Joycee's Profile

約咗朋友喺長沙灣等，朋友見到呢間餐廳幾得意就幫手攞埋位，呢間朱敏記我之前食過土瓜灣分店，印象中佢個胡椒豬肚湯係幾足料，所以都想試吓呢間新開嘅分店。weekday 6pm啱啱開始晚市，其本上人流唔多，侍應都係一貫嘅服務態度，好多嘢都要問兩三個先有人應。蒜蓉蒸蠔仔：賣相先扣一份，又浸滿油咁，個菜式嘅presentation真係要搞搞佢，啲蠔仔好細粒，基本上幾啖下肚就冇晒啲蠔仔，而且因為落得太多蒜蓉嘅關係，成碟嘢只有蒜頭味，完全蓋過蠔仔本身僅有嘅鮮甜味道，可以話係本末倒置，調味掩蓋咗食物本身嘅味道蒜蓉蒸吊桶：俾足8件排到靚靚都好有心意，但啲吊桶好靭，同埋即使落咗蒜蓉都掩蓋唔到吊筒嗰陣腥味豆豉鯪魚油麥菜：最後叫咗個油麥菜，呢度菜理應係家常小炒，似最穩陣嘅菜式，但唔知係落鹽定其他調味料重手，我覺得鹹得滯，而且油膩感重，食咗3份1到就要放棄就係啱啱先上返OpenRice諗住打個食評，點知原來已經係負評如潮，早知睇咗OpenRice先，叫我朋友即刻轉餐廳，唔使嘥咗個胃…Read More

喺中環快手食個lunch訂咗呢間嘢，開頭見個名都估佢係喺秘魯日本餐廳咁嘅proposition。叫咗個udon de pollo saltado (即係雞胸肉烏冬)同埋個chicharron de pescado (即係炸魚)，個烏冬直頭係「大x代」嘅質素，雞胸肉(絲)得可憐嘅3/4條，同埋….好咸，千祈唔好中伏！至於個炸魚用盲鰽嘅，炸漿處理得好，好輕身用嘅香料都幾特別，可惜個魚好鞋好似急凍咗好耐食落好「漿口」。Btw，冷氣好凍，啲梳化唔好坐會keep住向下跣，好似我咁quick lunch 就得，諗住約朋友吹下水嘅呢個環境未必適合。…Read More

路過土瓜灣站睇吓附近有咩嘢食，見到家樂冰廳喺度開咗分店，心諗正，之前係荃灣家樂冰廳嘅忠實fans，見依家唔使排隊就入去食下。夜晚7點嚟到，餐牌上面五成嘅嘢都冇晒，叫乜冇乜，諗住都仲可以食到佢signature嘅巨型火腿奄列，嚟到一切開舊奄列，心諗：「火腿呢？」再切開第二邊睇，見到幾條可憐嘅火腿喺入面，唔係呀嘛，俾$35食一堆熟到乾炒蛋，咁我做乜要特登叫呢個奄列唧？其他嘢食都係好普通茶記感覺，叫咗個滷水雞翼又咸又乾，$100 per head真心好唔抵，仲要啲職員同附近餐廳嘅員工係咁影相，搞到我哋食到好尷尬….如果開分店又管理唔到個質素嘅話，真係寧願唔好開分店，下次都係去返荃灣算。…Read More

限時入坐計60分鐘，座位有啲迫同隔離位好近，出入都要打側身，放咗兩碟嘢加兩杯咖啡已經冇位，去到45分鐘，食到8成已經趕住收嘢再俾埋張單，真係有啲趕。Heysonuts Breakfast ($129): 煙肉好乾、炒蛋太實凈、Portobello細舊得可憐，最好食係個沙律菜，用咗柚子醋好醒胃。以$129呢個價錢嚟講，可以有更好嘅選擇。Caramel Banana Waffle ($82): 賣相好得，個waffle焗得夠脆，不過焦糖好重手，有啲「漏」。Americano ($35): 正常、冇得特色，似mc cafe質素。…Read More

Weekend出去太子訂蛋糕行咗半日街，成日除咗早餐就未食過嘢，咁啱就搵到間任飲任食嘅火鍋店，啱曬我呢個邊爐狂熱份子！平時任飲任食嘅餐廳俾我嘅感覺好雜亂無章，但係一嚟到餐廳，wa! 裝修好靚、好整齊同埋... 感覺好乾淨！主要係海鮮火鍋同埋藥膳火鍋任食揀，包咗指定湯底同指定食物，之後再加嘢食就可以係個tablet度點。研究完一輪之後，好似藥膳火鍋嘅湯底正啲，所以就揀咗呢個package，藥膳火鍋有三種湯底揀，花膠螺頭、韓式、姫蟲茸，驟眼睇花膠螺頭藥膳雞鍋好似好補身，所以就揀咗呢個火鍋湯底用一個好巨型兩層嘅木桶裝住，話說個桶係用杉木做，內膽嗰個木桶有幾個窿，底下放左幾粒熱石，個店員話咁樣嘅設計可以過濾啲湯底，啲湯可以清啲喎，雖然唔係好明個原理，但係個湯底真心好足料，有原隻雞同埋好多藥材(杞子、紅棗、人蔘...)係入面，我哋首先試咗個湯(真係舀啲喺個窿度流出嚟嘅湯)，超級清甜同埋好滑，夠晒滋陰養顏，藥材味唔會喧賓奪主，真心正！醬料唔算多選擇，不過有齊我鍾意嘅：去到指定餐點，有12樣嘢，每樣細細舊，可以咩都試啲，最鍾意係佢啲手工餃子，特別係芫荽餃，如果有多幾隻就好嗱！另外一個指定餐點就係三揀一嘅肉類，揀咗手切安格斯牛頸脊，口感腍滑、雪花細緻，而且牛肉香味好突出！之後再encore左即炸響鈴，又大件又脆好鍾意佢全部人都細細份，唔使一款食物就質爆個肚最後加個出前一丁，有樣好貼心嘅嘢，就係俾埋個「撈」俾我哋，等我哋整個面嘅時候唔使散晒，正！…Read More

難得假要清可以take個break，俾個原因去揀間好嘢食餐靚牛先！記得尖東有呢間專食日本和牛嘅，環境比其他燒肉店舒服，價錢又幾合理，對於好似我呢種嗜牛一族真係好難抗拒餐牌預先準備好就嘅燒肉醬汁、檸檬同鹽基本上兩個人點4-5款燒肉加個飯都好足夠(P.S.個飯係好有米香，食得落一定要order)和牛上牛扒肉 (7.5/10)由淡味開始食到濃味，先試上牛扒肉，色澤好靚，食落都幾juicy，每面燒10秒到就好即刻食嗱和牛牛扒肉 (8.5/10)令人又愛又恨嘅baby pink和牛扒肉，油花分佈好完美！肉質細嫩、入口即溶！極邪惡和牛肉眼 (9/10)個人最喜歡呢款牛，原塊加厚切嘅牛肉眼都幾大件頭，牛味比之前兩款濃郁，肉汁好香甜，帶輕輕嘅牛奶香味，有驚喜！為咗唔好影響味蕾，今次只係飲Perrier😍😍前後食咗四款肉+沙律+日本飯+啤酒，埋單計埋每人唔駛$800，食到靚和牛加埋咁正嘅環境同氣氛，足矣！…Read More

Weekend返青衣老家，順手去青衣城B牌子舖頭買啲衫，咁啱落電梯走嗰陣見到1樓開咗間勁靚嘅新餐廳，主打韓式放題，好似好抵食，就決定食埋先返屋企先！呢間餐廳嘅玩法係一個價錢包晒啲基本食物，身為窮等人家，雖然見點餐紙唔駛額外付費嘅食物唔算多，都係揀咗最basic嗰隻先。火煱湯底呢，我哋二人就可以揀一個鍋，人蔘雞同部隊鍋二揀一。見隔離幾枱都食人蔘雞，羊群心態...照跟！好快就上咗個鍋，嘩，遠處已經聞到超濃嘅藥膳同人蔘香味，仲有原隻釀入咗糯米嘅雞，都好重本下最緊要係湯底好清，唔會因為咁大隻雞喺度搞到勁多油。未開始火鍋，試咗一啖，好正！去到出面夾嘢食嘅section，先知仲有好多嘢食可以任夾，可以睇下個盛況由於po相數量有限制，用文字表達- 食物分咗幾個主要區域：火煱配料區 (蔬菜、瓜類、年糕等)熟食區 (韓式雞翼、海鮮煎餅、炸物、湯等）石鍋飯區 (基本上石鍋飯有嘅配料都有齊晒，仲有埋雜錦海鮮同三款煮好咗嘅燒肉)部隊錯鍋區(好多丸、腸仔、餃子、魷魚、蜆、海帶等)甜品 (朱古力fondue、棉花糖機、幾款jar dessert、生果、仙草、芋圓等)兩大至愛火鍋配料：羽衣甘藍好新鮮，用嚟恰下恰下都keep到好脆；而豆腐卜食落好有豆味，感覺唔油膩。好貼心嘅湯水，夠足料、唔似落味精，可以潤一潤(平時冇乜湯水落肚，飲足三碗!)全場最熱氣都應該係呢個，不過新鮮炸出嚟嗰陣真係好好食，個粉又夠薄，不過放一陣就好快淋㗎啦另外仲有勁多醬汁同配料，單單for炸雞嘅醬汁已經有六款，個人尤其喜愛韓式士多啤梨辣醬，甜甜地加士多啤梨嘅香味；柚子醬係second favourite，清香甘甜，配炸雞一流！溫泉蛋時間掌握得好好，好鍾意除咗個黃之外仲有少少蛋白都仲係流心，就咁打落個碗，落兩滴豉油，sh一聲就呑落肚去到甜品時間，自己拎咗個tiramisu再加幾粒藍莓同士多啤梨，個tiramisu層次都幾豐富，唔會勁甜，帶少少espresso嘅甘澀，如果啲酒味就仲正以呢個價錢嚟講，環境又好，又多嘢食揀，都幾抵玩…Read More

高鐵開幕對我嚟講冇乜感覺，不過迎來嘅好消息，就係開咗好多食肆，其中包括咗添好運喺高鐵站行去添好運，要經過一條專用電梯，一上就係reception。星期六晚巿以為會超多人等位，但基本上攞飛等5分鐘到就有位。餐廳佔地都幾大，食客以本地人為主。點餐紙，同其他分店一樣，一眼睇曬，款式比其他分店少(例如尖椒、春卷都冇)價錢方面，可能位置問題，價錢比其他分店貴一至兩成酥皮焗叉燒包：添好運嘅焗叉燒包真係特別好食，每次嚟都一定叫呢個「鎮店之寶」，外層麵包我皮又薄又鬆脆，叉燒餡好飽滿，最緊要係新鮮整好，仲係熱辣辣陳皮牛肉球：(要咗加量喼汁所以睇落好深色)牛肉球食落質感好軟熟，帶一點點陳皮同香茅嘅清香蜜味叉燒腸：正，好重芫荽香味，腸粉皮夠薄，不過有點過咗火，少咗滑溜嘅質感。家鄉咸水角：一上枱就知出曬事，見到隻碟有好多灰黑色嘅水滴！！！啲水點咁明顯，點解上菜嗰位睇唔到嘅食嗰陣個心都仲係有啲唔安樂，反正味道唔太特別，外皮有點厚，餡料幾新鮮但份量偏少，食一啖就放棄了。埋單兩位$123，以食物質素嚟講，雖然比其他分店貴咗啲，但價錢都仲係幾親民，不過衛生就一定要改善啦！…Read More

放工多數喺屋企附近搵嘢食，行到吳松街目光所及，見到新開咗間Plato，望咗兩下menu咁啱有張二人枱埋單走人，既然唔駛等，晚餐就呢度啦！主餐牌套餐餐牌俾老細chur足全日係肚餓啲，諗咗陣都係想食得滿足啲，叫兩個重澱粉質set dinner再加埋沙律。燒牛肉凱撒沙律：羅馬生菜夠新鮮爽甜，咬落脆脆的，而牛肉唔會好乾身，加分。鮮蘆筍拿破崙天使麵：平時比較少食天使麵，因為天使麵麵條較細，稍有不慎就會煮到好「淋」，所以都幾巧考廚師功夫。好彩呢個天使麵煮到啱啱好，夠Al dente，值得一讚！另外醬汁濃郁之餘又唔會搶去蘆筍嘅清甜，所以呢個天使麵幾值得encore。黑松露野菌意大利飯：遠遠已經聞到黑松露嘅香味，食落更非常之濃郁，意大利飯軟硬度適中、粒粒分明，好有咬口。Tiramisu：去到最後貪心又叫埋個跟餐甜品，有紐約芝士蛋糕、藍莓芝士蛋糕同Tiramisu揀。諗左一陣，心大心細都係揀Tiramisu，唔係好甜好漏嗰隻，有淡淡咖啡味，兩個人share啱啱夠，加$28蚊又制得過。叫咁多嘢兩個人埋單都係四百零蚊，其實呢間分店位置幾好，近佐敦站同柯士甸站，食物質素又唔錯，約飯局一流！…Read More

尖沙咀開咗好多新餐廳，見近排有啲時間就周圍去下，今次試寶勒巷開咗唔夠一年嘅日本餐廳先！預早訂咗枱，店員留咗卡位俾我哋，認真幾闊落👍🏼餐牌日本粟米先嚟嘅前菜，之前都食過北海道白粟米，不過係烚過嘅，今次生食(都係第一次)，原來出奇地清甜！白蝦天婦羅估唔到咁細隻嘅白蝦炸完都唔覺乾身，好適合佐酒！刺身帶子很結實，味道鮮甜；牡丹蝦肉質爽甜，啖啖肉！幾款刺身入面個人嚟講最喜愛石垣鯛，香港好少地方有得食，肉質緊實、爽口，魚味起濃。日本岩蠔岩蠔肉質飽滿，味道較平時食開嘅生蠔濃厚，帶一點點海水味，配柚子、青檸、蔥花同醋真係一流喜之次外層薄薄嘅炸粉，雖然係將喜之次作天婦羅，但仍然肉質嫩滑細膩，保留很多水份，唔錯。魚湯稻庭烏冬麵質很滑溜又夠彈牙，魚湯極之濃厚，有點牛奶味，非常出色最後以甜品作結，埋單大概八百蚊一個人，以呢個質素，非常抵食！…Read More

休息咗一段時間，慶祝返新工！喺Vibes飲杯quick drink之後就去隔離嘅極尚大喜屋食8:45，早咗到，喺門口排一陣隊等入坐，店員每位都派定一叠點餐紙，等大家一埋位就可以即刻落單😲埋枱落單後5分鐘到，食物就陸續嚟到面前，好嘢開餐！爭取時間排住隊落單：今次好好彩有得坐卡位：有得飲酒，不過我冇試：呢度竟然有得飲解茶同果汁先生：首先嚟到嘅係海膽軍艦，以為只係會喺壽司飯放一塊仔海膽，原來都幾足料(如圖)，色水金金黃黃，質感軟滑，食落唔會腥唔會嗆喉，好有濃郁嘅海水味，值得一讚係食嗰陣紫菜仲係好脆嘅！之後嚟嘅係刺身，今次點左松葉蟹腳、三文魚、油甘魚、帶子、馬刀貝同赤貝，全部都好新鮮！！！最好食係油甘魚，師傅俾咗腩位我哋，油脂豐富又夠肥美，好好味😍燒物揀咗味醂魚乾，好香脆魚味又濃，好啱送酒，可惜唔係星期五，唔敢飲酒😅甜品有蜜瓜雪條、Haagen Dazs雪糕同Movenpick揀，幾肥都要食埋佢吖！Anyway，今次已經食咗我成個二月嘅Quota，嚟緊要努力減磅啦！…Read More

新一年有個新開始，點都要食餐好嘅，就揀一間佐敦最多Like嘅啦! （其實我好耐之前去過油麻地嗰間，印象中幾好🙈）平時出去食，通常散叫既多，一般套餐都會包括一啲你唔想食嘅嘢，不過大家如果食呢間，一定要嗌套餐，因為抵。好。多。👉🏼雜菜湯我好鍾意入面足料，啖啖菜，同埋睇得出佢有花時間去煲，沾蒜蓉包都掛得起，可encore蒜蓉包係熱辣辣既，無左油膩感，但我後悔食晒，唔小心叫多左野食🙈👉🏼洋蔥圈呢個真係要食，好肯定佢即叫即炸，仲要係新鮮炸唔係返炸，食入口唔會硬同老，又熱辣辣不過第一眼，我仲以為佢好厚粉，諗住中伏了，不過原來佢入面係洋蔥粒，唔係一條洋蔥，所以口感豐富好多，入面洋蔥又夠清新，好感動😭👉🏼卡邦尼煙肉意粉D芝士多到當堂嚇一跳，不過我鍾意！意粉食落好有咬口。芝士同忌廉好滑好香，偏偏又好掛，每條意粉都沾滿左芝士，正！👉🏼炭燒BBQ豬仔骨配薯條及沙律嗱！講明先，佢係圖文不符嘅，Menu睇落以為得半份，但上菜先知原來有足一份俾我，分明玩我哋兩個啫！佢仲要好衰咁整得好軟同好入味，一拮就離骨，連刀都唔駛用，好好食囉！回頭指數：8.5分…Read More

唔知係唔係有一排冇去奧海城，原來一樓Bene個舖位已經換咗新餐廳，叫「Mad for Garlic」，我聽過銅鑼灣times square嘅呢間餐廳都幾受歡迎，既然咁啱唔駛等位，又未食過韓式西餐，就不如就入去試試🤔兩個人望住個menu諗咗好耐都唔知試邊樣好，最後決定有圖有真相，望住menu邊樣嘢睇落ok就叫邊樣 菠菜野菌雞肉韓風意大利飯平時食嘅意大利飯通常都會落好多芝士，同埋米粒比較硬身。但呢度嘅做法有少少唔同，側重食材本身的味道，唔落咁多芝士所以食落冇咁漏，而米粒偏向軟稔但幾有咬口，唔錯。熱板烤香草肉眼又到最期待嘅牛扒時間！今日想食肉眼扒，揀咗medium rare，肉質幾嫩、夠juicy，有埋黑醋汁同香草鹽可以點(我比較喜歡香草鹽)，另值得一讚，用熱板上有樣好處，係可以keep住塊扒嘅溫度，又唔會好似鐵板咁heat到熟晒。其實另外仲想試下啲勁蒜嘅菜式，不過最衰太多選擇未揀中，唯有下次啦！…Read More

假期將至本身打算過中環食飯，最後還是遲收工，所以在公司附近找吃罷了。在太子集團中心芸芸的燈牌中，就是SHINE最吸引我的眼球（可能因為本人是shine的粉絲吧），二話不說就直上6樓。睇一睇menu，咦！唔貴喎！好有衝動即刻order😍😍不過我實在太餓了，而且有另一個主菜實在太吸睛了，下次早點來應該會前菜宴都大滿足☺前菜先黎一個黃金蟹餅配波蘿沙沙，煎炸食物配酸酸的波蘿一定係prefect match。不過上餐之後，一切開蟹餅，原來佢個皮係好薄好薄，首先最基本一定唔會成口炸粉先！先試蟹肉，完全無腥味，入口都無任何蟹殻碎，一定食得好放心。再點一下波蘿再食，即刻將鮮味再引左出黎，一點點既酸味果然同海鮮好夾。個人而言建議不需要加太多檸檬汁，因為唔算好炸，太酸反而好奇怪。跟住一定一定一定要分享就係呢度既王牌：極黑海膽意粉，無論任何對海膽沒太大興趣的人，你都會愛上這個意粉！先講海膽，海膽份量不少，接近平日半板份量。味道上非常鮮甜，海水味會令你感覺到那是新鮮。口感絕對不會軟巴巴的，有質感之餘，還非常滑溜。至於墨汁，除了已經加在意粉中一起料理的，還有一小管額外的墨汁，喜歡墨汁的人（我）即時心心眼😍把墨魚汁、海膽及三文魚籽三種海鮮食材同時放入口中，亦可以清楚分辨出不同味道，同時又沒有互相影響或任何腥味，我相信這個極黑海膽意粉絕對是這裡的最出色的一道菜，沒有之一。總結一下，Shine的性價比不錯，海膽意粉更是不能不試，回頭率達90%…Read More

自從搬咗出尖沙咀，食嘢就方便咗好多，近呢排都很會花時間睇下附近有咩好嘢食，韓國餐wishlist入面其中一間就係呢間「酌」啦😎位置喺諾士佛臺一號(好多餐廳嗰幢)，好在揀閒日兼收得早所以未算人多。餐廳好有心機裝修，有好多好韓式嘅擺設，anyway即刻order個炸雞先。韓式炸雞有幾款選擇，包括左原味、甜辣、蒜味豉油、蜜糖薑同大蔥味。既然第一次食，梗係揀咗原味先啦！唔知係唔係即叫即炸嘅關係，由落order到上枱都等左差唔多20分鐘，不過都值得等嘅，除咗好大件頭，而且味道同喺韓國炸雞店食到嘅一樣咁好味，雞皮超脆，肉質好嫩滑，即使雞胸都唔會覺得好鞋口。之後再加個韓式辣炒小八爪魚🐙，除咗主角八爪魚仔之外仲加咗芽菜、甘筍、洋蔥等等嘅配菜，食落都幾惹味，不過有成7級辣(10級滿分嘅話)，如果係煮魷魚就仲正啦！計埋另加嘅韓式餐盒同特飲，每人唔駛$250，以位置+環境+質素來講，真心幾抵食👍🏼…Read More