AR LAU's Profile

上星期五上午突然間喺社交平台見到一個KOL食港式豉油西餐，抽起條筋勁想食，於是去咗附近嘅經典老字號 - 第尾（有人話本身佢哋招牌係寫「茅屋」）。一去到見到個樓梯燈牌已經好有 feel, 入到間鋪完全好似去咗九十年代初嘅港式西餐廳，感覺返晒嚟。order 咗個鐵板牛扒午餐 set。紅湯（羅宋湯）好飲，可惜午餐冇牛油+餐包，同埋量有啲少。個牛扒完全有驚喜，七成熟，肉質剛好仍然有咬口又有牛味，冇用食粉「乸」到淋pat pat 同冇晒味，黑椒汁夠晒味，加咗5蚊加白飯撈汁，大滿足！杯黑咖啡完全可以，都抵讚！咁嘅氣氛，咁嘅價錢，咁嘅食物質素，咁嘅服務態度…… 我諗香港真係所剩無幾，要支持！！！…Read More

午餐時候去劉森記，12點已經坐滿九成人，生意幾好。Order咗薑蔥牛肉雲吞蝦子撈麵同埋羅漢果水，撈麵其實質量還好，蝦子撈麵好好食，好多蝦子，撈麵嘅味道好粥，但係又唔油，雲吞都幾足料蝦夠爽口，，唯獨牛肉真係用梳打粉「乸」得太過分，完全冇晒應有嘅質感同埋味道，希望真係可以改善。羅漢果水雖然淡淡地，但係感覺幾滋潤解渴，跟餐加$8幾抵。另外，辣椒醃蘿蔔仍然免費任食，喺香港其實已經好難得。老字號始終都係老字號，點都係有保證嘅一餐。…Read More

自己一個人食晚飯，想飲少少酒，又想食日本嘢，本身想去元氣，但係因為裝修，所以去咗對面嘅杉玉。一次兩個人其實唔使等位。一坐低就叫咗清酒，茶豆，茶碗蒸，淮山拌吞拿魚，海上鮮島。除咗茶豆煮過頭其他都好食。之後，再encore，叫咗炙燒海膽牛油鮟鱇魚乾壽司同埋池魚骨脆餅送酒，次魚骨好大碗，同清酒好夾，我嘗試要求攞啲蛋黃醬一齊食，可惜嗌兩次都冇，有啲失望。總括嚟講，係一間可以久不久坐低食吓飯嘅港式日本居酒屋。…Read More

其實已經好少食大排檔feel嘅小炒晚餐，我去完沙灘同朋友一齊嚟到深水埗，竟然有意想不到嘅收穫。話說我哋星期六6:30到達，餐廳已經坐到九成門，都知道應該有信心保證。一開始即刻叫咗杏汁豬肺湯，湯好飲湯渣好食。酸菜魚係招牌菜，自然不負眾望。最令人喜出望外嘅係小炒王，炒得夠乾身，上邊嘅炸魚仔同腰果好脆好香，火候夠又炒得啱啱好韭菜好嫩，必叫！麻辣雞煲一般OK，送飯都唔錯。梅菜炒牛肉菜心，可能因為用咗火鍋肥牛，而唔係新鮮牛肉，同埋菜心唔係一齊炒，食落去麻麻哋，絕對有改善空間。杯超級檸檬茶好似魚缸咁大杯，叫咗佢唔使再飲其他嘢，絕對抵飲。總括而言，係好食，不過記住要訂位。…Read More

已經幫襯了Scarlett超過四五年，水準一直都保持得不錯，通常一般去飲酒食一些cold cut and cheese, 就已經很滿足。今日去食brunch，burrata 仍然好味，salmon tartare 麻麻哋調味唔夠，duck leg 好嫩滑好好味，裏面配菜味道剛剛好。甜品應該係最失望嘅，以前嘅chocolate fondant 朱古力味很濃，而家變得冇乜朱古力味有啲死甜。mille feuille 賣相唔錯，但係裏面嘅cream質地好粉味道唔香唔夠滑。我一直都好鍾意Scarlett，希望以上意見可以令佢哋有所改善。…Read More

灣仔係香港其中一個好餐廳嘅聚集地，價錢一向都中上或以上，好少見到呢種中低價而環境又唔錯嘅餐廳喺呢區。以 pastry 來講，呢度算多選擇，無論甜同鹹都好多款式，而且賣相都好吸引。我試咗 pastrami sandwich 同 egg tart，材料新鮮度同味道都唔錯，唯一係加熱唔夠，sourdough 表面溫度唔夠，亦唔夠鬆脆。下次嚟，一定會試吓 salad 同埋 scone。如果行行吓街，想坐低食件 pastry 同埋飲杯嘢，呢度實在係一個好唔錯嘅選擇。…Read More

今日諗住去又一城坐低食一個輕鬆啲嘅午餐，去到Amaroni‘s，見到個餐牌都好似OK，就入去坐低。叫咗煎盲曹魚，第一碟嚟到嘅時候，我以為我同個廚師有仇，成碟食物亂糟糟好似發脾氣咁。個侍應生都知道賴嘢，我望一望佢，佢已經知道要拎返去廚房換。第二碟嚟到嘅時候，雖然個樣好啲，但係都係好似隔夜，然後攞入微波爐叮翻熱咁。個 Tiramisu 都唔好食，完全同以前差十萬八千里。其實做餐廳做到咁，又冇誠意，啲嘢又唔好食，而家香港租金咁貴，建議執咗佢。…Read More

香港好難得仍然有咁真材實料嘅餐廳，點都會支持。話說同朋友去佐敦附近睇戲，好想食一餐淨蛋白質冇澱粉質嘅晚飯，於是喺OpenRice搵咗一輪，見到呢間有石燒網燒幾得意，所以Book嚟試吓。一坐低，服務人員態度好好，雖然餐牌選擇唔多，但係鍾意食牛肉嘅我哋，好快就揀咗封門柳同埋牛柳，嚟到嘅時候有啲震撼，因為舊肉真係好大，對於比較鍾意食 rare 嘅我絕對夠生，加埋沙律同白飯，就算幾大食都一定夠。唯一俾佢哋嘅意見係，調味料可以有多啲選擇。…Read More

主要係多likes, 同埋俾佢哋嘅咁多嘅湯底吸引去試，而且仲可以一人一鍋。我嘅芫荽湯底還好，我朋友嘅花雕湯底係冇味，同隔離位嘅陌生人傾咗吓計，佢都話佢嘅椰子湯底同女朋友嘅花雕湯底一樣味，就係「冇味」。火鍋料非常麻麻，啲牛頸脊好普通嘅品質，收$298得咁嘅肉質可以算係好失望。出去攞嘅丸類款式還好，不過都係冇乜特別。可以讚嘅位係蔬菜好新鮮，羽衣甘藍好嫩。同埋，雪糕多款式加好味！飲品有暖櫃已經係最大驚喜！去打邊爐，但係讚嘅都唔係主菜，大家要考慮吓！咁多人like, 好想知究竟 like 啲乜嘢？…Read More

一向好鍾意飲豆漿，由屋企行去河畔花園都係十五分鐘左右，所以去試佢哋嘅芝麻豆漿同埋粢飯。黑白芝麻濃豆漿，真係好濃郁，好重芝麻味亦都好重豆味，好似飲糊仔，我幾鍾意，但未必個個可以接受咁厚身嘅質地。粢飯不過不失，糯米煮得有啲太淋唔係粒粒分明，咬落去好「立」口，油炸鬼夠脆，肉鬆同菜脯有啲太多，所以感覺有啲乾，分量幾大，絕對可以當一餐飯，夠飽。整體感覺可以，會想試吓佢哋其他嘅豆製甜品，應該唔會差。有心同有心機嘅小店，值得支持。…Read More

睇住啲食評同埋like數，所以去荃灣買餃子，順道先揀去呢間米線試吓，失望到不得之了。所謂每日限量供應嘅腩肉，似湯渣又唔入味，完全唔明點解咁樣都係特別推介。米線煮得好淋，完全冇咬口。通菜淥熟過頭，又係淋。豬耳叫做可以，不過冇乜味道。叫咗中辣嘅酸辣湯底，又唔酸又唔辣，冇味道。唯一比較可取，可能係個份量，真心好大碗，正常女仔一定食剩，建議衝量一下食量先 order。我真係想問吓，點解會有咁多人like呢間米線同埋點寫得出咁多好評。…Read More

自己一向去開附近嘅餃子老舖，今日終於有機會試新嘢！成日都覺得喺太子嚟講呢間舖頭真係太多人，所以冇心機排隊。點知今日經過終於得三個人喺門口等，於是決定等下入去試一試。點左芫荽鮮肉餃同埋馬蹄薺菜鮮肉餃，兩種餃子都好好食用料新鮮，唯一可以挑剔嘅係餃子皮唔夠煙韌，個椰子海帶雞湯豬骨底夠味濃郁好飲（差啲嗌多碗淨湯）。調味料都係基本嘢，辣菜脯一般，應該係買返嚟唔係自己整。食咗流心皮蛋作為小食，因為上面撒咗太多砂糖，太甜，所以覺得麻麻地。…Read More