟食，張張紙都有叫D～但實在太多野食，掛住食魚生，其他野都無影特寫tim~ 不過值得一提ge係，感覺上呢度日本野都好出色，魚生好味之餘，天婦羅比我想像中好食－平時出面個D好厚粉，又唔脆，呢度ge 海老天婦羅真係好得，D肉又爽，出面真係脆卜卜～我自己都食左兩盤>v<太多好味野，真係寫唔哂～D熟食其實好岩老豆食，但我食日本野都食到勁飽，仲要汽水任飲。。。可樂一落肚，個種滿足，哈～下次可以同男友黎多次,真係抵到爛～平時元氣食左2百都無咁多野食！！！後記：Spicy Soup 魚生古怪到一個點，小朋友千祈唔好學。…Read More

同兩個女仔fd做完運動已經成九點幾，竟然有人好邪惡咁建議去食宵夜時段放題，係2對1嘅情況下，最終上左黎呢度開大餐~~見到牆身放左幾幅韓星嘅畫，有我地大愛嘅GD，大家即刻心心眼~食物方面，都係以韓菜做主打，醬油蝦、黑莓醋炸豚肉，又有好多個名好搞鬼嘅韓式壽司，黑蚊蚊、靜雞雞、熱辣辣、軟綿綿、碎濕濕及笑蝦蝦......好鬼funny~同一時間烤爐ready，雪花肥牛、牛肋骨、腌漬牛腹肉、豬梅頭肉、五花腩、帆立貝、泡菜青口等全部放晒落去燒，非常盡情，佢地仲好有心思咁用電爐取代明火，爐上放有「吸油紙」索油，感覺健康d~刺身方面一定要order多幾隻又爽又肥美的特大赤蝦，有咁多好食嘅野，唔知要做幾多運動先level返luu~…Read More

其實唔特別想食壽司，不過上到黎見個場幾靚，又唔洗等位，於是就同個fd坐低試下~打開menu，見到原來壽司以外都有好多選擇，好似有唔少特色串燒，比我地揭揭下，仲發現有兩款限量供應嘅手打烏冬，於是毫不猶豫咁決定一人order一碗再share食！首先係特選蟹味噌濃湯手打烏冬，飲一啖湯已有好濃郁味，阿廚話係用左兩隻膏蟹熬湯兩粒鐘，之後整烏冬時再加入一隻，認真足料，只賣$118，算係成本價~另一款係花膠雞絲濃湯手打烏冬，聽落好補身，真係估佢唔到日本餐廳竟然有花膠食，原來個濃湯每日用8粒鐘黎熬，花膠咬落好彈牙，只售$128，都係超值~所以即使唔食刺身壽司嘅朋友，都可以黎試下手打拉麵~…Read More

同honey過澳門一日遊，因為要趕及7:30pm船返香港，所以6點已喺氹仔一帶搵地方食晚飯。見呢間餐廳幾好情調，入面又得一枱家庭客，幾乎包場咁feel，於是就揀呢間啦~呢度係由客人用ipad自行點菜的，中文英文menu都可以自選，我地見佢原來係主打海鮮菜式，於是就order左蟹蓋同海鮮湯飯~首次講講個蟹蓋，平時食開中式都係焗嘅、熱嘅，原來葡式整法係凍食嘅，幾有驚喜~d料都好足，味道甜甜地非常好，作為前菜開下胃唔錯~至於個海鮮濃湯飯就認真唔講得笑，飲一啖湯已覺盡收海鮮精華，非常滋味，入面有好多海鮮，蝦都有兩款，另有青口、蜆等等，海鮮份量甚至比飯仲多，食晒d飯都仲有海鮮淨，最後當然全部比我地掃晒啦！食食下途中我仲有諗過不如叫多客，一人一煲，不過honey話我又眼闊肚窄，所以先打消念頭~我見果枱家庭客都一樣有order到呢個海鮮濃湯飯，就知呢個應該係呢度嘅鎮店之寶~…Read More

自從阿哥帶過我黎食一次之後，以後每次我同任何人黎澳門，做野又好、旅行又好，都一定要黎呢度食返碗煲仔翅，因為實在太足料、太好味，最重要係質素夠穩定，每次食都食得返咁上下味道，所以即使次次都幾乎要排長龍，但仍然好值得等！試過有一次黎到食閉門羹，撞正佢地休息，於是就喺同一條街揀過另一間試，點知咁就中伏了，d翅食落有陣唔太新鮮嘅味，真係好失望~自此以後，無論呢度條隊有幾長，我d同伴有幾想放棄，我都會好堅持話一定要排呢間，因為堅係正，哈哈~ …Read More

之前黎幾次都係食招牌清湯腩，今次就搞搞新意思試下炸醬麵，一上枱見到金黄色嘅肉醬淋喺竹升麵上面，已經令人口水猛流！以前食慣左川味炸醬麵嘅麻辣、京式炸醬麵嘅濃郁，呢度嘅炸醬麵就比到我好大驚喜~單睇色澤已經令人食慾大增，用新鮮鴨蛋同面麵整成嘅竹升麵一食就知與別不同，充滿蛋香味道，咬落爽口彈牙；而加入左黄豆醬同蕃茄醬嘅炸醬辣中帶甜，甜中又食到微辣，風味獨特，好正！！！再飲一啖豬潤牛肉湯，湯頭好鮮，清清甜甜，細問員工，佢話係用左大量牛骨同藥材熬製而成，唔怪得咁好味。湯嘅香味令豬潤嘅嫩滑同牛肉嘅爽口更突出，真係食唔停，連湯都比我飲精光luuuuuuuu~…Read More