C U Later's Profile

天時暑熱之下平時都食粉麵為主，呢間潮式粉麵店都幾抵食，雲呑、魚旦粉+油菜都只不過$38 （加汽水要$10）。 佢哋「後欄」自製魚旦，所以品質唔錯，幾有魚味。而粉同油菜份量都唔少，所以都夠一位男士作午餐！…Read More

今日行過英皇集團大厦旁邊，見到店名已覺熟悉，當望入裡面見到黑色時裝紙袋就確認係我平時去開北角健威商場都會入去Oops睇吓衫嘅店，但係點解係賣小食同雪糕嘅？(抓頭)一於入去睇吓先，店面積細細但係有個頗大嘅雪糕櫃，仲有十幾款雪糕選擇，當然要試吓啦。一眼望見我至愛口味:香芋、椰子，即刻order兩球華夫筒。 店員喺一位甜姐兒雖然排晒長龍但臉上掛滿笑容，仲好大力添！個個雪糕球都好大個，唔似名牌雪糕店啲mini size。芋頭味到唔錯，紫色好吸引，而椰子味清香仲有粒粒椰肉，呢兩個口味簡直perfect match呀！一定會再試其他口味。…Read More

難得平日放假相約朋友到數碼港睇電影，因為平時較少到南區所以特意提早到鴨脷洲逛逛兼食晏。 一直覺得香港仔、鴨脷洲係漁民聚居嘅地方，有漁船停泊、遊客必到嘅海洋公園、珍寶海鮮舫; 而香港仔謝記、南記魚蛋粉亦都係由細食到大。 不過近幾年南區不斷發展轉型，翻天覆地搭建地鐵、興建豪宅，不久將來必有一番新景。 今日閑逛於鴨脷洲大街上完全感受到一種寧靜小社區內街坊鄰里嘅一種情懷。沒有大型巴士、貨櫃車於街上，只有少量私家車、小型客貨車、小巴等; 而大多數樓房都不高於十層，市區罕有; 更難得係走在街上完全無壓迫感，當中有好多特色懷舊小店，應該已經營好幾代無論外表同貨品都好似停留於某個年代一樣。 首先印象深刻係友和士多， 格局同以前見過嘅一樣，舖門前放有各式各樣糕點，種類之多今時今日確實難得一見 ， 而且大部份都係$5一件， 真係想樣樣都試吓。燒餅排列於一不銹鋼大盤內，每個燒餅差不多有手掌大小，較大件兼厚身但皮薄而豆沙餡適中，喜歡餅表面烘得夠乾身唔油膩，又唔會黐牙，好好味呀。馬仔係我至愛，店員將一盤像小方枱大小嘅馬仔分為兩件一袋售賣。 顏色金黃，食落鬆脆又唔會散開，而糖膠香甜唔太黏口，所以食完再買多兩包俾阿媽試吓。新鮮香蕉糕已經好少有舖頭售賣，除常見嘅條狀外仲有外形好似北京小食「驢打滾」一樣嘅香蕉豆沙糕，一大件非常軟糯兼豆沙份量十足，又好味又抵食。煎堆炸得金黃佈滿香口芝麻，皮外面好脆仲好薄，同樣地裡面豆沙份量足夠晒香甜，食落一啲都唔油膩。估唔到一間細小士多有咁懷式舊糕點售賣，有顧客問係唔係全部自己造，老闆娘好熱誠介紹邊幾款係來貨，而邊幾款係自家出品，非常老實。 希望可以繼續保存呢啲富有香港特色嘅店舖。…Read More

店位於觀塘近街市大樓，面積雖小但佈置有心思掛滿雲南特色擺設、裝飾，食物選擇都好多種類，家庭式經營，菜式不造作。燜肉米線 ($28)五花腩炆到入晒味切成肉粒，配有爽口椰菜絲，米線夠幼滑。紅油餛飩10隻($28)菜肉餛飩皮又薄又滑，一般紅油餛飩係用辣油醬料淋落餛飩上，但他們嘅紅油係用類似麻辣湯浸餛飩。湯剛開始唔覺得好辣但慢慢就滲出辣味，但與真正麻辣相比就唔夠麻和辣。炸臭豆腐($15)估唔到係好似腐乳般細粒，一碟有五粒同樣配有甜醬、辣豆板醬，臭味唔係好強。氣鍋杞子雞($39)氣鍋雞係雲南特色菜，配料有好幾款選擇如杞子、田七等等，小鍋份量差不多有一湯碗大小，湯好清甜而雞肉嫩滑，唔覺肥膩。大吉大利($37)其實係鴨腎、豬脷，全部切薄片淋上美味醬汁，不過腎同脷就比較難索到醬汁味道。醬骨架($37)呢款菜式通常到國內東北菜館都有供應，一大塊豬脊骨連肉用香料湯㷛到肉差不多離骨，一碟有四大塊肉連有筋膜入晒味，連骨髓亦可容易吸嗦到，越食越滋味。…Read More

途經灣仔巴路士街必會聞到陣陣臭豆腐味道，總被佢吸引、留下腳步一飽食慾 。$10有兩大舊，表面炸到蜂巢狀非常鬆脆，裡面豆腐軟身，一啖有兩種口感，海鮮甜醬、豆板醬係臭豆腐嘅最佳拍檔，增添惹味。 所謂「臭」味其實係聞落有味食落唔覺，所以不好此物嘅朋友都可接受，仲食得津津有味。$10五件煎釀三寶，大大件好抵食。「魚肉」平均放於每件青椒、茄子上，咬落煙煙韌韌味道唔錯。其實泉昌嘅沙爹螺肉、魷魚都好受歡迎，好快賣完咖。…Read More

餐廳位於食肆林立嘅灣仔QRE， 覆式有上、下兩層，一邊檣有玻璃窗令光線射進餐廳，而窗台上種滿香草，被安排坐落窗台旁嘅餐桌，有唔錯景觀仲有Rosemary 係旁邊添。午市套餐非常扺食又有多款選擇，今次叫咗兩個$188套餐，一牛一豬。餐包係熱辣辣嘅法包，配有蒜蓉橄欖油醬、芝士粉，另有包裝牛油、橄欖油、醋。蒜蓉橄欖油醬非常濃味配麵包食一流，不過有啲怕口氣太大 。 是日餐湯係意大利雜菜湯，湯夠晒熱而且蔬菜味道清新兼酸酸地，好開胃。主菜之前有一款pasta，今次係蕃茄意粉。 份量好大好似主菜咁，有鮮蕃茄肉但味道較淡，意粉較粗身，食完成碟都已經八九成飽喇。牛肉薄切配薯菜，朋友話肉質幾好剛熟，味道好濃有啲過咸，粗薯條新鮮炸脆卜卜。而我個豬扒烤到金黃色有好多香料喺面，肉質結實而味道都係偏重，旁邊伴菜新鮮減低油膩感覺。套餐包埋餐茶同甜品，紅茶香濃而檸檬新鮮，兩者味道好夾。 甜品係有焦糖面嘅奶布甸，質地好杰都幾漏。呢個set lunch份量好多，男士都好足夠，對女生嚟講確實好吃力去完成。 所以係十分抵食咖。…Read More

年初六市面好多食市都仲未開門，睇完戲回家途中想食甜品，所以試吓去明記碰吓運氣。 明記喺西灣河有兩間店舖，平時去開新店但仲未開舖，於是再去睇吓百佳對面舊店，好彩有開門仲全場滿座:)。明記供應多款新舊甜品，仲不時有新產品推出。桑寄生蓮子茶: 桑寄生具補肝腎、強筋骨、祛風濕等功效，亦具有降血壓、抗氧化、利尿等作用。 明記嘅桑寄生茶特別濃郁甘甘甜甜，原本包括一隻雞蛋但因之前食得太飽所以要求唔加蛋。蓮子份量唔少非常鬆化。杧果西米露: 以為好單調點知係非常豐富，有多汁香甜杧果、香濃杧果汁，椰汁西米露。杧果同椰汁係一個完美嘅配搭，西米粒粒分明唔會黐埋一舊，椰汁要一讚因為加入另一好拍檔芋頭碎但好難擦覺，我覺得如果可以加多啲芋頭或大粒啲，會更加完美好味。…Read More

不同種類、各式各樣甜品店隨處可見，中、西、日式任君選擇。中式甜品店以廣東糖水為首，至於其他代表要算係潮洲糖水，以我所知九龍城裡面嘅潮洲合成甜品供應嘅潮式糖水可以講得話全港獨有。 傳統潮式糖水各種材料配搭有差不多六十多款睇到眼花繚亂，而且每樣材料都有個別食療作用，食糖水之餘又可以對身體有益， 怪不得長年都座無虛席啦。蓮子雪耳薏米柿餅 - 全部材料都係我最鐘意嘅，尤其杮餅因為一般唔會喺食店供應。 蓮子、雪耳、薏米軟硬適中，每樣都有唔同質感，糖水清甜。冰花清心丸薏米馬蹄沙 - 馬蹄沙同樣市面少見到，馬蹄啄碎混合類似混入馬蹄粉，所以好幼滑，清心丸係潮流出名嘅食品本身無乜味，非常煙煙韌韌好有咬口，薏米令到整體更加豐富，糖水混入蛋花令味道非常香甜。…Read More

今年生日多得好朋友細意安排帶我去一間頗有特色餐廳慶祝 :) ， 餐廳位於元朗錦上路，都唔係好難搵啫，仲有代客泊車服務，非常方便。 落車望一望四周環境，有置身於東南亞resort餐廳一樣，隨即感覺到似曾相識......噢！古天樂、高圓圓 - 「單身男女」！ 之後幾晚睇「單戀雙城」𠲖！！乜陳茵微喺檳城做嘢間酒店餐廳又 ......， 原來呢度係取景勝地 ！ 餐廳環境確實一流簡直係石屎森林之中嘅綠洲。 從停車場入用餐地點沿路有特色露天擺設，有好多餐枱於帳篷下面; 再走入就會見到正中有一玻璃屋，作為室內用餐位置、類似泰國海鮮檔、印度薄餅烤爐、燒烤爐等。客人可一邊睇海鮮一邊睇啱就落order，店員耐心介紹不同煮法、配搭。馬拉棧桶蠔： 桶蠔size較細隻，表面撲得太多粉，食落有一層粉漿:(，配料有好多包括青、黃、紅椒、洋蔥、大葱等，馬拉棧有粒粒蝦米碎，可味道太重完全蓋過蠔嘅味道，呢個配搭麻麻地咋。蒜蓉牛油燒大蜆: 蜆燒過後味道鮮甜，連埋蒜蓉牛油汁一齊食更香濃，再加埋泰式汁食非常惹味。紅咖喱雞: 紅咖喱汁顏色好深酸酸地，裡面有泰式小茄子，而雞比較特別係類似白切雞，同其他餐廳做法不一樣。烤薄餅: 一客份量都唔少用嚟索咖喱汁一流，一要趁熱食就最好味喇。燒虎蝦: 之前喺海鮮檔揀完再燒，蝦肉結實而蝦頭有好多膏，點埋泰式酸辣汁食就最惹味。辣椒膏炒通菜: 菜好新鮮爽脆，用辣椒膏炒令味道剌激但唔會太辣。椰青: 又大又多水非常清甜，椰肉好厚食，既解渴又解熱。珍多冰: 材料豐富椰汁味濃郁，唔會太甜。整體環境一流，食物都唔錯，可以得閑約埋三五知己郊遊完去飯聚。…Read More

因為平時食煎、炸、辣嘢太多喇，所以每逢路過莊士頓道一帶，我都會特登去「三不賣」買返支葛菜水飲。 一支$25，一碗/杯$9。店只有一張小小吧枱，上面有兩個類似湯煲藏於枱裡，客人叫後就𢳂落碗內，可按個人喜好落鹽調味。 葛菜水有濃郁羅漢果味道，飲落味道似西洋菜湯，清熱止渴。…Read More

每年年初一都會去北角向長輩拜年，之後會搵地方食晚飯， 今年攪攪新意預先打電話去訂定枱食齋，店員告知只得六點鐘有枱剛合我們心意所以馬上確認。 大年初一約5:40到達，知客馬上寫卡安排入坐，並且不停叫嚷食一個鐘數次，又要落order又要等上餸，一個鐘食快餐都未必得啦，所以問清楚嗰位知客我地有無聽錯呢 ？！ 佢不停好勞氣咁話係得一個鐘仲指住張登記紙話七點、八點都有booking所以我地必須要七點離開，我唯有問佢點解訂位時無提出一般晚飯都係個半、兩個鐘，可解佢地一個鐘呢？ 點知佢更加勞氣咁叫我地趕快入坐，最多俾我地七點十五分離開，但就從無回答我嘅問題，新年流流唔想同佢 "開年"，只好馬上入坐 :( 。食齋當然唔少得叫碟齋滷味啦，一直都保持水準難怪每逢初一、十五、清明、重陽，地面外賣部都大排長龍，我家有時加餸都會選擇一盒齋滷味 :) 。 雖然豆腐類製成品都本身無味，但係佢地無論麵筋、腐皮、腐球都炆得非常入味，清楚食出咖喱香郁、酸甜醒胃、椰汁清香，叉燒惹味，每款都有不同質感。松子五柳黃魚賣相比真實還要吸引，有頭有尾五柳汁甜酸恰到好處，魚身用腐竹皮包住鮮腐竹、粉絲、雲耳絲、紅蘿蔔絲等等，材料豐富外脆內軟，越食越滋味。松子海苔炒飯係阿媽指定要叫，因為有佢喜愛嘅松子。 松子香口、海苔鮮味、菜粒清新、飯煙煙韌韌，整體味道配搭出式。但係以下四味都一般下次唔會再叫。咕咾猴頭菇唔知點解食到成口都係粉，可能沾乾粉過多。個咕咾汁淡而無味，表面炸過但一啲都唔脆，裡面食唔出係猴頭菇無任何味道:(。個名好應節記得有如意呢兩個字，大拿拿差不多八十蚊總有少少期望， 可惜只不過係炒蒿荀、雲耳、鮮百合、菇，味道一般份量唔多。羅漢齋係食常見嘅一味齋菜，但係炸過嘅豆腐非常硬身而啲竹笙仍保持 "原狀"，明顯兩者係未煮透。不過墊底菜心就翠綠爽甜。最後上枱係椰汁芋頭南瓜煲，煲係正常體積但裡面有啲水汪汪無椰汁香味，芋頭都夠粉但唔多，而南瓜份量仲少。其實唔難煮只要收乾啲水份，椰汁調味重啲就已經好好味。大家可能見到外面人頭湧湧有啲啲壓力，終於都喺一個鐘頭完成。…Read More

「辛苦搵來自在食」係我人生其中一個坐佑銘，亦會經常坐言起行 ， 出盡全力達到目標。 最近朋友介紹半島酒店裡面今佐日本料理個自助晚餐唔錯，所以即刻訂位一試。 自助晚餐逢星期五、六、日供應，今期主題係大板.京都，$668/成人 + $138可無限暢飲指定生啤、燒酎，喜歡"嗒"返兩杯嘅我倆當然唔會錯過無限暢飲啦。 自助餐包括: 1)任點指定軍艦卷、手卷，2)主菜一份，3) 自助冷盤、沙律、魚生、壽司、熱盤，4)甜品，5)雪糕，非常豐富。日本Subtory生啤 "The PREMIUM MALTS" 濃醇香順滑，而苦味點到即止，幾適合女生。服務員告之啤酒原桶剛新開所以包保新鮮。Iichiko Mugi Shochu 燒酎，用高酒精濃度燒酒溝流打水、果汁現時都幾流行，今次係用綠茶溝日本燒酒加冰，易入口有清新酒香茶香，而無 "芝華士溝道地"咁霸道。服務員見我倆飲得津津有味，建議我們回家可自己用不同日本燒酒溝綠茶、烏龍茶、果汁都一樣好味喎。餐牌上可任點三款軍艦、四款手卷。 軍艦有明太子沙律、海鮮沙律、八爪魚芥辣，呢三款喺連鎖迴轉壽司店都有供應唔算特別，所以每款叫咗一轉，不過食得出食材新鮮而唔係預先大量整定急凍貨色。 手卷有鰻魚、北寄貝、油甘魚柚子汁、三文魚葱，為怕肚子空間有限，所以每人只叫一款試吓。 鰻魚條烤得香幾肥美，而油甘魚加埋柚子造嘅醬汁好鮮味。餐廳面積唔算大，自助吧枱一列排於一邊檣身，陣容雖然無西式國際自助餐豐富但勝在食物用料上盛，必定能夠滿足愛好日式魚生、海鮮嘅朋友。 最入面係冷盤、魚生、沙律、壽司，中間係大板、京都美味熟食，近門口位置有多款甜品。 對於食量唔多嘅我可以專注食得精緻一啲呢 。冷盤有用溫室蕃茄、豆腐、三文魚子造嘅小碟。蕃茄厚肉多汁，豆腐充滿豆香，每款份量少少非常醒胃。魚生有多樣選擇，如三文魚、呑拿魚、帶子、甜蝦、魷魚、雪場蟹腳、海膽等等，全部都色澤光亮極為新鮮肥美。 愛吃海膽嘅我當然集中火力去吃個痛快啦，另外蟹腳都唔尤其加埋特製蟹醋食更加一流。壽司每款都好吸引，魚類新鮮壽司飯調味恰到好處，試過相中幾款都差不多八成滿。主菜有三款選擇，1) 大板吉列串配咖喱汁，2) 無花果舞茸大蝦天婦羅，3) 京都和牛sukiyaki，唔食牛嘅我當然選頭兩款啦。 吉列串有蝦、元貝、豬腩肉，表面吉列皮非常薄又均勻，食落無比鬆脆每一口都發出"嗦嗦聲"，從未食過炸得咁脆嘅吉，正呀。 入面嘅肉仍保存肉汁，而豬腩肉確實有驚喜，通常用以燒烤，但經吉列炸過又出奇無想像中肥膩。天婦羅有大虎蝦、舞茸、鮮無花最同時蔬，頗創新配搭。 天婦羅同樣炸得脆卜卜，大虎蝦爽口彈牙，最特別係天婦羅無花果，熱食感覺唔錯好軟腍又清甜，剛好中和油膩。雖然已有十成飽，但眼見半島出品嘅甜品又點可以錯過呢。 馬卡龍係時興甜點，呢度做得有水準，杏仁造嘅餅身夠晒鬆化，各款味道都好突出。 當然一定要試吓佢地出名嘅士多啤梨卷啦，聽講餅店部一出就好快賣晒，果然蛋糕蛋味香郁，忌廉甜滑，配酸甜士多啤梨令味道剛剛好。另外，好似拿坡倫嘅酥餅都好出式，酥皮見到一層層好密，鬆化得嚟又唔會一掂就散，吉士味道香甜。最後試埋香濃嘅抹茶、豆腐雪糕，為整頓精彩充滿大板、京都特色晚餐劃上完美句號。 可以用自助餐價錢享用超水準食物、味道、服務，非常物超所值。…Read More

America Restaurant美利堅係我屋企人喜歡大時大節食飯嘅聚腳地方，因為呢度充滿幾代人嘅回憶，因為呢度有籍民地情懷、異地色彩，因為呢度有實而不華嘅美食，因為呢度有熟悉嘅面孔、一枱一椅。記得細細個就跟著屋企人去美利堅食北京填鴨、童子雞、山東手撕雞等多不勝數嘅美食，從已故外婆口中得知原來我家長輩已經喺大概四十多年前幫趁美利堅，由公公婆婆、媽媽姨姨舅舅、我和表弟妹、到依家大家嘅小朋友，足足四代都有幸能到美利堅在不同時代吃著同一樣的味道。 聽聞以前英籍民地時候有好多外來軍艦停泊喺添馬艦，令到灣仔一帶都有水兵、外藉人士聚集，估計可能也因如此令賣京菜嘅酒樓都改咗個「洋名」 美利堅 American Restaurant，時至今日周不時會見到大批外籍人士光顧。 酒樓佈置擺設都與外國唐人街上中式餐廳相似；至於餐牌更加係中英對照。 食物菜式既保存傳統京菜特色，亦能照顧外籍人士喜好，煎炸款式頗多，宮保蝦球、京葱爆羊肉等都會用鐵板上， 店員會先放燒紅鐵板喺餐桌上，然後淋上宮保汁、京葱羊肉，頓時發出吱吱啫啫聲蒸氣冒出，客人都被此「表演」吸引、拍掌歡呼，非常熱鬧。 食物味道十年如一日，這令不少已移民嘅Funs每次回港必定去回味一返。 另外，大部份店員都係效力多年嘅老店員，每次見到他們都份外親切。難得海外家人回港渡歲，各人都舉腳讚成去老地方團年，難得大時大節除套餐外亦可散叫，由於團年套餐已包括大部份想叫嘅菜式，所以好快決定叫套餐！趁未上菜，可以食吓枱上面嘅泡菜、醃青瓜、花生，全部係自家醃製，非常醒胃。四喜大冷盤: 好大堆頭，賞心悅目。 有醉雞、醬蹄、燻素鵝、海哲。 每樣都好好味，尤其最愛嘅燻素鵝，腐皮充滿煙燻香味，裡面材料豐富又爽口清新。 至於醬蹄肥瘦適中，上面淋上特製蒜蓉醬汁非常惹味。鐵板宮爆蝦球: 聲、色、味俱存。鐵板燒紅有大大隻蝦球，上桌時淋上醬汁，因為蒸發而產生聲音; 鮮豔橙紅色酸甜味較重嘅宮保汁，唔太辣老幼咸宜; 雖然係急凍蝦球，但肉質唔錯既彈牙又有蝦味，表面薄薄炸粉索滿醬汁入晒味。芙蓉三鮮: 豪華版賽旁蟹，非常豐富有蝦、魚、瑤柱、鮑片、帶子等， 蛋白炒得好香滑，剛好包住所有材料，最啱小朋友食。發財好市金錢: 團年新春必備意頭菜式，上面有炆得入味蠔豉、旁邊圓淥淥金錢係自整蝦丸; 裡面有好多炸過嘅蒜子、索晒汁嘅發菜、豬脷，仲有生菜墊底。砂鍋雲呑燉雞: 大砂煲成個盤咁大，內有一整隻鮮雞，金華火腿片，十二粒大雲呑好似水餃咁大隻豬肉混有蝦粒，仲有小堂菜， 雞湯非常鮮甜，一煲足可分十五碗湯。烤北京填鴨: 填鴨係京菜主角，鴨好健美無過多肥膏但略嫌鴨胸位置緊緊熟帶粉紅色， 包填鴨用嘅薄餅皮做得出色，極之柔軟充滿麵粉香味，淨食都好好味。瑤柱扒豆苗: 瑤柱份量好多，啖啖都係瑤柱肉，豆苗脆綠嫩口。葱油餅: 由於係姨姨至愛，所以加叫一客共兩件。 外皮鬆化裡面葱粒頗多全部熟透多汁。四季平安餃子: 素餃子內有菜、粉絲、豆乾，全部㧻得幼細食落有汁，餃子皮搓得柔韌十足，加埋醋一齊食，一啲都唔漏。賀年合時甜品: 高力豆沙為晚飯作完美句號，蛋白外面炸得香口，入面軟滑包住香濃豆沙， 灑上沙糖更添甜美。…Read More

翡翠拉麵小籠包第一次見佢地嘅大名係喺新加坡，而第一試係喺當時嘅太古城店依家都已經轉咗名喇。 一直喜歡佢地系統化無論食物同服務都保持一致水準，去任何一間店都食到同一味道。酥炸小黃魚 - 小食之選，小黃魚肉質嫩滑條，除去兩旁小骨和中間脊骨即啖啖肉，魚表皮炸得鬆化連魚鰭同小骨都可以呑埋，皮炸過後把肉汁保存。 晒上炸蒜、熟蒜、葱粹增添惹味。小籠包 - 每枱必叫亦係佢地招牌菜，包皮夠薄兼有韌性表面乾身唔易整穿，內有充足湯汁而豬肉都算鮮味，配埋醋同薑絲一齊食更加好味。菜肉雲呑拉麵 - 拉麵亦都係佢地招牌，即場有師父人手拉所以麵非常有彈性爽身唔會黏牙，可自由選擇芫茜、葱，個人就喜歡全要，令上湯更加清香。 至於菜肉雲呑皮又薄又滑，餡料美味。炸菜肉抹叉子燒餅 - 炸菜同肉碎整體味道偏淡，叉子燒餅有啲中間未開晒，可能烘得唔透。 整體普通。杏仁豆腐 - 以前好多地方都有供應，但係依家比較少地方有得賣，所以一於叫嚟試吓。 所謂豆腐其實係用杏仁汁、奶造型布甸，切成小方粒白雪雪好似豆腐粒，再撈埋雜果粒一齊食。 味道唔錯係一味幾好嘅甜品。棗泥酥食 - 酥餅好鬆化上面芝麻非常香口，裡面棗蓉餡好香濃，食嘅時候小心燙嘴。打出名當唔易，要擴充業務到不同城市更加要做到食物和服務質素能夠保持穩定水準，可以見到翡翠集團確實花過好多工夫、心血去經營。…Read More

好多謝兩位至愛好友百忙中抽出中午時間同我慶祝生日， :) 感激，並且選擇我喜愛嘅西班牙菜。步出lift門已感到餐廳好有氣派，有兩個武士同小形噴水池；入到餐廳感覺好有西班牙氣氛，佈置擺設有當地色彩，如鬥牛用嘅旗。 佈局有啲似中環嘅Ole，近玻璃窗一邊餐棹如置身室外有充足陽光；用拱門般矮檣同玻璃間開另一邊作室內，頗有特色。午市有set lunch 相當抵食，全部從主要餐牌選擇，$148包括：餐包、汽水/果汁、前菜、主菜、餐茶、甜品，其他餐廳通常無餐前飲。 果汁有多款選擇，圖中係紅莓汁味道唔錯。餐包係熱辣辣嘅法包，外脆內軟有陣陣麵粉香味，可配牛油或Tapas鮮蕃茄蒜蓉醬，味道好夾。前菜有沙律、餐湯、冷熱小食，我哋叫咗：吞拿魚沙律、松露醬意粉、海鮮湯 （唔記得影相），雖然係前菜但係份量頗多。Fresh Tagliatelle with Truffle Sauce - 其實有一份正常Pasta咁多仲新鮮熱辣，鮮製扁身意粉又軟又有韌性，而忌廉汁夠晒滑身，松露醬味道突出同忌廉、雜茹好夾。Matinated Tuna with Dried Tomato - 呑拿魚新鮮無腥味，配以車厘茄、芝士、生菜、橄欖油，夾埋一齊食口感豐富清新，係一道開胃前菜。Roasted Suckling Pig in Segovia Sauce - 乳豬肉質嫩滑帶少少脂肪同肋骨，皮好薄燒到脆卜卜，醃得入味唔需要再落其他調味，伴有烚薯仔同蕃茄，味道、賣相同喺西班牙食過嘅不相伯仲，令人食指大動。Black Cod in Green Sauce - 煮法正統用大蜆同湯汁煮魚，魚肉無骨、油份高非常肥美肉滑，湯汁充滿白酒味，砵裡面仲有薯仔將蜆同魚嘅鮮甜充分吸收。Seafood Paella - 食西班牙菜不可決少，記得旅遊巴賽隆拿、馬德里時經常去食Paella，因為當地提供多款口味選擇和特別材料，而且去到西方可以「有米落肚」，確實賞心落事。 Fandango 同樣有差不多四款Paella供應，今次要咗常見嘅海鮮口味，點餐時要留意須時30分鐘。 賣相吸引顏色鮮豔，有大蝦、大蜆、青口喺飯面，飯吸索所有溫汁味道非常鮮味，剛剛煮熟有咬口，一鍋三個人分都食唔晒，足夠四位或以上分享。餐茶可選冷/熱飲品，檸檬茶同咖啡都唔錯。 至於甜品都有5款選擇。Caramel Custard - 味道一流，蛋布甸好滑有彈性，唔無過實或過稀，充滿蛋香。至於焦糖控制得怡到好處，無苦味夠濃身剛好同布甸瀜為一體，仲唔會太甜。Chocolate Cake with Orange Sherbet and Ginger Sauce - 以為平平無其但都有驚喜，深黑色朱古力蛋糕有好多氣孔較海綿蛋糕硬身，朱古力味唔算重無乜甜味；旁邊橙味雪吧反而係主角，雪吧好幼滑酸酸地剛好清一清味蕾，橙同朱古力簡直係perfect match互相提升味道，至於白色薑味醬汁唔似中國人嗰種重薑味，我仲以為係白色奶油添。Puff Pastry with Vanilla Ice-cream and Chocolate Sauce - 同樣製作認真，雲尼拿雪糕較軟身釀入巴夫裡面，有啲似巴夫連鎖店個吉士醬咁，巴夫酥皮鬆化應該係自家製，連埋上嘅濃郁朱古力醬一齊食非常滋味。整體從前菜到甜品都用心機、誠意去製作，午市套餐都以如此工力去烹調，晚市一定不能錯過，下次約埋班朋友再試過。…Read More