eat_eat_everyday's Profile

臨放工前，朋友send左個社交平台 post比我，雙皮奶雞蛋仔進駐中環。原來Airside本店好出名，雙皮奶同雞蛋仔我都鍾意食，即刻好有興趣，再睇下個地址，放工返屋企順路！路過去睇下都好。H Code地下向來都唔係好旺。重諗緊新開冇冇人會專程去，會唔會要排隊，點知…. 原來聽日先開張。老板話個漿啱啱打好，見我一場黎到，整一底比我！幸運的一天。佢一邊整，一邊介紹。佢獨創嘅雙皮奶雞蛋仔。用水牛奶整嘅餡，喺Airside好受歡迎。好多人特登過海去食，所以佢地黎左中環開分店。遲啲會有斯里蘭卡咖喱飯。想試就要開張後先有。講講下，好快就整好。賣相唔錯。粒粒顏色好均勻，時間控制得啱啱好。老板話要趁熱食。拎返屋企凍左，就要用氣炸鍋160度，唔記得左幾耐，因為我冇諗住返去先食。成粒食，脆得咬落去有聲，但唔會脆到硬，拿捏得好好。有蛋香，唔太甜。雖然叫雙皮奶，食落就好似燉鮮奶咁。熱，滑，有奶香。蛋真係有無窮嘅可能性，配呢個燉奶，好夾。口感，溫度，配搭，全部都做得好。不過最欣賞呢個雞蛋仔嘅係，每一粒都一樣，唔會喺邊嗰啲冇餡，過脆，等等。期待佢開張。又想多啲人可以食到呢個咁特別又高質嘅雞蛋仔，又唔想排隊，有啲矛盾。…Read More

有次同事叫外賣，喺上環送去中環，嗰盒10件壽司入面有兩件係核突到淨係食左舊飯。至於有咩問題，已經唔記得左。一直都冇興趣再試。直至今日，想搵個地方好快咁食個lunch。過哂lunch hour，諗住唔使等。嗌到120，禁飛已經係164。諗住放棄。點知一叫號碼就叫左10個，最後3分鐘就成功有位坐。第一次黎。原來條迴轉帶冇野。落完單就等。好蠢咁望住條帶，一路都冇。見到上面有幾碟野，好似膠咁，完全冇諗過係我點嘅野。望左一眼以為係display。好白痴咁等左一陣，見到隔離枱人地喺上面拎，我先好震驚咁拎左嗰4碟壽司落黎。見到啲完全冇光澤嘅魚，重係好難以置信係食得嘅。都係壽司黎嘅。完全冇靈魂。最好食係舊飯。乾，但又唔係柴。冇油香，但又有少少魚味。再叫多轉。今次識喺上面攞。成世人食過最唔好食嘅海膽。擦膠咁嘅質地，一啲汁都冇，但味道又食得落架喎。顏色咁死沉沉嘅吞拿魚蓉第一次見，但味道好正常。又唔可以話佢好難食，但真係唔想再食。8碟埋單$140幾。重有20分鐘埋單走人。唔怪得知，出到黎，又有10幾人等緊位……Read More

超過一個月前的一餐飯，終於有心機寫食評。相片放了那麼久還是得寫，因為真心值得推介。吃了三次午餐，雖然每次都點一樣的菜式，但水準一直都保持到，每次都很滿意。午餐相對晚餐超抵食，不過建立了信心，也是時候試試晚餐。店員捧著盤子，上面放了餐牌上每一道菜的食材，逐道菜介紹。晚餐有兩款。店員當然推介Full Experience。一場來到，也不妨一試，多4道菜。只有兩個主菜需要選擇。雖然那塊煮出來有手掌般大的花膠幾吸引，但大家都選了Amadai。決定好，就先吃熱呼呼的麵包。麵包是我第一次來，印象最深刻的一環。新鮮焗起，每次都是熱呼呼的，不用睇彩數。配上香氣十足的橄欖油和開胃的黑醋，頓時胃口大開。Amuse Bouche有足足4款，每一款都精緻又特別。這粒小球，咬下去爆出清新的汁，帶少少酒香。白露荀做的凍。清清地卻有濃濃的白露荀味，滑嘟嘟。另外兩款是炸雞皮和炸鵪鶉蛋。蛋炸得像個鳥巢，咬下去很鬆很脆，中間是流心蛋黃，控制得剛剛好，厲害。炸雞皮很乾脆，沒有想像的油膩，配上青咖喱醬，十分惹味。這時，才來到第一道菜。打開蓋，煙燻味撲鼻，香噴噴。而且，不只是造作，魚子醬和蒸蛋，吃下去真有煙燻味，充滿驚喜。帶鹹的魚子醬配清淡的蒸蛋，配搭一流。第二道菜是拖羅。切成粒的拖羅，香而不膩，配上清甜的海膽和蕃茄味啫喱。看上去很日式，吃下去卻很中式，應該是蕃茄啫喱的調味所致。我換了另一道菜，只試了一口，挺喜歡的。我不吃生，所以換成自家製的ricotta cheese。午餐也有這道菜，但我每次都選凍湯，所以還未試過。清清的奶香，口感厚實，跟多汁的橙和甜甜的紅菜頭都很夾。接著是鮟鱇魚肝。很精緻。碟子上帶酸的啫喱和果醬，魚肝吃起來一點都不會膩。連紫蘇小花都不放過，配起來香氣十足。接著是羊肚菌，驚喜繼續。上面放了一點點金箔，看起來帶點優雅。羊肚菌中釀了墨魚滑，吃起來有點咬口。下面是切成一條條的魷魚，比墨魚滑更有嚼勁。很喜歡充滿層次的口感，看得出配搭上花了心思。不得不提深啡色的汁，是牛仔肉炆出的汁，以濃郁的汁襯托菌香。來到二選一的主菜，甘鯛。下面是煮得頗甜的洋蔥做的醬和細細粒甜甜的洋蔥。鐵板燒做法的魚，把魚鱗燒到站起來，咬下去啖啖都咔嚓咔嚓響。魚煎得嫰滑，跟甜甜的洋蔥醬都幾夾。中場休息。來個紅菜頭雪葩。上面那條紙管般的裝飾，原來是蛋白糖，加點銀箔，貫徹精緻賣相的風格。清香的紅菜頭，加上切成丁的青蘋果和餅碎，連個中場休息的小甜點也毫不馬虎。飛騨牛，試了一口。表面肉味濃郁，中間軟嫩帶點油香。西班牙紅蝦，蝦肉嫩滑，蝦味濃郁。蝦頭很多膏，濃郁的味道在口裡維持了一會。午餐的紅蝦細細隻，沒那麼精緻，但個人覺得蝦的濃香不會被這隻大版比下去。所以這道又不算超驚喜，我會把重點放在旁道的米型意粉上。看似意大利飯，其實是冬蔭公味的米型意粉，帶點辣，很香很惹味。已經很飽了。幸好，沒有影響品嚐最後的栗子甜品。一點也不會死甜，栗子味很自然，帶點點酒香。配上雲尼嗱雪糕，無可挑剔。還有一人3款petit fours。中間那粒達摩，是柚子清酒啫喱糖，柚子和清酒的味都很突出，底部卻沾了點鹹鹹的糖，為味蕾帶來衝擊。Tiramisu那件是十分軟熟的糯米糍皮，包著中間的咖啡味蛋糕，也是很不錯。實在太飽太飽，也忘了最後那粒吃了甚麼了，只記得沒有失望。很久沒有吃得這麼盡興。…Read More

有次下雨，隨便點個外賣午餐，誤打誤撞吃了個回味無窮的沙茶麵。取外賣時，餐廳門口站滿了人，熱鬧非常。見它這麼多捧場客，一直記著要再來堂食試試其他菜式。終於，等到晚市再來。沒有午市般熱鬧，但入座率都有一半。餐牌選擇不算多。莆田也是福建菜，菜式更多更吸引。先點了幾個前菜，普普通通。點著菜，一分鐘就上菜。臘味雞卷，還好。有臘味香又不會太油膩。香醋拌蝦苗，濕濕的，吃到一半開始覺得偏鹹。鹹香酥炸黃花魚，表面乾身脆口，不過連中間的肉都乾了。姜蔥炒海蟶，跟圖片不符。色澤一點都不吸引，而且炒得很濕，鑊氣欠奉。蟶子有兩隻有沙，其他還好。其實都幾肥，只是烹調得太差。香煎蟶子蛋，這個好吃得多。蛋煎得幾香，中間還有少許蛋汁，外乾內濕，而且蟶子份量足，啖啖都有。青紅椒炒小腸，也是香氣欠奉。似乎炒功還有很大的改善空間。小海鮮燜軟豆腐，正正常常。高湯燜炒純米粉，超幼的米粉炒出來沒有黏在一起，不會太濕，都算可以。廈門沙茶麵，保持到上次的水準。又香又辣，麵條掛湯，開胃。高麗菜花肉燜飯，跟莆田那個釜飯相差甚遠。沒有吃到高麗菜，有些乾到硬的肉。味道正常。沒有預期中好吃。吃福建菜，還是喜歡莆田。那些姐姐的服務也比這裡的，熱情得多。…Read More

比個名吸引到。先有個九宮格。但唔係有9樣野，有一格係配雞串嘅蛋。有一格係明明可以任叫嘅生蠔。個飯最好味，有蠔香，重好食過啲蠔。燒鱔正常。天婦羅好差，個粉就厚，秋葵唔爽，濕濕想稔稔咁。生蠔冇味。冇甜味，又冇海水味。只有口感似蠔，純講味道食唔出。白桃烏龍茶水都冇，要叫野飲。不過$28咁大枝，而且有啲白桃香，都可以嘅。燒帆立貝燒到乾爭爭，好似食緊零食帆立貝乾咁。燒蠔算係有啲蠔味， 又未至於乾柴咁。得3樣食物㨂嘅放題，第一次見。然後呢3樣又唔係驚為天人，食完想再食咁好味。點完一轉就冇再加了。重有，燒蠔啲煙燻得好勁。總結：中伏。加一句，個九宮格嘅飯係ok嘅，可能啲釜飯褼日有驚喜。…Read More

見到啲相好靚。幾個月冇返公司，好耐冇一齊食晏，點知好失望。牛油海膽汁蟹肉扁意粉一開始還好，就係意粉煮得太腍。食食下發現下面浸左牛油。雖然係牛油海膽汁，但都唔使咁誇張。直情係溶左嘅牛油做湯底咁，又油又膩。日式蒸焗時令海鮮睇埋英文，係black cod同clams。既然係定左嘅，就唔係時令啦。賣相有啲噱頭，偏淡，鱈魚都幾滑幾香嘅。還可以啦。服務態度可以，但上菜好慢，上餐飲好慢，埋單都好慢。今時今日，最重要嘅衞生，就算唔錯，都幾乾淨。…Read More

上次食左抹茶牛乳大福，覺得幾好食，所以返黎試下午餐。服務好好。店員幾有禮貌。拎完外賣，返到去，首先飲啖matcha latte。冇茶味嘅。打過個蓋望下，呆左。從未見過咁嘅顏色嘅matcha latte。似蜜瓜味維他奶。當飲左杯奶。不過比$19 (lunch set加$15配飲品，超過$40嘅飲品要補錢) 飲杯奶，就真係一啲都唔抵。醬油意粉，味道有啲似上海粗炒。意粉唔al dente, 表面粉粉地咁。洋蔥好生。總之就唔好食啦。超失望。…Read More

去食lunch，變左包場。第五波爆到咁，佢開錯時候，有啲可惜。裝修幾靚，服務細心。店員見我張紙巾用左，拎多張比我。餐牌選擇唔多，價錢都少少貴，不過味道唔錯同幾好坐。田螺個殼食得，脆脆啲，幾特別。入面有薯蓉但可以再多啲。牛油味偏重，幸好香草醬都夠重。田螺滑溜溜，口感一般。整體都可以。洋蔥湯好大碗。芝士多士好香。好多洋蔥，甜甜的，好香好濃。Lobster pasta本來不大期望，估唔到有驚喜。意粉彈牙，個汁幾香又唔會太重，龍蝦清甜。Classic benedict 蛋好靚。麵又烘得鬆脆軟熟。冇乜調味，主要係個hollandaise sauce同煙肉調味。沙律好新鮮。外賣兩粒Canele。$20一粒咋！細粒啲嘅。脆中有少少韌，可能有少少濕氣。中間都幾靚，濕潤又有雲尼拿香。唔算最好食，但平平地過下癮，都係個唔錯嘅選擇真心希望佢頂得住個疫情。…Read More

突然好想食Canele，於是喺外賣平台叫外賣。幅圖有3粒，$52. 以為好抵，叫左兩份。送到黎，原來得兩粒。比幅圖誤導都唔緊要，最緊要好食。 拎上手係凍的，似係冰櫃拎出黎。見到個形狀咁唔靚，成個比薩斜塔咁，都冇乜期望。於是拎去焗。平時有喺IG shop買開，通常都有個instruction。跟返都係180度焗15分鐘。焗完出去，稔到好似麵包布丁咁。咬落去一pat野，都算啦，中間咩事？啲蜂巢呢？我以為自己焗錯左，於是食未焗嗰粒。起碼摸落去唔係軟稔稔的。重衰。原來個外層只是冰左所以硬，唔係脆。食落去一陣雪藏味，難食到吐返出黎。中間都是成舊野合為一體，一個窿都見唔到，都唔好講咩蜂巢。不過就都有啲雲尼拿味嘅。好想打去問下呢兩粒野其實喺冰櫃放左幾耐，同埋佢地係咪有獨門秘笈去焗返再serve比人。呢粒係我食過最貴嘅canele, 但每粒咬左一半就掉左。…Read More

好一段時間沒有去cafe。通常食物都普普通通，只為有個價錢相宜的地方傾下計。表妹推介這間cafe的熱飲有卡通人物，賣相可愛。一來到，店員先在門口替我們消毒雙手和衣服，前前後後噴一次，令食客吃得放心。Smoked salmon and mentaiko risotto意大利飯用了明太子，帶微辣，有新鮮感。飯是剛熟的，沒有正宗的微生（我發現很多人都接受不了飯中心是生的），但未至於稔，都算不錯。煙三文魚是正常貨色。Asari Clams Linguine扁意粉煮得al dente。加了一條條菜和洋蔥，混左一起的口感有多重層次。蜆吃不到酒味，正正常常，不算清甜，用料一分錢一分貨，可以接受。沒有沙，基本功都做到。Grapefruit wings雞翼炸得一流，又脆又香。柚子蜜都幾襯。Sesame latte實物跟圖片一樣，一樣好看。芝麻和奶的比例幾好。雖然偏奶，但飲到最後兩啖，把沉底的芝麻拌勻再喝，是最正的兩啖。Hojicha latte比起芝麻，更喜歡焙茶。茶味很濃。食物算是不錯，服務態度有禮。雖然細細間店，但座位不會很逼。…Read More

早幾日路過見到餐牌幾吸引，冇訂枱walk in冇位。今日試下上網book，有位喎。就係比呢個餐牌吸引到，lunch set可以有飯有拉麵。等左一陣，黎左碗好大嘅飯。朋友個餐未黎，諗住等埋一齊食，於是冇食住。點知幾分鐘後，店員黎收返碗飯，話黎錯左。但我已經對住碗飯，傾左幾分鐘計…. 好似有啲唔衞生。佢收左碗飯後一陣，黎左碗拉麵。柚子鹽味，可以話淡，亦可以話清，都可以接受。不過麵完全唔掛湯，雖然麵質彈牙，唔錯。唔係平時嘅拉麵，有少少嚡，似全麥意粉嘅口感。終於影到一張成個餐嘅相。但個飯嘅賣相實在唔討好。Premium Seafood Don係最貴嗰個，但望住呎個樣真係冇野好講。得嗰幾粒魚生，有三文魚，玉子，鰻魚同吞拿魚。咁少魚生，好寒酸。重賈係普通白飯，冇醋，好唔開胃。失望到爆。服務都幾差。隔離係出食物嘅位。店員撞跌左塊膠板，個角撞左落朋友個頭到，但佢只係o左一聲，sorry都冇句，都幾過份。…Read More

食lunch.等左一個鐘主菜都未黎。餐廳一半都未坐滿，counter企左5個廚煮緊野，點解可以咁耐。終於都等到，得一份。都可以嘅。意粉口感唔錯，冇汁但有啖啖海水嘅鮮味。再等多15分鐘，其他終於黎。淨係影左一個。個蟹肉意粉賣相唔討好，但食落還好。呢個pesto唔係al dente咁簡單，係硬到痴牙。本來諗住算啦照食，但三個人都食唔落，於是向店員反映。店員叫左個廚黎，佢話換一隻麵比我地，會快啲。真係幾快，但個樣係咁嘅。自問都食過唔少意粉，咁嘅樣嘅真係未見過。點解可以濕到咁。雖然個意粉係正常，但Pesto完全冇調味，只有好重嘅basil, 重到有啲草青味。食左一半，都係放棄了。等到無聊期間，店員免費refill哂。我就叫左杯mocktail. 正常，冇乜特手。差得誇張。以後唔會再黎。…Read More

望著街景，吃下午茶。3:00入座，3:45截單，時間剛好。這個時間，只有tapas供應。用手機可以看餐牌，每款食物也附有相片。炸薯仔又脆又香口。外脆之餘，也吃到中間鬆又腍的薯仔。Croquettes，炸得夠脆。放涼後仍然脆。帶微微的魚味，味道不錯。蕃茄麵包幾清新。包的質素正正常常。和牛做的肉丸。蕃茄醬味道不錯， 夠濃又不會太重。肉丸腍腍的，也夠味，略嫌乾身。簡單的美味。用電話埋單付款，就可以起身離開，很方便。…Read More

冇睇食評，見到啲相幾靚，所以黎試下。好遠，由中環搭的士去，加埋塞車，搞左差唔多半個鐘。12:30黎到，冇開門。明明訂左枱，於是敲門。突然開左門有個女士，佢話等一陣。等左一分鐘，佢再開門，戴左頂帽。坐低之後，原來佢就係師傅。只有omakase, 兩張一模一樣嘅餐牌，只有價錢唔同。師傅話一個有海膽，一個冇海膽。㨂完佢就離開左去準備。有性格嘅廚師可能都係咁，唔鍾意應酬，唔吹水。普通嘅沙律。茶碗蒸幾好食喎。好多料。跟住就開始食壽司。普通。最怪係要問師傅係咩壽司，食咁多次omakase，從未試過。帆立貝壽司上面一pat XO醬，蓋過哂帆立貝嘅味，配搭古怪。唯一特別係湯葉壽司。簡單但唔錯。$200都勉強過得去。…Read More

點了午餐中的壽司拼盤，其他有刺身拼盤和各種丼。前菜普普通通。蛋蒸得幾滑。沒想過，$400幾蚊的壽司是這個樣子的。賣相毫不吸引。零特色，零驚喜，也不是那種沉實而有實力的。海膽細細的，但放入口又不覺得精緻細膩。偏乾，不是甜，不是鮮，不知道走甚麼路線。甜品是黑糖厥餅。雖然賣相不討好，但總算正常，算是全部食物入面，勉強符合預期。有黑糖味卻又不太甜。實在太失望。埋單每位$481。這個價錢我去千両應該會開心滿足十倍。…Read More